Luke 10

Jesus te nira vetena ara vitu hangavulu rua

1Imurina eni Jesus te vilira e vitu hangavulu rua na vaovarongo, me vetenara ge kara udu ruarua, ma kara idevia tana lei komu sule mana pile te ghanaghana ke vaa igaa. 2Jesus te ghaghua vanira, ‘Te sule ngangata na ghegheli, hauva mara mua subo na tinoni ni lutu. Kau kokoeliulivuti vania God, na vunaghi ni ghegheli, ge ke nira vetena mai na lei tinoni lutu ge kara vahikolui nina baore.#Matthew 9:37-38 3Kau tona! Inau tu nighau vetena vaghara na lei dale sheep ighobudira na lei kau ghaghala.#Matthew 10:16 4Kau bei holaa na rongo, pana kirisa, pana haharana ni marevomiu. Kau bei tughuru beto gea kara kokoe vanighau tana halautu.

5“Tana bona kau haghe tana valena siki sakai, kau diki bosaa, ‘Nina mabo God ke kabu itamiu.’ 6Ma ge teke ghahaa igaa na tinoni te liouto me mabo ke, a God ke hea na mabo. Me ke taho ke, animiu na vauto ke oli mai tamiu. 7Kau ghahaghau igaa tana vale keri, vanga ma kau inu tana hava tua kara heghau, keri na peluna na tinoni lutu na pukuna te ulaghana na tinoni lutu ke hola na taba vania nina lutu te nea. Kau bei iduvale gea.#1 Corinthians 9:14; 1 Timothy 5:18

8“Ivei na bona vaghana kau haghe tana komu sule, ma kara lavipangotighau na vure igaa ke, ghania na hava tua na vanga tara talua vanighau mai. 9Kisura na lei tinoni vahaghi igaa tana komu keri, ma kau bosa vanira na vure igaa, ‘Na kinakabuna God te dutu mai tua.’ 10Mi ta siki komu sule kau va haghe igaa, mana vurena na komu keri tara mua liona ge kau ghahaghau itadira ke, kau tona tana lei halautu ilokana na komu keri, ma kau bosa te vagha eni, 11‘Na pughu ni parina na komumiu te kau tana marevomami, kai taporaha kehai. Ke vagha na vaughilala vanighau God ke deteghau. Ma kau ghanaghana olia na kinakabuna God te dutu mai tua.’ #Matthew 10:7-14; Mark 6:8-11; Luke 9:3-5; Gehegehedira 13:51 12E utuni inau tu bosa vanighau, tana bongi ni dete a God ke torora vaa na vurena na komu keri vulea na vure ni Sodom.”#10:12 Sodom God te durakera na vurena na komu Sodom idania na pukuna tara hahi sule ngangata. Vuivuni 19:24-28; Matthew 11:24.

Lei komu tara mua taluutunia Jesus

(Matthew 11:20-24)

13Ma Jesus te bosa ghua, “Ighau rana vure i Chorazin, God ke tangotoroghau! Ighau na vure ghua i Bethsaida, God ke tangotoroghau! Ma ge na lei butuli tu gonighi itamiu, ku gonighi ghua i Tyre mi Sidon,#10:13 Tyre mi Sidon erua na komu sule rana mua Jew tara ghahaa ilokadira. Na vurena na komu kiri tara hahi ngangata. na vure kiri kara tughulio tua. Tara nighi pupulu na tivi ni dikalio mara talu ravuni na hulidira, te tughunia tara tughulio tana lei paludira.#Isaiah 23:1-18; Ezekiel 26:1—28:26; Joel 3:4-8; Amos 1:9-10; Zechariah 9:2-4 14Mi tana bongi ni dete, God ke toroghau haba vaa na vure ni Tyre mi Sidon. 15Me vagha vanighau ghua ighau na vure ni Capernaum. ?Au ghanaghana ighau ke, ma God ke taludatoghau ikokou? Taho! God ke sonihorughau i pari Betidalo!” #Isaiah 14:13-15

16Ma Jesus te bosa vanira nina vaovarongo me ghaghua, “Ahei tua te taonia na bosamiu ke, te taoniu inau, ma hei te nighau sika, te niu sika ghua inau. Ma hei te niu sika inau, te nia sika God te niu vetena mai.” #Matthew 10:40; Mark 9:37; Luke 9:48; John 13:20

Na oliadira mai ara vitu hangavulu rua

17Bona tara oli mai ara vitu hangavulu rua na mane ka, mara togotogo sule ngangata mara ghaghua vania Jesus, “Maghutu, sughua na lei tidalo dika tara rongovighai tai ghurukehara tana ahamu!”

18Ma Jesus te bosa tughu vanira me ghaghua, “Inau tu righia Satan te kutuhoru mai kokou te vaghaa na viti te horu mai tana oka. 19Kau taluutuniu! Inau tu heghau na maana te vulea nina maana a Satan, ge ke ghalatighau na poli pana liva, ke mua vahaghitailighau. Taho siki totobo ke dikalaghau! #Buka Linge 91:13 20Hauva, kau bei togotogo na pukuna tara taonighau tana bona tau ghurukehara lei tidalo dika. E uto vulea vaa ge kau togotogo, na pukuna God te gere horui tua na ahamiu i kokou.”

Jesus te togotogo me holohabaa God

(Matthew 11:25-27; 13:16-17)

21Tana bona vaghana keri Jesus te vonughia na togotogo nia na Tarunga Tabu me ghaghua, “Tamagu, to vunaghi pungisighi na kokou mana maramana. Inau tu holoutogho to poloi na lei totobo raini vanira rana vure tara manaha mara ghilala, maia to tatea vanira na utuni, gaira te vaghara rana lei gari pile. Eo Tamagu, aeni gaia te taonia na liomu.”

22Soko, Jesus te bosa vanira na vure, “Na lei totobo soko a Tamagu te talui tana limagu. E taho ahei ke ghilala utuniu, inau na Dale, na Mama vamua, me taho ahei ke ghilala utunia na Mama, inau, na Dale vamua ma gaira tu vilira ge ku tatera vania na Mama.” #John 3:35; 10:15

23Tana bona tara ghaha heghedira vamua Jesus te ririu vaa tadira nina vaovarongo me ghaghua vanira, “God te vautoghau na pukuna ge lubatighau ge au righighi nia na matamiu na lei totobo tau righighi. 24Inau tu bosa vanighau gatu, subo na lei prophet mana lei vunaghi haba idania tara lioni na righiani na lei totobo tau righighi, hauva mara mua tangomana, mana rongoviani na lei totobo tau rongovighi, hauva mara mua rongovighi.”

Na vavaghaha na mane uto ni Samaria

25Ta sakai na dani, na manetarai ni vetena nina Moses te mai righia Jesus me taboa na liu pegoana ge ghaghua vania, “?Tarai, na hava ku nea ge ku loghoa na vola maurihali?”

26Ma Jesus te bosatughu vania me ghaghua, “?Na hava te bosaa na vetena? ?Ivei to nea na idumiana?”

27Mana manetarai ni vetena nina Moses te bosa tughu vania Jesus me ghaghua, “Ko dolovia Lord nimua na God nia na puku ni tobamu, mana tarungamu, mana lagamu, mana ghanaghanamu soko. Vagha ghua ko dolovia ghamua na komukolu te vaghaa to dolovigho heghemu.”#Eruani Vetena 6:5; Buka Vetena 19:18

28Ge bosa Jesus vania, “E utuni, ko nea ghua te vaghaa ge ko vola.” #Matthew 22:35-40; Mark 12:28-34; Buka Vetena 18:5

29Mana manetarai ni vetena nina Moses te liona ge rana vure kara ghanaghana gaia te maemane, ge ghoi huatia so Jesus, “?Ma hei gaia na ghagua na komukolu?”

30Ge bosatughu Jesus, “Sakai na mane ni Jew te butu i Jerusalem me tona va i Jericho, me sodora rana tinoni labupolo tana halautu, gera lotia, mara gitoi nina lei totobo udolu, mara labua, ge ra pilia tana halautu me bughoro igaa. 31Mi murina eni, a sakai na manesukaghi te taonia mai ghua na halautu keri, me righia na mane te pipili tana halautu me liubatia. 32Te vaghaa ghua na mane hahanga tana Valetabu#10:32 na mane hahanga ni sukaghi Tana leu ni Greek - Levite; na mane te va mai tana kemana Levi. Te lutu ilokana na Valetabu. te mai, me righia na mane te pipili me va siro horua vamua, ge sania iga me liubatia. 33Mana mane ni Samaria#10:33 mane ni Samaria Rana Jew tara nira sika rana vure ni Samaria. te taonia mai ghua na halautu keri, ge righia na mane te pipili me arovia. 34Ma gaia te mai tatana, me saui lei paena ge poroi. Keri ge sake datoa ta nina na maumanu tara holoa nia na donkey, me hola tonaa tana vale ni sinogho ge koekoea igaa.#2 Vavata 28:15 35Mi ropoghana gaia te holai erua na seleni na silver#10:35 erua na seleni na silver te vaghaa na matena erua na bongi ni lutu sakai na mane. me hea na tinoni righitaoni me bosa vania, ‘Kula, ko koekoea i murigu na mane eni, mi tana bona ku oli mai vaho ge ku tughu olighi vanigho na rongo mana hava to sonighi itatana.’” 36Ma Jesus te bosa vania na tarai, “?Ahei tadira ra tolu raini ta nimua na ghanaghana te ghana komukolu na tinoni te hoghoti tadira na labupolo?”

37Mana manetarai ni vetena nina Moses te bosa tughu me ghaghua, “Gaia keri te arovia.”

Ma Jesus te bosa vania, “Eo, ko tona mo ko nea ghua te vaghaa.”

Jesus te kaora Martha ma Mary

38Jesus ma nina vaovarongo tara tona va i Jerusalem, mara mai tana komu te ghaha ga na vaivine na ahana Martha. Martha te holaara vaa tana valena. 39Ma Mary a tughana Martha, te sopou dutu mai ta Jesus, me varongohia te tarai.#John 11:1 40Ma Martha te nighi ghaghua subo na totobo te gonighi, ge mai itatana Jesus me vania, “Maghutu, te mua uto a Mary te sopou vamua, tu lutu heghegu. Ko bosa vania me ke mai hangau!”

41Ma Jesus te bosa tughu vania, “Martha, Martha, ighoe to nighi kanoragha mo nighi dikalio te subo na totobo, 42hauvaa ma sakai na totobo vamua te mava. A Mary vamua te vilia na totobo uto, mu ku mua ghoi hola keha ghua itatana.”

Currently Selected:

Luke 10: nlg

Highlight

Copy