Maarko 16

Ũrũga Yeesu daahĩtha

(Tigiil Maatteeo 28:1-8; ꞌLuuka 24:1-12; Yõaannẽ 20:1-10)

1Ma baa urutaa ꞌcĩ edecciaaĩ Kõrra cĩ ꞌYiommaanõ ꞌjiaat, iita ĩtĩngaacõ Maria Madalẽẽna hĩ Maria aattĩ ꞌJeemithi hĩ Thaloome, õõt utuuyyia ngõõrrẽẽn ꞌcĩg õꞌngõlĩ ẽmmẽdĩ, ꞌcĩg adiim õõ uudi ẽlẽ cĩ Yeesu. 2Ma baa ngaalloohoth ngerrenita lomidikaawa, baa nga uppwaanna kõrra thõng, õõt nẽẽg ĩĩcĩ waany baa adaiini Yeesu. 3Baa ajinõõ nẽẽg ꞌgõõla aĩ, “Nganĩ occa hatĩ ꞌcĩ õkõ eelleet ngagĩĩt heehĩheet bẽẽ cĩ ꞌloohu?”

4Ma baa õõ edeenyothi nẽẽg waany ꞌcĩ adayyia biyyia ho, acĩnoothi hinnia ẽꞌnyẽẽhĩ bẽẽ aau ngadiiha. Nẽ baa ꞌthẽk bẽẽ cobbi gẽrrẽẽt tĩho. 5Ma baa õõ aduhun nẽẽg ꞌloohatõõ ho, acĩn hinnia nyahaappan umwa ꞌcĩ ahimit ceremwa ꞌcĩg õõppẽr, iccioloongan loota ꞌloohatõõ cĩ aꞌthiit cobbi. Baa abulan thõõth ciee ĩhõõggõ gẽrrẽẽt.

6Ma nĩngaata ikia uduhaak nyahaappanĩ tĩhõ ĩhõõggõ ĩĩnnĩk, “Ma hiꞌngolinnu. Haga naa adiimmu niig Yeesu cĩ Naaꞌtharẽtĩ baa odooddothoothĩk hurucceea, iittiõõ nẽẽ ngaati tõõ, baa ũrũga nẽẽnĩ. Ĩcĩnĩt da nĩngĩ baa ammũtĩ eeta ẽlẽ cĩ Yeesu. 7Nẽ ꞌyioko, ĩtĩngaac õõt uduktaak nuyyiook cĩgĩnnĩg hĩ Pẽẽtũrũ buúk ĩĩttĩk, ‘Utuanĩ nẽẽ ũũk ĩĩcĩ looc cĩ ꞌGalileea, õõ hatĩ acinnu ĩnõõnnõ ĩĩca, hĩ baa aduhaakuung nẽẽ ngagiita.’ ”

8Baa aggam ngaaĩ barriti nẽ atalmaanyattĩ gẽrrẽẽt, nĩngĩtĩ aduknaanĩ ꞌloohatõõ. Baa hõllõngaa aduhaak nẽẽg eet umwa thõõth nicci, hĩnĩngĩtĩ baa itieelli nẽẽg gẽrrẽẽt.

Ẽdẽẽnyak Yeesu ẽlẽ cĩnnĩ nuyyiook cĩgĩnnĩg

(Tigiil Maatteeo 28:9-10; Yõaannẽ 20:11-18)

9Ma baa urutaa ꞌcĩ ũrũgaaĩ Yeesu daahĩtha, baa lomidikaawa ngerrenita, ikia uppwaannak nẽẽ Maria Madalẽẽna ĩĩcĩ oou, ngaa baa iiggiaĩ nẽẽ loriẽẽt ꞌcĩg abathĩ tũkĩramma. 10Ma ho, ũũk uduhaak Maria Madalẽẽna ꞌgõõnõgĩ ꞌcĩg baag õõkõr hĩ ĩnõõnnõ baa nga alu nẽẽg Yeesu. 11Ma baa ĩthĩhĩt nẽẽg aĩ ũrũga Yeesu nẽ baa ĩcĩn Maria Madalẽẽna ĩnõõnnõ, baa aalla abũrĩ nẽẽg thõõth ꞌcĩ aduha Maria Madalẽẽna ho noho.

Uppwaannak Yeesu nuyyiook cĩgĩnnĩg ꞌramma

(Tigiil ꞌLuuka 24:13-35)

12Ma uruta, ikia uppwaannak Yeesu nuyyiook cĩgĩnnĩg ꞌramma ꞌgõõlaa ꞌcĩ hõllõngaa agaĩ nuyyiooha, baa ũtũngteek nẽẽg ꞌJeruꞌthalẽm. 13Ma baa oboddia nẽẽg hiita huduktaak ꞌgõõnõgĩ ũgĩ buúk thõõth icci, aitiõõ hinnia ꞌgoonoggia hõllõngaa ẽlẽmĩ thõõth icci buúk.

Uppwaannak Yeesu nuyyiook cĩgĩnnĩg õmmõtõ hĩ hõdẽĩ

(Tigiil Maatteeo 28:16-20; ꞌLuuka 24:36-49; Yõaannẽ 20:19-23; Dtiicanĩ cĩg ꞌThooyyiahu 1:6-8)

14Ma urutaa cĩnnĩ vẽlẽk, ikia uppwaannak Yeesu nuyyiook ꞌcĩg ĩĩn õmmõtõ hĩ hõdẽĩ baa nga aduhi. Baa eggerꞌnyeek Yeesu ĩhõõggõ, hĩnĩngĩtĩ aitiõõ hõllõngaa aꞌnyak lemiinit. Hĩnĩngĩtĩ baa õkõmĩ nuyyiook ꞌthinneeti ngaatĩ ẽlẽmmĩ thõõth cĩ eet baag ĩcĩnĩt Yeesu, baa ũrũga nẽẽ daahĩtha. 15Ma ho, ĩĩnnĩk Yeesu ĩhõõggõ, “Õõt illimanit eet nyeemuut ꞌcĩ abũnnaa loonyini vẽlẽk. 16Ẽẽtĩ ꞌcĩ ẽlẽmĩ nyeemuut nẽ aggam baattithimo, eelliaa hatĩ nẽẽnĩ, nẽẽthĩ, ẽẽtĩ ꞌcĩ hõllõngaa ẽlẽmĩ, uuki hatĩ nẽẽnĩ. 17Aaꞌnyĩhoothĩk hatĩ lemmiook vẽlẽk ꞌtirriani ꞌcĩ adticanĩ thooꞌthiok ꞌcĩg ĩnaat eeta. Iiggia hatĩ nẽẽg loriẽẽt ꞌcĩg abathĩ ꞌthaarĩĩ cĩgannĩg nẽ othoothito thõõthaa ꞌcĩ ĩĩn ngeju. 18Aggam hatĩ nuyyiooha cieeg hũkaaꞌnya athĩnĩĩ cĩggĩĩng nẽ aitõõ hatĩ hũkaaꞌnya hõllõngaa occa adak ĩhõõggõ. Nẽ ma adak nuyyiooha ꞌgẽẽn ꞌcĩ aarĩk eeta ẽgẽrnẽẽn ꞌcĩg occa aruk nuyyiook, aitiõõ hatĩ hõllõngaa adaahĩ ũdũt. Nẽ ataadĩk hatĩ nẽẽg athĩn cĩggĩĩng eetinii ꞌcĩg õmmõõrĩ nẽ hatĩ ũbũttaathõ eeta tĩko.”

Õdõngĩ Yeesu ũũk hẽẽtahujjieen

(Tigiil ꞌLuuka 24:50-53; Dtiicanĩ cĩg ꞌThooyyiahu 1:9-11)

19Ma urutaa ꞌcĩ õthõõthĩhĩ Makayyioohiti Yeesu nuyyiook ẽlẽk, ikia õdõngĩ nẽẽ ũũk hẽẽtahujjieen nẽ ũũk aau attiaa cobbi ĩĩcĩ Nyekuci. 20Nĩngĩtĩ õõĩ nuyyiooha cĩgĩnnĩg allimanĩ thõõth cĩ Nyekuci loonyini vẽlẽk nẽ baa adticanni Makayyioohiti hõdẽĩ hĩ ĩhõõggõ nẽ aaꞌnyĩk ꞌlimman cĩnnĩ ho, hĩĩ dĩdĩ thooꞌthiohĩĩ ꞌcĩg ĩnaat eeta ĩcĩg baag adtican nuyyiooha.

Currently Selected:

Maarko 16: did

Highlight

Copy