KEKULI 20
20
Macedonia nu Akhaya wi Kewa
1Kekivvü tsü kecen seng wi Paul na kenondithu cighu nu saketezü jüh khi pi kiza nu mathu kemehai sa benlo kiza nu Macedonia wi wa. 2Ma ayyi tsüthu pvüdhi wa ketsijüh khi pi anyithu satezü, nu ma Akhaya wi ghoya. 3Ma asha kecheng ciwi ben. Nu ma Siriya wi wale kiden keben wi Judah nyithu na ma miwi acho sa keben chüya nu ma Macedonia yyi pvüdhi sen nu wha nengle südheya. 4Berea wina kegho Sopater tsa Purhu, Thessalonika wina kegho Aristarka nu Sekunda manyi, Derbe wina kegho Gaya, Asia yyi wina kegho Tukhika nu Trofima manyi, nu Timothi hathu na ma ssi wa. 5Mathu na atu wina wala Troa wi ikhang hie ben. 6Azimi nkechi Mesa pi Kemishu Kho seng wi ikhang na Filippi wina ahunjjen wi wa ghanan manga seng wi Troa wi mathu cuya nu ikhang na ciwi ghanan tagü ben.
Paul na Asakhenwa Troa Kehhainan
7Tugho ghanan aghaja wi ikhang na gweghe dsajjü le saghuya. Paul na ma dhitsüwa wi bvüa keten ghena ma ajüh khi pi anyithu kiza wala ghaja cancüla wi cu. 8Ikhang na keccünengli keben pen ajjenshha tangwa wi ahula kejon na qheben. 9Ciwi kepvünyi kesü ma nyan Eutuka kesa na ajjenkubhi kete wi donkiben, Paul na ajüh kesie khi wa kesalina ma jen mvu pfüpfü wa nu jenchi ntsa keben wi ajjenshha kechengwa wina ayyi wi qanca dua. Mathu na wa ma pieki wa nan shü benla. 10Isala Paul na cüla ma khün pieya nu khi, “Nthu hatha n-nala, ma khilila hangben.” 11Tsaseng wi ma ajjenshha tangwa wi kila amesa pakhhi dsaya, nu mathu wi ajüh khineng wala ghanenwa aghani keshhugho cu, nu bvüa. 12Mathu na pvüzawa tsü kahang ssi whala ajjen wi leben cca ben wa.
Troa wina Mileta wi kewa
13Ikhang na atuwa sala wa Asso wi Paul ssinu ahunjjen wina wale sa. Ma ikhang na tsüti salo kiza, kepaghenanye ma ayyi wi alentsen sen nu ciwi waden. 14Ma Asso wi ikhang metuya nu ikhang ma ssinu ahunjjen wina Mitulen wi wa. 15Ciwi na dhitsüwa ikhang ahunjjen wina Khio wi ghoya. Dhitsüwa wi Samo cuya, nu kecheng ghanan wi ikhang wala Mileta cuya. 16Paul na Efesa pvüdhi wale südheya kesalina Asia wi matsü ndedi mvula sa, kepaghenanye ma saya kemehai chu Pentekost tsathang wi Jerusalem wi benle kesalina kaghaji ntsa saben.
Paul na Efesa Keshenpfüthu wi Ajüh Sakhen Kekhi
17Paul na Mileta wina Efesa wi keshenpfüthu na ghola ma metulo kesa ketsijüh kesunchi. 18Mathu na gho cukeya wi Paul na mathu kiza, “Hi ghola Asia yyi cuya tegü wina gho nansü kecu khati nu nthu ssiben khe nthu na chüben. 19Judah nyithu cho ghena matsü nkemehai hi wi kegho wi lela hi Apvüwa magha nyi sala kimenni nu ihacücala hi kekuli sale! 20Hi nthu ghena kemehaiwa tsü mangla nkekhenengla pi anyithu jawi nu ajjen wi la nthu sansi. 21Hi leben khapegheya nu Anyiza wi ghola Jisu Khrista nondiyalo kesa pi Judah nyithu nu Grik nyithu la kizadha. 22Hi khili Kemetha Ghamu jühkina nu Jerusalem wi wale bendha, isala hi ciwi khati saben khe nchü. 23Anyunuti tsüdi wi lela Kemetha Ghamu na atssüzü kesa nu ketizen kesa na hi hie benle kesa kitsan chiden. 24Isala hi Anyiza nanketizen wina Jühtheü Kemehaiwa ha pi khilo nu Apvüwa kekuli salo pi hi kecü tsü sacenle kesalina hi hi kahang ha pi mangla nkenye saden.
25“Ae, hi nthu tsüdi jawi wa nu Anyiza Kadiyyi cüki pi nthu sansi cüdha. Nu khili nten na nthu hi nmu nengdha kesa chüben. 26Tsalina hi nansü ha pi nthu kiza ntsa chiben: keujüla nthu pahan na bhatagha lela ikuti nmidha. 27Kepaghenanye hi mangla nkekhenengla Anyiza kemeshen tsüdi pi nthu kiza chidha. 28Tsalina nthu ketanla nthu ghena nu Kemetha Ghamu na nthu pi hie thsü ketheng nenithu tsü nonccayalo. Anyiza kemehu, ma ma Tsawa pi ahhansha kesa wina sa kethengwa tsü hie kemehai saya. 29Kepaghenanye hi kebvü seng wi adenni ma yen nkemehai ntsa na nthu jawi gho nu akhang hawa ha yasa cüben kesa hi chüben. 30Nu nthu jawi anyi pahan shagha milikemesa khi pi kenondithu mechu sen nu mathu nie wa thsüaben kesa hi chüben. 31Tsalina hi amapi kecheng ghaja ghanan n-nganla ihacüca nu nthu sansi kesa tsü meshenyalo.
32“Nu hi khili nthu pila Anyiza kwen wi nu ma nanketizen wi tsü chidha, tsüna nthu sa pi züya thsü mehai nu kemihhi pi ma nyithu ghena ketheng tsü pi nthu cüben. 33Hi tho ji la rükatssü, suna, athsümeni tsüthu ntepagha. 34Nthu na chüben, hi ikwen pi kuli nu pi hi keniethu nu hi la nsenthu keyishü tsüdila saya. 35Hi nthu ya kekuli tsüdi wi apiketsü sa nu mangla nkenyethu kiqaya thsüle nu Apvüwa Jisu na kekhi jüh, ‘Nyu wi mukeyawa nyela pi nyu kecüwa na kemihhi ntsa,’ kesa ha meshenyalo kesalina ha pi nthu ccücaben.”
36Paul na ajüh tsü khidhi meyi mathu ssinu akhhutsüdu mathu tsüdi ghena kekhie sa. 37Isanu mathu tsüdi wa ma khüntagüya nu ma kimang nu qai. 38Mathu tsüdila ma mathu wi ma nmu nendha le kekhi ghena ahathana ntsa sa. Isanu mathu na Paul ssisen wala ahunjjen wi du thsüa.
Currently Selected:
KEKULI 20: RENGNBSI
Highlight
Share
Copy

Want to have your highlights saved across all your devices? Sign up or sign in
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.