Yõaannẽ 10

Tũhayyioohit ꞌcĩ abũnnaa hĩ aꞌtha cĩgĩnnĩg

1Baa õthõõth Yeesu aĩ, “Haduhaakuung dĩdĩ, ẽẽtĩ ꞌcĩ hõllõngaa aduhun logguur cĩ aꞌthaannu hattũũgaa cobbi nẽ ĩꞌngõtha araana ꞌgõõlaa umwaanĩ huduhuna ĩĩttõõ, ĩĩn nẽẽ igorriaahit. 2Ẽẽtĩ ꞌcĩ adukna hattũũgaa cobbi, ĩĩn tũhayyioohit cĩ aꞌthaannu. 3Abbuuhik bekioohiti cĩ hattuugu tũhayyioohit cĩ aꞌthaannu hattũũg nẽ ĩthĩhĩt aꞌtha molook cĩnnĩ. Avvĩ tũhayyioohiti aꞌtha cĩgĩnnĩg ꞌthaarĩĩ cĩggĩĩng cũũmõ cũũmõ nẽ ĩꞌngĩdeek geyyia. 4Ma baa aꞌnyaha nẽẽ aꞌtha cĩgĩnnĩg vẽlẽk battaala, ikia utuanẽẽhĩ nẽẽ ĩhõõggõ nẽ ũnnẽẽcõ aꞌtha cĩgĩnnĩg ĩnõõnnõ uruta, hĩnĩngĩtĩ aga aꞌtha molook cĩnnĩ. 5Aitiõõ hatĩ aꞌtha hõllõngaa occa anũ eet ꞌcĩ ꞌrĩĩng, avvir hinnia hatĩ thõng, hĩnĩngĩtĩ hõllõngaa aga nẽẽg molook cĩ eet ꞌcĩ ꞌrĩĩng.” 6Baa aduhaak Yeesu eet dtẽẽllẽn iccig awantoothĩk ko, aitiõõ hinnia hõllõngaa athĩhĩ eeta thõõth ꞌcĩ aduhaak Yeesu ĩhõõggõ ho buúk.

Ĩĩn Yeesu tũhayyioohit ꞌcĩ abũnnaa

7Ma ho, uduhaak Yeesu eet tarĩ ĩĩnnĩk, “Haduhaakuung dĩdĩ, hĩĩnĩ naa hattũũg cobbi cĩ aꞌthaannu.#10:7 Aꞌtha: Ma õthõõth Yeesu aꞌtha, õthõõth nẽẽ eet ꞌcĩg ĩĩn nuyyiook cĩgĩnnĩg. 8Eeta vẽlẽk baag uwwattaa hĩ nganĩĩta, ĩĩn igorriaak hĩ ꞌloorriak nẽ baa hõllõngaa athĩhĩ aꞌtha ĩhõõggõ. 9Hĩĩnĩ naa hattũũg cobbi. Ẽẽtĩ ꞌcĩ adukna hĩ nganĩĩta, eelliaa hatĩnĩ. Adukna hatĩ nẽẽ hattũũg cobbi nẽ uduhun ũũk battaala, hĩ aꞌthẽẽtĩ ꞌcĩ õkõ ẽgĩ mudduuny.

10“Dtiic cĩ igorriaaktõ dioo ꞌcĩ aku ĩgõrꞌthĩ aꞌtha nẽ ucuhana nẽ ĩꞌthaan thõng. Nẽẽthĩ, dtiic caannĩ ꞌcĩ hakuu haaꞌnyĩkĩĩ aꞌtha rũgẽt vẽlẽk ꞌcĩ aalla ooo. 11Hĩĩnĩ naa tũhayyioohit ꞌcĩ abũnnaa. Ẽlẽmana tũhayyioohiti ꞌcĩ abũnnaa, rũgẽt cĩnnĩ, hĩnĩngĩtĩ aꞌtha cĩgĩnnĩg. 12Aitiõõ tũhayyioohiti ꞌcĩ adũmanniaa thõng, hõllõngaa ĩĩn baattĩ aꞌthaannu. Nẽ ma udtuuha nẽẽ huduumot, ũũnnĩk hinnia hatĩ aꞌtha ẽmmẽn nẽ ivvira. Nẽ ikia adak huduumotĩ aꞌtha nẽ ĩꞌthaan ĩhõõggõ. 13Avvir hatĩ ẽẽtĩ, hĩnĩngĩtĩ ĩĩn nẽẽ tũhayyioohit ꞌcĩ adũmanniaa thõng nẽ hõllõngaa aallak aꞌtha buúk.

14“Hĩĩnĩ naa tũhayyioohit ꞌcĩ abũnnaa. Haga naa aꞌtha cĩgannĩg nẽ agayyia aꞌtha cĩgannĩg buúk nganĩĩta. 15Hĩcĩ agayya nganĩĩt Baaba, haga naa buúk ĩnõõnnõ. Nẽ hẽlẽmanaa naa rũgẽt caannĩ, hĩnĩngĩtĩ aꞌtha cĩgannĩg. 16Haꞌnyahi naa aꞌtha ũgĩ ꞌcĩg nga aitiõõ logguuratõõ cĩ tõõ. Hadiimi hatĩ halũta ĩhõõggõ buúk hiita logguuratõõ cĩ. Athĩhĩ hatĩ nẽẽg molook caannĩ, ĩĩn hatĩ nyalõmaar hõdẽẽthõng nẽ ĩĩ tũhayyioohiti hõdẽẽthõng.

17“Ammĩnannaa Baaba nganĩĩt, hĩnĩngĩtĩ hẽlẽmanaa naa rũgẽt caannĩ hadaahõ nẽ hatĩ hikia hũrũga tarĩ. 18Aitiõõ ẽẽtĩ ꞌcĩ aggamaanna nganĩĩt rũgẽt caannĩ tõõ. Hẽlẽmanaa naa rũgẽt caannĩ ẽmmẽn. Haꞌnyahi naa makaaꞌthĩt ꞌcĩ hẽlẽmanaanĩ rũgẽt caannĩ nẽ hõbõdaaĩ tarĩ, hĩ baa aduhaaka Baaba.”

19Ma thooꞌthiohĩĩ cĩg vẽlẽk, iita eꞌngerrio eeta cĩg ꞌJudeei tarĩ. 20Baa aĩ eeta ꞌcĩg mẽẽlĩg, “Eet ꞌcĩ aꞌnyak lori ꞌcĩ abathĩ niccieeni nẽ adak maangõnĩ! Inni ĩthĩhĩt ĩnõõnnõ ho?”

21Nẽẽthĩ, baa õthõõth eeta ũgẽẽgĩ aĩ, “Aitiõõ ẽẽtĩ ꞌcĩ aꞌnyak lori ꞌcĩ abathĩ hõllõngaa occa õthõõth hoti. Occa gõõng aaꞌnyĩk lorii ꞌcĩ abathĩ eet ꞌcĩ rubenĩ hĩcĩnĩ hutuno?”

Ũtũbũrĩt eeta cĩg ꞌJudeei Yeesu

22Ma baa ĩĩ lõõcĩ tagĩĩth,#10:22 Tagĩĩth: Looccaa cĩ Ĩꞌthĩraẽlĩ, aitiõõ tagĩĩthĩ hõllõngaa aduhõõ hĩ tagĩĩth cĩ looc cĩnaac. Tagĩĩthĩ cĩ looc cĩ Ĩꞌthĩraẽlĩ, alalĩ lõõcĩ gẽrrẽẽt nẽ ĩtĩĩl gẽrrẽẽt. Nẽ õkõmĩ gẽrrẽẽt ngaatĩ occa ẽhẽẽrõnĩ eeta nyĩlõhẽẽnnĩĩ cĩg. baa aaĩ Yeesu ꞌJeruꞌthalẽma, adak Karrama ꞌcĩ Aggataniini ꞌCieeth cĩ Nyekuci.#10:22 Karrama ꞌcĩ Aggataniini ꞌCieeth cĩ Nyekuci: Ĩĩn ciee kõr cĩ karrama cobbi ꞌcĩ baa ammuhaanĩ eeta cĩg ꞌJudeei ꞌgattaniinit cĩ ꞌCieeth cĩ Nyekuci, baa ẽꞌthẽcan habuui cĩ ꞌGirihi ꞌcĩ haĩ Antioko Epivaane. Baa ẽẽl ꞌJuuda Makabeeo eet cĩg ꞌJudeei hitiggia habu icci looccaa cĩ Ĩꞌthĩraẽlĩ. Aꞌnyak Karrama ciee irkiꞌnyia ꞌcĩg ũũppan ꞌmiia hõdẽĩ hĩ hẽẽn tũkĩramma, baa nga hittirria Yeesu. 23Kõr niccia, baa õvvõ Yeesu halaangatõõ cĩ ꞌCieeth cĩ Nyekuci, ꞌThĩĩmaa cĩ ꞌThõlõmõõnẽ. 24Ma nĩngaata, uluttiaak eeta cĩg ꞌJudeei ĩnõõnnõ nẽ ijinit ĩĩttĩk, “Ammiꞌthẽẽnĩ thõõth ĩꞌthõng ningina? Má ĩĩnĩ Krĩstõ, duhaaheet cũrũmũũm.”

25Ẽdẽcĩ Yeesu ĩhõõggõ anneek, “Ma baa huduhaahuung ẽlẽk nẽ aalla hõllõngaa ẽlẽmmaangu noho. Thooꞌthioha ꞌcĩg hadticani naa ꞌcĩg ĩnaat eeta ꞌthaarĩĩ cĩg Baaba ho, õthõõꞌtha nganĩĩta. 26Nẽẽthĩ, aitiõõ niig hõllõngaa ẽlẽmmaangu nganĩĩt, hĩnĩngĩtĩ hõllõngaa iiginnu niig aꞌtha cĩgannĩg. 27Athĩhĩ aꞌtha cĩgannĩg molook caannĩ nẽ hagawa naa ĩhõõggõ nẽ unuyyia nẽẽg nganĩĩta. 28Haaꞌnyihi naa aꞌtha rũgẽt ꞌcĩ aalla ooo nẽ aitiõõ hatĩ nẽẽg hõllõngaa adaahĩ ũdũt. Nẽ aitiõõ eet ꞌcĩ occa avvucanaanna nganĩĩt ĩhõõggõ athĩnĩĩ cĩgannĩg tõõ. 29Ĩllõõan Baaba baa aaꞌnya nganĩĩt ĩhõõggõ vẽlẽk. Aitiõõ ẽẽtĩ ꞌcĩ occa avvucana ĩhõõggõ athĩnĩĩ cĩgĩnnĩg tõõ. 30Hĩĩgĩnna naag hĩ Baaba hõdẽẽthõng.”

31Ma nĩngaata noho, uuratta makayyiooha cĩg ꞌJudeei biyyiẽẽn ꞌcĩg adiim õhõdaanĩ Yeesu. 32Anneek hinnia Yeesu ĩhõõggõ, “Baa hĩdĩmana naa thooꞌthiok ꞌcĩg mẽẽlĩg ꞌcĩg ĩnaat eeta hõrggẽẽnaa cunuung, ꞌcĩg au hĩ Baaba. Nẽẽthĩ ꞌyioko, thooꞌthiok iigia ꞌcĩg adiim õhõdaannaangu niig nganĩĩt ko?”

33Ẽdẽcĩ eeta cĩg ꞌJudeei Yeesu anneek, “Hõllõngaa hadiimma naag hõhõdaanni nganiit, hĩnĩngĩtĩ thooꞌthiok iccig. Hadiimma hõhõdaanni, hĩnĩngĩtĩ odoomi nii Nyekuc, ẽẽtĩ ꞌcĩ holli õõ haaga nẽ idiim aarihuu ẽlẽ cunni hĩĩ Nyekuc.”

34Ẽdẽcĩ Yeesu eet cĩg ꞌJudeei anneek, “Hõllõngaa nooyyia eheeddi nyattaalaa cunuung aĩ Nyekuci, ‘Iiginnu niig nyekuꞌnya?’#Tigiil ꞌBuuk cĩ Tegellwaanu 82:6 35Hõllõngaa occa ẽppẽhanoonnu niig hĩ ꞌBuuk cĩ Nyekuci. Nẽẽthĩ, baa aũ Nyekuci eet tĩko anneek, ‘nyekuꞌnya.’ 36Inni ahaddiahaangu ĩĩttĩhaangu hadĩmani ꞌthẽccan ꞌcĩ abathĩ dtẽc ngaatĩ haĩnnĩ, hĩĩnĩ Ngeertĩ Nyekuci ho? Nẽ nẽẽ tarĩ, Baaba ꞌcĩ baa ẽbẽraanna nganĩĩt nẽ ĩꞌthõõawaa hikia loota nĩnga ho. 37Má hõllõngaa hadĩmani naa thõõth hĩ baa adĩman Baaba, ma thĩ nga hẽlẽmmaangu nganĩĩta. 38Nẽẽthĩ, má hadĩmani naa thooꞌthiok ꞌcĩg adĩman Baaba, tananga hiittiõõ hõllõngaa ẽlẽmmaangu nganĩĩta, elemit ꞌthĩ nẽẽ thooꞌthiok ꞌcĩg ĩnaat eeta ho, hátĩ agaac ĩĩtõ, aaĩ Baaba hĩ nganĩĩta nẽ haau naa hĩ ĩnõõnnõ.” 39Ma nĩngaata, idiimito eeta cĩg ꞌJudeei aggamit Yeesu tarĩ, alĩĩta hinnia Yeesu ĩhõõggõ thõng.

40Ma ho, abaahĩ Yeesu hidioo cĩ ꞌJõrdanĩ baakĩta, ngaatĩ baa aggamẽẽkĩ Yõaannẽ eet baattithimo baa waathinnioohĩĩ ꞌcĩg oou. 41Nĩngĩtĩ auuni eeta ꞌcĩg mẽẽlĩg hĩ ĩnõõnnõ nẽ ĩĩtõ, “Tananga nga hĩdĩman Yõaannẽ thõõth umwa ꞌcĩ ĩnaat eeta, baa nẽ ikia ĩĩ thõõth ꞌcĩ aduha nẽẽ, hĩnĩngĩtĩ Yeesu ho dĩdĩ.” 42Ma nĩngaata, iita elemit eeta ꞌcĩg mẽẽlĩg thõõth cĩ Yeesu.

Currently Selected:

Yõaannẽ 10: did

Highlight

Copy