MARK 8

Mipi Sang Li Vakna

(Matt. 15.32-39)

1Huai nite in, mipi tampitak a hongom nawn ua, nekding bangmah a neikei ua, aman a nungzuite a sam a, a kiang uah, 2“Mipite tuin ka kiang ah ni thum a omta ua, nekding bangmah a neih louh ziak un ka lainat mahmah hi. 3Anngawl in a inn uah paisak leng lamkal ah a bah kha ding uh; khenkhatte houh a hongpaina uh a gamla mahmah hi” a chi hi.

4A nungzuite’n, “Mi’n hiai gamdai ah koi a tanghou in ahia hiai mite a hihtai theih ding uh?” chi in amah a dawng uhi.

5Huan aman, “Tanghou phel bangzah na nei ua?” chi in, amau a dong a. Amau, “Phel sagih” a chi uhi.

6Huan mipite lei a tu ding in thu a pia a; tanghou phel sagih a la a, kipahthu a genkhit in a balkham a, a ma ua lui ding in a nungzuite kiang ah a pia a; huchi in mipite ma ah a luita uhi. 7Ngasa tawmchik leng a nei ua; aman a vualzawl a, huaite leng a ma ua lui ding in thu a pia hi. 8Huchi in a ne ua, a kham chiat ua; a khamval nen uh bawm sagih dim in a luak uhi. 9Amau sang li vel ahi ua; aman amaute a paisakta hi. 10Amah bel a nungzuite kiang ah long ah a tuangpah a, Dalmanutha gam a tungta uhi.

Chiamtehna Ngetna

(Matt. 12.38-42; 16.1-4)

11Pharisaite a hongpai ua, amah ze-etna ding in, amah apan van a kipan a chiamtehna zong in amah a hong sel uhi. 12Huan amah a lungsim in nakpi’n a nak kuaikuai hi, “Bang a chia hiai khangte’n chiamtehna zong uh ahia? Chihtaktak in k’on hilh ahi, hiai khangte kiang ah chiamtehna himhim piak ahi kei ding” a chi hi.

13Huchi in amaute paisan in long ah a tuang nawn a, galkhat lam ah a paita hi.

Pharisaite Leh Herod Silngou

(Matt. 16.5-12)

14Huan a nungzuite’n tanghou a tawi mangngilh ua, tanghou phel khat kia lou ngal long ah tanghou dang himhim lah a neikei uhi. 15Huan, aman a kiang uah, “Pharisaite silngou leh Herod silngou lak ah kiveng unla, pilvang un,” a chi hi.

16Amau, “tanghou i neih louh ziak eive” chi in a a kingaihtuah uhi.

17Jesu’n huai a theih in, a kiang uah, “Bangdia tanghou na neih louh ziak ua kingaihtuah na hi ua? Tu nangawn in na theisam kei u maw? Theisiam lou lai maw? Na lungtang uh na khauhsak ua hia? 18Mit nei napi in na mu kei ua hia? bil nei napi in na za kei ua hia? theigige lou maw? 19Sang nga lak a tanghou phel nga ka balkhap lai in a nen bawm bangzah ahia na luahdim uh?” a chi hi. Amau, “Sawmlehnih,” a chi uhi.

20Huan sang li lak sagih ka balkhap lai in, a nen bawm bangzah ahia na luahdim uh? a chi a. Amau a kiang ah, “Sagih” a chi uhi.

21Aman a kiang uah, bangchidan a tu nangawn a theisiam lou lailai na hi ua?” a chi hi.

Bethsaida Mittaw Hihdamna

22Huai nung in Bethsaida a hongtung uhi; Huan a kiang ah mittaw a honpi ua, amah khoih ding in a ngen uhi. 23Aman mittaw khut a len a, khua a kipan a pikhia hi; a mit ah chilsia in a tung a khut a koihkhit in, “Khua na mu thei hia?” chi in a dong hi. 24Amah hong dak khia a, “Mite ka mu; singkung pai bang in ka mu” a chi hi. 25A mit ah a khut a koihnawn a, aman a en gegu a, a hong dam maimah a, bangkim chiantak in a mu theita hi. 26Huan Jesu’n, khua ah leng lut ken chi in, a in ah a paisakta hi.

Peter In Jesu Khrist Hihna Phuangkhia

(Matt. 16.13-20; Lk. 9.18-21)

27Huan Jesu leh a nungzuite a hongpai zel ua, Kaisaria Philippi khua te a hongtung ua; huan paikawm in a nungzuite kiang ah, “Mite’n kei kua ahi a honchi ua?“ chi in, a dong hi.

28Amau “Baptispa Johan ahi, a honchi ua; midang in Elijah ahi, a honchi ua; khenkhat in bel, zawlnei kuahiam ahi, a honchi uh” a chi uhi.

29Huan aman a kiang uah, “Ahihleh nou kei kua ahi n’on chi ua?” chi in, a dong hi. Peter in a kiang ah “Khrist na hi” chi in, a dawng hi.

30Huan aman a tanchin kuamah hilhlouh ding in a chi bikbek hi.

Jesu’n A Sihna leh Thohnawnna Ding Genkholhna

(Matt. 16.21-28; Lk. 9.22-27)

31Huan Mihing Tapa in thil tampi a thuak dingte, upate, siampu liante, laigelhmite deihlouh a a om ding, hihlup a a om ding leh ni thum nung a a thohnawn ding thute amau a hilh hi. 32Huai thute chiantak in a gen hi. Huan, Peter in amah a pituam a, a tai hi. 33Amah bel a hong kihei a, a nungzuite muh in, Peter a tai a, “Setan, ka nung ah pai in, Pathian thilte ngaihtuahlou in, mihing thilte na ngaihtuah zaw” a chi hi.

34Huan mipite, a nungzuite toh a sam a, a kiang uah, “Kuapeuh in honzuih a ut leh amah kimangngilh in, a Kros pua in honzui hen. 35Kuapeuh a hinna humbit ut in a tan ding a; kuapeuh keimah ziak leh Tanchinhoih ziak a a hinna tan in a humbit ding hi. 36Min khovel a pum in a nei henla, a hinna tan leh, amah ading in bang a phatuam dia? 37Min a hinna tang in bang a pe thei dia? 38Kuapeuh tulai khang angkawm leh gilou chingte lak a keimah leh ka thu zumpih, Mihing Tapa in, angel siangthoute toh a Pa thupina a kivan a a hong hun chiang in, huai mite a hon zumpih thuk sam ding” a chi hi.

Currently Selected:

MARK 8: PAITBSI

Highlight

Copy