Sam 109
109
Sam Kratrtqki-esz'-nrade-rpwxmz (109)
Kxnzpibqtilr Doa Ne Gct
Nabz ne Devet.
Kxnzatrkatilr Ninge
1Gct, glqlz-zvzx nim.
Bzkq anabume bange x obqlvz-txpwzme ninge.
2Murde kxdrka'-ngrng kxnzesabrng nzycmnetr-ngrdr ninge
Mz nzpokiatitr-krdr ninge.
3Nzatrkati-krdr ninge trpnzngr noude,
A' nzrpiting natq kx trmrlzu.
4Kxmule-esz' aodux x krka'-ngrneng nidr,
A' nzayzlu-alzuplr mz natq ngr nzpokiangr.
5Kxmule-esz' alebo badr da kxmrlzting mz nzngini-krnge kztedr,
A' nzale-alzupqng bange da kxtrka mz nzapu-krdr enqmi rngeng.
Bzkq Amrlzq Enqmi Rnge
6Yawe, suti drtwrnge kx na-ayrplapxq ncblo kc tqycmne-atrkatile ninge
Mz nzvz-nqblq-krde natqnge kcng napibo bam mz nzngini-krnge kxnzawz nem.
Mzli kc navz-ngrde mz kot, kzdq kxdrka'ngr natubz mz nibrde,
X mrlz kzdq enqmi rde nanginide majzstret.
7Bzkq rlr-ngrbzme nzaovxio-krde,
A' nzkrka'-krde na-aelwapx-ngrde nzvz-rbr-krde.
8Bzkq amrlzq nide, a' nabz ani,
X natekqtr ncblo kzble mz nzngini-krde kxrmailz. #Aposol 1:20
9Nabzsz-kzle doa nedeng x olvz rde,
Murde trpengr kx na-aclve-angidrle nidr.
10Naodatitxde ma nyz doa nedeng,
Murde navztxneng mz nzrlx-krdr dakxnzng.
11Mz nzrka-niwzlr-krdr trau kx rlxti trtedr, nayrkrtxpxngr dztudrng amrlx.
X lr mrkzbleng napnatibzlr da kx atatrple mz nzwz-krde.
12Bzkq kx nivz lrde mrlzbz bade,
X bzkq kx ycngr drtwrde doa nedeng.
13Nabzng badr lr ma nyzdeng amrlx,
Murde bzkq kx nardctipx mou drtwr nqvi lrde.
14Nadcpx mz drtwrm nqmq kr melrmqdeng kc tqtrka,
X bzkq ipqpxq alwx ngr lxede.
15Mrkc Heven nadcpx zvz mz drtwrm alwx ngrdrng,
A' mz nrlc enqmi lcng namrbrtr alo mz drtwr.
Alwx Rdeng
16Rlxtibo bam da lcng murde mrlx lc trpnzngr kx mrlzti nivz lrde,
A' armzkiti x rnibqti leplz txneng kxtrnzrngiscung x kx drtwrdr talvzo zlwz.
17Mrlzbz bade nzpilz-zvz-krde leplz.
Delc mrlzvxitx na-ayzlu-mou-ngrbz bade nzpilz-krdeng.
X pxtxpx-ngrde nzale-krbzle da kxmrlz mz leplz.
Delc tqpxtxpx-ngrne nzrka-ngrbz da kxmrlz bade.
18Tresakiu nzpilz-krde leplz.
Delc nzayzlu-krbzmeleng bade naxngitx-pnzbzle.
Mrlz nzpilz-krm nide na-apule lue kx mingrtr mz nrkrdrtqde,
X tolo kx na-alqtipwzle me xvcngr nrvr ngrde.
19X na-apu-kzle lrpz kc tqkq-ngrde
X amqngitr nrkalo.
Yangrnga-zlwzx
20-21Yawe, Kxetu rnge, kxmule-esz' rlxtibo bam nzayrplapx-krm enqmi rngeng
Kcng tzpibqtilr ninge,
A' rlxti-kzpo bam nzamrlz-krm ninge x nzokatr-krm ninge mz nzvz-nqblq-krde Natqm.
X arlapx ninge mz nzvz-nqblq-krde nzmrlzkr nzaodu-krm ninge.
22Murde ninge ncblo txne kx tr-rngiscu,
X drtwrnge vztx zlwz.
23-24Nrkrdrtqnge ngi nrvr-nrbalqpe mz trnzmupe-krpwc'u,
Mz nzapu-krnge zmyo ngr milzpq kc namrbr-anipe.
X apunepe-kzx br kc tqlvcne tqwqplxne nenq,
Mz nzyangrnga-zlwz-krnge.
25Kx nzmc ninge nzyrpalelvzlr ninge,
X nzmcpxmlr nctqdr bange.
26Yawe, Gct rnge, okatrp ninge, kxnzawz nem!
Arlapx ninge mz nzvz-nqblq-krde nzaodu-krm ninge.
27Murde enqmi rngeng nakrlz-zpwxlr kx arlapxq ninge
Mz zmatq ngrm kx xplr-esz'ngr.
28Yawe, kxmule-esz' enqmi rngeng nzpibqtilr ninge, a' amrlz ninge,
X aovxio nidr murde nabilvzx nim.
29Batrpz nzavzo-lzbq-krdr,
Murde nzamyati-krbzme drtqdr naopx mz mz leplz.
30Yawe, sa na-awi-zlwzbo bam,
Mz nzglqlz-krnge nim mz mzlir leplz nemqng.
31Murde nim kc tqtubz mz nibr ncblo txne,
Mz nzarlapx-krm nide mz mq kxnzabetitrlr nide, murde nabz-ngrde.
Currently Selected:
Sam 109: ntu
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.
