MARK 7

Thugousiah Thu Dotna

(Matt. 15.1-9)

1Huan Pharisaite leh laigelhmite lak a mi kuate hiam, Jerusalem khua a kipan a kiang ah a hong kikhawm uhi. 2Huaite’n nungzui khenkhatte’n khut ninpi a tanghou a nek uh a mu ua, nin, chih tuh, sillou, chihna ahi.

3Pharisaite leh Juda tengteng in Upate thugousiah a pom chinten ziak un a khut uh hoihtak a a silkei uleh a ne ngeikei uhi. 4Dawlmun a kipan a a pai un leng a kisil phot kei uleh a ne ngeikei uhi. Huan thugousiah dang tampi a chin uh a om, nou, bel, taubelte sil thute ahi.

5Huchi in Pharisaite leh laigelhmite’n, “Bang achia na nungzuite’n upate thugousiah bang a omlou a, khut ninpi a tanghou ne uhiam” chi in, a dong uhi.

6Aman a kiang uah, “Isai in nou milepchiahte thu a na genkhol dik hilhial ve,

‘Hiai mite’n a muk un a hon zahtak ua, a lungtang un hon gamlat uh’ a chi hi.

7‘Mihing thupiakte a sinsak lel ziak un a hon biak uh a thawn ahi,’ chih gelh bang in.

8Pathian thupiakte nelhsiah in mihing thugousiah na len chinten ua eive” a chi hi.

9A kiang uah, “Na thugousiah uh na zuih theihna ding ua Pathian thupiakte na deihlouh uzaw, lem na thei hial ve ua. 10Mosi in, Na nu leh na pa zahtak in, Kuapeuh a nu hiam a pa hiam gensia si mahmah hen, a chi a; 11Nou hichibang in na chi ua, min, a nu hiam, a pa hiam kiang ah, n’on phatuampihna ding Korban ahita, a chih leh, huai tuh Pathian kiang a piak, chihna ahi. 12A nu ading hiam, a pa ading hiam a bangmah hihsak na phal nawn kei nak uh. 13Na thugousiah uh na piak sawnsawnna un Pathian thu bangmahlou na suah uhi; huai bang thil tampi na hih uh” a chi hi.

Mihing Hihninte

(Matt. 15.1-9)

14Huan mipite a sam nawn a, a kiang uah, “Na vek un ka thu ngaikhia unla, theisiam un:” 15Mihing pawlam a kipan asung a lut amah hihnin thei bangmah a omkei; mihing sung a kipan a hongpawt, huaite mihing hihnin ahizaw hi. 16Kuapeuh zakna ding bil nei in, za hen!” a chi hi.

17Mipite inn a a lutsan nung in a nungzuite’n gentehna thu amah a dong chian uhi. 18Aman a kiang uah, “Nou leng huchitel a theihsiamna neilou na hi u maw? Bangpeuh pawlam a kipan a mihing sung a lut in amah a hihnin theikei chih na theikei ua hia? 19A lungtang sung a lutlou a, a gilpi sung a a lut zawk ziak in leh dailenna a pawt khemai a hih ziak in” a chi a. Huai tuh an chiteng a siang, a chihna ahi.

20Mihing sung apan hongpawt, huai ngeingei in mihing a hihnin nak ahi. 21Mihingte sunglam lungtang a kipan in, ngaihtuahna giloute a hongpawt nak hi: 22Kingaihna, guktakna, tualthahna, angkawmna leh enna, gitlouhna, khemhatna, bevenna, hazatna gensiatna, kisaktheihna leh, haihuainate ahi. 23Hiai thilgiloute tengteng sunglam a kipan a hongpawt a, mihing a hihnin nak hi” a chi hi.

Jentel Numei Hihdamna

(Matt. 15.21-28)

24Huan a thou a, huai a kipan in Tura leh Sidon uk ah a paita hi. Inn ah a lut a, kuamah theih a deihkei a; himahleh a kisel theikei hi. 25Huchi in numei khat, a tanu naupang chik dawininpai in, a tanchin a naza a, a khebul ah a khupboh hi. 26Numei Grik mi ahia, Siriaphoinisia gam a piang ahi. Aman a tanu sung a kipan a dawi delhkhe ding in a ngen hi. 27Aman a kiang ah, “Tate hongvah masa uhen aw; tate tanghou laksak a uite kiang a paih kilawmlou hi” a chi hi.

28Numei in a kiang ah, “Toupa, hihzaw ahi a, himahleh dohkan nuai a uite’n leng tate tanghou nen a ne zel sam vaw oi” chi in a dawng hi.

29Aman, a kiang ah, “Na thugen ziak in paita in: dawi na tanu sung a kipan a pawtta hi” a chi hi.

30Huan a inn ah a paita, a tanu, dawi in a pawt khiaksan, lupna a lum a va muta hi.

Bengngong Pautheilou Hihdamna

31Huan Tura gam a kipan a pawtnawn a, Sidon khua tawn in Dekapolis gam Paikan in Galili dil a tungta hi. 32Mi khat bengngong, pau leng pau kichian theilou a kiang ah hon tonpih ua, a tung a khut koih ding in a ngen uhi. 33Aman mipi lak a kipan in amah kia in a pituam a, a khut zungte in a bilsung a khoih a, chilsia in a lei a khoihsak hi; 34Vanlam en in a khoisa huthut hi. Huan a kiang ah “Ephatha” a chi a; huai bel, “Kihongta in” chihna ahi.

35Huchi in a bilte uh a hong kihong a, a leigakna leng a hong kiphel a, chiantak in a pautheita hi. 36A kiang uah, kuamah hilhlou ding a chi bikbeka; himahleh a nak kham phet in, a nak tangkoupih zawsem uhi. 37“Aman bangkim hoihtak in a hih a; bengngongte nangawn a pausak zel,” a chi ua, lamdang a sa mahmah uhi.

Currently Selected:

MARK 7: PAITBSI

Highlight

Copy