ÏOANNIS 14
14
U Jisu u long ka Lynti sha U Kpa
1“Wat sngewkhuslai bad sngewdiaw,” U Jisu u la ong ha ki. “To ngeit ha U Blei bad to ngeit ha nga ruh. 2Don shibun ki kamra ha ka ïing U Kpa jong nga, bad ngan leit ban pynkhreh ka jaka ïa phi. Ngan ym jin da la ïathuh ïa phi lada kam long kumta. 3Bad hadien ba nga la leit bad pynkhreh ka jaka ïa phi, ngan wan pat bad ngan shim ïa phi ha lade hi, ba phi ruh phin don ha ka jaka kaba nga don. 4Phi tip ïa ka lynti kaba ïalam sha kata ka jaka shano sha ba nga leit.”
5U Thomas u la ong ha u, “Ko Kynrad, ngim tip shano ba men leit; te kumno ngin tip ïa ka lynti ban poi hangta?”
6U Jisu u la jubab ïa u, “Nga long ka lynti, ka jingshisha, bad ka jingim, ym don uno uno u ba leit sha U Kpa lait na nga. 7Mynta ba phi la ithuh ïa nga,” u la ong ha ki, “phin ithuh ïa U Kpa jong nga ruh; bad naduh mynta phi da ithuh ïa u bad phi la ïohi ïa u.”
8U Philip u la ong ha u, “Ko Kynrad, to pyn-i ha ngi ïa U Kpa; kata ka long baroh kaba ngi donkam.”
9U Jisu u la jubab, “Naba la slem nga la don bad phi baroh; pynban mem ithuh ïa nga, ko Philip? Uno uno uba la ïohi ïa nga u la ïohi ïa U Kpa. Balei, te, me ong, ‘To pyn-i ha ngi ïa U Kpa?’ 10Hato mem ngeit, ko Philip, ba nga long ha U Kpa bad U Kpa u long ha nga? Ki ktien kiba nga la kren ha phi,” U Jisu u la ong ha la ki synran, “kim shym la wan na nga hi. U Kpa, uba ïaisah bad nga, u trei la ka jong ka kam. 11To ngeit ïa nga haba nga ong ba nga long ha U Kpa bad U Kpa u long ha nga. Lymda kumta, to ngeit namar kiei kiei kiba nga leh. 12Nga ïathuh ha phi ïa ka jingshisha: Uno uno uba ngeit ha nga un leh ïa kaei kaba nga leh — ho-oid, un leh wat ïa ki kiei kiei kiba kham khraw, namar ngan leit sha U Kpa. 13Bad ngan leh ïa kano kano kaba phi pan ha ka kyrteng jong nga, khnang ba ïa ka burom U Kpa yn ïoh pynpaw lyngba U Khun. 14Lada phi pan na nga ïa kano kano ha ka kyrteng jong nga, ngan leh ïa kata.
Ka jingkular ïa U Mynsiem Bakhuid
15“Lada phi ieit ïa nga, phin sumar ïa ki hukum jong nga. 16Ngan pan na U Kpa, bad un ai ïa phi ïa uwei pat U Nongïarap#14:16 U Nongïarap: La pynkylla hangne U Nongïarap ha ka jaka U Nongpyntngen namar ba ka kyntien Nongïarap ka kham ïar ha ka jingmut bad ka ïajan bad ka jingmut jong ka kyntien Grik Parakletos., u ban shongsah bad phi junom. 17Uta u long U Mynsiem uba pynpaw ïa ka jingshisha shaphang U Blei. Ka pyrthei kam lah ban pdiang ïa u, namar ba kam ïohi ïa u lane ithuh ïa u. Hynrei phi ithuh ïa u, namar ba u ïaisah bad phi bad u don hapoh jong phi.
18“Ynda nga leit, phin ym sah tang marwei; ngan wan pat sha phi. 19Sa tang shipor ka pyrthei kan ym ïohi shuh ïa nga, hynrei phin ïohi ïa nga; bad namar ba nga im, phi ruh phin ïoh im. 20Haba kata ka sngi ka poi, phin sa tip ba nga long ha U Kpa jong nga bad ba ma phi ha nga, kumba nga long ha phi.
21“Uno uno uba pdiang ïa ki hukum jong nga bad ngeit ïa ki u long uta uba ieit ïa nga. U Kpa jong nga un ieit ïa uno uno uba ieit ïa nga; nga ruh ngan ieit ïa u bad ngan pynpaw ïa lade ha u.”
22U Judas (ym u Judas Iskariot) u la ong, “Ko Trai, kumno ka lah ban long ba men pynpaw ïa lade ha ngi bad ym ha ka pyrthei?” 23U Jisu u la jubab ïa u, “Uno uno uba ieit ïa nga un kohnguh ïa ka jinghikai jong nga. U Kpa jong nga un ieit ïa u, bad U Kpa jong nga bad ma nga ngin wan ha u bad sah hapoh jong u. 24Uno uno u bym ieit ïa nga um kohnguh ïa ka jinghikai jong nga. Bad ka jinghikai kaba phi la ïohsngew kam dei ka jong nga, hynrei ka wan na U Kpa, uba la phah ïa nga.
25“Nga la ïathuh ha phi ïa kane katba nga dang don bad phi. 26Uta U Nongïarap, U Mynsiem Bakhuid, ïa uba U Kpa un phah ha ka kyrteng jong nga, un hikai ïa phi ïa kiei kiei baroh bad un pynkynmaw ïa baroh kaba nga la ïathuh ha phi.
27“Ïa ka jingsuk nga iehnoh ha phi, ïa ka jingsuk jong nga hi, nga ai ha phi. Ngam ai ïa ka kumba ka pyrthei ka ai. Wat sngewkhuslai bad sngewdiaw; wat sngewsheptieng. 28Phi la ïohsngew ïa nga ba nga ong ha phi, ‘Ngan sa leit noh, hynrei ngan sa wan pat sha phi.’ Lada phi la ieit ïa nga, phin kmen namar ba ngan sa leit sha U Kpa; naba u long kham khraw ban ïa nga. 29Nga la ïathuh ha phi ïa kane mynta ha shuwa ba baroh kan jia, ba kumta haba kata kan jia, phin ïoh ngeit. 30-31Ngam lah ban kren bad phi kham slem, namar u nongsynshar jong kane ka pyrthei un wan. Um donbor halor jong nga, hynrei, ka pyrthei ka dei ban tip ba nga ieit ïa U Kpa; na kata ka daw balei ba nga leh ïa kiei kiei baroh kumba u hukum ïa nga.
“Ale, ïa ngin ïaleit noh na kane ka jaka.
Currently Selected:
ÏOANNIS 14: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
