Aetüng hai saite 7

Isrelae ceng üng khimi täsingtä hai täsawng bälitä hai sang bälitä

1Hini pyng-a kai lä kheng kha Känipre angtawtha lawng bälitä na lä älawngpre üng khöteng täki bälitä-a aedaw ö te nung vi dy. Äni ce lä älawngpre täki bälitä üng aeli na tea mäkhang ö vi dy. Tukha älawng qawng-a pangle hai, thingkawng na tea lä äte aeli la mäsaeja haw y hethang sa ö te vi dy. 2Säthaw Kanghing üng äsäny tea süng kha käni käse mang üng ly saite Känipre angtawtha kälang bung kai lä nung vi dy. Äni lä älawng hai pangle tea täphra hethang Säthaw ma haidae py saite Känipre angtawtha lawng bälitä na tea ätüng käleng hai thui vi dy. 3Känipre angtawtha lä, “Mä-ai üng Säthaw üng mawsawng na üng löpeng tea kai ce ma äsäny sa y rytä lä, älawng, thingkawng na hai pangle tea täphra ö hang” näkha thui vi dy. 4Tupyng-a Säthaw üng äsäny sa saite khimi rui na kai lä thai vi dy. Honi na lä lawng täsingtä hai täsawng bälitä hai sang bälitä awng ö vi dy. Äni ce lä Isrelae ceng hawlai netä angxynlyng na thung üng vi. 5Judae amäjy khimi lawng 12,000tä, Ruben amäjy thung üng 12,000tä, Kad amäjy thung üng lawng 12,000tä, 6Asa amäjy thung üng lawng 12,000tä, Natali amäjy thung üng lawng 12,000tä, Manase amäjy thung üng lawng 12,000tä, 7Simon amäjy thung üng lawng 12,000tä, Levi amäjy thung üng lawng 12,000tä, Isaika amäjy thung üng lawng 12,000tä, 8Zabulun amäjy thung üng lawng 12,000tä, Josefae amäjy thung üng lawng 12,000tä, hai Benjamin amäjy thung üng lawng 12,000tä na tea lä äsäny sa qi ö vi dy.

Khimipui na

9Honi pyng-a kai kheng ea lä, ämi la to haw lei y saite khimipui na tea kai lä nung vi dy. Äni ce lä älawng qawng üng pre qütä na, amäjy qütä na, ceng qütä na, khimi ce hai älo cawngkhang aepe saite qütä na vi dy. Äni ce lä kä-o kanglung na aelawng kha äkö hai cangrang cangpre na süng ea areng aety nae hai Beram caw üng maw-a aedaw ö vi dy. 10Tudylä äni ce lä, “Mä-ai üng Säthaw lä areng aety nae qawng-a aety vi. Äni hai Beram caw lä mä-ai bung aeqang te vi,” näkha ätüng käleng hai thui ö vi dy. 11Känipre angtawtha angxynlyng na lä areng aety nae, mätawngky na hai, hing saite me bälitä na tea sävenglü kha aedaw ö vi dy. Tupyng-a äni ce lä Areng üng aety nae maw-a aebo kha Säthaw tea cäphaw ö vi dy. 12Tukha äni ce lä, “Amen, mä-ai üng Säthaw tea lä bälaw ö sy. Mä-ai üng Säthaw lä phung-ang awng saite, bälunghae saite, kawng te lo thui he hawi saite, tämö khai he hawi saite, haidae hai aethaw na dungtäsa awng jawjaw sy, Amen” näkha thui ö vi dy.

13Tupyng-a mätawngky lawngtä ma kai tea, “Kä-o kanglung na aelawng saite hini khimi ce lä ämi ce mei. Äni ce lä mamang üng ly ö te vi mei” näkha düng vi dy.#7:13 Aetüng 6:11

14Kai ma äni tea, “Areng ä, Nang lä mäny vi” näkha mäthang vi dy. Äni ma kai tea,

“Hini khimi na lä sakälö khü phi saite na aeting kha bäja ö saite na vi. Äni ce lä äma ce üng kä-o na tea Beram caw üng äthi hai mäcai ping ö pyng saite na vi dy. 15Tukätephüng-a äni ce lä Säthaw üng areng aety nae maw-a awng kha Säthaw üng Ingkäcai thung-a kärung käni äni tea mawsawng sa ö vi. Areng aety nae qawng-a aety saite Kung ma lä äni ce hai mangtä awng kha äni ce tea aedung hai vi ai. 16Äni ce lä manila böjo aelang, tui aehe haile tyng ö y ai. Käni taw te hai käbi la äni ce tea lä tyng ö y dy lyng. 17Ätephüng-a mei nädylä areng aety nae üng äsäla ung-a awng saite Beram caw lä äni ce bung rui saite beram kärui Kung-a lawng vi ai. Äni ma äni ce bung lä kähing py saite tui cäpring mityng-a bähawi pa vi ai. Tukha Säthaw lä äni ce üng ämi na mang tho saite minaw tui angxynlyng na tea mai pang vi ai” näkha nä vi.

Currently Selected:

Aetüng hai saite 7: cekNT

Highlight

Copy