HABAKKUK 1
1
1Hile Npugü le jolo pe sidyükesha gü Habakkuk ketsü.
Habakkuk le Joketsin Zokemvu Kenya Kethyü
2Oh Npugü, nle akehi nyüshü kethyü mhundyü, lo nle gwakemvu nyu agun kenishü kela mhundyü ano dithen lakhi nka ke keche hibin mon? 3Nle nyu thyüo ano kenjün kethyü tsühontse kethyü hyu hü nla? Nle dihontse nyhen-o thyükezü tsühontse kethyü nri thonlo bin la? Kenke lo gwakemvu aphu ahun bin, lo lihiki aphu terikethyü lo kekega le bin laso. 4Tejvü gü le kvumvula lo a-min ndi laso, lo joketsinkezo tho thyümvu. Gwakemvu nyu le kemitsin nyu nye gwa, lo joketsin kejo sen kecha bin laso.
Npugü le Kenikeshü
5Tsüsika Npugü le a-temi dan ka zo, “Hagun hunkebin senye dan nribin lo, tsonlo hagun le kehyugü genyu dun thyüti. Ale tha nme thyüshü titse lo hagun le tsü rüla nyüloe tenyen loho. 6Ale rigwakemvu, matse bin hükemvu temi Babilon nyu dan no kekvu sen loti. A-le kazü kecha dan so kvulo nrün genyu tson chü laso. 7Anyugun le kenshvu lo kenrin rüla zo, lo anyugun le ketekho-o anyugun npvü anyugun khipe tejvü nme thyü bin nyo.
8“Anyugun keru le meren dan nyeki-e nmhenkvu, teken le n nyon kebin nyeki-e a-rigwamvukvu. Anyugun keru kezen nyu le kazü nithen ki ryü, anyugun keru dan le kazü nkhwen. Anyugun le logi le a-chvü hü kethyü hontse nye tsüryü jü.
9“Anyugun rihü dan le rio rigwakemvu thyü ryüjü, tson-o anyugun gükethyü nyu temi aphu kerü shvu. Anyugun do le chon pe hachon hontse. 10Anyugun le raja nyu kemeni lo keda nyue shwinyü. Chwida kenko nme-e anyugun khinlo mvu-- anyugun nnyon khwen pe tsü ntsunlo-o lolo lahü. 11Tson-o anyugun le tsangkenbu hontse tsüryüo ndi lahü, temi hidan le anyugun kekvu le anyugun tero.”
Habakkuk le Npugü ka kenyo Ni
12Npugü, sokeri ka nyu nle Sunggigü. Nle a Sunggigü, nshün lo kethonthen bin hü. Npugü, a Sunggigü lo akeno gü, nle Babilon nyu kejülo-o anyugun thyü nko pe anyugun no shaja pe agun tsü. 13Ai nle dihontse temi rigwakemvu hidan nyhenlo bin la? N yhütyü le gwakemvu nri nrün nshün rile, lo nle temi dan le gwakemvu thyü kebin tsü nribin lo kemvui. Tsonlo nle nyuthyüo tsüdan le anyugun nyeki kemitsin nyu nke kebin hinyu ma tselo binla?
14Nle dihontseo temi lope tsehü nmvue nyukhu a-kentsen lo a-tsonketsin kendi dan hontse logwa tila? 15Babilon nyu le temi lope tsehü hontseo hükhuvü pe nsü, Anyugun le joh ka tsüdan jon pe süo tenkelo genyu sherhün-o nra sen bin! 16Anyugun le anyugun joh-e rüshvu, lo kerüshvu kechae thyü pe tsüdan tsü, kechamvu le anyugun joh dan le kegwatsin dan pe anyugun tsü lohü.
17Anyugun le kethonthen anyugun jenthon sen-o shwikenjün ndi tse me dushvu bin ti ole?
Currently Selected:
HABAKKUK 1: REGSBSI
Highlight
Share
Copy
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
