EPHESOS 4

Ka jinglong kawei ha ka met

1Nga kyntu ïa phi, te — nga uba long u nongsah byndi namar ba nga shakri ïa U Trai; to im ka jingim kaba la thew kat kum ka rukom kaba U Blei u la buh haba u la khot ïa phi. 2#Kol. 3:12,13To long borabor kiba sngewrit, kiba jemnud, bad kiba ïaishah. To pyn-i ïa ka jingieit jong phi da kaba ïaishah iwei ïa iwei pat. 3To ïaleh shitom ban pynneh ïa ka jinglong shi tylli ïa kaba U Mynsiem u ai lyngba ka jingsuk kaba tehsong lang ïa phi. 4Don tang kawei ka met bad uwei U Mynsiem, kumba don tang kawei ka jingkyrmen sha kaba U Blei u la khot ïa phi. 5Don tang uwei U Trai, kawei ka jingngeit, kawei ka jingpynbaptis; 6don tang uwei U Blei uba long U Kpa jong u bynriew baroh, uba long U Trai halor baroh, uba trei lyngba kiei kiei baroh, bad u long ha baroh.

7Uwei pa uwei na ngi, u la ïohpdiang ïa ka jingai bakyrpang kat kum ka jingthew ïa kaei kaba U Khrist u la ai. 8#Salm. 68:18Kumba ka Jingthoh Bakhuid ka ong,

“Mynba u la kiew shajrong eh,

u la ïalam bad u ïa shibun kiba shah ringmraw;

u la ai ki jingai sngewbha ha u bynriew.”

9Mynta, ka mut aïu “u la kiew shajrong”? Ka mut ba nyngkong u la leit hiar sha kiba jylliew tam shapoh ka pyrthei. 10Kumta uta uba hiar shapoh u long uta ujuh uba leit kiew shaneng, shajrong bad sha lyndet ki bneng, ban pyndap ïa ka pyrthei baroh kawei da ka jingdon ryngkat jong u. 11U la long ma u, uba “la ai ki jingai sngewbha ha u bynriew;” u la thung katto katne ngut ban long ki apostol; ïa kiwei, ki nongïathuhlypa; ïa kiwei, ki nongïalap; ïa kiwei pat, ki nongsharai balang bad ki nonghikai. 12U la leh ïa kane ban pynkhreh ïa ki briew jong U Blei baroh na ka bynta ka kam jong ka jingshakri ba kynja mynsiem, khnang ban tei ïa ka met U Khrist. 13Bad kumta ngin ïawanlang baroh sha kata ka jinglong kawei ha ka jingngeit jong ngi bad ha ka jingtip jong ngi ïa U Khun U Blei; ngin long ki briew kiba rangbah bha, kiba kot shaduh ka rynïeng ka jinglong rangbah pura U Khrist. 14Te ngin ym long shuh kum ki khynnah, ba la pynshad kynting da ki jingat phyllung bad ka jingbeh ka 'erïong man ba ka kylla da ka jinghikai jong ki riewshukor, kiba ïalam ïa kiwei pat sha ka jingbakla da ki buit sianti ba ki pynmih. 15Pynban, da kaba kren ïa ka jingshisha ha ka mynsiem ka jingieit, ngi dei ban san ha ki rukom baroh ha U Khrist uba long u khlieh. 16#Kol. 2:19Hapoh ka jingsynshar jong u, baroh ki dkhot kiba ïapher jong ka met ki ïabiang lang sbiak, bad ïa ka met baroh kawei la bat lang da kawei pa kawei ka jingïapyndait ïa kaba ka la pynbiang. Kumta haba kawei pa kawei ka bynta kaba ïapher ka ïatrei kam kumba ka dei ban trei, ka met baroh kawei ka san bad ka tei ïa lade da ka jingieit.

Ka jingim kaba thymmai ha U Khrist

17Ha ka kyrteng U Trai, te, nga maham ïa phi; wat ïai im kum kiba mane blei thala, kiba ki jingpyrkhat jong ki kim donbor, bad kiba ki jingmut jong ki, ki long ha ka jingdum. 18Kim don bynta ha ka jingim kaba U Blei u ai, naba ki long kiba bieit tasam bad kiba eh dohnud. 19Ki la duh noh ïa baroh ki jingsngew jong ka jinglehrain; ki pynlapmiet ïa lade ha ki kam thala bad ki leh ïa baroh ki jait kam sniew khlem salia.

20Kata kam long kaei kaba phi la nang shaphang U Khrist! 21Phi la ïohsngew shisha shaphang jong u, bad kum ki nongbud jong u, la hikai ha phi ïa kata ka jingshisha kaba don ha U Jisu. 22#Kol. 3:9Kumta to iehnoh ïa u briew barim jong phi, uba pynlong ïa phi ban im kumba phi la ju im — u briew uba rim uba la nang pynjot da ki jingkwah brai bashukor jong ka. 23Dei ban pynthymmai nadong shadong ïa ki dohnud bad ïa ki jingmut jong phi, 24#Kol. 3:10; Jen. 1:26bad phi dei ban kup ïa u briew uba thymmai ïa uba la thaw ha ka dur U Blei kaba pynpaw ïa lade ha ka jingim kaba shisha kaba long kaba beit bad kaba khuid.

25 # Sekh. 8:16 Nangta, ym don shuh ka jinglamler! Uwei pa uwei u dei ban kren ïa ka jingshisha ha la u parabangeit, namar baroh ngi long ki dkhot ba ïalong lang ha ka met U Khrist. 26#Salm. 4:4Lada phi bitar, wat ai ba ka jingbitar jong phi kan ïalam ïa phi ban leh pop, wat bitar sah baroh shi sngi. 27Wat ailad ïa u Soitan. 28U briew uba ju tuh u dei ban sangeh noh ban tuh bad to un sdang ban treikam khnang ba un kamai ïa ka jingim hok na ka bynta ïa lade bad ba u lah ban ïarap ïa kiba kyrduh. 29Wat kren ïa ki ktien pynmong, hynrei, tang ki ktien kiba long ka jingïarap, kita keiñ kiba tei bad kiba ïadei tang ïa kata kaba donkam, khnang ba kaei kaba phi kren kan long kaba bha ïa kita kiba shahshkor ïa phi. 30Bad to wat pynsngewsih ïa U Mynsiem Bakhuid jong U Blei; naba U Mynsiem u long ka dak jong ka jinglong trai jong U Blei ïa phi, ka jingbahkhlieh ba ka Sngi kan poi haba U Blei un pyllaitluid ïa phi. 31To bret noh ïa baroh ka jingkthang mynsiem, ka jingkwah brai bad ka jingbitar. Keiñ noh ka jingkaw kaw, lane ka jingkrenbeiñ bad keiñ noh ki jingsngew isih la ha kano kano ka rukom. 32#Kol. 3:13Pynban, to lehsbun bad long jemnud iwei ïa wei pat, bad to ïamap iwei ïa iwei pat, kumba U Blei u la map ïa phi ha U Khrist.

Currently Selected:

EPHESOS 4: KHACLBSI

Highlight

Copy