Aetüng hai saite 6

Cakhi saite dengki na

1Tupyng-a Beram caw lä cakhi saite dengki säritä thung üng angcü üng dengki tea täphra te kai lä nung vi dy. Hing saite me bälitä thung-a haetä te üng bärei mäkhawi te tüng kätyng, “Ly lawi” näkha thui te kai lä thai vi dy. 2Kai lä kheng kha cäphö kanglung metä tea nung vi dy. Honi qawng-a aedang saite kung lä livaw haetä süng vi. Areng üng lökhu haetä äni lä dang vi dy. Äni lä bäja saite kung kätyng täre na tea bäja hethang tho te vi dy.

3Beram caw ma äbaeni üng cakhi saite dengki tea täphra ea lä, hing saite äbaeni ma, “Ly lawi” näkha thui saite lo kai lä thai vi dy. 4Tupyng-a cäphö kälang kangthing metä tho vi dy. Cäphö aedang saite kung tea lä älawngpre-a täre aety hai hethang Säthaw ma aenae py pa vi dy. Khimi ce tea lä äma ce tingtawi aebädü hai ö vi dy. Äni lä aekei sawngseng käleng haetä dang vi dy.

5Beram caw ma ämäthung üng cakhi saite dengki tea täphra te kätü-a lä, hing saite ämäthung üng ma, “Ly lawi” näkha thui te lo kai lä thai vi dy. Kai kheng ea lä, cäphö kangnung metä bung nung vi dy. Honi qawng-a aedang saite kung üng äkö thung-a lä nüng nae haetä süng vi dy. 6Hing saite me äbälitä na thung üng ätüng tho te kätyng kai thai saite lä, “Kjung näsaite caw nibu känetä lä känitä kälu sa te ävang tähang py he kae. Bali näsaite caw nibu netä hai aelae lä känitä kälu sa te ävang py hethang kae vi. Olive situi kung na hai Cäpje thai kung na tea lä täphra ö hang” näkha nä vi.

7Tudylä Beram caw ma cakhi saite dengki äbälitä tea täphra ea lä, hing saite äbälitä ma, “Ly lawi” näkha thui te kai lä thai vi dy. 8Tukha kai kheng ea lä cäphö kädapae saite metä bung kai lä nung vi dy. Honi qawng-a aedang saite kung üng ämüng lä Kädü khaw vi dy. Angqaw khaw lä äni leithung-a hui vi dy. Änini tea lä Säthaw ma älawng qawng üng phü bälitä-a phütä na tea bädü hethang aenae py pa vi dy. Honi lä täre aety saite, tähung täkang tho saite, anghawi kaelae tyng saite hai tawngbawi käpryng na hai-a bädü hethang aenae änini lä dang hawi vi dy.

9Tupyng-a Beram caw lä cakhi saite dengki bangawtä tea täphra ea lä, Säthaw üng angthang hai äma ce üng yng saite tea thui te phüng-a, mätang bälai kha dü saite khimi na üng muilaw na bung löci aesa nae maicang täkui-a kai lä nung vi dy. 10Honi na lä, “Lengky saite Areng ä, nang lä cai saite hai ae-y nae hawiky saite Kung vi. Nang ma kai ce bung bädü saite älawng qawng-a awng saite khimi na tea tärae cei kha dengpy hethang lä matangtä qae ai rawng mei” näkha ätüng käleng hai hang ö vi dy. 11Tupyng-a äni ce angxynlyng tea lä kä-o kanglung py qi kha tänaetä aehae hethang thui pa vi dy. Äni ce kätyng bädü hethang awng saite Areng üng mawsawng kälang na hai kangby jä-ai kälang na cungrü te y rytä äni ce lä sitäri-a aering hethang kae ö vi dy.

12Beram caw ma cakhi saite dengki ätärutä tea täphra te tea kai lä nung vi dy. Tukha pangtälü käleng lä naw vi dy. Käni lä kärung kätyng mänungxae kha law lä äthi kätyng thing vi dy. 13Käni khösang üng tengpaw na lä aeli kangcai tho te phüng-a, thaidö kung aehüng kha äthai kangheng na lä aerui te kätyng älawng-a aeqa ö by vi dy. 14Käni khösang lä cae ang-yng kätyng tä-yng kha awng y vi dy. Me anghung hai angrai sälawng angxynlyng na la äma ce mityng üng hai aethui ja ö vi dy. 15Tupyng-a älawngpre-a sanphrang na, khimi mätawngky na, reisae kälengky na, kätawng känang na hai aenae kä-awngky na, khimi kälang angxynlyng na, mawsawng na hai khimi kaelawi na lä täpu khaw hai me anghung na qawng üng kälung na täkui-a aeho ö vi dy. 16Äni ce lä me anghung hai kälung na tea, “Kai ce tea aekai kha täphung ö la. Areng üng aety nae qawng-a aety saite Kung üng mimai tea nung y hethang hai Beram caw üng kädawtho saite thung üng kai ce bung hoja ö kü jo. 17Änini üng kädawtho saite ri hethang hawi te käni lä vaihi tyng te vi dy. Ämi lawngtä la hing haw y ai” näkha ätüng käleng hang ö vi dy.

Currently Selected:

Aetüng hai saite 6: cekNT

Highlight

Copy