Саалтыр 24
24
1Давид псалома.
Эйиэхэ, Айыы Тойон, дууһам үөһэ дьулуһар.
2Айыы Таҥарам, Эйиэхэ мин эрэнэбин;
миигин кыбыстыыга киллэртэримэ,
өстөөхтөрбүн сэтэрэтимэ.
3Эйиэхэ эрэнээччилэртэн ким да кыбыстыбатын,
Эйигин утары уодаһыннаахтык туруммут, ол сааттын.
4Ыйан биэр миэхэ, Айыы Тойон, Бэйэҥ суолларгын,
үөрэт Эн ыллыктаргынан сылдьарга.
5Салай Бэйэҥ кырдьыккар, үөрэт миигин;
Эн буолаҕын мин быыһабыллаах Таҥарам,
Эйиэхэ хайа да күн эрэнэбин.
6Ахтан-санаан кэл, Айыы Тойон, үйэлэр тухары уларыйбат
амарах сыһыаҥҥын, бигэ тапталгын.
7Ахтыма эдэр сааһым аньыытын, сокуона суох дьайыытын;
үтүө санааҕыттан миигин амарахтык аҕын, Айыы Тойон!
8 Айыы Тойон үтүө санаалаах, Кини кырдьыгы көрөр,
ол иһин аньыылаахтары көнө суолга үөрэтэр.
9Көрсүө-сэмэй дьону кырдьыкка салайар,
көрсүө-сэмэй дьону Бэйэтин суолугар такайар.
10Кини кэс тылын, Кини туоһутун тутуһааччыга
Айыы Тойон суола барыта – бигэ таптал уонна кырдьык.
11Бэйэҥ аатыҥ туһугар, Айыы Тойон,
буруйбун бырастыы гын, улуу буруйу мин оҥорбуппун.
12 Айыы Тойонтон куттанар дьон кимнээҕий?
Айыы Тойон кинилэри талыахтаах суолларыгар үөрэтиэҕэ.
13Оччоҕо дьоллоох-соргулаах буолуохтара,
оҕолоро сири-уоту бас билэн олоруохтара.
14 Айыы Тойон кистэлэҥэ Киниттэн куттанар дьоҥҥо ананар,
Кини кэс тылын ирдэбилэ кинилэргэ арыллар.
15Мин хараҕым хаһан да Айыы Тойонтон арахпат;
Кини мин атахпын илим ситимиттэн араарар.
16Оо, хайыс мин диэки, миигин абыраа-аһын,
суос-соҕотохпун мин, баттана-үктэнэ сылдьабын.
17Олус да элбээтэ сүрэҕим муҥа-таҥа,
өрүһүйэн таһаар миигин бу кутурҕантан.
18Көр мин түбэспит эрэйбин-муҥмун, кыһалҕабын;
аньыыбын-харабын барытын бырастыы гын.
19Көр өстөөхтөрүм төһө үксээбиттэрин,
хайдах курдук миигин өлөрдүү абааһы көрбүттэрин.
20Араҥаччылаа дууһабын, өрүһүйэн ыл миигин,
Эйиэхэ эрэммит киһи кыбыстыыга кииримиим.
21Эҥкилэ суох ыраас сигили уонна кырдьыгы тутуһуу
миигин харыстыахтыннар;
Эйигин мин туорхаһыйа кэтэһэбин.
22Айыы Таҥара, Израилы бары эрэйиттэн өрүһүй.
Currently Selected:
Саалтыр 24: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
