ꠁꠘ꠆ꠎꠤꠟ ৪: ꠢꠣꠘ꠆ꠘꠣꠘ 8
8
ꠎꠤꠘꠣꠇꠥꠞ ꠛꠦꠐꠤꠞ ꠛꠤꠌꠣꠞ
1ꠛꠣꠖꠦ ꠢꠇꠟ ꠝꠣꠘꠥꠡ ꠎꠣꠞꠎꠤꠞ ꠛꠣꠠꠤꠔ ꠉꠦꠟꠣꠉꠤ, ꠀꠞ ꠢꠎꠞꠔ ꠁꠍꠣ ꠄꠇꠟꠣ ꠎꠄꠔꠥꠘ ꠙꠣꠠꠅ ꠉꠤꠀ ꠃꠑꠟꠣ। 2ꠛꠣꠖꠞ ꠖꠤꠘ ꠚꠎꠞ ꠅꠇ꠆ꠔꠅ ꠁꠍꠣ ꠢꠤꠞꠛꠣꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠉꠦꠟꠣ, ꠉꠤꠀ ꠢꠣꠞꠟꠦ ꠢꠇꠟ ꠝꠣꠘꠥꠡ ꠔꠣꠘ ꠉꠦꠍꠦ ꠀꠁꠟ। ꠔꠣꠁꠘ ꠅꠘꠅ ꠛꠁꠀ ꠔꠣꠞꠣꠞꠦ ꠔꠣꠟꠤꠝ ꠖꠤꠟꠣ। 3ꠅꠃ ꠡꠝꠄ ꠝꠃꠟꠣꠘꠣ ꠀꠞ ꠚꠞꠤꠡꠤ ꠡꠝꠣꠎꠞ ꠝꠣꠘꠡꠦ ꠄꠇ ꠎꠤꠘꠣꠇꠥꠞ ꠛꠦꠐꠤꠞꠦ ꠟꠁꠀ ꠔꠣꠘ ꠉꠦꠍꠦ ꠀꠁꠟ। ꠀꠁꠀ ꠛꠦꠐꠤꠞꠦ ꠝꠎꠟꠤꠍꠞ ꠝꠣꠎꠈꠣꠘꠅ ꠃꠛꠣ ꠇꠞꠣꠁꠀ ꠇꠁꠟ, 4“ꠢꠥꠎꠥꠞ, ꠅꠃ ꠛꠦꠐꠤ ꠅꠉꠥ ꠎꠤꠘꠣꠞ ꠇꠣꠝꠅ ꠗꠞꠣ ꠈꠣꠁꠍꠦ। 5ꠔꠦ ꠔꠃꠞꠣꠔ ꠡꠞꠤꠚꠞ ꠝꠣꠎꠦ ꠔ ꠝꠥꠍꠣ ꠘꠛꠤꠄ ꠎꠤꠘꠣꠇꠥꠞ ꠛꠦꠐꠤꠘ꠆ꠔꠞꠦ ꠙꠣꠔ꠆ꠔꠞ ꠝꠣꠞꠤꠀ ꠝꠣꠞꠤꠟꠤꠛꠣꠞ ꠢꠥꠇꠥꠝ ꠖꠤꠍꠂꠘ। ꠅꠈꠘ ꠀꠙꠘꠦ ꠇꠤꠔꠣ ꠇꠂꠘ?” 6ꠔꠣꠞꠣ ꠁꠍꠣꠞꠦ ꠙꠞꠤꠇ꠆ꠇꠣ ꠇꠞꠣꠞ ꠘꠤꠅꠔꠦꠃ ꠁꠟꠣ ꠇꠁꠟꠣ, ꠎꠣꠔꠦ ꠔꠣꠘꠞꠦ ꠖꠥꠡꠤ ꠛꠣꠘꠣꠘꠤꠞ ꠟꠣꠉꠤ ꠇꠥꠘꠥ ꠈꠥꠔ ꠙꠣꠁꠘ।
ꠔꠦꠃ ꠁꠍꠣꠄꠅ ꠝꠣꠕꠣ ꠘꠤꠌꠣ ꠇꠞꠤ ꠀꠋꠉꠥꠟ ꠖꠤꠀ ꠝꠣꠐꠤꠔ ꠟꠦꠈꠣꠔ ꠟꠣꠉꠟꠣ। 7ꠅꠁꠟꠦ ꠔꠣꠞꠣ ꠎꠦꠛꠟꠣ ꠛꠣꠞ ꠛꠣꠞ ꠔꠣꠘꠞꠦ ꠎꠤꠇꠣꠁꠞꠣ, ꠅꠃ ꠡꠝꠄ ꠔꠣꠁꠘ ꠝꠣꠕꠣ ꠔꠥꠟꠤꠀ ꠇꠁꠟꠣ, “ꠀꠙꠘꠣꠁꠘ꠆ꠔꠞ ꠝꠣꠎꠦ ꠎꠦ ꠎꠘꠦ ꠇꠥꠘꠥꠖꠤꠘ ꠉꠥꠘꠣ ꠇꠞꠍꠂꠘ ꠘꠣ, ꠄꠁꠘ ꠙꠄꠟꠣ ꠅꠃ ꠛꠦꠐꠤꠞꠦ ꠙꠣꠔ꠆ꠔꠞ ꠝꠣꠞꠃꠇ꠆ꠇꠣ।” 8ꠅꠈꠣꠘ ꠇꠁꠀ ꠔꠣꠁꠘ ꠢꠤꠞꠛꠣꠞ ꠝꠣꠕꠣ ꠘꠤꠌꠣ ꠇꠞꠤ ꠝꠣꠐꠤꠔ ꠟꠦꠈꠣꠔ ꠟꠣꠉꠟꠣ। 9ꠁꠈꠣꠘ ꠢꠥꠘꠤꠀ ꠘꠦꠔꠣ ꠅꠇꠟꠞ ꠝꠣꠎꠦ ꠛꠥꠠꠣ ꠕꠣꠇꠤ ꠡꠥꠞꠥ ꠇꠞꠤꠀ ꠄꠇꠦ ꠄꠇꠦ ꠢꠇꠟꠃ ꠉꠦꠟꠣꠉꠤ। ꠈꠣꠟꠤ ꠁꠍꠣ ꠀꠞ ꠢꠃ ꠛꠦꠐꠤ ꠍꠣꠠꠣ ꠖꠥꠍꠞꠣ ꠇꠦꠃ ꠞꠁꠟ ꠘꠣ। 10ꠔꠦꠃ ꠁꠍꠣꠄ ꠝꠣꠕꠣ ꠔꠥꠟꠤꠀ ꠅꠃ ꠛꠦꠐꠤꠞꠦ ꠎꠤꠇꠣꠁꠟꠣ, “ꠇꠤꠔꠣ ꠉ ꠝꠣꠁ, ꠁꠔꠣ ꠝꠣꠘꠥꠡ ꠇꠥꠀꠁ? ꠇꠦꠃ ꠔꠥꠝꠣꠞꠦ ꠡꠣꠎꠣꠞ ꠎꠥꠇꠣ ꠝꠘꠅ ꠇꠞꠟ ꠘꠣ ꠘꠤ?” 11ꠛꠦꠐꠤꠄ ꠇꠁꠟ, “ꠎꠤ ꠘꠣ ꠢꠥꠎꠥꠞ, ꠔꠣꠞꠣ ꠇꠦꠃ ꠔ ꠡꠣꠎꠣ ꠖꠤꠍꠂꠘ ꠘꠣ।” ꠅꠃ ꠡꠝꠄ ꠁꠍꠣꠄ ꠇꠁꠟꠣ, “ꠔꠦ ꠀꠝꠤꠅ ꠔꠥꠝꠣꠞꠦ ꠇꠥꠘꠥ ꠡꠣꠎꠣ ꠖꠤꠔꠣꠝ ꠘꠣꠄ। ꠅꠈꠘ ꠎꠣꠅꠉꠤ, ꠉꠥꠘꠣꠞ ꠙꠕꠦ ꠀꠞ ꠎꠤꠘ꠆ꠖꠦꠉꠤ ꠇꠣꠐꠣꠁꠅ ꠘꠣ।”
ꠢꠎꠞꠔ ꠁꠍꠣ ꠀꠟ-ꠝꠍꠤꠃ ꠖꠥꠘꠤꠀꠞ ꠘꠥꠞ
12ꠛꠣꠖꠦ ꠢꠎꠞꠔ ꠁꠍꠣꠄ ꠝꠣꠘꠡꠞꠦ ꠇꠁꠟꠣ, “ꠀꠝꠤꠃ ꠖꠥꠘꠤꠀꠞ ꠘꠥꠞ। ꠎꠦ ꠎꠘ ꠀꠝꠣꠞ ꠙꠕꠦ ꠀꠄ, ꠢꠦ ꠇꠥꠘꠥ ꠡꠝꠄ ꠀꠘ꠆ꠖꠣꠞꠤꠔ ꠙꠣꠅ ꠚꠣꠟꠣꠁꠔ ꠘꠣꠄ, ꠛꠞꠋ ꠘꠥꠞꠞ ꠎꠤꠘ꠆ꠖꠦꠉꠤ ꠙꠣꠁꠛ।” 13ꠁꠈꠣꠘ ꠢꠥꠘꠤꠀ ꠚꠞꠤꠡꠤ ꠅꠇꠟꠦ ꠇꠁꠟꠣ, “ꠔꠥꠝꠣꠞ ꠡꠣꠇ꠆ꠇꠤ ꠟꠅꠀ ꠎꠣꠁꠔ ꠘꠣꠄ, ꠔꠥꠝꠤ ꠔꠥꠝꠣꠞ ꠘꠤꠎꠞ ꠙꠇ꠆ꠇꠦ ꠡꠣꠇ꠆ꠇꠤ ꠖꠤꠞꠣꠄ।” 14ꠔꠦꠃ ꠁꠍꠣꠄ ꠎꠥꠀꠙ ꠖꠤꠟꠣ, “ꠀꠝꠤ ꠀꠝꠣꠞ ꠘꠤꠎꠞ ꠙꠇ꠆ꠇꠦ ꠡꠣꠇ꠆ꠇꠤ ꠖꠤꠟꠦꠅ ꠀꠝꠣꠞ ꠡꠣꠇ꠆ꠇꠤ ꠔ ꠢꠣꠍꠣ। ꠇꠣꠞꠘ ꠀꠝꠤ ꠇꠥꠀꠁ ꠕꠣꠇꠤ ꠀꠁꠍꠤ ꠀꠞ ꠇꠥꠀꠁ ꠎꠣꠁꠞꠣꠝ, ꠁꠔꠣ ꠔ ꠔꠥꠝꠞꠣ ꠎꠣꠘ ꠘꠣ, ꠈꠣꠟꠤ ꠀꠝꠤꠃ ꠎꠣꠘꠤ। 15ꠔꠥꠝꠞꠣ ꠔ ꠖꠥꠘꠤꠀꠛꠤ ꠝꠣꠘꠡꠞ ꠟꠣꠈꠣꠘ ꠛꠤꠌꠣꠞ ꠇꠞ, ꠅꠁꠟꠦ ꠀꠝꠤ ꠇꠦꠃꠞꠞ ꠛꠤꠌꠣꠞ ꠇꠞꠤ ꠘꠣ। 16ꠀꠝꠤ ꠇꠦꠃꠞꠞ ꠛꠤꠌꠣꠞ ꠇꠞꠟꠦꠅ ꠢꠇ ꠛꠤꠌꠣꠞ ꠇꠞꠝꠥ, ꠇꠣꠞꠘ ꠀꠝꠤ ꠄꠇꠟꠣ ꠘꠣꠄ, ꠀꠝꠣꠞ ꠟꠉꠦ ꠀꠝꠣꠞ ꠉꠣꠁꠛꠤ ꠛꠣꠚꠅ ꠀꠍꠂꠘ, ꠅꠃ ꠛꠣꠚꠦ ꠀꠝꠣꠞꠦ ꠛꠦꠎꠤꠍꠂꠘ। 17ꠔꠥꠝꠞꠣꠞ ꠡꠞꠤꠅꠔꠞ ꠝꠣꠎꠦ ꠟꠦꠈꠣ ꠀꠍꠦ, ꠖꠥꠁꠎꠘꠦ ꠎꠥꠖꠤ ꠄꠇ ꠢꠝꠣꠘ ꠡꠣꠇ꠆ꠇꠤ ꠖꠦꠄ, ꠔꠦ ꠁ ꠡꠣꠇ꠆ꠇꠤ ꠢꠣꠍꠣ। 18ꠅꠟꠣꠈꠣꠘ ꠀꠝꠤꠅ ꠀꠝꠣꠞ ꠙꠇ꠆ꠇꠦ ꠡꠣꠇ꠆ꠇꠤ ꠖꠦꠁ, ꠀꠞ ꠎꠦ ꠛꠣꠚꠦ ꠀꠝꠣꠞꠦ ꠙꠣꠑꠣꠁꠍꠂꠘ, ꠔꠣꠁꠘꠅ ꠀꠝꠣꠞ ꠙꠇ꠆ꠇꠦ ꠡꠣꠇ꠆ꠇꠤ ꠖꠦꠁꠘ।”
19ꠚꠞꠤꠡꠤ ꠅꠇꠟꠦ ꠔꠣꠘꠞꠦ ꠇꠁꠟꠣ, “ꠔꠥꠝꠣꠞ ꠛꠣꠚ ꠇꠥꠀꠁ?” ꠁꠍꠣꠄ ꠎꠥꠀꠙ ꠖꠤꠟꠣ, “ꠔꠥꠝꠞꠣ ꠀꠝꠣꠞꠦꠅ ꠌꠤꠘ ꠘꠣ, ꠀꠞ ꠀꠝꠣꠞ ꠛꠣꠚꠞꠦꠅ ꠌꠤꠘ ꠘꠣ। ꠀꠝꠣꠞꠦ ꠌꠤꠘꠟꠦ ꠀꠝꠣꠞ ꠛꠣꠚꠞꠦꠅ ꠌꠤꠘꠟꠣꠄ ꠅꠘꠦ।” 20ꠙꠛꠤꠔ꠆ꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠖꠣꠘ-ꠛꠣꠇ꠆ꠡꠞ ꠉꠦꠍꠦ ꠃꠛꠣꠁꠀ ꠢꠎꠞꠔ ꠁꠍꠣꠄ ꠅꠃ ꠔꠣꠟꠤꠝ ꠖꠤꠟꠣ। ꠅꠁꠟꠦ ꠔꠣꠘ ꠡꠝꠄ ꠙꠥꠞꠣ ꠘꠣ ꠅꠀꠄ ꠇꠦꠃ ꠔꠣꠘꠞꠦ ꠗꠞꠟ ꠘꠣ।
ꠘꠤꠎꠞ ꠝꠃꠔꠞ ꠛꠦꠙꠣꠞꠦ ꠀꠉꠣꠝ ꠈꠛꠞ
21ꠢꠎꠞꠔ ꠁꠍꠣꠄ ꠚꠞꠤꠡꠤ ꠅꠇꠟꠞꠦ ꠢꠤꠞꠛꠣꠞ ꠇꠁꠟꠣ, “ꠀꠝꠤ ꠔ ꠎꠣꠁꠀꠞꠉꠤ। ꠉꠤꠀ ꠢꠣꠞꠟꠦ ꠔꠥꠝꠞꠣ ꠀꠝꠣꠞꠦ ꠔꠥꠇꠣꠁꠛꠣꠄ, ꠅꠁꠟꠦ ꠀꠞ ꠙꠣꠁꠔꠣꠄ ꠘꠣꠄ, ꠀꠝꠤ ꠎꠦꠘꠅ ꠎꠣꠁꠞꠣꠝ, ꠔꠥꠝꠞꠣ ꠢꠤꠘꠅ ꠀꠁꠔꠣꠄꠅ ꠙꠣꠞꠔꠣꠄ ꠘꠣꠄ, ꠔꠥꠝꠞꠣ ꠘꠤꠎꠞ ꠉꠥꠘꠣꠞ ꠝꠣꠎꠦꠃ ꠝꠞꠛꠣꠄ।” 22ꠁꠢꠥꠖꠤ ꠘꠦꠔꠣ ꠅꠇꠟꠦ ꠇꠁꠟꠣ, “ꠢꠦ ꠇꠦꠘꠦ ꠇꠁꠟ, ꠀꠝꠤ ꠎꠦꠘꠅ ꠎꠣꠁꠞꠣꠝ, ꠔꠥꠝꠞꠣ ꠢꠤꠘꠅ ꠀꠁꠔꠣꠄ ꠙꠣꠞꠔꠣꠄ ꠘꠣꠄ? ꠢꠦ ꠇꠤꠔꠣ ꠘꠤꠎꠦ ꠘꠤꠎꠦ ꠝꠞꠤꠎꠤꠔ ꠘꠤ?” 23ꠁꠍꠣꠄ ꠇꠁꠟꠣ, “ꠀꠝꠤ ꠀꠁꠍꠤ ꠃꠙꠞꠦ ꠕꠣꠇꠤ, ꠀꠞ ꠔꠥꠝꠞꠣ ꠔꠟꠦ ꠕꠣꠇꠤ। ꠔꠥꠝꠞꠣ ꠁ ꠎꠉꠔꠞ, ꠅꠁꠟꠦ ꠀꠝꠤ ꠔ ꠁ ꠎꠉꠔꠞ ꠘꠣꠄ। 24ꠄꠞꠟꠣꠉꠤ ꠀꠝꠤ ꠇꠁꠞꠣꠝ, ꠔꠥꠝꠞꠣ ꠘꠤꠎꠞ ꠉꠥꠘꠣꠞ ꠝꠣꠎꠦꠃ ꠝꠞꠛꠣꠄ। ꠔꠥꠝꠞꠣ ꠎꠥꠖꠤ ꠄꠇꠤꠘ ꠘꠣ ꠇꠞ, ꠀꠝꠤꠃ ꠢꠦꠁꠘ, ꠔꠦ ꠉꠥꠘꠣꠉꠣꠞ ꠢꠣꠟꠔꠦꠃ ꠝꠞꠛꠣꠄ।”
25ꠁꠈꠣꠘ ꠢꠥꠘꠤꠀ ꠘꠦꠔꠣ ꠅꠇꠟꠦ ꠔꠣꠘꠞꠦ ꠇꠁꠟꠣ, “ꠔꠥꠝꠤ ꠇꠦ?” ꠔꠣꠁꠘ ꠎꠥꠀꠙ ꠖꠤꠟꠣ, “ꠙꠄꠟꠣ ꠕꠣꠇꠤ ꠀꠝꠤ ꠎꠦꠟꠣ ꠇꠁꠞꠣꠝ, ꠀꠝꠤꠃ ꠢꠦꠁꠘ। 26ꠔꠥꠝꠞꠣꠞ ꠛꠦꠙꠣꠞꠦ ꠝꠣꠔꠣꠞ ꠀꠞ ꠛꠤꠌꠣꠞ ꠇꠞꠣꠞ ꠛꠃꠔꠔꠣ ꠀꠍꠦ। ꠢꠥꠘꠅ, ꠎꠦꠁꠘ ꠀꠝꠣꠞꠦ ꠙꠣꠑꠣꠁꠍꠂꠘ ꠔꠣꠘ ꠝꠣꠎꠦ ꠔ ꠝꠤꠍꠣ ꠇꠥꠘ꠆ꠔꠣ ꠘꠣꠁ। ꠀꠝꠤ ꠔꠣꠘ ꠉꠦꠍ ꠕꠣꠇꠤ ꠎꠦꠔꠣ ꠢꠥꠘꠤ, ꠅꠔꠣꠃ ꠁ ꠖꠥꠘꠤꠀꠞꠦ ꠎꠣꠘꠣꠁ।” 27ꠁꠍꠣꠄ ꠎꠦꠘ ꠔꠣꠘ ꠉꠣꠁꠛꠤ ꠛꠣꠚꠞ ꠇꠕꠣ ꠇꠁꠞꠣ, ꠔꠣꠞꠣ ꠁꠔꠣ ꠛꠥꠎꠟꠣ ꠘꠣ। 28ꠄꠞꠖꠣꠄ ꠁꠍꠣꠄ ꠇꠁꠟꠣ, “ꠔꠥꠝꠞꠣ ꠎꠦꠛꠟꠣ ꠀꠝꠤ ꠛꠤꠘ-ꠀꠖꠝꠞꠦ ꠃꠙꠞꠦ ꠔꠥꠟꠛꠣꠄ, ꠅꠃ ꠡꠝꠄ ꠛꠥꠎꠛꠣꠄ ꠀꠝꠤꠃ ꠢꠦꠁꠘ। ꠀꠞ ꠄꠅꠈꠣꠘ ꠛꠥꠎꠛꠣꠄ, ꠀꠝꠤ ꠘꠤꠎꠦ ꠘꠤꠎꠦ ꠇꠥꠘ꠆ꠔꠣ ꠇꠞꠤ ꠘꠣ, ꠀꠝꠣꠞ ꠉꠣꠁꠛꠤ ꠛꠣꠚꠦ ꠀꠝꠣꠞꠦ ꠎꠦ ꠔꠣꠟꠤꠝ ꠖꠤꠍꠂꠘ, ꠅꠃ ꠔꠣꠟꠤꠝꠃ ꠀꠝꠤ ꠛꠣꠔꠣꠁ। 29ꠎꠦꠁꠘ ꠀꠝꠣꠞꠦ ꠙꠣꠑꠣꠁꠍꠂꠘ, ꠔꠣꠁꠘ ꠘꠤꠎꠦ ꠀꠝꠣꠞ ꠟꠉꠦ ꠀꠍꠂꠘ। ꠔꠣꠁꠘ ꠀꠝꠣꠞ ꠟꠉ ꠍꠣꠠꠍꠂꠘ ꠘꠣ, ꠀꠝꠤ ꠔ ꠢꠣꠝꠦꠡꠣ ꠅꠃ ꠇꠣꠝꠃ ꠇꠞꠤ, ꠎꠦ ꠇꠣꠝ ꠇꠞꠟꠦ ꠔꠣꠁꠘ ꠈꠥꠡꠤ ꠅꠁꠘ।” 30ꠁꠍꠣꠞ ꠁ ꠛꠄꠀꠘ ꠢꠥꠘꠤꠀ ꠛꠃꠔ ꠝꠣꠘꠡꠦ ꠔꠣꠘ ꠃꠙꠞꠦ ꠁꠝꠣꠘ ꠀꠘꠟꠣ।
ꠢꠎꠞꠔ ꠁꠛ꠆ꠞꠣꠢꠤꠝꠞ ꠈꠣꠐꠤ ꠀꠅꠟꠣꠖ ꠇꠦ
31ꠄꠞꠣꠞ ꠝꠣꠎꠦ ꠎꠦꠔꠣ ꠁꠢꠥꠖꠤ ꠅꠇꠟꠦ ꠔꠣꠘ ꠃꠙꠞꠦ ꠁꠝꠣꠘ ꠀꠘꠍꠤꠟꠣ, ꠔꠣꠁꠘ ꠄꠞꠣꠞꠦ ꠇꠁꠟꠣ, “ꠔꠥꠝꠞꠣ ꠎꠥꠖꠤ ꠀꠝꠣꠞ ꠇꠕꠣꠝꠔ ꠌꠟ, ꠔꠦ ꠔꠥꠝꠞꠣ ꠀꠝꠣꠞ ꠢꠣꠍꠣꠞꠞ ꠃꠝ꠆ꠝꠔ। 32ꠔꠥꠝꠞꠣ ꠢꠇ ꠌꠤꠘꠛꠣꠄ ꠀꠞ ꠅꠃ ꠢꠇꠦꠃ ꠔꠥꠝꠞꠣꠞꠦ ꠀꠎꠣꠖ ꠇꠞꠛꠣ।” 33ꠁꠈꠣꠘ ꠢꠥꠘꠤꠀ ꠔꠣꠞꠣ ꠇꠁꠟꠣ, “ꠀꠝꠞꠣ ꠔ ꠢꠎꠞꠔ ꠁꠛ꠆ꠞꠣꠢꠤꠝꠞ ꠛꠋꠡꠞ ꠝꠣꠘꠥꠡ, ꠀꠝꠞꠣ ꠇꠥꠘꠥ ꠡꠝꠄꠅ ꠇꠦꠃꠞꠞ ꠉꠥꠟꠣꠝ ꠀꠍꠟꠣꠝ ꠘꠣ। ꠔꠦ ꠔꠥꠝꠤ ꠇꠤꠟꠣ ꠇꠁꠞꠣꠄ, ꠀꠝꠞꠣꠞꠦ ꠀꠎꠣꠖ ꠇꠞꠣ ꠅꠁꠛ?”
34ꠢꠎꠞꠔ ꠁꠍꠣꠄ ꠇꠁꠟꠣ, “ꠀꠝꠤ ꠔꠥꠝꠞꠣꠞꠦ ꠢꠇ ꠇꠕꠣ ꠇꠁꠞꠣꠝ, ꠎꠦꠞꠣ ꠉꠥꠘꠣꠞ ꠝꠣꠎꠦ ꠎꠤꠘ꠆ꠖꠦꠉꠤ ꠇꠣꠐꠣꠄ, ꠔꠣꠞꠣ ꠉꠥꠘꠣꠞ ꠉꠥꠟꠣꠝ। 35ꠇꠥꠘꠥ ꠉꠥꠟꠣꠝ ꠌꠤꠞꠇꠣꠟ ꠔꠣꠞ ꠝꠥꠘꠤꠛꠞ ꠛꠣꠠꠤꠔ ꠕꠣꠇꠦ ꠘꠣ, ꠅꠁꠟꠦ ꠙꠥꠔ ꠔ ꠌꠤꠞꠇꠣꠟ ꠕꠣꠇꠦ। 36ꠄꠞꠟꠣꠉꠤ ꠙꠥꠔꠦ ꠎꠥꠖꠤ ꠔꠥꠝꠞꠣꠞꠦ ꠀꠎꠣꠖ ꠇꠞꠂꠘ, ꠔꠦ ꠔꠥꠝꠞꠣ ꠢꠣꠍꠣꠞꠞ ꠀꠎꠣꠖ ꠅꠁꠛꠣꠄ। 37ꠀꠝꠤ ꠎꠣꠘꠤ, ꠔꠥꠝꠞꠣ ꠁꠛ꠆ꠞꠣꠢꠤꠝ ꠘꠛꠤꠞ ꠛꠋꠡꠞ ꠝꠣꠘꠥꠡ, ꠔꠦꠛꠃ ꠀꠝꠣꠞꠦ ꠝꠣꠞꠤꠟꠤꠔꠣꠄ ꠌꠣꠁꠞꠣꠄ, ꠇꠣꠞꠘ ꠀꠝꠣꠞ ꠘꠍꠤꠅꠔ ꠔꠥꠝꠞꠣꠞ ꠜꠤꠔꠞꠦ ꠢꠣꠝꠣꠄ ꠘꠣ। 38ꠀꠝꠤ ꠀꠝꠣꠞ ꠉꠣꠁꠛꠤ ꠛꠣꠚꠞ ꠉꠦꠍꠦ ꠎꠦꠔꠣ ꠖꠦꠈꠍꠤ ꠅꠔꠣ ꠇꠁꠞꠣꠝ, ꠀꠞ ꠔꠥꠝꠞꠣ ꠘꠤꠎꠞ ꠛꠣꠚꠞ ꠉꠦꠍ ꠕꠣꠇꠤ ꠎꠦꠔꠣ ꠢꠤꠇꠍ ꠅꠔꠣꠃ ꠇꠞꠞꠣꠄ।”
39ꠅꠃ ꠡꠝꠄ ꠔꠣꠞꠣ ꠁꠍꠣꠞꠦ ꠇꠁꠟꠣ, “ꠢꠥꠘꠅ, ꠢꠎꠞꠔ ꠁꠛ꠆ꠞꠣꠢꠤꠝꠃ ꠀꠝꠞꠣꠞ ꠛꠣꠚ।” ꠔꠣꠁꠘ ꠇꠁꠟꠣ, “ꠔꠥꠝꠞꠣ ꠎꠥꠖꠤ ꠁꠛ꠆ꠞꠣꠢꠤꠝ ꠘꠛꠤꠞ ꠀꠅꠟꠣꠖ ꠅꠁꠔꠣꠄ, ꠔꠦ ꠁꠛ꠆ꠞꠣꠢꠤꠝꠞ ꠟꠣꠈꠣꠘ ꠇꠣꠝ ꠇꠞꠟꠣꠄ ꠅꠘꠦ। 40ꠀꠝꠤ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠎꠦ ꠢꠇ ꠇꠣꠟꠣꠝ ꠙꠣꠁꠍꠤ, ꠅꠔꠣꠃ ꠔꠥꠝꠞꠣꠞꠦ ꠇꠁꠞꠣꠝ। ꠔꠦꠛꠃ ꠔꠥꠝꠞꠣ ꠀꠝꠣꠞꠦ ꠝꠣꠞꠤꠟꠤꠔꠣꠄ ꠌꠣꠁꠞꠣꠄ, ꠅꠁꠟꠦ ꠁꠛ꠆ꠞꠣꠢꠤꠝꠦ ꠔ ꠁꠟꠣ ꠇꠞꠍꠂꠘ ꠘꠣ। 41ꠔꠥꠝꠞꠣꠞ ꠘꠤꠎꠞ ꠛꠣꠚꠦ ꠎꠦꠔꠣ ꠇꠞꠦ, ꠔꠥꠝꠞꠣꠅ ꠅꠔꠣ ꠇꠞꠞꠣꠄ।” ꠅꠃ ꠔꠣꠞꠣ ꠁꠍꠣꠞꠦ ꠇꠁꠟꠣ, “ꠀꠝꠞꠣ ꠔ ꠚꠥꠋꠉꠣ ꠙꠥꠀ ꠘꠣꠄ। ꠀꠝꠞꠣꠞ ꠄꠇꠎꠘꠃ ꠛꠣꠚ ꠀꠍꠂꠘ, ꠄꠁꠘ ꠅꠁꠟꠣ ꠀꠟ꠆ꠟꠣ।”
42ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠀꠍꠟꠦꠃ ꠀꠟ꠆ꠟꠣ ꠎꠥꠖꠤ ꠔꠥꠝꠞꠣꠞ ꠉꠣꠁꠛꠤ ꠛꠣꠚ ꠅꠁꠔꠣ, ꠔꠦ ꠀꠝꠣꠞ ꠛꠣꠄ ꠔꠥꠝꠞꠣꠞ ꠝꠣꠄꠀ ꠕꠣꠇꠟ ꠅꠘꠦ। ꠇꠣꠞꠘ ꠀꠝꠤ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠀꠁꠍꠤ ꠀꠞ ꠅꠈꠘ ꠔꠥꠝꠞꠣꠞ ꠝꠣꠎꠦ ꠀꠍꠤ। ꠀꠝꠤ ꠘꠤꠎꠦ ꠀꠁꠍꠤ ꠘꠣ, ꠔꠣꠁꠘꠃ ꠀꠝꠣꠞꠦ ꠙꠣꠑꠣꠁꠍꠂꠘ। 43ꠔꠥꠝꠞꠣ ꠀꠝꠣꠞ ꠇꠕꠣ ꠛꠥꠎꠞꠣꠄ ꠘꠣ, ꠇꠣꠞꠘ ꠔꠥꠝꠞꠣ ꠀꠝꠣꠞ ꠇꠕꠣ ꠡꠁꠎ꠆ꠎ ꠇꠞꠔꠣꠄ ꠙꠣꠞ ꠘꠣ। 44ꠁꠛꠟꠤꠍꠃ ꠔꠥꠝꠞꠣꠞ ꠛꠣꠚ ꠀꠞ ꠔꠥꠝꠞꠣ ꠔꠣꠞ ꠀꠅꠟꠣꠖ, ꠄꠞꠖꠣꠄ ꠔꠥꠝꠞꠣ ꠔꠣꠞ ꠈꠣꠁꠡ ꠙꠥꠞꠣ ꠇꠞꠔꠣꠄ ꠌꠣꠁꠞꠣꠄ। ꠁꠛꠟꠤꠍ ꠔ ꠙꠄꠟꠣ ꠕꠣꠇꠤꠃ ꠈꠥꠘꠤ। ꠢꠦ ꠇꠥꠘꠥꠖꠤꠘ ꠢꠇꠞ ꠝꠣꠎꠦ ꠛꠡꠔ ꠇꠞꠍꠦ ꠘꠣ, ꠇꠣꠞꠘ ꠔꠣꠞ ꠝꠣꠎꠦ ꠇꠥꠘꠥ ꠢꠇ ꠘꠣꠁ। ꠢꠦ ꠎꠦꠛꠟꠣ ꠝꠤꠍꠣ ꠝꠣꠔꠦ, ꠅꠃ ꠡꠝꠄ ꠢꠦ ꠘꠤꠎ ꠕꠣꠇꠤꠃ ꠝꠣꠔꠦ। ꠇꠣꠞꠘ ꠢꠦ ꠛꠦꠁꠝꠣꠘ, ꠀꠞ ꠢꠇꠟ ꠛꠦꠁꠝꠣꠘꠤ ꠔꠣꠞ ꠝꠣꠎ ꠕꠣꠇꠤꠃ ꠙꠄꠖꠣ ꠅꠁꠍꠦ। 45ꠀꠝꠤ ꠢꠇ ꠝꠣꠔ ꠝꠣꠔꠤꠀꠞ ꠄꠞꠟꠣꠉꠤ ꠔꠥꠝꠞꠣ ꠀꠝꠣꠞꠦ ꠄꠇꠤꠘ ꠇꠞꠞꠣꠄ ꠘꠣ। 46ꠔꠥꠝꠞꠣꠞ ꠝꠣꠎꠦ ꠇꠦꠃ ꠀꠝꠣꠞꠦ ꠉꠥꠘꠣꠉꠣꠞ ꠙꠞꠝꠣꠘ ꠇꠞꠔ ꠙꠣꠞꠛ ꠘꠤ? ꠀꠝꠤ ꠎꠥꠖꠤ ꠢꠇ ꠝꠣꠔ ꠝꠣꠔꠤ, ꠔꠦ ꠀꠝꠣꠞꠦ ꠄꠇꠤꠘ ꠇꠞꠞꠣꠄ ꠘꠣ ꠇꠦꠘꠦ? 47ꠎꠦ ꠝꠣꠘꠥꠡ ꠀꠟ꠆ꠟꠣꠞ ꠛꠘ꠆ꠖꠣ, ꠢꠦ ꠀꠟ꠆ꠟꠣꠞ ꠇꠣꠟꠣꠝ ꠢꠥꠘꠦ। ꠔꠥꠝꠞꠣ ꠀꠟ꠆ꠟꠣꠞ ꠘꠣꠄ ꠉꠔꠤꠇꠦ ꠀꠟ꠆ꠟꠣꠞ ꠇꠣꠟꠣꠝ ꠢꠥꠘ ꠘꠣ।”
48ꠅꠃ ꠡꠝꠄ ꠔꠣꠞꠣ ꠁꠍꠣꠞꠦ ꠇꠁꠟꠣ, “ꠀꠝꠞꠣ ꠔ ꠑꠤꠇ ꠇꠕꠣ ꠇꠁꠍꠤ, ꠔꠥꠁ ꠡꠝꠞꠤꠀ ꠎꠣꠔꠞ ꠝꠣꠘꠥꠡ, ꠔꠞꠦ ꠜꠥꠔꠦ ꠗꠞꠍꠦ।” 49ꠔꠣꠁꠘ ꠇꠁꠟꠣ, “ꠘꠣ, ꠀꠝꠣꠞꠦ ꠜꠥꠔꠦ ꠗꠞꠍꠦ ꠘꠣ। ꠀꠝꠤ ꠀꠝꠣꠞ ꠛꠣꠚꠞꠦ ꠁꠎ꠆ꠎꠔ ꠇꠞꠤ, ꠅꠁꠟꠦ ꠔꠥꠝꠞꠣ ꠀꠝꠣꠞꠦ ꠛꠦꠁꠎ꠆ꠎꠔ ꠇꠞꠞꠣꠄ। 50ꠀꠝꠤ ꠘꠤꠎꠦ ꠇꠥꠘꠥ ꠁꠎ꠆ꠎꠔ ꠙꠣꠁꠔꠣꠝ ꠇꠞꠤ ꠇꠣꠝ ꠇꠞꠤ ꠘꠣ। ꠅꠁꠟꠦ ꠄꠇꠎꠘ ꠀꠍꠂꠘ ꠎꠦꠁꠘ ꠀꠝꠣꠞ ꠁꠎ꠆ꠎꠔꠞ ꠟꠣꠉꠤ ꠇꠣꠝ ꠇꠞꠂꠘ, ꠔꠣꠁꠘꠃ ꠀꠝꠣꠞ ꠛꠤꠌꠣꠞꠇ। 51ꠀꠝꠤ ꠔꠥꠝꠞꠣꠞꠦ ꠢꠇ ꠇꠕꠣ ꠇꠁꠞꠣꠝ, ꠇꠦꠃ ꠎꠥꠖꠤ ꠀꠝꠣꠞ ꠇꠕꠣ ꠝꠣꠘꠦ, ꠢꠦ ꠇꠥꠘꠥ ꠡꠝꠄꠃ ꠝꠞꠔ ꠘꠣꠄ।”
52ꠔꠣꠞꠣ ꠔꠣꠘꠞꠦ ꠇꠁꠟꠣ, “ꠅꠈꠘ ꠀꠝꠞꠣ ꠛꠥꠎꠟꠣꠝ, ꠔꠞꠦ ꠑꠤꠇꠃ ꠜꠥꠔꠦ ꠗꠞꠍꠦ। ꠁꠛ꠆ꠞꠣꠢꠤꠝ ꠘꠛꠤ ꠛꠣ ꠀꠞꠅ ꠘꠛꠤ ꠅꠇꠟ ꠔ ꠝꠣꠞꠣ ꠉꠦꠍꠂꠘ, ꠀꠞ ꠔꠥꠁ ꠇꠁꠞꠦ, ꠇꠦꠃ ꠎꠥꠖꠤ ꠀꠝꠣꠞ ꠇꠕꠣ ꠝꠣꠘꠦ, ꠢꠦ ꠇꠥꠘꠥ ꠡꠝꠄꠅ ꠝꠞꠔ ꠘꠣꠄ। 53ꠔꠥꠁ ꠇꠥꠘꠥ ꠛꠣꠛꠣ ꠁꠛ꠆ꠞꠣꠢꠤꠝ ꠕꠣꠇꠤꠅ ꠛꠠ ꠘꠤ? ꠔꠣꠁꠘ ꠘꠤꠎꠦ ꠀꠞ ꠛꠣꠇꠤ ꠔꠣꠝꠣꠝ ꠘꠛꠤ ꠅꠇꠟꠃ ꠝꠣꠞꠣ ꠉꠦꠍꠂꠘ। ꠔꠦ ꠔꠥꠁ ꠘꠤꠎꠞꠦ ꠇꠤꠔꠣ ꠝꠘꠅ ꠇꠞꠍ?” 54ꠁꠍꠣꠄ ꠎꠥꠀꠙ ꠖꠤꠟꠣ, “ꠀꠝꠤ ꠎꠥꠖꠤ ꠘꠤꠎꠞ ꠔꠣꠞꠤꠚ ꠘꠤꠎꠦꠃ ꠇꠞꠤ, ꠔꠦ ꠄꠞ ꠇꠥꠘꠥ ꠖꠣꠝ ꠘꠣꠁ। ꠀꠝꠣꠞ ꠉꠣꠁꠛꠤ ꠛꠣꠚ, ꠎꠣꠘꠞꠦ ꠔꠥꠝꠞꠣꠞ ꠀꠟ꠆ꠟꠣ ꠇꠁꠀ ꠖꠣꠛꠤ ꠇꠞꠅ, ꠔꠣꠁꠘꠃ ꠀꠝꠣꠞꠦ ꠁꠎ꠆ꠎꠔ ꠖꠣꠘ ꠇꠞꠂꠘ। 55ꠔꠥꠝꠞꠣ ꠔꠣꠘꠞꠦ ꠌꠤꠘꠍ ꠘꠣ, ꠅꠁꠟꠦ ꠀꠝꠤ ꠔꠣꠘꠞꠦ ꠌꠤꠘꠤ। ꠀꠝꠤ ꠎꠥꠖꠤ ꠇꠁ ꠀꠝꠤ ꠔꠣꠘꠞꠦ ꠌꠤꠘꠤ ꠘꠣ, ꠔꠦ ꠔ ꠔꠥꠝꠞꠣꠞ ꠟꠣꠈꠣꠘ ꠀꠝꠤꠅ ꠛꠦꠁꠝꠣꠘ ꠅꠁꠝꠥ। ꠀꠝꠤ ꠔꠣꠘꠞꠦ ꠌꠤꠘꠤ ꠀꠞ ꠔꠣꠘ ꠢꠥꠇꠥꠝ-ꠀꠢꠇꠣꠝ ꠝꠣꠘꠤꠀ ꠌꠟꠤ। 56ꠔꠥꠝꠞꠣꠞ ꠛꠣꠚ ꠁꠛ꠆ꠞꠣꠢꠤꠝ ꠘꠛꠤꠄ ꠀꠝꠣꠞ ꠖꠤꠘ ꠖꠦꠈꠣꠞ ꠀꠡꠣꠄ ꠈꠥꠡꠤ ꠇꠞꠍꠂꠘ। ꠔꠣꠁꠘ ꠁꠔꠣ ꠖꠦꠈꠍꠂꠘ ꠀꠞ ꠈꠥꠡꠤꠅ ꠅꠁꠍꠂꠘ।”
57ꠁꠢꠥꠖꠤ ꠘꠦꠔꠣ ꠅꠇꠟꠦ ꠔꠣꠘꠞꠦ ꠇꠁꠟꠣ, “ꠔꠥꠝꠣꠞ ꠛꠄꠅꠡ ꠔ ꠅꠈꠘꠅ ꠙꠁꠘ꠆ꠌꠣꠡ ꠛꠍꠞ ꠅꠁꠍꠦ ꠘꠣ, ꠔꠦ ꠔꠥꠝꠤ ꠁꠛ꠆ꠞꠣꠢꠤꠝ ꠘꠛꠤꠞꠦ ꠖꠦꠈꠟꠣꠄ ꠇꠤꠟꠣ?” 58ꠁꠍꠣꠄ ꠇꠁꠟꠣ, “ꠀꠝꠤ ꠔꠥꠝꠞꠣꠞꠦ ꠢꠇ ꠇꠕꠣ ꠇꠁꠞꠣꠝ, ꠁꠛ꠆ꠞꠣꠢꠤꠝ ꠘꠛꠤꠞ ꠎꠘꠝꠞ ꠀꠉ ꠕꠣꠇꠤꠃ ꠀꠝꠤ ꠀꠍꠤ।” 59ꠁꠈꠣꠘ ꠢꠥꠘꠤꠀ ꠘꠦꠔꠣ ꠅꠇꠟꠦ ꠔꠣꠘꠞꠦ ꠝꠣꠞꠣꠞ ꠟꠣꠉꠤ ꠙꠣꠔ꠆ꠔꠞ ꠔꠥꠇꠣꠁꠀ ꠟꠁꠟꠣ। ꠅꠁꠟꠦ ꠢꠎꠞꠔ ꠁꠍꠣꠄ ꠀꠃꠠꠤ ꠖꠤꠀ ꠛꠣꠄꠔꠥꠟ-ꠝꠥꠇꠣꠖ꠆ꠖꠍ ꠕꠣꠇꠤ ꠛꠣꠞ ꠅꠁꠀ ꠉꠦꠟꠣꠉꠤ।
Currently Selected:
ꠁꠘ꠆ꠎꠤꠟ ৪: ꠢꠣꠘ꠆ꠘꠣꠘ 8: sylN
Highlight
Share
Copy
Want to have your highlights saved across all your devices? Sign up or sign in
© Ahle Kitab Society. All rights reserved.
