KOLOSSAI 2

1To shah ngan ïathuh ïa phi haduh katno nga la trei shitom na ka bynta jong phi, bad na ka bynta ki briew ha Laodikaïa bad na ka bynta kiwei pat baroh ki bym ithuh ïa nga markhmat. 2Nga leh ïa kane khnang ba yn pyndap ïa ki da ka jingshlur bad ba yn lah ban khring lang ïa ki ha ka jingieit, bad kumta kin ïoh ïa ka jingdap ba-pura ïa ka jingsngewskhem kaba ka jingshemphang ka wallam. Ha kane ka rukom kin tip ïa ka jingmaïan ka jong U Blei, kaba long U Khrist hi. 3U long u shabi uba plie ïa baroh ki jingkynshew ba la buhrieh jong ka jingstad bad ka jingtip U Blei.

4Nga ong ha phi, te, wat ai ba uno uno un shukor ïa phi da ki jingïatainia kiba bakla, kam pher haduh katno ki i kumba ki long kiba bha. 5Naba wat la ngam don ryngkat ha ka met, pynban nga don bad phi ha ka mynsiem, bad nga kmen haba nga ïohi ïa ka jingkut jingmut kaba skhem da kaba phi ïa-ïeng lang ha ka jingngeit jong phi ha U Khrist.

Ka jingdap pura ka jingim ha U Khrist

6Naduh ba phi la pdiang ïa U Khrist Jisu kum U Trai, to im ha u. 7Pynngam jylliew ïa ki nongrim jong phi ha u, to tei ïa ka jingim jong phi halor jong u, bad to nang kham khlaiñ ha ka jingngeit jong phi, kumba la hikai ïa phi. Bad to long kiba la pyndap da ka jingainguh.

8Da khmih bha, te, ba uno uno un ym teh mraw ïa phi da ki buit shukor bymmyntoi jong ka jingstad ba kynja briew, kaba wan na ki jinghikai ba la ai pateng da ki briew bad na ki mynsiem kiba synshar ïa ka jingpynlong, bad ym na U Khrist. 9Naba ka jingdap pura jong ka jinglong Blei ka shong tylli ha U Khrist, ha ka jinglongbriew jong u, bad la ai ha phi ïa ka jingim ba-dap pura ha u. 10U long uba hakhlieh tam halor kawei pa kawei ka jingsynshar ba kynja mynsiem bad ka bor synshar.

11Ha U Khrist la otsher ïa phi, ym da ka jingotsher kaba la thaw da ki briew, hynrei da ka jingotsher ba la pynlong da U Khrist, kaba kynthup ïa ka jinglong ba la laitluid na ka bor jong ka pop hi. 12#Rom. 6:4Naba haba la pynbaptis ïa phi, la tep ïa phi bad U Khrist, bad ha ka jingpynbaptis la pynmihpat ruh ïa phi bad U Khrist da ka jingngeit jong phi ha ka bor ba-ïaitrei jong U Blei, uba la pynmihpat ïa u na ka jingïap. 13#Eph. 2:1-5Phi la long ha kawei ka por kiba la ïap ha kaba kynja mynsiem namar ki pop jong phi bad namar ba phi la long ki Jentil kiba khlem ka Hukum. Hynrei U Blei mynta u la wallam ïa phi sha ka jingim bad U Khrist. 14#Eph. 2:15U Blei u la map ïa ngi ïa ki pop jong ngi baroh; u la pyndam noh ïa ka jingbuh jingthoh ka bymsngewtynnat ïa ki ram jong ngi lem bad ki kyndon jong ka kiba teh bad weng noh syndon ïa ka da kaba sah preg ïa ka ha ka diengphna. 15Bad halor kata ka diengphna, U Khrist u la pyllaitluid ïa lade na ka bor jong ki nongsynshar ba kynja mynsiem bad na ki bor synshar; u la pynlong ka jingthadrong ïa ki da kaba ïalam ïa ki kum ki mraw ha ka jingïaid paidbah kaba jop jong u.

16 # Rom. 14:1-6 Kumta wat shah ïano ïano ban shna kyndon shaphang kaei kaba phi bam lane dih lane shaphang ki sngi bakhuid lane ki Jingkhawai Niam Bnai Thymmai lane ka Sabbaton. 17Baroh kiba kum kita ki long tang ka syrngiew jong kiei kiei ha ka lawei; ka jingshisha ka long U Khrist. 18Wat shah ïa lade ban shah pynrem da uno uno uba kam ba u long uba kham hakhlieh namar ki jingïohipaw kiba kyrpang bad uba ïai ban ha ka jingsngewrit bymdei bad ha kaba mane ïa ki angel. Naba khlem kano kano ka daw, ïa kiba kum kine ki briew la pynmeng shikatdei da ka rukom pyrkhat briew bad ki la sangeh ban batskhem ha U Khrist, uba long u khlieh jong ka met. 19#Eph. 4:16Hapoh ka jingsynshar jong U Khrist la bsa ïa ka met baroh kawei bad la pyndait lang da ki mat bad doh-satar jong ka, bad ka san kumba U Blei u kwah ïa ka ba kan san.

Kaba ïap bad kaba im ha U Khrist

20Phi la ïap bad U Khrist bad la pyllaitluid ïa phi na ki mynsiem kiba synshar ïa ka jingpynlong. 21Balei, te, phi im kumba phi dei jong kane ka pyrthei? Balei phi kohnguh kum ïa kine ki kyndon, kum, “Wat bat ïa kane,” “Wat mad ïa katai,” “Wat tba ïa kawei pat”? 22Kine baroh ki kdew ïa kiei kiei kiba long ki bymmyntoi shisien ba la dep pyndonkam; ki long tang ki aiñ bad ki jinghikai u briew. 23Da shisha kiba kum kine ki kyndon ki i kumba la pynshong nongrim ha ka jingstad ha ka jingmane ba shu pynbor ïa ki angel, bad ka jingsngewrit bymdei, bad ka jingleh palat ïa ka met; hynrei ki bymdondor ei ei ha kaba synshar ïa ki jingbrai ka doh.

Currently Selected:

KOLOSSAI 2: KHACLBSI

Highlight

Copy