ZEKHARIYA 14
14
Jerusalem nu Mizzatentithu
1Apvüwa na ajüh kekaghaten tsathangwa tsüna tetsakidha. Tsü tsüwi nyu na Jerusalem shuya, nu nthu tuwi na shukeya tsanqaithu tsüpi gishüya ben. 2Apvüwa na mizzatentithu tsüdi ssighu sengho Jerusalem wi aghi saben. Anyunutiwa tsü yaya, ajjenthu shuya, nu nzathu messameshü saben. Anyithu gishü pahan na kushinyi sa wa, isala kepathu tsü ssinu anyunutiwa wina bvü nben. 3Tsaseng wi Apvüwa na shula ma kheni kesa ti mizzatentithu tsü ssisa ben. 4Ma tsü tsüwi Jerusalem na nishuwa Oliv Yikha miwi ngan ben. Isanu nishu wina wa nidu kecu Oliv Yikha tsü gishü pi keni sa nu manyi jüwi ketijü kedi kesü saaben. Ayikha tsü gishü pahan na aghawa nu pahan na acülawa saben. 5Nthu na yyiketijü hawa na ayikha pvüdhi sen nu pahanwa wa keben wi tsüna bvüaben, nthu bamyithu na Judah Kadimi Uzziya tsüwi ameghükuju wi kebvü ti nthu la bvüben. Apvüwa iNyiza na tangnyilothu tsüdi ssinu ma gweghe ghoden.
6Tsü tsüwa na kegho wi kese nyelela akejan, 7nyelela kejang na nbendha. Ciwi keshüthangla ghaja tsüwi lela ghanan kewegü na benden. Khathansha wi hati ha saaben khe Apvüwa ketan chüben.
8Tsüwa tsathang na kegho wi Jerusalem wina atssü kemetha na lle shhugho nu gishü pahan na llesen Keshü Tssükedone wi wa nu kepawa na llesen Mediterranean wi duaben. Tsüna amapi chuli pathsü nu mazu wi lela lle waben. 9Isanu Apvüwa na ayyi tsüdi miwi Kadimi saaben; anyi tsüdila ma pi Anyiza sa nu ma kinyi nu ma nyan tsü chüben.
10Aghawa Geba wina wa acülawa Rimmon kecu ayeku maben pi ketijü saaben. Isala Jerusalem tsü maben ben nu ayyi tsü kevü miwi misiki saaben; anyunutiwa na Benjamin Kaghapeng-jenka wina wa kheni kaghapeng-jenka kesü keben pen Accügwen Kaghapeng-jenka kecu, nu Hananel Ducükezhü wina wa kadimi kisengtssü kemisügüpen kecu saaben. 11#Ccü 22.3. Anyithu na ciwi yazishu hang, keyasa na mathu kepateqhe ben nbendha.
12Apvüwa na khuma-khujü qhethiketen kesa kesü sengho mizzatenti tsüdi miwi chi nu Jerusalem ssinu aghisaben. Mathu na hangkeben wi mathu sa na bighe wa; mathu nyon nu mathu milithu na bighe waben.
13Tsü tsüwi Apvüwa na mathu sapi kivvü nu messi thsü nu anyi tsüdila ma kekheghewa kwen ghanya nu tsü ssisaben. 14Judah nyithu Jerusalem wi aghisaben. Mathu mizzatentithu keben-keyeng tsüdi — suna, rükatssü, nu athsümeni sha ntsawa shu yaben.
15Khumakhujü qhethiketen kesa kesü na ghinyithu kemnanpen wi asahangthu tsüdi — goru, gada kizzawa, sunsiesa, nu gadathu miwi la ghoaben .
16 #
Lev 23.39-43. Tsaseng wi Jerusalem ssikesa mizzatentithu tsüdi wi hang kebenthu na amapi kaghapengla ciwi wa kadimiwa Kemisintsa Apvüwa kinyi nu Kelishu Kho kemini tsü saaden. 17Keujüla mizzatenti kesü le kesü lela wa Kemisintsa Apvüwa tsüpi kadimiwa sala nkinyi mvu lethu, mathu yyiwi atsangho chicü nben. 18Keujüla Ejipt nyithu na Kelishu Kho nsamvu lethu, Apvüwa na kesun pi mizzatenti kesü le kesü lela nwa mvula kesathu miwi kechi khumakhujü tsüpi mathu miwi gho thsüaben. 19Keujüla Ejipt nu mizzatenti kepathu tsüdi Kelishu Kho kemini tsü nsa lethu, kemeten ha mathu miwi ghoaben .
20Tsü tsüwi goruthu sun wi kehuki amighe wi lela hati zhükiben: “Satemetha pi Apvüwa cüdha.” Kekinyijjen wi apfüthu na kekinyipen tuwi akhuzzathu ti metha ben. 21Jerusalem nu Judah tsüdi wi Kemisintsa Apvüwa kekinyi wi kesen ghena apfü tsüdi khuthi pi makepa sa ben. Anyi ahhansha sapi kekinyithu na tsüthu pi ahhanshathu sa tsü shvu ben. Tsü tsüwa na kegho wi Kemisintsa Apvüwa Kekinyijjen wi asenkesa kesüla nmila ben.
Currently Selected:
ZEKHARIYA 14: RENGNBSI
Highlight
Share
Copy
Want to have your highlights saved across all your devices? Sign up or sign in
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
