MATTHAÏOS 24

U Jisu u kren shaphang ka jingpynjot ïa ka Templ

(Mrk. 13:1-2; Luk. 21:5-6)

1U Jisu u la mih bad u la leit noh na ka Templ mynba ki synran jong u ki la wan sha u ban pyn-i ïa ki jingtei jong ka. 2“Ho-oid,” u la ong, “phi lah ban khmih ïa kine baroh. Nga ong ha phi ïa kane: Yn ym don uwei u maw hangne u ban dang neh ha la ka jaka; uwei pa uwei na ki un shah pynhap.”

Ki jingeh bad ki jingshah pynshitom beiñ

(Mrk. 13:3-13; Luk. 21:7-19)

3Katba U Jisu u dang shong halor u lum ki Olib, ki synran ki la wan sha u ha kaba jar jar. “To ïathuh ha ngi lano kane baroh kan long,” ki la kylli, “bad kaei ka ban jia ban pyn-i ba ka la dei ka por ïa ka jingwan jong me bad kaba kut ka Ïa.”

4U Jisu u la jubab, “To sumar, bad wat shah ïano ïano ruh ban shukor ïa phi. 5Shibun ki briew, kiba kam ba ki kren na ka bynta jong nga, kin wan bad ong, ‘Nga long u Messaïah!’ bad kin shukor ïa ki briew kiba bun. 6Phin sa ïohsngew ïa ki jingsawa ki thma kiba hajan bad ïa ki khubor thma kiba sha jngai; hynrei wat khih khuslai. Kiba kum kine kiei kiei ki dei ban jia, hynrei kim mut ba kaba kut ka la poi. 7Ki ri kin ïaleh kawei ïa kawei pat, ki hima kin tur ïaleh kawei ïa kawei pat. Kin don ki 'nemsniew bad ki jingkhynñiuh jumai ha kylleng. 8Kine kiei kiei baroh ki long kum ki jingpang banyngkong jong ka jingsuh kha.

9 # Mat. 10:22 “Nangta ïa phi yn kem bad yn aiti ban shah pynshitom bad ban shah pynïap. Ki jaitbynriew baroh kin isih ïa phi namar jong nga. 10Shibun kin iehnoh ïa ka jingngeit jong ki ha kata ka por; kin ïashetkylla iwei ïa iwei pat bad kin isih iwei ïa iwei pat. 11Nangta shibun ki nongïathuhlypa lamler kin mih bad kin shukor ïa ki briew kiba bun. 12Haduh katta kan long ka jingsaphriang jong ka jingsniew ba ka jingieit jong ki briew kiba bun kan man khriat. 13#Mat. 10:22Hynrei uno uno uba ïeng skhem haduh kaba kut un lait im. 14Bad ïa kane ka Khubor Babha shaphang ka Hima yn ïalap ha kylleng ka pyrthei na ka bynta ka jingsakhi sha ki jaitbynriew baroh; bad nangta kaba kut kan wan.

Ka jingijli bashyrkhei

(Mrk. 13:14-23; Luk. 21:20-24)

15 # Dan. 9:27; 11:31; 12:11 “Phin ïohi ïa ‘Ka Jingijli Bashyrkhei’ ïa kaba u Daniel u nongïathuh lypa u la kren. Kan ïeng ha ka jaka bakhuid.” (Ka jingkynthoh ïa u nongpule: Da pynthikna ban shemphang aïu kane ka kit jingmut!) 16“Nangta kito kiba don ha Judia ki dei ban phet sha ki lum. 17#Luk. 17:31U briew uba don ha tnum ka ïing jong u, um dei shuh ban pynlut por ban hiar shapoh bad shim ïa ki jingdon jingem jong u na ka ïing. 18U briew uba don ha ka lyngkha um dei ban phai dien ban leit shim ïa ka jaiñkup jong u. 19A katno kan long kaba shyrkhei ha kito ki sngi ïa ki kynthei kiba armet bad ïa ki kmie kiba don ki khun rit! 20To duwai ha U Blei ba phin ym hap ban phet noh ha ka por tlang lane ha ka sngi Sabbaton! 21#Dan. 12:1; Jpw. 7:14Namar ka jingjynjar ha kata ka por kan kham shyrkhei ban ïa kano kano kaba la ju jia, naduh kaba sdang jong ka pyrthei haduh kane ka sngi. Lymne ba yn don pat kano kano kum kane. 22Hynrei U Blei u la pynduna ïa ka jingbun ki sngi; lada um shym la leh kumta, yn ym don mano mano ruh uba lah ban lait im. Na ka bynta ki briew jong u kiba u la jied, U Blei un pynduna ïa ki sngi.

23“Nangta, lada uno uno u ong ha phi, ‘Ha khmih, hangne U don U Messaïah!’ lane ‘U don hangtai!’ — wat ngeit ïa kata. 24Naba ki Messaïah lamler bad ki nongïathuhlypa lamler kin ïamih, kin leh ïa ki kambah bakhraw bad ki kamphylla khnang ban shukor wat ïa ki briew kiba la jied jong U Blei, lada ka long kaba lah. 25To shahshkor! nga la ïathuh ha phi ïa kane ha shuwa ba ka por kan poi.

26 # Luk. 17:23,24 “Lane, lada ki briew kin ïathuh ïa phi, ‘Ha khmih, u don ha ka ri shyiap!’ — wat leit shata, lane lada ki ong, ‘Ha khmih, u rieh hangne!’ — wat ngeit ïa kata. 27Naba U Khun U Briew un wan kum ka leilieh kaba thaba na shiliang sha shiliang ka sahit bneng, na mihngi sha sepngi.

28 # Luk. 17:37 “Hangno hangno ha kaba don ka metïap, ki pukni kin ïalumlang.

Ka jingwan jong U Khun U Briew

(Mrk. 13:24-27; Luk. 21:25-28)

29 # Isa. 13:10; Joel. 2:10,31; 3:15; Jpw. 6:12; Isa. 13:10; Ese. 32:7; Joel. 2:10; 3:15; Isa. 34:4; Jpw. 6:13 “Shen hadien ka jingjynjar jong kito ki sngi, ka sngi kan dum, u bnai un ym tyngshaiñ shuh, ki khlur kin hap na bneng, bad ki bor ha ka haw haw kin shah beh na ki lynti jong ki. 30#Dan. 7:13; Sekh. 12:10-14; Jpw. 1:7Nangta ka dak U Khun U Briew kan paw ha ka sahit bneng, bad baroh ki jaitbynriew jong ka pyrthei kin ïam haba ki ïohi ïa U Khun U Briew ba u wan ha ki lyoh bneng ha ka bor bad ka burom bakhraw. 31Ka turoi bakhraw kan sawa, bad un phah ïa ki angel jong u sha ki sawlyer jong ka pyrthei, ban kin lumlang ïa ki briew kiba la jied jong u na kawei ka tduh jong ka pyrthei sha kawei pat.

Ka jinghikai na u dieng Dumbur

(Mrk. 13:28-31; Luk. 21:29-33)

32“Ai ba u dieng Dumbur un hikai ïa phi. Haba ki tnat jong u ki jyrngam bad khie lung bad u sdang ban sei sla, phi tip ba ka lyiur ka la jan. 33Ha kajuh ka rukom, haba phi ïohi ïa kine kiei kiei baroh, phin tip ba ka por ka la jan ban sdang artat. 34To kynmaw ba kine kiei kiei baroh kin jia ha shuwa ba ki briew kiba im mynta kin ïap baroh. 35Ka bneng bad ka pyrthei kin leit noh, hynrei ki ktien jong nga kin ym leit noh da lei lei.

Ym don batip ïa ka Sngi bad ka kynta

(Mrk. 13:32-37; Luk. 17:26-30,34-36)

36“Pynban, ym don uno uno ruh uba tip lano kata ka sngi bad ka kynta kan wan — ym ki angel ha bneng lymne U Khun; tang U Kpa hi uba tip. 37#Jen. 6:5-8Ka jingwan U Khun U Briew kan long kum kaei kaba la jia ha ka por u Noah. 38Ha ki sngi shuwa ka jingshlei um, ki briew ki ïabam bad ïadih, ki shynrang bad ki kynthei ki ïashongkurim, haduh ka sngi hi kaba u Noah u la leit rung shapoh ka ïinglieng; 39#Jen. 7:6-24pynban kim sngewthuh kaei kaba la jia tad haduh ba ka jingshlei um ka la wan bad ka rong noh ïa ki baroh. Kan sa long kumta haba U Khun U Briew u wan. 40Ha kata ka por ar ngut ki rangbah kin ïatrei ha ka lyngkha: Ïa uwei yn shim noh, ïa uwei pat yn iehnoh shadien. 41Ar ngut ki kynthei kin don ha ka jaka tylliat kpu: Ïa kawei yn shim noh, ïa kawei pat yn iehnoh shadien.

42“To sumar, te, namar ba phim tip ha kano ka sngi ba U Trai jong phi un wan. 43#Luk. 12:39,40Lada u trai ïing u la tip ïa ka por ba u nongtuh un wan, phi lah ban thikna ba un jin da la peitmat bad un ym shah ïa u nongtuh ban prong shapoh ka ïing jong u. 44Kumta te, phi dei ban long kiba ïai pynkhreh, namar ba U Khun U Briew un wan ha ka kynta kaba phim shym khmih lynti ïa u.

U shakri uba lah ban shaniah lane u shakri u bymlah ban shaniah

(Luk. 12:41-48)

45“Uno, te, uba long u shakri uba lah ban shaniah bad uba stad? U dei uta ïa uba u kynrad jong u, u la buh ban khmih ïa kiwei pat ki shakri ban ai jingbam ïa ki ha ka por kaba dei. 46Katno uba kmen u long uta u shakri lada u kynrad jong u, u shem ba u leh ïa kane haba u wan sha ïing! 47Da shisha, nga ong ha phi, u kynrad un buh ïa uta u shakri ban khmih ïa ka jingdon jingem jong u baroh. 48Hynrei lada u long u shakri uba sniew, un ong ha lade ba u kynrad jong nga un wan slem, 49bad un sdang ban shoh ïa la ki para shakri bad ban ïabam ïadih bad ki nongbuaid. 50Nangta u kynrad jong uta u shakri un wan pat ha kawei ka sngi haba u shakri um shym khmih lynti ïa u bad ha ka por kaba um tip. 51U kynrad un ot ïa u lyngkhot lyngkhai bad un pynlong ïa u ban ïoh bynta ïa ka kupar jong ki riewarsap. Hangta un lynñiar bad kyr-iat la ki bniat.

Currently Selected:

MATTHAÏOS 24: KHACLBSI

Highlight

Copy