Aetüng hai saite 5

Cae ang-yng hai Beram caw

1Areng aety nae qawng-a aety saite lawngtä üng äkö bangtang mang cae ang-yng süng saite tea kai lä nung vi dy. Honi cae ang-yng lä dengki säritä hai dengtang kha khai vi dy. Honi tea lä phei netä cae tärü bawi vi dy. 2Tupyng-a Känipre angtawtha aethaw awng bärai saite ma, “Hini dengki dengtang saite na tea täphra kha cae ang-yng lang hethang aeteng te lä ämi mei” näkha ätüng käleng hai a saite lawngtä bung kai lä nung vi dy. 3Tungaila hini cae ang-yng tea lang kha kheng haw hethang Känipre-a, älawngpre-a hai älawng täkui-a lä ämi la awng y vi dy. 4Hini cae ang-yng lang kha äthung-a kheng hethang aeteng saite ämi la awng y te phüng-a, kai lä tengxyng y raw sö kae vi dy. 5Tupyng-a mätawngky na thung üng lawngtä ma lä kai tea, “Raw vi hang lawi. Tängai ba. Judae ceng thung üng Xangsi täkai, Davidae üng kaesui kaebeng käleng, ma bäja vi dy. Äni lä hini cae ang-yng hai cakhi saite dengki säritä na tea täphra kha lang haw vi” näpa.

6Tupyng-a Beram caw lä areng aety nae äsäla ung-a hing saite me bälitä hai mätawngky na ma säveng kha aedaw te tea kai lä nung vi dy. Äni lä löci aesa he ra saite beram kätyng awng vi dy. Beram caw lä täki säritä hai ämi säritä awng vi dy. Honi ämi na lä Muilaw Käcai üng cungrü saite säritä vi. Säthaw ma äni bung lä älawngpre qütä-a mätaw saite na vi dy. 7Honi Beram caw lä ly kha areng aety nae qawng-a aety saite lawngtä üng äkö bangtang mang üng cae ang-yng tea la vi dy. 8Hokä la te kätü-a, hing saite me bälitä na hai mätawngky kuisy bälitä lä Beram caw üng maw-a aebo ö vi dy. Äni ce tea lä tingtyng haetä hai rimuidi kawi saite sui kaephi süng qi ö vi dy. Honi dingrawng mui na lä Säthaw üng khimi käcai na üng aetang saite na tea thui te vi. 9Tukha äni ce lä ae-awi kangthae thui ö vi dy.

“Nang lä honi cae ang-yng la hethang hai,

cakhi saite dengki na tea täphra hethang aeteng khaw vi.

Ätephüng-a mei nädylä, khimi ce lä nang bung bädü kha nang üng löci aesa saite hai ceng qütä, älo cawngkhang aepe saite qütä,

älawng qawng üng pre qütä awng saite na üng khimi na bung lä Säthaw tähang rang vi dy.

10Nang ma äni ce bung lä mäthykung na kätyng mä-ai üng Säthaw tea mawsawng sa hethang hai

sanphrang na kätyng älawngpre tea pyng ö ai” näpa.

11Tupyng-a kai lä kheng kha täsawngtä hai sangrui-a to lei y rung khytä nyng saite Känipre angtawtha na üng ätüng thai vi dy. Äni ce lä areng üng aety nae, hing saite me bälitä na hai mätawngky na tea sävenglü vi dy. 12Tukha äni ce lä ätüng käleng hai,

“Khimi ce ma bädü saite Beram caw lä haidae awng saite, tawngnang saite, bälunghae saite, aethaw awng saite,

tämö khai saite, phung-ang hai awng hethang aeteng khaw te vi.

Hing saite angxynlyng na lä äni tea bälaw ö sy” näkha ae-awi thui ö vi.

13Tupyng-a käni hai älawng qawng-a, älawng thung-a, pangle thung-a awng saite hai khöteng täki angxynlyng na üng hing saite angxynlyng na ma ae-awi hai thui te lä:

“Areng aety nae qawng-a aety saite Kung hai Beram caw tea lä hing saite qütä na ma bälaw kha,

tämö khai hethang lä aeteng khaw te vi. Äni tea lä phung-ang hai haidae na lä,

dungtäsa awng jawjaw sy” näkha thui ö vi dy.

14Tudylä hing saite me bälitä na lä, “Amen” näkha mäthang ö vi dy. Tukha mätawngky na lä aebo kha Säthaw hai Beram caw tea cäphaw ö vi dy.

Currently Selected:

Aetüng hai saite 5: cekNT

Highlight

Copy