MARK 9
9
1 #
Mak 13:30; Met 10:23; Luk 22:18 Che amah in ankuunga asonei, “Atak a keiin nannihta kisonchou, chunna mii ste onna ngirra ammei anmahva Ringpu in tuuisoh inruuia kurung huunna a athlengnohmiil kthita matemnoh tuei.”
Ameel Amthlei
(Met 17:1–13; Luk 9:28–36)
2 #
Met 17:1–8; Mak 5:37; 13:3; Luk 9:28–36; 2 Pit 1:17,18 Che niruk aknua Jisu in Pitar leh Jems mahche John soh inruuia aphurh eiche ankaang muulla anrouva kalsei; che anmah anmaikuunga amah ameel amthleipei, 3#Met 28:3amah puunreichu intlelitsa, inngoubengsa, thaleina puunsuk tukhat inkho mainanga mangou cheknoh tuei 4Che ankuunga Elaijah leh Moses thlengsa; che anmah in Jisu soh trongjousei. 5Pitar in Jisu ninga ason, “Lulok inih in onna iam thra, thlaam inthum seemrei, inkhat in nangtu che inkhat in Moses tu mahche inkhat in Elaijahtu.” 6Alamva amah in jangkisonme romnoh, alamva anmah in ralla intrisei. 7#Met 3:17; Mak 1:11; Luk 3:22; Jon 12:28–29; 2 Pit 1:17–18Che sumphai in anchunga abahpei, “Mah i keiin kirilvol Kisakupa amah in ason rungaive.” 8Che kak hanga invella an an in tukhatkho muhnohsei chuta Jisu akrouta anmuhningsa.
9 #
Met 17:9–13; Luk 9:36 #
Mak 8:30; 5:43; 7:36 Che anmah in muul chungnata anjung in, miivaa Asa kupakha thinata chek a aringnohmiil, anmah in anmuhkha tukhat kuungkho son janoh tuta ankuunga tranga atih ei. 10Chunna aksuuk kharella anmah in anroua anrilla ansihpei, thinata ringi jangta asonnameta inruisei. 11#Met 11:14Che anmah in akuunga anrui, “Jarella ringjih lulok in Elaijah matsah a thlengtu antihme?” 12#Mak 8:31; 9:31; 10:33Che anmahta asonei, “Poot naamte amlengnatu Elaijah in thlengtu; che miivaa Asa kupa rella khatloh a amjihme, amah in klah knang khalmo aphahtu che injahna amnohluunga aminang tupotme? 13Chuta keiin kisonchou mah chuvah Elaijah kha thlengsa, amahrella anjih khananga, anmah in akuunga anrilpella antlohjakha antlohpei.”
Thranoh Li in Anruuipi Naokhat Jisu in Amthrat
(Met 17:14–21; Luk 9:37–43)
14 #
Met 17:14–18; Luk 9:37–43 Che anmah in aroikuunga anthlenglaia, miitam in anmahta anlomkha anmah inkho anmuhpei, che ringjih lulok in anmahsoh trong inngeia amsei. 15Che kak hanga miitam in amahta anmuhlaia, khalmoa salungkhousei, che tlaanna amahta anlousoongpei. 16Che amah in ankuunga aruiei, “Jangta nannih in anmahsoh intelchoume?” 17Che miitam kaarna inkhat in amsang, “Lulok, kisakupa nikuunga kithlengpi, alamva trong suuknoh li in amahta asuurpei; 18che mah li in asuurlaia, amah in kuleia inriil inriilsa; che amchilkha inthruh mahche ahakho amket amket che mah chukhopnoh a akehkut kaia khalmo klahsa; chunna mah ita manomnatu niroi ankuunga kison in cheknohsei.” 19Chunna amah in ankuunga amsangei, “Ah, malot amnoh ringnatluun, jikcha soot a keiin nannihsoh inruuia kdou umangme? Naokha kikuunga keithlenve.” 20Che anmah in nao kupakha amahkuunga anthlenpei; che li in amahta amuh in, kak hanga inlat inlitsa, abaoa amchilkho suuksa. 21Che Jisu in apakuung aruipei, “Jikcha soot a mainanga suuksame?” Chunna amah in atih, “Nao aveilainata. 22Che amah in injomma meikaar mahche tuiisuunga chong chong, amahta mamaangnatu aksuul; chuta nangin nichek namnehta tlohchek cheleva, kannihta kanirilvolro che kanimjoomro.” 23#Met 17:20; Luk 17:6; Mak 11:22–24Chunna Jisu in akuunga ason, “Nangin chekcheleva; poot annamte amlot miikuung avah veikir.” 24Kak hanga nao apa in trap a onga ason, “Keiin kamlot; malot a inleuh sanglakho kamjoomro.” 25Che miitam inlomma tlaanna anthleng amuh in, Jisu in seengnoh lita saalla ason, “Nang trong suuknoh mahche makuurpang li, keiin jathang nikuunga kamlanche, amahkuung nata inthruhro, che veikhat inlenga luutnohro.” 26Cheva naoin onga atrapche aknua amahta trihkhopna veia akchutpei, mahcheva inthruhsa, che nao kupakha akthi ruungnangsa; chunna aktam in antihpei, “Amah i thisa.” 27Chuta Jisu in akutta akaiche amthohpei, cheva inthousa. 28Che amah in innsuunga aluutlai, aroi in inruktea anruipei, “Jarelna kannihva manom cheknoh ungme?” 29Che amah in ankuunga asonei, “Mainangi jakhat inkho manom cheknohtu chuta ngen in.”
Jisu in Athihsam Relna Veikhat Trong
(Met 17:22–23; Luk 9:43–45)
30 #
Met 17:22–23; Luk 9:43–45 Anmah in Kalili vanna mah chunnata sehsei, amah atakta tukhat ningkho marom indah; 31#Mak 8:31; 10:33alamva aroita matheih a ankuunga asonei, “Miivaa Asa kupakha miikut a amilantu, che anmah in anthattu; anthatche, nithum aknua amah in veikhat ringtu.” 32#Jon 12:16Chuta amah in asonkha lou theihnohsei, che anmah in akuunga ruikho trihsei.
Tunang in Akliinrem Vei ume?
(Met 18:1–5; Luk 9:46–48)
33 #
Met 18:1–5; Luk 9:46–48 Che anmah in Kaparnaum a thlengsei; innsuunga a amlai anmah kuunga aruiei, “Jangta nannih in lam in intelchoume?” 34#Luk 22:24Chuta anmah in rimta amsei; alamva khatleh khat in tunang in akliinrem umeta lamma intelsei. 35#Met 20:26,27; 23:11; Mak 10:43,44; Luk 22:26Che anmah in inboksei che somleinihta aongpei; chunna anmah kuunga asonei, “Tukhat in matsahremtang tihle, annaamte ankaar a juktoolremtu che annaamtevaa roijuih veitu.” 36#Mak 10:16Che amah in nao inkhatta alohche anmah akaar a asih, akutbaanga akonche, ankuunga ason ei, 37#Met 10:40; Luk 10:16; Jon 12:44; 13:20“Tukhat in mah nao nanga kikminga louchoule keita nanloh ang; che tukhat in keita keilou choule, keita keilounohchou chuta keita kamthlah amahta nanlohpei.”
Inihta Iniandahnoh Miikha Inih turelna
(Luk 9:49–50)
38 #
Luk 9:49–50; 11:23; Met 12:30 John in amahkuunga ason, “Lulok, mii khat in nang nikminga khousaar amnom kannih in kanmuh, che atlohnohnatu kannih in kankhaam, alamva amahva inihta inihjuihnoh.” 39Chuta Jisu in asonei, “Amahta khaamnohve; alamva akliin thlouta kikminga atlohche sootnohveia aknua kikuunga thranoh trongtu tukhatkho amnoh. 40#Met 12:30; Luk 11:23Alamva tukhat in inihta indahnoh eile anmahvah inihtasei. 41#Met 10:42#Met 10:42Alamva atak a keiin nankuunga kisonchou, mah chuvah nannihva Khrista ming akphurh miichouta tukhat in tuii chaplakhat nan iinnatu nanimlanle, amah atlohmankha tiknikho maangnohtu.”
Alehting Tlaaknatu Madoi
(Met 18:6–9; Luk 17:1–2)
42 #
Met 18:6–9; 5:29–30; Luk 17:1–2 “Tukhat in keita kamlot mii ankaarna andihkhatta aleh tlaaknatu suulleva aringa sumlung imthoiche tuiiboom suunga ilon in amah turelva ralla thratu. 43#Met 5:30Che nang nikut in nangta aleh a nakthlakleva, mahkha tanmotro, athih amnoh mei, repnanga nikut innih inruuia nitlakngutva nikut tua nangin akringa niluut in ralla thratu. 44Mah khanna aklungin thinohluung che meikho thinohluung. 45Che nang nikeh in nangta aleh ah nakthlakleva, mahkha tanmotro; repnanga nikeh innih inruuia nitlakngutva nangin nikeh tua akringa niluut in ralla thratu. 46Mah khanna aklungin thinohluung che meikho thinohluung. 47#Met 5:29Che nang nimit in nangta aleh a namthlakleva, mahkha kholro; nimit innih inruuia repnang nitlakngutva nimit khalekru a Ringpu vaa kurung huunna niluut in raalla nangtu thratu. 48Mah khanna aklungin thinohluung che meikho thinohluung. 49#Met 5:13; Luk 14:34–35Alamva mii naamteta mei in machih am alnanga am al umang. 50#Met 5:13; Luk 14:34,35; Kol 4:6; 1 Thes 5:13Machih i thra, chuta machih in a alta maangleva, khatloh a nangin nim al umangme? Nankaar a machih ma amve, che inkhatleh khat leh oi veive.”
Currently Selected:
MARK 9: TARAOBSI
Highlight
Share
Copy

Want to have your highlights saved across all your devices? Sign up or sign in
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.