GENESIS 35

Bethel Ah Pathian In Jakob A Vualzawl

1Huan, Pathian in Jakob kiang ah, “Thou inla, Bethel ah hohtou in, huai ah teng in. Na u Esau a kipan na taimanglai a, na kiang a kilak Pathian ading in huai ah maitam doh in” a chi hi.

2Jakob in a inkuanpihte leh a kiang a om tengteng kiang ah, “Na lak ua om gamdang pathiante koihmang unla, kihihsiangthou unla, na puansilhte uh kheng un. 3I thou ding ua, Bethel ah i paitou ding uh. Ka lungzin lai a hon dawng, ka paina a ka kiang a om zel Pathian ading in maitam ka doh ding” a chi hi. 4Huchi in gamdang pathiante a khut ua om tengteng leh a bil ua bilbah a bah tengteng uh Jakob kiang ah a pia uhi. Jakob in Sekem khaw kiang a tosaw nuai ah a phum hi.

5A pai ua, a kim ua khuate’n a lau mahmah ua, Jakob tapate a delhkei uhi. 6Jakob Kanan gam a Luz khua a tung a, amah leh a kiang a om tengteng toh, Luz Bethel ahi. 7Huai ah maitam a doh a, a u a kipan a taimanglai a, a kiang a Pathian a kilak ziak in huai mun min El Bethel a sa hi. 8Rebekah donnu Deborah a si a, Bethel khang a tawsaw nuai ah a vui ua; a tawsaw min Allon bakuth a sa uhi.

9Jakob Padan-aram gam a kipan a hongtun in Pathian a kiang ah a kilak nawn a, a vualzawl hi. 10Pathian in a kiang ah, “Na min Jakob ahi a; na min Jakob ahi nawn kei ding a, na min Israel ahi zawta ding” a chi hi. Huchi in, a min Israel a sata hi. 11Pathian mah in a kiang ah, “Kei Pathian bangkim hihthei ka hi. Chi tampi suang in hongpung in. Chichih tham ngial leh chi tuamtuam omkhawm leng nang ah a hongom ding ua, na khal a kipan kumpipate leng a hongpawt ding uhi. 12Abraham leh Isak kiang a ka gam piak na kiang ah k’on pe ding. Na omlouh nung chiang in na suante kiang ah leng gam ka pe zel ding” a chi hi. 13Pathian in a houpihna mun a kipan Jakob a paitouh santa hi. 14A houpihna mun ah Jakob in suangkhuam a phut a; a tung ah dawn thillat a buak a, a tung ah sathau leng a buak hi. 15Jakob in, Pathian in a houpihna mun min Bethel a sa hi.

Rakil Sihna

16Bethel a kipan a pai ua; Ephrath khaw tunna ding gamlatak ahihlaiin Rakil in nau a veia, a nakvei mahmah hi. 17Hichi ahi a, a gim laitak in naudommi’n, “Lau ken, hiai tapa leng na nei ding” a chi hi. 18Hichi ahi a, a kha a pawtlaiin, a sita a, a min Ben Oni a sa a; himahleh a pa’n Benjamin a sa hi.

19Rakil a sita, Ephrath lampi ah a vui uhi, Ephrath khua Bethlehem khua ahi. 20A han tung ah Jakob in suang a phut a; huai tunitan in Rakil han suangphuh ahilai hi. 21Israel a pai zel a, Migdol Eder khenlam ah a puanin a kai hi.

Jakob Tapate

(1 Kron. 2.1,2)

22Hichi ahi a, Israel huai gam a a omlai in Reuben in a pa mei Bilhah a va luppiha; Israel in huai a za hi. 23Jakob tapate sawmlehnih ahi uh. Leah tapate Reuben, Jakob ta upapen, Simeon, Levi, Judah, Issakar leh Zebulun ahi uh. 24Rakil tapate Joseph leh Benjamin ahi uh. 25Rakil sikhanu Bilhah tapate Dan leh Naphtali ahi uh. 26Leah sikhanu Zilpah tapate Gad leh Asher ahi ua; huaite Jakob tapa, Padan-aram gam a a neihte ahi uhi.

Isak Sihna

27Jakob Kiriath Arba khua a Abraham leh Isak omna Mamre ah a pa Isak kiang a tungta hi. Kiriath Arba khua Hebron ahi. 28Isak damsung kum za leh sawmgiat ahi. 29Isak in a kha a khahta a, upapi tekkuna damin a si a, a chipihte kiang ah piin a omta hi. A tapate Esau leh Jakob in amah a vuita uhi.

Currently Selected:

GENESIS 35: PAITBSI

Highlight

Copy