BINZEN 12

Sunggigü le Abram Ko Kelo

1Npugü le Abram ka zoshü, “N kazü, n shvu nnye lo Npvü ka khelao, ale kazü nme tsin pe nhishü titse kebin günyu gunlo. 2Ale ntsipwen kechon pe ntsüti, tson-o anyugun le senye keda nme thyü soryü ti. Ale jochü pe ntsüo n no zankechwi thyüti, tson-o n no megenyu jochü nme thyüti.

3Jochü pe nketsü nyu ale jochü pe tsüti. Ai shochün pe nketsü nyu ale shochün pe tsüti. Lo nge ale jochü pe senye aphu tsüti.”

4Abram le a-keyhun chen hentsenyü pvün ka Haran nyu tsonchü chwila, Npugü le a-no thyülo tse keshü hontse; Lot le a-zen-o gü. 5Abram le a-nu Sarai, a-sikezen gü nyugü Lot, lo a-le Haran nyu kequen kelo kenya lo a-go aphu zen-o Kanan kazü ki gü titse tsonchü shüla.

Anyugun le Kanan tikelo ka, 6Abram le Shechem nyu bin kenshün gü nyu Moreh ka senbin kenshün gü tilo kemvu then njwen-o kazü gü rhi gü. (Tsügwenkho ka Kanan nyu le kazü günyu yhun bin zun.) 7Npugü le Abram yhühyu thyü ryüo a-ka zoshü, “Ale pe ntsipwen tsü titse kebin kazü le hile.” Tsüselo Abram le tsüka kershvubin nme thyü pe a-yhühyu thyü keshü Npugü tsü. 8Tsüsiki a-le ketu-o tesinzin Bethel nyida gü npho kipon rincho kazü ki gü nkhün zinle Bethel lo npho zin Ai tse au jaka kensenbin nme thyülo. A-le tsünyu ko kershvubin nme thyülo-o Npugü rüshvu. 9Tson-o a-le bin me ka kelao kecha ki Kanan tesin zin gü.

Abram le Ijipt Ki Kebin

10Ai Kanan nyu chenda thyü lola, lo tsüle gwamvusa kela ge nyu Abram le tesinzin kethün-o Ijipt ki gü tsü ki bin gwa tinla. 11A-le terhi nken-o Ijipt nyu yü kejü ka, a-nu Sarai ka zoshü, “Nle tenunyu kezegwa nme. 12Ijipt nyu le nhyu shülo, nle anu le tseo a-nyugun le adushvu lao nno rhün loti. 13Tsügenyu nle a lügi letse anyugun ka zola lo; tsonyatselo n genyu ano rhün loti lo ashwi kegwa thyü shüti.” 14A-le terhi nken-o Ijipt nyu yü laryü, Ijipt nyu le a-nu le zegwasa kethyü hyushü. 15Raja hensin nyu kedanyu peha le hyushüo tsügi le zegwa letse raja gü ka zoshüla; tsügenyu a-zen raja kanyu güla. 16Tsügi genyu raja güle Abram shwikegwa thyüshü, lo tanyü, tenyü, methu, gada, do lo ut pe Abram tsüshü.

17Ai raja gü le Sarai zenlo kela genyu Npugü le kethyükenyü kenrin kethyü nipe a-ge lo rajaka nyu temi dan ge shü. 18Tsüselo Raja gü le me nipe Abram koshüo, “Nle age nyuthyü shü bin nla?” Nyuthyüo a-le nnu letse aka zomvula? 19Nyuthyüo a-le nlügi letse shüo ano a-lope anu thyü titse zen lo hü nla? Nnu le hika re; a-zen lo-o tinla. 20Raja gü le ahza pe a-temi dan tsüshüo anyugun no Abram, a-nu lo a-hon aphu sen a-kazü nken chwila.

Currently Selected:

BINZEN 12: REGSBSI

Highlight

Copy