GENESIS 32

Esau Tuak Dingin Jakob A Kisakhol

1Jakob a pai zel a, Pathian angelte’n a na tuak uhi. 2Jakob in amau a muh in, “Hiai Pathian giahphual ahi” a chi a; huai mun Mahanaim a sa hi.

3Jakob in, Edom gam, tua Seir gam ah a ma ah thangkoute Esau kiang ah a sawl hi. 4A kiang uah, ka toupa Esau kiang ah hichi’n na gen ding uh. “Na sikha Jakob in hichi’n a chi. Laban kiang ah mikhual ka hi a, tutan ka om nilouh hi. 5Bawngtalte, sabiltungte leh belamte, sikhapa leh sikhanute ka nei hi. Na hehpihna ka muh theihna dia ka toupa hilh ding in mite k’on sawl hi.”

6Thangkoute Jakob kiang ah a hong kiknawn ua, “Na u Esau kiang ka va tung ua, mi za li toh nang dawn ding in a hongpai hi” chi’n, a gen uhi. 7Jakob in a lau mahmah a, a lungkhamta hi. A kiang a mi omte, belamhonte, bawnghonte leh sangawngsaute pawl nih in a khen hi. 8Esau hongpai a, pawl khat a thah leh leng pawl khat omlai taimang thei ding, a chi hi. 9Jakob mah in, “Aw ka pa Abraham Pathian, ka pa Isak Pathian, Toupa, Na gam ah leh na tanaute kiang ah pai nawnta in. k’on hih hoih ding, hon chipa, 10Na sikha tung a hehpihna na muhsak leh thutak tengteng na muhsak lak a, a neupen leng mutak ka hi kei. Hiai Jordan lui ka chiang kia toh ka kan a; tuin zaw pawl nih hial ka hong hita uhi. 11Hehpih in ka u khut a kipan, Esau khut a kipan, hon humbit in. Huchilou in zaw kei leh numei naupang tan in a honthat kha ding, chih ka lau hi. 12Nang k’on hihhoih ngeingei dia, na suante tuipi a piaunel simzohlouh tanhiala a tam bang in ka bawl ding n’on chi ngal a” a chi hi.

13Huai zan in huai ah a giakta a; a neihlak a kipan a u Esau ading thilpiak a lakhia hi. 14Kelpi za nih, keltal sawmnih, belampi za nih leh belampa sawmnih, 15Sangawngsau zatlai sawmthum a noute toh, bawngpi sawmli leh bawngtal sawm, sabengtungpi sawmnih leh sabiltung nou sawm. 16Hiaite pawl chih a tuam chiat in a sikhate khut ah a kem sak a, a sikhate kiang ah, “Ka ma ah pai galkah unla, pawl chih kalnei sak zel un,” a chi hi. 17A makaipa kiang ah, “Ka u Esau in a hontuah a, na kiang a, kua na hia? Kaw hoh dek na hia? Na ma a om kuate ahi ua? chi a a hondot leh, 18Na sikha Jakob a ahi ua; Ka pu Esau, nang ka toupa adia a hon khak thilpiak ahi. Ngai in, amah ka nung uah a om, na chi ding” chi in thu a pia hi. 19A nihna leh a thumna leh ganhon hawlte tengteng kiang ah leng, “Esau na muh chiang un huchibang mah in na gen ding uh. 20Ngai in, na sikha ka nung uah a om, chi chiat un” chi in thu a pe chiat hi. “Thilpiak ka ma ah pai leh a lung ka damsak dia, huai nung in a mel ka mu ding. Huchi in, a hon na kipahpih ding,” a chi hi. 21Huchi in, thilpiak a ma ah a pai galkah sak a; amah huai zan in a pawlte lak ah a giak hi.

Peniel Ah Jakob In Pathian A Buan

22Zan in a thou a, a zi nihte leh a sikhanu nihte leh a tapa sawmlehkhatte a pi a, Jabbok lui ngahna ah a kanta hi. 23Amau a pi a, lui a kan ua, a neih tengteng leng a kansak vek hi. 24Jakob amah kia in a omta a, mi khat toh phalvak tan a kibuan uhi. 25A zoukei, chih a kitheih in a pheipi guhtuah a khoihsak a, a kibuan lai un Jakob pheipi guhtuah a kilawita hi. 26Aman, “Honkhah in, phalvak ding ahita,” a chi hi; aman, “N’on vualzawl keileh k’on khah kei ding” a chi hi.

27Aman a kiang ah, “Na min bang ahia?” a chi a; aman, “Jakob” a chi hi.

28Aman, “Na min Jakob ahi nawn kei ding, Israel a honchi zawta ding uh. Pathian leh mihingte na buan a, na zouta ngal a” a chi hi.

29Jakob in amah a dong a, “Hehpih in na min honhilh in” a chi hi. Aman, “Bangziak in ahia ka min n’on dot?” a chi hi. Huai ah a vualzawlta hi.

30Jakob in huai mun min “Peniel” a sa hi. “Pathian a mai chin mahmah ah ka mu a, ka hinna a hawi ziak in” a chi hi. 31Peniel a khenlai in, ni a hongsuak a, amah a honsun a, a pheipi ziak in a baita hi. 32Huaiziak in, Jakob pheipi guhtuah a sadual tak a khoih sak ziak in tutan in Israel suante’n pheipi guhtuah a sadual om a ne ngeikei uhi.

Currently Selected:

GENESIS 32: PAITBSI

Highlight

Copy