Sam 14
14
Sam Kranzpnu-esz'-nrade-pwx (14)
Nzngqngukr Kxtrnzrlxngitiung
Nabz ne Devet kx yrbzle mz kxrmailz ngr dzbe kxnzngrng.
1Leplz kxnzngqngung mz drtwrdr nzrpilr kx, “Trpnzngr Gct.”
Leplz lcng nzvz-rbrng x nzale-txpwzng da kxtrka zlwz.
Trpnzngr leplz lcng kxtubq.
2Yawe mncom Heven, x sc tqmcomle leplz amrlx,
Mz nzmc-krde neke yrplapx mz nzrtangrti-krde nide.
3A' nzesablqtilr Gct amrlx ngrdr x drtwrdr esz'ti mz nzale-krdr da kxtrka.
Trpnzngr nidr kxesz' kxtubq. #Rom 3:10-12
4Delc tqrpingr Yawe kx, “Leplz lcng tztrkang nznibqtitxdr leplz nengeng
Nzapulr kx nzrnibqng da kx nangqdr.
X mrbrtr mz drtwrdr nzkrka'-krmlr bange.
?Myx kxmule, trnzkrlzlru da kxtubq?”
5A' narngidrtio-lzbqng x namwxlrlvzti-lzbqng,
Murde Gct tedr badr kxnztubqng.
6Vz zvz nzrpwa'-krbzlr me pnz drtwr kxnzrlxngiting.
A' Yawe mnc-ngalelvzle leplz nedeng.
7Sutitx zlwz drtwrnge kx Gct rgu kc Saeon na-arlapxle leplz nedeng.
Murde mzli kc nayzlu-mou-ngrmle, namnc-zpwxku badr.
X nigu lr Jekop drtwrgu sa naelalzm.
X nigu lr Israel sa na-abrtz-ngrgu da lc. #Sam 53:1-6
Currently Selected:
Sam 14: ntu
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.
