ꠔꠃꠞꠣꠔ ১: ꠙꠄꠖꠣ ꠘꠣꠝꠣ 18

ꠛꠤꠛꠤ ꠍꠣꠄꠞꠣꠞ ꠊꠞꠅ ꠙꠥꠀꠞ ꠅꠀꠖꠣ

1ꠛꠣꠖꠦ ꠝꠝ꠆ꠞꠤꠞ ꠄꠟꠘ ꠛꠘꠞ ꠇꠣꠍꠣꠔ ꠝꠣꠛꠥꠖꠦ ꠁꠛ꠆ꠞꠣꠢꠤꠝꠞꠦ ꠖꠦꠈꠣ ꠖꠤꠟꠣ। ꠔꠣꠁꠘ ꠖꠤꠘꠞ ꠉꠞꠝꠞ ꠡꠝꠄ ꠔꠣꠝ꠆ꠛꠥꠞ ꠖꠞꠎꠣꠔ ꠛꠅꠀꠔ ꠀꠍꠟꠣ। 2ꠅꠃꠟꠣ ꠡꠝꠄ ꠌꠃꠈ ꠔꠥꠟꠤꠀ ꠖꠦꠈꠟꠣ, ꠔꠣꠘ ꠍꠣꠝꠘꠦ ꠔꠤꠘꠎꠘ ꠝꠣꠘꠥꠡ ꠃꠛꠣꠁ ꠞꠁꠍꠂꠘ। ꠖꠦꠈꠤꠀꠃ ꠔꠣꠁꠘ ꠖꠞꠎꠣꠞ ꠉꠦꠍ ꠕꠣꠇꠤ ꠖꠃꠠꠣꠁꠀ ꠉꠤꠀ, ꠝꠣꠐꠤꠔ ꠍꠁꠎꠖꠣ ꠇꠞꠤꠀ ꠔꠣꠞꠣꠞꠦ ꠇꠁꠟꠣ, 3“ꠅ ꠝꠥꠘꠤꠛ, ꠀꠝꠤ ꠎꠥꠖꠤ ꠀꠙꠘꠣꠞꠣꠞ ꠝꠣꠄꠀꠞ ꠇꠥꠘꠥ ꠝꠣꠘꠥꠡ ꠅꠁ, ꠔꠣꠁꠟꠦ ꠀꠙꠘꠣꠞꠣꠞ ꠁ ꠉꠥꠟꠣꠝꠞꠦ ꠚꠣꠟꠣꠁꠀ ꠎꠣꠁꠘ ꠘꠣ ꠎꠦꠘ। 4ꠀꠝꠤ ꠕꠥꠠꠣ ꠙꠣꠘꠤ ꠀꠘꠤꠀ ꠖꠤꠀꠞ ꠀꠙꠘꠣꠞꠣ ꠀꠔ-ꠙꠣꠅ ꠗꠁꠀ, ꠅꠃ ꠉꠣꠍ ꠔꠟꠣꠔ ꠎꠤꠞꠣꠃꠇ꠆ꠇꠣ। 5ꠀꠞ ꠁ ꠉꠥꠟꠣꠝꠞ ꠇꠣꠍꠣꠔ ꠎꠦꠛꠟꠣ ꠀꠁꠍꠂꠘ, ꠔꠦ ꠕꠥꠠꠣ ꠈꠣꠘꠤ ꠀꠘꠤꠀ ꠖꠦꠁ, ꠅꠔꠣ ꠈꠣꠁꠀ ꠎꠣꠘꠅ ꠀꠞꠣꠝ ꠅꠁꠟꠦ ꠀꠙꠘꠣꠞꠣ ꠢꠤꠞꠛꠣꠞ ꠞꠅꠀꠘꠣ ꠖꠤꠛꠣꠘꠦ।” ꠔꠣꠞꠣ ꠇꠁꠟꠣ, “ꠜꠣꠟꠣ, ꠀꠙꠘꠦ ꠎꠦꠛꠟꠣ ꠇꠁꠞꠣ, ꠔꠦ ꠇꠞꠃꠇ꠆ꠇꠣ।” 6ꠁꠛ꠆ꠞꠣꠢꠤꠝꠦ ꠟꠉꠦ ꠟꠉꠦ ꠜꠤꠔꠞꠦ ꠉꠤꠀ ꠍꠣꠄꠞꠣꠞꠦ ꠇꠁꠟꠣ, “ꠎꠟꠖꠤ ꠇꠞꠤꠀ ꠔꠤꠘ ꠙꠦꠐꠥ ꠜꠣꠟꠣ ꠝꠄꠖꠣ ꠝꠣꠈꠤꠀ ꠙꠤꠑꠣ ꠛꠣꠘꠣꠅ।” 7ꠔꠣꠁꠘ ꠖꠃꠠꠣꠁꠀ ꠉꠤꠀ ꠉꠞꠥꠞ ꠙꠣꠟ ꠕꠘꠦ ꠈꠥꠛ ꠜꠣꠟꠣ ꠄꠇꠐꠣ ꠇꠍꠝꠣ ꠛꠣꠍꠥꠞ ꠀꠘꠤꠀ ꠔꠣꠘ ꠉꠥꠟꠣꠝꠞꠦ ꠖꠤꠟꠣ। ꠢꠦ-ꠅ ꠎꠟꠖꠤ ꠇꠞꠤ ꠅꠇꠐꠣ ꠞꠣꠘ꠆ꠖꠤꠟ। 8ꠅꠃ ꠁꠛ꠆ꠞꠣꠢꠤꠝꠦ ꠖꠥꠗ, ꠖꠁ ꠀꠞ ꠉꠥꠡ꠆ꠔ ꠀꠘꠤꠀ ꠔꠣꠞꠣꠞꠦ ꠈꠣꠁꠛꠣꠞ ꠖꠤꠟꠣ, ꠔꠣꠞꠣ ꠈꠣꠅꠀ-ꠖꠣꠅꠀ ꠇꠞꠟꠣ। ꠔꠣꠁꠘ ꠔꠣꠞꠣꠞ ꠇꠣꠘ꠆ꠖꠣꠔ ꠉꠣꠍ ꠔꠟꠣꠔ ꠃꠛꠣꠁꠟꠣ।

9ꠔꠣꠞꠣ ꠁꠛ꠆ꠞꠣꠢꠤꠝꠞꠦ ꠎꠤꠇꠣꠁꠟꠣ, “ꠀꠙꠘꠣꠞ ꠛꠤꠛꠤ ꠍꠣꠄꠞꠣ ꠇꠁ?” ꠔꠣꠁꠘ ꠇꠁꠟꠣ, “ꠅꠃꠘꠥ, ꠔꠣꠝ꠆ꠛꠥꠞ ꠜꠤꠔꠞꠦ ꠀꠍꠂꠘ।” 10ꠅꠃ ꠄꠞꠣꠞ ꠝꠣꠎꠦ ꠄꠇꠎꠘꠦ ꠇꠁꠟꠣ, “ꠍꠣꠝꠘꠞ ꠛꠞꠍ ꠁ ꠌꠣꠘ꠆ꠖꠅ ꠀꠝꠤ ꠅꠛꠡ꠆ꠡꠃ ꠀꠙꠘꠣꠞ ꠉꠦꠍꠦ ꠀꠁꠝꠥ। ꠖꠦꠈꠛꠣ, ꠅꠃ ꠡꠝꠄ ꠀꠙꠘꠣꠞ ꠛꠤꠛꠤ ꠍꠣꠄꠞꠣꠞ ꠇꠥꠟꠅ ꠄꠇ ꠙꠥꠀ ꠕꠣꠇꠛ।” ꠍꠣꠄꠞꠣꠄ ꠁꠛ꠆ꠞꠣꠢꠤꠝꠞ ꠈꠞꠦ ꠔꠣꠝ꠆ꠛꠥꠞ ꠖꠞꠎꠣꠔ ꠃꠛꠣꠁꠀ ꠁꠔꠣ ꠢꠥꠘꠟꠣ। 11ꠁ ꠡꠝꠄ ꠁꠛ꠆ꠞꠣꠢꠤꠝ ꠀꠞ ꠍꠣꠄꠞꠣ ꠛꠥꠠꠣ-ꠎꠁꠚ ꠅꠁꠉꠦꠍꠂꠘ, ꠢꠥꠞꠥꠔ꠆ꠔꠣ ꠅꠀꠞ ꠟꠣꠈꠣꠘ ꠛꠄꠅꠡꠅ ꠍꠣꠄꠞꠣꠞ ꠞꠁꠍꠤꠟ ꠘꠣ। 12ꠄꠞꠟꠣꠉꠤ ꠍꠣꠄꠞꠣꠄ ꠝꠘꠦ ꠝꠘꠦ ꠀꠡꠤꠀ ꠇꠁꠟꠣ, “ꠀꠝꠣꠞ ꠅꠃꠟꠣ ꠢꠦꠡꠇꠣꠟꠤ ꠛꠄꠅꠡꠅ ꠁꠔꠣ ꠈꠥꠡꠤ ꠀꠞ ꠀꠁꠛ ꠘꠤ? ꠀꠝꠣꠞ ꠝꠣꠟꠤꠇꠅ ꠝꠥꠞꠛ꠆ꠛꠤ ꠅꠁꠉꠦꠍꠂꠘ।” 13ꠔꠦꠃ ꠝꠣꠛꠥꠖꠦ ꠁꠛ꠆ꠞꠣꠢꠤꠝꠞꠦ ꠇꠁꠟꠣ, “ꠍꠣꠄꠞꠣꠄ ꠇꠤꠔꠣꠞ ꠟꠣꠉꠤ ꠁꠔꠣ ꠇꠁꠀ ꠀꠡꠟ ꠎꠦꠘ, ꠢꠣꠍꠣꠃ ꠀꠝꠣꠞ ꠢꠥꠞꠥꠔ꠆ꠔꠣ ꠅꠁꠛ ꠘꠤ, ꠀꠝꠤ ꠔ ꠛꠥꠠꠤ? 14ꠝꠣꠛꠥꠖꠦ ꠙꠣꠞꠂꠘ ꠘꠣ ꠁꠟꠣ ꠇꠥꠘ꠆ꠔꠣ ꠀꠍꠦ ꠘꠤ? ꠖꠦꠈꠤꠅ, ꠑꠤꠇ ꠡꠝꠄꠄ ꠀꠝꠤ ꠢꠤꠞꠛꠣꠞ ꠔꠥꠝꠣꠞ ꠉꠦꠍꠦ ꠀꠁꠝꠥ, ꠀꠞ ꠁ ꠡꠝꠄ ꠍꠣꠄꠞꠣꠞ ꠇꠥꠟꠅ ꠙꠥꠀ ꠕꠣꠇꠛ।” 15ꠍꠣꠄꠞꠣꠄ ꠒꠞꠣꠁꠀ ꠇꠁꠟꠣ, “ꠎꠤ ꠘꠣ, ꠀꠝꠤ ꠔ ꠀꠡꠍꠤ ꠘꠣ।” ꠅꠃ ꠔꠣꠁꠘ ꠇꠁꠟꠣ, “ꠘꠣ ꠞꠦꠉ, ꠔꠥꠝꠤ ꠘꠥ ꠀꠡꠤꠟꠣꠄ।”

ꠍꠣꠖꠥꠝ ꠐꠣꠃꠘꠞ ꠟꠣꠉꠤ ꠁꠛ꠆ꠞꠣꠢꠤꠝ (ꠀ꠩) ꠅꠞ ꠝꠤꠘꠔꠤ

16ꠄꠞꠛꠣꠖꠦ ꠢꠃ ꠔꠤꠘꠎꠘꠦ ꠁꠘ ꠕꠘꠦ ꠃꠑꠤꠀ ꠍꠣꠖꠥꠝꠞ ꠛꠣꠄ ꠌꠣꠁꠟꠣ। ꠁꠛ꠆ꠞꠣꠢꠤꠝꠦ ꠔꠣꠞꠣꠞ ꠟꠉꠦ ꠅꠁꠀ ꠛꠤꠖꠣꠄ ꠖꠦꠅꠀꠔ ꠉꠦꠟꠣ। 17ꠔꠦꠃ ꠝꠣꠛꠥꠖꠦ ꠇꠁꠟꠣ, “ꠀꠝꠤ ꠎꠦꠔꠣ ꠇꠞꠔꠣꠝ ꠌꠣꠁꠀꠞ, ꠁꠔꠣ ꠇꠥꠘꠥ ꠁꠛ꠆ꠞꠣꠢꠤꠝꠞꠦ ꠟꠥꠇꠣꠁꠔꠣꠝ ꠘꠤ? 18ꠁꠛ꠆ꠞꠣꠢꠤꠝ ꠕꠣꠇꠤꠀꠃ ꠔ ꠀꠝꠤ ꠄꠇ ꠝꠢꠣꠘ ꠢꠤꠝ꠆ꠝꠔꠀꠟꠣ ꠎꠣꠔꠤ ꠙꠄꠖꠣ ꠇꠞꠝꠥ, ꠖꠥꠘꠤꠀꠁꠞ ꠢꠇꠟ ꠎꠣꠔꠤꠄ ꠅꠘ ꠕꠘꠦ ꠛꠞꠇꠔ ꠇꠣꠝꠣꠁꠛꠣ। 19ꠄꠞꠟꠣꠉꠤꠃ ꠀꠝꠤ ꠔꠣꠞꠦ ꠈꠣꠔꠤꠞ ꠇꠞꠍꠤ, ꠢꠦ ꠔꠣꠞ ꠅꠀꠞꠤꠡ ꠀꠞ ꠔꠣꠞ ꠘꠤꠎꠞ ꠢꠇꠟꠞꠦ ꠀꠝꠣꠞ ꠝꠞ꠆ꠎꠤ ꠝꠣꠘꠤꠀ ꠢꠇ ꠀꠞ ꠁꠘꠍꠣꠚꠞ ꠇꠣꠝ ꠇꠞꠣꠞ ꠢꠥꠇꠥꠝ ꠖꠦꠄ। ꠔꠣꠞꠣꠅ ꠎꠥꠖꠤ ꠅꠃ ꠟꠣꠈꠣꠘ ꠌꠟꠦ, ꠔꠣꠁꠟꠦ ꠀꠝꠤ ꠝꠣꠛꠥꠖꠦ ꠁꠛ꠆ꠞꠣꠢꠤꠝꠞ ꠛꠦꠙꠣꠞꠦ ꠎꠔꠔꠣ ꠇꠁꠍꠤ, ꠢꠇꠟꠔꠣꠃ ꠙꠥꠞꠣ ꠇꠞꠝꠥ।” 20ꠛꠣꠖꠦ ꠝꠣꠛꠥꠖꠦ ꠇꠁꠟꠣ, “ꠍꠣꠖꠥꠝ ꠀꠞ ꠀꠝꠥꠞꠣꠞ ꠛꠤꠞꠥꠖ꠆ꠖꠦ ꠈꠥꠛ ꠘꠣꠟꠤꠡ ꠀꠞ ꠚꠞꠤꠀꠖ ꠢꠥꠘꠤꠀꠞ, ꠔꠣꠞꠣꠞ ꠉꠥꠘꠣꠅ ꠈꠥꠛ ꠛꠦꠎꠥꠁꠔꠣ। 21ꠄꠞꠟꠣꠉꠤ ꠀꠝꠤ ꠔꠟꠦ ꠟꠣꠝꠤꠀ ꠉꠤꠀ ꠖꠦꠈꠤ, ꠀꠝꠤ ꠎꠦꠟꠣ ꠘꠣꠟꠤꠡ ꠢꠥꠘꠤꠀꠞ, ꠁꠔꠣ ꠢꠣꠍꠣꠃ ꠅꠃꠟꠣ ꠈꠣꠞꠣꠙ ꠇꠤ ꠘꠣ। ꠀꠞ ꠘꠣ ꠅꠁꠟꠦꠅ ꠔ ꠖꠦꠈꠝꠥ।”

22ꠅꠃ ꠢꠤ ꠖꠥꠁꠅꠎꠘꠦ ꠚꠤꠞꠤꠀ ꠍꠣꠖꠥꠝꠞ ꠛꠣꠄ ꠞꠅꠀꠘꠣ ꠖꠤꠟꠣ ꠀꠞ ꠁꠛ꠆ꠞꠣꠢꠤꠝ ꠝꠣꠛꠥꠖꠞ ꠉꠦꠍꠦ ꠃꠛꠣꠁ ꠞꠁꠟꠣ। 23ꠛꠣꠖꠦ ꠁꠛ꠆ꠞꠣꠢꠤꠝꠦ ꠝꠣꠛꠥꠖꠞ ꠛꠣꠄ ꠀꠉꠥꠀꠁꠀ ꠉꠤꠀ ꠇꠁꠟꠣ, “ꠀꠙꠘꠦ ꠉꠥꠘꠣꠉꠣꠞꠞ ꠟꠉꠦ ꠢꠇ ꠝꠣꠘꠥꠡ ꠅꠇꠟꠞꠦꠅ ꠝꠣꠞꠤꠟꠣꠁꠔꠣ ꠘꠤ? 24ꠐꠣꠃꠘꠞ ꠝꠣꠎꠦ ꠎꠥꠖꠤ ꠙꠁꠘ꠆ꠌꠣꠡ ꠎꠘ ꠢꠇ ꠝꠣꠘꠥꠡ ꠕꠣꠇꠦ ꠔꠣꠁꠟꠦ ꠢꠃ ꠙꠁꠘ꠆ꠌꠣꠡ ꠎꠘꠞ ꠈꠣꠔꠤꠞꠦ ꠐꠣꠃꠘꠞꠦ ꠝꠦꠢꠦꠞꠛꠣꠘꠤ ꠘꠣ ꠇꠞꠤꠀ ꠛꠤꠘꠣꠡ ꠇꠞꠤꠟꠣꠁꠛꠣ ꠘꠤ? 25ꠔꠦ ꠀꠙꠘꠣꠞ ꠇꠣꠝ ꠔ ꠅꠃꠟꠣ ꠘꠣꠄ, ꠢꠇ ꠀꠞ ꠉꠥꠘꠣꠉꠣꠞꠞꠦ ꠄꠇꠟꠉꠦ ꠝꠣꠞꠤꠟꠣꠅꠀ, ꠄꠇ ꠢꠝꠣꠘ ꠡꠣꠎꠣ ꠖꠦꠅꠀ, ꠀꠙꠘꠣꠞ ꠟꠣꠉꠤ ꠔ ꠑꠤꠇ ꠘꠣꠄ। ꠎꠦꠁꠘ ꠢꠣꠞꠣ ꠖꠥꠘꠤꠀꠞ ꠛꠤꠌꠣꠞ ꠇꠞꠂꠘ, ꠔꠣꠁꠘ ꠇꠥꠘꠥ ꠢꠇ ꠁꠘꠍꠣꠚ ꠇꠞꠔꠣ ꠘꠣꠄ ꠘꠤ?” 26ꠝꠣꠛꠥꠖꠦ ꠇꠁꠟꠣ, “ꠎꠥꠖꠤ ꠍꠣꠖꠥꠝ ꠐꠣꠃꠘꠅ ꠙꠁꠘ꠆ꠌꠣꠡ ꠎꠘꠅ ꠢꠇ ꠝꠣꠘꠥꠡ ꠕꠣꠇꠂꠘ, ꠔꠣꠁꠟꠦ ꠔꠣꠞꠣꠞ ꠈꠣꠔꠤꠞꠦ ꠀꠝꠤ ꠀꠡ꠆ꠔꠣ ꠐꠣꠃꠘꠞꠦ ꠞꠦꠢꠣꠁ ꠖꠤꠟꠣꠁꠝꠥ।” 27ꠁꠛ꠆ꠞꠣꠢꠤꠝꠦ ꠇꠁꠟꠣ, “ꠖꠦꠈꠃꠇ꠆ꠇꠣ, ꠀꠝꠤ ꠔ ꠗꠥꠁꠟ ꠀꠞ ꠍꠣꠟꠤ ꠍꠣꠠꠣ ꠇꠥꠘ꠆ꠔꠣ ꠘꠣꠄ, ꠔꠣ-ꠅ ꠀꠝꠤ ꠡꠣꠅꠡ ꠇꠞꠤꠀ ꠀꠝꠣꠞ ꠝꠣꠟꠤꠇꠞ ꠟꠉꠦ ꠝꠣꠔꠤꠀꠞ। 28ꠗꠞꠃꠇ꠆ꠇꠣ, ꠎꠥꠖꠤ ꠙꠁꠘ꠆ꠌꠣꠡ ꠎꠘ ꠢꠇ ꠝꠣꠘꠥꠡ ꠘꠣ ꠅꠁꠀ ꠙꠣꠌ ꠎꠘ ꠇꠝ ꠅꠄ, ꠔꠣꠁꠟꠦ ꠇꠤꠔꠣ ꠅꠃ ꠙꠣꠌ ꠎꠘ ꠇꠝꠞ ꠟꠣꠉꠤ ꠀꠙꠘꠦ ꠀꠡ꠆ꠔꠣ ꠐꠣꠃꠘ ꠛꠤꠘꠣꠡ ꠇꠞꠤꠟꠣꠁꠛꠣ ꠘꠤ?” ꠔꠣꠁꠘ ꠇꠁꠟꠣ, “ꠀꠝꠤ ꠎꠥꠖꠤ ꠢꠤꠘꠅ ꠙꠄꠔꠣꠟ꠆ꠟꠤꠡ ꠎꠘꠞꠦ ꠙꠣꠁ, ꠔꠣꠁꠟꠦ ꠁꠇꠐꠣ ꠛꠤꠘꠣꠡ ꠇꠞꠔꠣꠝ ꠘꠣꠄ।” 29ꠁꠛ꠆ꠞꠣꠢꠤꠝꠦ ꠔꠣꠘꠞꠦ ꠢꠤꠞꠛꠣꠞ ꠇꠁꠟꠣ, “ꠗꠞꠃꠇ꠆ꠇꠣ, ꠎꠥꠖꠤ ꠢꠤꠘꠅ ꠌꠣꠟ꠆ꠟꠤꠡ ꠎꠘ ꠙꠣꠅꠀ ꠎꠣꠄ?” ꠝꠣꠛꠥꠖꠦ ꠇꠁꠟꠣ, “ꠢꠃ ꠌꠣꠟ꠆ꠟꠤꠡ ꠎꠘꠞ ꠈꠣꠔꠤꠞꠦ ꠀꠝꠤ ꠛꠤꠘꠣꠡ ꠇꠞꠔꠣꠝ ꠘꠣꠄ।” 30ꠁꠛ꠆ꠞꠣꠢꠤꠝꠦ ꠇꠁꠟꠣ, “ꠀꠝꠣꠞ ꠝꠣꠟꠤꠇ ꠎꠣꠘꠥ ꠀꠝꠣꠞ ꠝꠣꠔꠦ ꠘꠣꠞꠣꠎ ꠘꠣ ꠅꠁꠘ। ꠀꠁꠌ꠆ꠍꠣ, ꠎꠥꠖꠤ ꠢꠤꠘꠅ ꠔꠤꠡ ꠎꠘꠞꠦ ꠙꠣꠅꠀ ꠎꠣꠄ?” ꠔꠣꠁꠘ ꠇꠁꠟꠣ, “ꠎꠥꠖꠤ ꠀꠝꠤ ꠔꠤꠡ ꠎꠘꠞꠦꠅ ꠙꠣꠁ, ꠔꠣꠁꠟꠦꠅ ꠀꠝꠤ ꠛꠤꠘꠣꠡ ꠇꠞꠔꠣꠝ ꠘꠣꠄ।” 31ꠁꠛ꠆ꠞꠣꠢꠤꠝꠦ ꠇꠁꠟꠣ, “ꠀꠝꠤ ꠎꠦꠛꠟꠣ ꠢꠤꠝ꠆ꠝꠔ ꠇꠞꠤꠀ ꠝꠣꠟꠤꠇꠞ ꠟꠉꠦ ꠛꠣꠔꠌꠤꠔ ꠇꠞꠤꠀꠞ ꠔꠦ ꠢꠤꠞꠛꠣꠞ ꠇꠁꠀꠞ, ꠎꠥꠖꠤ ꠢꠤꠘꠅ ꠛꠤꠡ ꠎꠘꠞꠦ ꠙꠣꠅꠀ ꠎꠣꠄ?” ꠝꠣꠛꠥꠖꠦ ꠎꠥꠀꠙ ꠖꠤꠟꠣ, “ꠢꠃ ꠛꠤꠡ ꠎꠘꠞ ꠈꠣꠔꠤꠞꠦꠃ ꠀꠝꠤ ꠁꠇꠐꠣ ꠛꠤꠘꠣꠡ ꠇꠞꠔꠣꠝ ꠘꠣꠄ।” 32ꠢꠦꠡꠦ ꠁꠛ꠆ꠞꠣꠢꠤꠝꠦ ꠇꠁꠟꠣ, “ꠀꠝꠣꠞ ꠝꠣꠟꠤꠇ ꠎꠣꠘꠥ ꠘꠣꠞꠣꠎ ꠘꠣ ꠅꠁꠘ, ꠀꠝꠤ ꠈꠣꠟꠤ ꠀꠞꠅ ꠄꠇꠛꠣꠞꠔꠣ ꠇꠁꠀꠞ, ꠎꠥꠖꠤ ꠢꠤꠘꠅ ꠖꠡ ꠎꠘ ꠕꠣꠇꠂꠘ?” ꠝꠣꠛꠥꠖꠦ ꠇꠁꠟꠣ, “ꠢꠃ ꠖꠡ ꠎꠘꠞ ꠈꠣꠔꠤꠞꠦꠃ ꠀꠝꠤ ꠁꠇꠐꠣ ꠛꠤꠘꠣꠡ ꠇꠞꠔꠣꠝ ꠘꠣꠄ।” 33ꠁꠛ꠆ꠞꠣꠢꠤꠝꠞ ꠟꠉꠦ ꠝꠣꠛꠥꠖꠞ ꠛꠣꠔ-ꠍꠅꠀꠟ ꠡꠦꠡ ꠅꠁꠀ ꠢꠣꠞꠟꠦ ꠞꠅꠀꠘꠣ ꠖꠤꠟꠣꠁꠟꠣ, ꠀꠞ ꠁꠛ꠆ꠞꠣꠢꠤꠝꠅ ꠔꠣꠘ ꠛꠣꠠꠤꠔ ꠚꠤꠞꠤꠀ ꠀꠁꠟꠣ।

Currently Selected:

ꠔꠃꠞꠣꠔ ১: ꠙꠄꠖꠣ ꠘꠣꠝꠣ 18: sylN

Highlight

Copy