GENESIS 33

Jakob In Esau A Kimuhpih

1Huan, Jakob a dak a, ngai in, Esau a kiang a mi za li toh a hongpai hi. Huchi in Leah, Rakil leh sikhanu nihte kiang ah a tate a omsak khipkhep hi. 2Sikhanute leh a tate a makai in a koih a, Leah leh a tate a zom in a koih a, Rakil leh Joseph bel a nanungpen in a koih hi. 3Amah a ma uah a pai a, a u kiang chin a tun masiah sagihvei leisi in a kun hi. 4Himahleh Esau amah mu ding in a tai a, a pom a, a ngawng a kun in a tawp a, a kap uhi. 5Esau a dak a, numeite leh naupangte a mu a; “N’on pite kuate ahi ua?” a chi hi. Aman, “Pathian in hehpihtak a na sikha kiang a a piak naupangte ahi uh” a chi hi. 6Sikhanute leh a tate uh a hongpai ua, a kun uhi. 7Leah leng a tate toh a hongpai nai ua, a kun ua, huaikhit in Joseph leh Rakil leng a hongpai nai ua, a kun uhi.

8Esau in, “Ka ganhon kituahpih tengpi bang na chihna ahia?” a chi hi. Aman, “Ka toupa, na hehpihna ka muh theihna ding in ka chi a ahi” a chi hi.

9Esau in, “Ken leng hau veng e, bawi aw, na neih tengteng nang a hi hen” a chi hi.

10Jakob in, “Hilou e, n’on hehpih theih leh hehpih in k’on thilpiakte hon sansak in. Pathian mel mu bang in na mel ka mu a, ka tung ah lah na kipak ngal a. 11Pathian in hon hehpih ziak leh a kiching ka neih ziak in k’on thilpiakte sang in” a chi hi. Huchi in a kun a, aman a sangta hi.

12Esau in, “Kisa in, pai ni, na ma ah ka pai ding” a chi hi.

13Aman a kiang ah, “Naupangte a neulai dan uleh belamhon ka kiang a omte a nou a hih dan uh, ka toupa, na thei hi. Ni khat lel leng hatlua a, a hawl uleh ganhon tengteng a sivek ding uhi. 14Ka toupa, hehpih in na sikha ma ah pai inla; Ken Seir tang ah, ka toupa, na kiang ka tun mateng, ka ma a gante a paitheih hun bangbang uleh naupangte a paitheih hun bangbang un, awlawl in k’on masuan zel ding” a chi hi.

15Esau in, “Ka kiang a om mi khenkhat hon nutsiat leng a ke” a chi hi. Aman, “A poimawh khol ahia? Ka toupa mitmuh in hehpihna hon musak in” a chi hi. 16Huai ni mah in Seir tanglam zuan in Esau a kiknawnta hi. 17Jakob Sukkoth mun ah a pai a, amah ading inn a lam a, a gante adin leng buktate a lam hi. Huaiziak in, huai mun min Sukkoth a sa hi.

18Jakob Padan-aram gam a kipan a hong a, lungmuangtakin Sekem khua, Kanan gam a om, a tung a, khopi ma ah a puanin a zakta hi. 19A puanin zakna mun, Sekem pa Hamor tate a kipan, dangka za khat in a lei hi. 20Huai ah maitam a doh a, a min El-Elohe-Israel a sa hi.

Currently Selected:

GENESIS 33: PAITBSI

Highlight

Copy