ꞌLuuka 17

Lemiinit hĩ dtiic

(Tigiil Maatteeo 18:6-7, 21-22; Maarko 9:42)

1Baa aduhaak Yeesu nuyyiook cĩgĩnnĩg anneek, “Aattĩg ꞌthẽk hatĩ gõõng hẽlẽggĩ ꞌcĩg aaꞌnyĩk eet hĩdĩmanit ꞌthẽccan. Nẽẽthĩ, uuki hatĩ ẽẽtĩ ꞌcĩ allabeek ꞌgõõnõgĩ hẽꞌthẽcattõõ. 2Occa mẽẽn ngaatĩ ẽcẽbõõthĩkĩ ĩnõõnnõ hirriaaĩ iꞌnyiaawa nẽ udhuhoothĩk bũlũcatõõ, hĩllõõan ngaatĩ allabẽẽkĩ nẽẽ ꞌgõõnõgĩ ꞌthẽccan. 3Ebehit eleeti cugguung jurrung.

“Nẽ má adĩman ꞌgotonu ꞌthẽccan, ꞌgerenyeek. Nẽ má ũtũngeek ꞌthẽccan cĩnnĩ ho, tamaatĩk ĩnõõnnõ. 4Má adĩmannii ꞌgotonu ꞌbuth tabattĩ tũkĩramma kõr hõdẽẽthõng nẽ õbõda tabattĩ tũkĩramma aku anneeki ‘Hẽꞌthẽcana, tamaatĩhaanĩ,’ tamaatĩk ĩnõõnnõ.”

Lemiinit

5Nĩngĩtĩ alaĩ ꞌthooyyiaha Yeesu annẽẽkĩ, “Makayyioohit, ꞌtõõr baaĩ nuun lemiinit cĩnaang hĩĩ maka!”

6Ẽdẽcĩ Yeesu ĩhõõggõ anneek, “ꞌYioko ꞌthẽk hĩĩ ꞌcĩ aꞌnyaku lemiinit ꞌcĩ hidici ꞌcĩ ĩĩkĩ hinyomooc ꞌcĩ mĩllĩꞌnyĩ, occa ꞌthẽk uuluyyu ngaatĩ anneeku ꞌmũũnĩc nicci, ‘ꞌButtannia bĩĩt tiboolanĩ bũlũcatõõ.’ Occa ꞌthẽk athiknuunga.”

Dtiic cĩ dticcianniookto

7Ma ho, ijin Yeesu ꞌthooyyiak cĩggĩĩng ĩĩnnĩk, “ꞌYioko hĩĩ ꞌcĩ aꞌnyahĩ ẽẽtĩ umwaa hõrggẽẽnaa cunuung dticciannioohit ꞌcĩ akannĩ manatõõ, hode ꞌcĩ ũũha hẽlẽggĩ, ĩcca occa anneek ĩnõõnnõ hatĩ õbõda, ‘Deccia ijjia hudukto?’ 8Ĩcca occa nõõ hõllõngaa anneek, ‘Kũmaneeka nõõ ꞌgẽẽn nẽ ẽrẽẽõ nga haduhi, nẽẽthĩ hatĩ ikia uduho niina?’ 9Occa hõllõngaa atalĩ nẽẽ dticciannioohit tĩho ngaatĩ adticanĩ dtiic ꞌcĩ hatĩ adukiaak ko? 10Nẽ niig buúk, ma idticattu dtiic vẽlẽk ꞌcĩ baa adukiaakuunga, ĩĩtõ, ‘Hĩĩgĩnna naag dticcianniook haaga, hadticanna ꞌgii ꞌcĩ adukiaakeeta.’ ”

Eet õmmõtõ ꞌcĩg adak helleggeri

11Ma ho, ĩtĩnga Yeesu ũũk ĩĩcĩ ꞌJeruꞌthalẽmĩ, ẽdẽcĩ lõkõõrĩ cĩ Thamaria hĩ ꞌGalileea. 12Ma õkõ aduhun õlõ umwa ho, ammũdoothĩk hinnia eet õmmõtõ ꞌcĩg adak helleggeri. Baa abĩllaa eeta tĩko ꞌrẽẽna 13nẽ utuvvuyyiõõ moloohaa cobbi ĩĩtõ, “Yeesu, Makayyioohit, tamaatĩheeta!”

14Ma acĩn Yeesu ĩhõõggõ ho, ĩĩnnĩk, “Õõt etereꞌthieek paadĩrꞌnya eleeti cugguung.” Ma baa õõta, iꞌnginõõthĩ helleggeri eleetini noho matadaꞌnyak hũbũttaathõ nẽẽg vẽlẽk lõꞌngõõc.

15Ma adtuuha umwaa ngaatĩ abũnnayyĩ ho, õbõda ĩdĩhĩtha Nyekuc ꞌjieena moloohaa cobbi. 16Nĩngĩtĩ aku ẽttẽẽdĩ looc ꞌthõõnĩĩ cĩg Yeesu nẽ atal ĩnõõnnõ gẽrrẽẽt. Nẽ baa ĩĩn ẽẽtĩ tĩho eet cĩ looc cĩ Thamaria.

17Ma nĩngaata, ijin Yeesu ĩhõõggõ ĩĩnnĩk, “Hõllõngaa nooyyia hatĩ ĩĩn eeta ꞌcĩg eelliaa ho õmmõtõ? Õõt tũrkũwwec ĩĩna? 18Inni hĩĩ eet cĩ looc cĩ ꞌrĩĩng dioo, ꞌcĩ õbõda aku anneek Nyekuc ĩlaallẽ ho?” 19Nĩngĩtĩ annẽẽkĩ Yeesu eet nicci, “Ẽlẽ, tĩnga bĩtõ, aaꞌnyi lemiiniti cunni bũna.”

Habuccieet cĩ Nyekuci

(Tigiil Maatteeo 24:23-28, 37-41)

20Ma ho, ijinit Variꞌtheei ũgẽẽgĩ Yeesu kõr ꞌcĩ occa hatĩ akuuni habuccieet cĩ Nyekuci. Ẽdẽcĩ nẽẽ ĩhõõggõ anneek, “Aitiõõ habuccieet cĩ Nyekuci hõllõngaa aku ꞌgõõlaa ꞌcĩ occa acinnu niiga, 21hode ꞌgõõlaa ꞌcĩ aĩnnĩ eeta, ‘Habuccieet cĩ Nyekuci cieeni,’ hode ‘Habuccieet cĩ Nyekuci caanĩ,’ hĩnĩngĩtĩ aau habuccieet cĩ Nyekuci hĩ ngagiit ngaati ẽlẽk.”

22Nĩngĩtĩ aduhaakĩ Yeesu nuyyiook annẽẽkĩ, “Au hatĩ waathinniooha ꞌcĩg adiim acinnu Ngeertĩ Eeto, nẽẽthĩ hinnia, aitiõõ hatĩ hõllõngaa acinnu. 23Nẽ hatĩ ma anneekuung eeta, ‘Ĩnõõnnõ caanĩ!’ Hode, ‘Ĩnõõnnõ cieeni!’ Ma hanũooꞌthu ĩhõõggõ. 24Hĩnĩngĩtĩ aaĩ hatĩ kõrra ꞌcĩ akuuni Ngeertĩ Eeto hĩ tammu ꞌcĩ ammadĩ nẽ ũttũhũl hẽẽtkujjieen hĩ looc vẽlẽk. 25Nẽẽthĩ, nga hĩdĩmanĩ thõõth cieeni, accananni nõõ hatĩ nẽẽ gẽrrẽẽt nẽ ũtũbũrĩt eeta cĩg irkiꞌnyia niccig.

26“Ma ikia Ngeertĩ Eeto, aaĩ hatĩ hĩ waathinniooha baag Nõõa. 27Baa attumanni eeta ara aduhi, ahũdĩ, nẽ ũꞌthũwattõõ ĩꞌthõng kõr baa adukni Nõõa haahũl nẽ iita ucuddia maama ĩhõõggõ vẽlẽk hĩ lõõcĩ ꞌthĩĩ.

28“Baa aaĩ noho buúk, korriook baag Lõõtĩ. Baa ꞌthẽk ara eeta duhẽẽnĩt hĩ hũdẽẽnĩt, hĩ tũũnyẽnĩt, hĩ kanniinit hĩ tehenyiinit. 29Ma baa kõr ꞌcĩ ĩꞌngaannĩ Lõõtĩ ꞌThõõdõma ho, udhukia ꞌgwaa ꞌcĩ aaburii padtahac hẽẽtahujjieen nẽ ũtũũth ĩhõõggõ vẽlẽk hĩĩ lõõcĩ ꞌthĩĩ.

30“Aaĩ ꞌthẽk hatĩ hoti buúk kõr ꞌcĩ uppwaannanĩ Ngeertĩ Eeto. 31Kõr tĩho, aꞌnyĩĩk eet ꞌcĩ aaĩ ꞌcieethaa cĩnnĩ lokora, hiittiõõ hõllõngaa allũũcĩ aĩ hũũk hittiha ijjio ꞌcieetõõ. Noho buúk, aꞌnyĩĩk eet ꞌcĩ aaĩ manatõõ hiittiõõ hõllõngaa obodeek ꞌgiimwa õlõ. 32Ummuhuttooth thõõth cĩ ngaa cĩ Lõõtĩ! 33Ẽẽtĩ ꞌcĩ attĩman aĩ hũꞌthũũtĩ rũgẽt cĩnnĩ, adhuheek hatĩ tuu nẽ ẽẽtĩ ꞌcĩ adhuheek rũgẽt cĩnnĩ tuu, aꞌthũũnnĩ hatĩnĩ. 34Haduhaakuunga, eeta ꞌramma ꞌcĩg oogin ꞌrõõha hõdẽẽthõng baalin niccia, õkõõĩ hatĩ Makayyioohiti hõdẽẽthõng nẽ ũtũngoothĩk umwaanĩ. 35Nẽ ngaaĩ ꞌramma ꞌcĩg ereki ngaatĩ hõdẽẽthõng, õkõõĩ hatĩ Makayyioohiti hõdẽĩ nẽ ũtũngoothĩk umwaanĩ. 36Ma aattĩg hatĩ eeta ꞌramma manatõõ, õkõõĩ hatĩ Makayyioohiti hõdẽĩ nẽ ũtũngeek umwa.”

37Nĩngĩtĩ ajini nuyyiooha annẽẽkĩ, “Adĩmanni hatĩ thõõth ciee ngaana Makayyioohit?”

Ẽdẽcĩ Yeesu anneek, “Ngaatĩ adaaknĩ ẽẽtĩ, alũtoothĩk ꞌthẽk hatĩ hodobwaana.”

Currently Selected:

ꞌLuuka 17: did

Highlight

Copy