Luke 4

Na tabotaboana Jesus

(Matthew 4:1-11; Mark 1:12-13)

1Ma Jesus, te vonughia na Tarunga Tabu, te oli mai tana beti tina Jordan, me hulia na Tarunga Tabu vaa tana bona mamaha te taho iga na beti mana ghai. 2Igaa Satan te tabotaboa Jesus e vati hangavulu na bongi. Mi tana lei bongi rakiri, Jesus te mua ghania siki vanga, murina vaho ge vitolo. 3Ma Satan te bosa vania me ghaghua, “Ge toko dalena God ke, mo ko bosaa na vatu eni me ke liliu ni berete.”

4Jesus te bosa tughu vania me ghaghua, “Te vaghaa tara gerea tua tana gegere tabu, ‘Na tinoni ke mua nia vola na vanga heghena vamua.’” #Eruani Vetena 8:3

5Ma Satan te lavia va tana bona te datogha, me tatei vania, tana pile bona vamua, na lei kinakabu ni maramana udolu, 6me ghaghua, “Ra vaheu mai tua raini, mi nau ku vahea ahei ku vilia, 7ma ge ighoe ko holohabau, mo ko tualaghi tuturu vaniu ke, gaighi udolu raini ku vahegho gatu animua.”

8Jesus te bosa tughu vania me ghaghua, “Te vagha tara gerea tua tana gegere tabu, ‘Ko holohabaa Lord nimua na God, ma gaia heghena vamua ko lutu vania.’” #Eruani Vetena 6:13

9Ma Satan te lavidatoa vaa i Jerusalem tana vouvotuna na Valetabu, me bosa vania, “Ge toko puku ni dalena God sughua ke, mo ko sosogha horu! 10Na pukuna tara gerea tua tana gegere tabu,

‘God ke vetenara mai lei nina angel, ge kara righitaonigho.

11Tana limadira kara sakurigho nia, ge rana marevomu ke mua kalea siki vatu.’”#Buka Linge 91:11-12

12Jesus te bosa tughu vania me ghaghua, “Tara gerea tua tana gegere tabu, ‘Ko bei tabotaboa Lord nimua na God.’”#Eruani Vetena 6:16 13Ma Satan te tabotabo sokoa tua Jesus nighi na lei totobo raini, ge rughuhoru sania Jesus pile bona, me pitua na bona uto te maheboa iga ge ke ghoi tabotaboa.

Jesus te vuivunia nina lutu i Galilee

(Matthew 4:12-17; Mark 1:14-15)

14Ma Jesus te pulohi tana bubulo i Galilee te vonughia na maana ni Tarunga Tabu, mana tutuguna te lada tana lei komu. 15Gaia te vuivuni ni tarai lokani didira lei vale kokoeliulivuti ni Jew, ma gaira tara rongovia nina tarai mara holoutoa.

Jesus tara nia sika i Nazareth

(Matthew 13:53-58; Mark 6:1-6)

16Ma Jesus te tona i Nazareth, te sule ghalagha igaa. Me haghe tana vale kokoeliulivuti ni Jew, ta sakai na Sabbath,#4:16 Sabbath bongi aheahe ni Jew, tana Sarare. te vaghaa te nea haia tua, me tughuru dato ge idumia na gegere tabu. 17Mara hea na gegere ta Prophet Isaiah. Ge a Jesus te vurehia na bona te bosa igaa,

18“Nina Tarunga Tabu Lord te savungiu inau,

na pukuna gaia te viliu ge ku tughunitatea na Rongorongo Uto vanira rana bona.

Gaia te vetenau ge ku tughunitatea na lubatiadira tara kabu popongo;

mana rorodo kara ghoi reireioli ghua,

ma rana vahaghitaili kara sodoa na togholuvu.

19Mu ku tughunitatea na bona ni aho te dutu mai ge a God ke vavolara nina vure.” #Isaiah 61:1-2

20Te idumia sokoa tua ge loku olia na gegere, me hea olia na mane haba, ge sopou horu. Na matadira na vure soko ilokana na vale kokoeliulivuti ni Jew tara totolaa. 21Keri ge bosa vanira me ghaghua, “Na gegere tabu tu idumia vanighau te kale itaeni!”

22Gaira udolu tara bosautoa, me nia maro na mangadira nina lei bosa ni tarai te uto. Gera ghaghua, “Gaia na dalena Joseph vamua.”

23Ma Jesus te bosa vanira, “Ighau tau liona ge kau bosa vaniu na bosa manaha eni te ghaghua, ‘Mane kisu, ko diki vavolagho heghemu,’ na ghanaghana igaa ke, ‘ge ighoe na Christ ke, ko gonighi ghua iani tana komuda na lei butuli to nei Capernaum tai rongovighi!’ 24E utuni eni inau to bosa vanighau, ‘Na prophet tara mua ghanaghana mavaa tana komuna heghena oli.’ #John 4:44 25E utuni te subo na matesasani Israel te manana na hangadira tana bongina Elijah idania, tana bona te taho na uha ilokana e tolu na niulu me ono na vula, keri ge na ngengere sule te kalea i Israel udolu,#1 Vunaghi Haba 17:1 26hauvaa ma God te mua vetenaa Elijah vaa ta siki sakai Israel, me vaa vamua itatana na samu i Zarephath, tana buto ni komu i Sidon.#1 Vunaghi Haba 17:8-16 27Me subo ghua na tinoni te kalera na kuhu, tana bonana na prophet Elisha idania, me taho siki sakai ke kisura, sakai vamua God te vavolaa Naaman na tinoni ni Syria.” #2 Vunaghi Haba 5:1-14

28Tana bona na vure ilokana na vale kokoeliulivuti ni Jew tara rongovia, ge ra rutu ngangata vania. 29Gaira tara tabea mara ghuruhorua Jesus tana komudira, mara hola tonaa tana kouna na ghotu, tara kisua igaa na komudira. Tara liona ge kara pili horua tana tigetige ni vatu. 30Ma Jesus te tabalili kolili ghobudira me tona keha.

Na tinoni na tidalo dika ilokana

(Mark 1:21-28)

31Jesus te sughi i Capernaum tana bubulo i Galilee, mi ga te taraira na vure ghua tana Sabbath. 32Ma gaira tara nia hare nina tarai, na pukuna te nia kokoe na maana.#Matthew 7:28-29 33A sakai na mane igaa ilokana na vale kokoeliulivuti ni Jew, te loghoa na tidalo dika ilokana, te ghaeghahe me ghaghua, 34“Ari! ?Jesus ni Nazareth, nimua na hava itamami? ?To mai ni hurakeamami? Inau tu ghilalagho ahei ighoe, na tinoni tabu God te vetenagho mai.”

35Ma Jesus te bosa laga vania na tidalo dika me ghaghua, “Ko todore mo ko rughuhoru mai tatana.” Mana tidalo dika te nia piri horu tana pari, naghodira, ge rughuhoru itatana, me mua dikalaa.

36Na vure tara nia hare, mara sopa kokoe heghedira mara ghaghua, “?Na hava na vata ni bosa vaghani raini? Na pukuna nia nina malei haba mana maana, te ghurukehara nia rana tidalo dika, mara rughuhoru!” 37Mana tutuguna na hava te nei, te lada tana lei komu udolu mi tana buto ni komu keri lilighina Capernaum.

Jesus te kisura subo na vure

(Matthew 8:14-17; Mark 1:29-34)

38Ma Jesus te rughuhoru tana vale kokoeliulivuti ni Jew, me va haghe tana valena Simon. A vungona na vaivine a Simon igaa, te nia koli na vahaghi sapangia. Agaira tara nongia Jesus ge ke kisua. 39Ma Jesus te tughuru lilighina, ge tiva keha na vahaghi tatana, mana vahaghi te rughuhoru sania me ghaota tua. Mana vaivine te tughuru dato tua me goni ghadira vanga.

40Me lighi tua na aho te nulavi, rana vure tara lavira vania mai agaira soko te kalera lei sopasopa ni vahaghi kehakeha, ma Jesus te talua na limana ivuvungadira me kisu volara. 41Na lei tidalo dika tara rughuhoru tadira, tara ngangaraha, “Ighoe a dalena God sughua!”

Ma Jesus te pasara, me hove pungisira ge kara bei kokoe, na pukuna tara ghilalaa gaia na Christ.

Jesus te tarai tana lei vale kokoeliulivuti ni Jew

(Mark 1:35-39)

42Me roropo ghana Jesus te sania na komu me tona tana bona aroha. Mana vure subo tara kene taonia. Mara sodoa, ge ra hovea ge ke bei tona sanira. 43Ma Jesus te bosa vanira, “Inau ku ladavaghinia mughua na Rongorongo Uto ni kinakabuna God, tana lei sopa komu ghua, na pukuna gaia eni God te vetenau nia ku lutua.” 44Ma gaia te nia tarai na Rongorongo Uto ilokani na lei vale kokoeliulivuti ni Jew tana bubulo i Judea talighu.

Currently Selected:

Luke 4: nlg

Highlight

Copy