ꞌLuuka 14

Yeesu õlõõ cĩ Variꞌtheetto

1Kõr umwa cĩ ꞌYiommaanõ, baa õkõ aduhi Yeesu õlõõ cĩ Variꞌtheenit umwa ꞌcĩ agayyi gẽrrẽẽt. Nĩngĩtĩ arũũrrĩ eeta ĩnõõnnõ, 2nẽ baa ammũdeek abĩlĩ eet umwaa nĩngaata ꞌcĩ iii athĩna hĩ ꞌthoo. 3Nĩngĩtĩ ajini Yeesu Variꞌtheei hĩ ꞌlimmanniook ꞌcĩg aga nyattal gẽrrẽẽt annẽẽkĩ, “Aũlan nyattaala ngaatĩ occa aaꞌnyĩhõõthĩkĩ ẽẽtĩ ꞌcĩ õmmõõrĩ hũbũna Kõrraa cĩ ꞌYiommaanõ?” 4Ĩjjaaki hinnia nẽẽg vẽlẽk kim, nĩngĩtĩ ahumi Yeesu eet ꞌcĩ iii athĩna hĩ ꞌthoo ho hũbũna nĩngĩtĩ ĩꞌthõõĩkĩ hũũk.

5Ma nĩngaata, ijin Yeesu ĩhõõggõ ĩĩnnĩk, “Má ꞌyioko hudhuhoothĩk ngeertĩ eet umwa hõrggẽẽnaa cunuung hode olĩ võhõõratõõ, hõllõngaa occa agurraaku niig ĩnõõnnõ battaali kõr tĩho noho, tananga Kõrraa cĩ ꞌYiommaanõ?” 6Ĩjjaaki tarĩ nẽẽg vẽlẽk kim noho.

Ma hẽtẽrꞌtha makaaꞌthĩt cunni

7Ma baa adtuuha Yeesu hẽẽrõn ẽbẽra dtaabĩt ꞌcĩg obbitig ꞌcĩg occa aattiyyi eeta ꞌcĩg obbitig ko, uduha thõõth ꞌcĩ awantoothĩk ko ĩĩ, 8“Ma auyyi eet umwaa karramaawaa cĩ nyahũũtaaõ, ma hõkõ haaĩ dtaabawaa cobbi. Horoong ꞌyioko baa avva baattĩ olu eet umwa cobbi ꞌcĩ ĩllõõannii nganiita. 9Má ikia ẽẽtĩ tĩho, aku hatĩ baattĩ olu nẽ iinnihii, ‘Ẽlẽ, aꞌnyĩĩka dako nõõ dtaaba cunni hataa eet icci.’ Ma nĩngaata, aggammi hatĩ ngaaoni ngaatĩ õkõ aayyi dtaabawaa ꞌcĩ hidici. 10Nẽẽthĩ, ma auyyi ẽẽtĩ ngaamwaanĩ, bĩĩt au dtaabawaa ꞌcĩ hidici, hátĩ ma aku baattĩ olu ho, aku hatĩ anneeki, ‘ꞌGõõna, tĩnga bĩĩt au dtaabawaa cobbi hata.’ Ĩnõõ thĩ hatĩ ꞌcĩ itieelini eeta vẽlẽk hõrggẽẽnaa cĩ heerinnioohu nĩngaata. 11Ẽẽtĩ ꞌcĩ õdõng ẽlẽ cĩnnĩ ꞌgoonoginni vẽlẽk, arritanniaak hatĩ looc. Nẽ ẽẽtĩ ꞌcĩ arritan ẽlẽ cĩnnĩ, odoꞌngi hatĩnĩ.”

12Nĩngĩtĩ annẽẽkĩ Yeesu baattĩ olu, “Ma aꞌnyahi hatĩ gõõng ꞌgẽẽn õlõõ cunni, ma havva ꞌgoonogu hode ꞌgotoonogu hode ittioonniok, hode balliook ꞌcĩg arũmeennu. Má avva ĩhõõggõ, horoong hatĩ au avvaanni nẽẽg buúk nganiit horumwa nẽ ũdũmanit ꞌgẽẽn baa aaꞌnyihi nii ĩhõõggõ ho. 13Nẽẽthĩ, ma aꞌnyahi karrama, tũvva ꞌguurthettiaak hĩ ꞌngoolliak hĩ rubenniaak. 14Ĩnõõ ꞌcĩ hatĩ aggatanni Nyekuci nganiita. Tananga aitiõõ nẽẽg hõllõngaa adũmanniina, adũmannii hatĩ nii kõr ꞌcĩ arũgnaanĩ eeta ꞌcĩg abũnnaa daahĩtha.”

ꞌLimman ꞌcĩ awantoothĩk karrama cobbi

(Tigiil Maatteeo 22:1-10)

15Ma baa athĩhĩ eet umwaa ꞌcĩ arũmĩ hĩ Yeesu nĩngaata thõõth icci ho, ikia othoothĩk nẽẽ Yeesu ĩĩnnĩk, “Aggatanĩ ẽẽtĩ ꞌcĩ hatĩ adak karrama habuccieetaa cĩ Nyekuci.”

16Ẽdẽcĩ Yeesu anneek, “Baa aaĩ eet umwaa ꞌcĩ akũmaneek karrama cobbi gẽrrẽẽt nẽ ũtũvva hẽẽrõn ꞌcĩg mẽẽlĩg ꞌrĩng. 17Ma baa ũkũmanoothĩk ꞌgii vẽlẽk, ĩꞌthõ dticciannioohit cĩnnĩ hũũk huduhaak eet ꞌcĩg adiim nẽẽ ho hĩĩnnĩk, ‘Iita, ũkũmanoothĩk ꞌgii vẽlẽk.’

18“Ĩlõõrĩth hinnia eeta ꞌcĩg adiim nẽẽ ho vẽlẽk hõdẽĩ hõdẽĩ. Ẽdẽcĩ ꞌcĩ oou aĩ, ‘Ẽlẽ, occa hõllõngaa hakuuni, nga hũũta mana umwa aayyiohoothong noho, ĩꞌnya nõõ hũũk hĩcĩnõ.’

19“Aĩ umwaa, ‘Ẽlẽ, nga hũũta olĩꞌnya cĩg kanniittak õmmõtõ aayyiohoothong, haĩ ꞌyioko nuun hũũk hĩttĩman hatĩ occa akannĩ.’

20“Ẽdẽcĩ tarĩ umwaa aĩ, ‘Ẽlẽ, occa hõllõngaa hakuuni, baa nga haꞌngĩdĩ ibiaali noho.’

21“Nĩngĩtĩ õbõdaanĩ dticciannioohiti aku aduhaakĩ makayyioohit cĩnnĩ thõõth icci. Ma nĩngaata, ikia ĩlĩĩlĩ makayyioohiti gẽrrẽẽt nẽ uduhaak dticciannioohit cĩnnĩ ĩĩnnĩk, ‘Viir hataman, bĩĩt ꞌgoolliohĩĩ cĩg ꞌtaaũnaak nẽ ũũk ũlũtaahaa hullaha hĩ tuhuulliak hĩ rubenniaak hiita.’

22“Ma baa õbõda dticciannioohiti ho, ikia uduhaak makayyioohit ĩĩnnĩk, ‘Makayyioohit, hĩdĩmana hĩaa aduha niina, nẽẽthĩ, nga maka nĩngĩtĩ ꞌcĩ occa aattiyyi eeta ũgẽẽgĩ.’

23“Nĩngĩtĩ annẽẽkĩ makayyioohiti ĩnõõnnõ, ‘Bodooth ꞌgoolliohĩ hĩ olooyyiohĩĩ ꞌcĩg aattiyyiaa battaala hata vẽlẽk nẽ ũllũnganaa eet hiita, hátĩ hĩbbĩt ꞌcieeth caannĩ jurrung. 24Aitiõõ ꞌthẽk hatĩ eeta baag haavvi naa hõllõngaa atarĩ ꞌgẽẽn cĩ karrama caannĩ ho.’ ”

Pĩĩrnanĩt ꞌcĩ hĩĩnnĩ nuyyiook cĩg Yeesu

(Tigiil Maatteeo 10:37-38)

25Baa õõkõr eeta ꞌcĩg mẽẽlĩg gẽrrẽẽt hĩ Yeesu, nĩngĩtĩ ũũkõthõõthĩkĩ Yeesu ĩhõõggõ nẽ ĩĩnnĩk, 26“Ẽẽtĩ ꞌcĩ aku hĩ nganĩĩt nẽ nga hataarõthĩ maaꞌnyĩ hĩ aatĩnnĩ hĩ ngaa cĩnnĩ hĩ lõhõlĩ cĩgĩnnĩg hĩ ꞌgõtõõnõgĩ hĩ ngõõnõgĩ, hode rũgẽt cĩnnĩ dẽẽdẽ, hõllõngaa occa ũũppan ngaatĩ ĩĩnnĩ nuyyioohit caannĩ. 27Nẽ ẽẽtĩ ꞌcĩ hõllõngaa irriongan hurucce cĩnnĩ nẽ ũnũa nganĩĩta, hõllõngaa ĩĩn nẽẽ buúk nuyyioohit caannĩ.

28“ꞌYioko hidiim hẽtẽhẽny ẽẽtĩ umwaa hõrggẽẽnaa cunuung ꞌcieeth, hõllõngaa occa nõõ aaĩ loota nẽ ummuk, hatĩ má aꞌnyak ꞌrabbẽẽt ꞌcĩg ũũppan ngaatĩ ẽdẽcaakĩ ꞌcieeth? 29Hĩnĩngĩtĩ má iꞌthianaanĩ nẽẽ ẽhẽnyĩt ꞌcieeth nẽ hõllõngaa ũũlũ ngaatĩ ẽdẽcaakĩ, au hatĩ arannĩ eeta ĩnõõnnõ aĩ, 30‘Iꞌthianaaĩ baa nẽẽꞌthẽk ẽẽtĩ ẽtẽhẽnyõõ nẽ bẽrẽ aꞌnyamanẽẽhĩ ꞌgõõla.’

31“Má hĩĩ ꞌcĩ adiim aruhõõnĩ habuui ꞌcĩ aꞌnyak ũũrũta aalibꞌnya õmmõtõ haaga hĩ habu ꞌcĩ aꞌnyak ũũrũta aalibꞌnya hẽẽn ꞌramma, hõllõngaa nõõ occa aaĩ loota nẽ ummuk hatĩ occa ũũlũ? 32Má acĩnoothi hõllõngaa occa ũũlũ, occa ꞌthẽk ĩꞌthõ eet cĩgĩnnĩg, hátĩ nga aattiyyiaa mĩrõha ꞌrẽẽna, hõõt haꞌnyahit ganõn. 33Nẽ ꞌgõõlaa cĩ, hiꞌthihi eet ꞌcĩ occa ĩĩn nuyyioohit caannĩ, hatĩ nga hũtũngeek ꞌgii vẽlẽk.

Immile hĩ Lanyit

(Tigiil Maatteeo 5:13; Maarko 9:50)

34“Abũnnaa immilla, nẽẽthĩ, má iittiõõ mũccarõõnĩ cĩnnĩ tõõ, occa hatĩ nga aku ammũccarĩĩ tarĩ hutuno? 35Iittiõõ hõllõngaa abũnnaa ngaatĩ hõꞌngõõtanẽẽkĩ ꞌthẽẽm hode cooni, ikia udduutoothĩk tuu haaga.

“Aꞌnyĩĩk eet ꞌcĩ aꞌnyak ĩtat hĩthĩhõ.”

Currently Selected:

ꞌLuuka 14: did

Highlight

Copy