INṬANNA 27

Isakin Jakob mal a sâwm

1Isak chu a hung tar a, khaw hmu thei lo khawpa a mit a hung inthim chun, a naupa upa lem Esau chu a ko a, a kuomah, “Ka naupa,” a tih a: ama chun, “Hitaka hi ka um,” a tih a.

2Chun, amân a kuomah, “Ngai ta, ka tar ta bêk a, ka thi ni ding ka hriet si nawh a.

3Chuleiin, tuhin, lunginsiettakin, i hriemhrei thal bâwm le i thal ngul kha chawi la, phûlah va suok la, sakhi mi va kâppêk rawh.

4Chun, ka thi hmaa mal ka sâwm theina ding chein, ka du zâwng takin hme inhniktakah mi siempêk la, ka fâk dingin ka kuomah hung la rawh,” a tih a.

5 # Gen 12.3; Nam 24.9 Chun, Isakin a naupa Esau a biek lai chu Rebekain a lo hriet a. Chuonga Esau chu sakhi kâpa hung hâwn dinga phûla a fe laiin,

6Rebeka chun a naupa Jakob kuomah, “Ngai ta,i pa chun i u Esau kuomah hieng hin a ti ka hriet a,

7‘Sakhi mi hung kâppêk la, ka fâk a ka thi hmaa LALPA hmaa mal ka sâwmna ding chein, hme inhniktakin mi hung siempêk rawh,’ tiin.

8Chuleiin, tuhin, ka naupa, thu ka pêk ang pei che chu zâwm rawh.

9Ran ruol lai va fe la, chutaka inthawk chu kêlte ṭha deu deu pahni mi va lapêk rawh: chu chu a duzâwng takin i pa ta dingin hme inhniktakah lo siem ka tih;

10chun, a thi hmaa mal a sâwm theina ding chein a fâk dingin i pa kuomah i va fepui ding a nih,” a tih a.

11Jakob chun a nu Rebeka kuoma chun, “Ngai ta, ka u Esau chu mi inhmultak a nih a, kei ruok chu mi innâmtak ka ni sih a.

12Ka pa chun a mi lo them vêl el khawm a ni thei a, ama ngaiin hlêmtu ang hung ni ding ka nih a, malsâwm nêk hmanin ṭawngsie inphur ni lem el ka tih a,” a tih a.

13A nu chun a kuomah, “Ka naupa, i ṭawngse phur ding chu keia chungah um raw se: ka thu zâwm la mi va lapêk el rawh,” a tih a.

14Chuongchun, a va feh a, a va lâk a, a nu kuomah a hungpui a; chun, a nu chun a pa du zâwngin hme inhniktakin a lo siem tah a.

15Chun, Rebeka chun a naupa upa lem, Esau silfên ṭhatak, ina a kuoma um chu a lâk a, a naupa naupang lem Jakob chu ân hâktir a;

16kêlte vun chun a kut nâmna lai le a rîng nâmna lai chu a tuom a:

17chun, hme inhniktak le bei a siemhai chu a naupa Jakob kutah a pêk bawk a.

18Chun, ama chu a pa kuomah a feh a, “Pa,” a tih a; ama chun, “Hitaka hi ka um, ka naupa a tu lem am i nih a?” a tih a.

19Jakob chun a pa kuomah, “I naupa upa lem Esau ka nih, i mi tir ang khan ka thaw zo tah, lunginsiettakin tho la, mal mi sâwm dingin ṭhung la, ka sakhi sa hi fa raw le,” a tih a.

20Isak chun a naupa kuomah, “Ka naupa, iengtizie am a na i hung inhma ngei de?” a tih a. Ama chun, “LALPA i Pathienin a mîn hlâw- tlingtir lei a nih,” a tih a. 21Chun, Isak chun Jakob kuomah, “Ka naupa, lunginsiettakin hung hnai raw khai, lo them vêl ka ti che, ka naupa Esau i ni takzet am,” a tih a.

22Chun, Jakob chun a pa Isak chu a va hnai a; ama chun a lo them vêl a, “A rawl chu Jakob rawl a ni sih a, a kuthai chu Esau kut a ni sih a,” a tih a.

23Chuongchun, a kut chu Esau kut anga ân hmul leiin ama chu a hriet nawh a; mal a sâwm tah a.

24“Ka naupa Esau ngei i ni de maw?” a tih a. Ama chun, “Nih e,” a tih a.

25Chun, ama chun, “Mi hung chawi hnai pêk rawh, chuongchun, mal ka sâwm theina ding chein ka naupa sakhi sa chu lo fâng ka tih,” a tih a. Chuongchun, a hung chawi hnai pêk a, a fâk tah a; uoin khawm a lâkpêk a, a dâwn bawk a.

26Chun, a pa Isak chun a kuomah, “Ka naupa, hung hnai la mi fâwp rawh,” a tih a.

27Chuongchun, a va hnai a, a fâwp a: ama chun a silfên rim chu a hriet a, mal a sâwm tah a,

“En ta, ka naupa rim hi

LALPA malsâwm ram rim ang a nih

28Chuongchun, Pathienin vân daidaw,

Le hnuoi ṭhatna hmun,

Le bu le uoin tamtak pe raw se che.

29Mi chi tum tumin i rawng bâwl hai sienla,

Hnam tum tumin chibai bûk raw hai se che.

I unauhai lai lalah um la,

I nu nauhaiin chibai bûk raw hai se che.

Ṭawngsie inphurtu che taphawt chu ṭawngsephurin um sienla,

Malsâwmtu che chu malsâwmin um raw se,” a tih a.

30Chun, Isakin Jakob mal a sâwm zo a Jakob chu a pa kuoma inthawka a suok hman chauin, a u Esau chu a ramsuok a hung a.

31Ama khawm chun hme in- hniktakin a siem a, a pa kuoma chun a hung chawi veh a, a pa kuoma chun, “Pa, tho la, mal i mi sâwmna dingin i naupa sakhi sa hi fa raw le,” a tih a.

32A pa Isak chun a kuomah, “Tu am i nih a?” a tih a. Ama chun, “I naupa, i naupa upa lem Esau ka nih,” a tih a.

33Chuongchun, Isak chu nasatak- in ân thin a, “Sakhi kâp a, ka kuoma a sa hung la a, i hung tlung hmaa ka ifâk zo ta a, mal ka isâwm ta kha tu am a nih a? Anih, ama chu malsâwmin um tho tho tâng a tih,” a tih a.

34Esau chun a pa thu hril a hrietin, nasatak le thlasetakin a ṭap tah a, a pa kuoma chun, “Aw pa, kei hi, kei khawm hi mal mi sâwm ve lul raw a tih a.

35Ama chun, ‘I sangin a mi hung hlêm a, i malsâwmna chu a lâkpêk ta che a nih,’ a tih a.

36Esau chun a hminga Jakob an ti hi an ti dik hle ni lo am a nih? hi vawi hni a mi lân tah a nih a: ka nau lutir nina a mi lâkpêk a; chun, ngai ta, tuhin ka malsâwmna chu a mi lâkpêk nâwk ta hi,” a tih a. Chun, ama bawkin, “Malsâwmna i mi la hlapêk naw am a nih?” a tih a.

37Isak chun a dawn a, Esau kuomah, “Ngai ta, ama chu i lalah ka siem a, a unauhai po po khawm a siehlaw dingin ka pêk vawng a; bu le uoinin ka châwm ta bawk a; ka naupa, nanga ta dingin iengam thawpêk ka ti cheh a?” a tih a.

38Esau chun a pa kuomah, “Pa, malsâwmna pakhat bak amani i nei? Aw pa, kei hi, kei khawm hi mal mi sâwm ve lul rawh,” a tih a.

39Chun, Esau chu inringtakin a ṭap tah a. Chun, a pa Isak chun a dawn a, a kuomah,

“Ngai ta, i umna hmun ding chu hnuoi ṭhatna hlata le,

Chungtienga inthawka vân daidaw hlatah a nih a um ding chu.

40I kâwlhnâmin a nih i hring ding chu, i sang rawng khawm i bâwl ding a nih;

În tleng suok pha ruok chun,

A rîngkawl chu i rînga inthawk thinthla tâng i tih,” a tih a.

Jakob Haran tienga tir hmang a nih

41Chun, a pain mal a sâwmna lei chun Esau chun Jakob chu a theida tah a. Esau chun a lungrilin, “Ka pa sûn ni ding chu a hnai tah a, chu pha chun ka sang Jakob chu that el ka tih,” a tih a.

42A naupa upa lem Esau thu hril chu Rebeka an hril a; chuongchun, mi a tir a, a naupa naupang lem Jakob chu a ko a, a kuomah, “Ngai ta, i u Esau chun i chungthuah nang sukhlum tum chein ân hnêm a nih.

43Chuleichun, ka naupa, tuhin ka thu hi awi rawh: tho la, Harana ka ṭapa Laban inah tlânhmang rawh.

44I u lungsen hi a bo hmakhat chu ni iengzât lai amanih a kuomah va um phawt rawh,

45i u lungsenna hi a bo a, a chunga i thilthaw hi a theinghil pha chun mi tir ka ta, chutaka inthawk chu hung inṭhuoitir ka ti che, iengdingin am ni khatah in pahni hni chun chân el ka ti cheu a?” a tih a.

46Chun, Rebeka chun Isak kuomah, “Heth naunuhai lei hin nun hi ka nghawk a nih. Jakob hin hi ram nunghâk, hieng Heth naunuhai laia mi hi nuhmeiin a nei ve nâwk lem chun, ka ta dingin hring hi ieng am ṭhahnem a ta?” a tih a.

Currently Selected:

INṬANNA 27: HMARCLBSI

Highlight

Copy