EPHESOS 5

Im ha ka jingshai

1Namar phi long ki khun kiba ieit eh jong U Blei, phi dei ban long kum ma u. 2#Eks. 29:18; Salm. 40:6Ïa ka jingim jong phi dei ban synshar da ka jingieit, kumba U Khrist u la ieit ïa ngi bad u la aiti ïa la ka jingim na ka bynta jong ngi kum ka jingainguh ba-iwbih bad ka jingkñia ba pynsngewbha ïa U Blei.

3Namar ba phi long ki briew jong U Blei, kam long kaba dei wat ban ïakren hapdeng jong phi ïa kino kino ki kam awria ne ki kam jakhlia ne ki kam kwah lalot. 4Lymne kam long kaba dei ïa phi ban pyndonkam ïa ka ktien kaba khlem akor, kren thala, ne krensih, pynban, phi dei ban ainguh ïa U Blei. 5Phi dei ban sngewskhem ba yn ym don uno uno uba awria, uba long jakhlia, lane uba kwah lalot (naba ka jingkwah lalot ka long hi ka rukom mane bleithaw) u ban ïoh bynta ha ka Hima jong U Khrist bad jong U Blei.

6Wat shah ïano ïano ban shukor ïa phi da ki ktien bieit, namar dei na kine kiei kiei ba ka jingbitar U Blei kan wan ha kito ki bymkohnguh ïa u. 7Kumta phim dei ban ïadon bynta ei ei bad kiba kum kita ki briew. 8Phi hi phi la ju long mynno mynno ha ka jingdum, hynrei namar phi la long ki briew jong U Trai, phi long ha ka jingshai. Kumta phi dei ban im kum ki briew kiba don ha ka jingshai, 9naba ka dei ka jingshai kaba pynmih ïa ka jingot kaba kyrhai ha baroh ki jinglong babha, bahok, bad bashisha. 10Pyrshang ban tip ïa kaei kaba pynsngewbha ïa U Trai. 11Phim dei ban ïadon bynta ei ei bad ki kam bym don jingmyntoi kiba ki briew ki leh, kiba long ki kam ka jingdum. Pynban wallam ïa ki sha ka jingshai. 12(Ka long da shisha kaba lehrain eh wat ban ïakren ïa kita kiei kiei ïa kiba ki leh ha kaba rieh). 13Bad haba ïa kiei kiei baroh la wallam sha ka jingshai, te ïa ka jinglong bashisha jong ki la pynpaw shynna; naba kaei kaei kaba la pynpaw shynna ka kylla long ka jingshai. 14Kata ka long balei ba la ong,

“To khie joit, me uba ïohthiah,

bad to mih na kiba ïap,

bad U Khrist un tyngshaiñ halor jong me.”

15Kumta da sumar kumno phi im. Wat im kum ki briew kiba bieit, hynrei, kum ki briew kiba stad. 16#Kol. 4:5To pyndonkam bha ïa ki kabu baroh ba phi ïoh, namar kine ki long ki sngi kiba sniew. 17Wat long kiba bieit, hynrei, pyrshang ban wad ïa kaei kaba U Trai u kwah ïa phi ban leh.

18Wat buaid da ka waiñ, ha kaba kan pynjot ïa phi; pynban, to long kiba la pyndap da U Mynsiem. 19#Kol. 3:16,17To ïakren iwei ïa iwei pat da ki ktien ha ki salm, ki jingrwai ïaroh bad ki jingrwai ba kynja mynsiem; da kaba rwai ki jingrwai ïaroh bad ki salm sha U Trai da ki jingïaroh ha ki dohnud jong phi. 20Ha ka kyrteng U Jisu Khrist uba U Trai jong ngi, to ïai ainguh borabor na ka bynta kiei kiei baroh sha U Blei uba U Kpa.

Ka kamram u Tnga bad ka Tnga

21To pyndem ïa lade iwei ha iwei pat namar ka jingsheptieng burom jong phi ïa U Khrist.

22 # Kol. 3:18; 1 Pet. 3:1 Ko ki kynthei, to pyndem ha la ki tnga, kumba ha U Trai. 23Naba u tnga u don ka iktiar halor la ka tnga kumba U Khrist u don ka iktiar halor ka balang; bad U Khrist hi u long U Nongpynim jong ka balang, ka met jong u. 24Bad kumta ki kynthei ki dei ban aiti lut ha ki tnga jong ki kumba ka balang ka aiti ïa lade ha U Khrist.

25 # Kol. 3:19; 1 Pet. 3:7 Ko ki shynrang, to ieit ïa la ki tnga kumba U Khrist u la ieit ïa ka balang bad u la ai ïa la ka jingim na ka bynta jong ka. 26-27U la leh ïa kane ban pynkyntang ïa ka balang sha U Blei da ka ktien jong u, hadien ba la pynkhuid ïa ka da kaba sait ïa ka ha ka um, khnang ban aiti ïa ka balang sha lade hi, ha ka jingitynnat jong ka baroh — kaba khuid bad khlem shah kynnoh pop, khlem ka jingthohbria ne ka jingsti ne kano kano ka jingbymjanai. 28Ki shynrang ki dei ban ieit ïa ki tnga jong ki kumba ki ieit ïa la ki jong ki met. U shynrang uba ieit ïa la ka tnga u ieit ïa lade hi. 29(Ym ju don uno uno uba isih ïa la ka jong ka met. Pynban, u bsa bad sumar ïa ka, kumba U Khrist ruh u leh ïa ka balang; 30naba ngi long ki dkhot ka met jong u.) 31#Jen. 2:24Kumba ka Jingthoh Bakhuid ka ong, “Namar kane ka daw, u briew un iehnoh ïa la u kpa bad ïa la ka kmie bad un ïalong kawei bad la ka tnga, bad ki ar ngut kin ïalong kawei.” 32Ka don ka jingmaïan kaba la pynpaw ha ka Jingthoh Bakhuid, kaba nga sngewthuh kaba thew ïa U Khrist bad ïa ka balang. 33Hynrei ka thew ruh ïa phi: Man u shynrang u dei ban ieit ïa la ka tnga kumba ïa lade, bad man ka kynthei ka dei ban ñiewburom ïa la u tnga.

Currently Selected:

EPHESOS 5: KHACLBSI

Highlight

Copy