Aetüng hai saite 3

Sardis kangkawng tea thui saite Angthang

1“Sardis märü kangkawng üng Känipre angtawtha tea hini kätyng cae tärü ba:

“Hini lä Säthaw üng Muilaw üng cungrü saite säritä tea pyng kha tengpaw säritä tea süng saite Kung üng älo na vi. Nang ce sa saite na tea kai lä mäny. Khimi ce ma nang ce lä hing vi näkha dawng ngaila, nang ce lä kai leithung hui ö y te phüng-a, khimi kädü na kae vi. 2I aelaw ö lawi. Nang ce üng aethaw äje cäcaw awng saite tea lä awng rae hethang aethawsa ö ba. Nang ce hokä sa y dylä, Säthaw ma py saite nang ce üng aethaw lä dü ö ai. Nang ce sa saite kälu na Säthaw üng maw-a lä cungrü y te kai lä nung vi. 3Tukätephüng-a nang ce lä aetu pyng saite hai thai pyng saite na tea aedawng haile tyng ö ba. Nang ce üng hunghö na ae-ui kha Säthaw üng lo tängai ö lawi. Nang ce i aelaw y dylä, theru kätyng nang ce lä aedawng ö y te kätü-a, kai lä nang ce tea ly ai. 4Tungaila Sardis märü üng kangkawng thung-a nang ce thung üng phütä lä hunghö na tea caiping-a khai ö vi. Nang ce lä aeteng khaw te phüng-a, kä-o kanglung na aelawng kha kai hai mangtä aeke ö ai. 5Bäja saite khimi angxynlyng na lä hini kätyng kä-o kanglung tea aelawng hai ö ai. Kai lä äni ce üng ämüng na tea dungtäsa kähing dang saite na üng ämüng tärü saite cae-u thung üng mai ja y lyng. Kai üng Pä-ai hai Känipre angtawtha na maw-a äni ce lä kai hai aesui saite na vi näkha Kai ma thui ai.

6“Muilaw Käcai ma kangkawng na tea thui saite lo känawkhing awng saite khimi lä thaikaw sy.

Philadelphia kangkawng tea thui saite Angthang

7“Philadelphia kangkawng üng Känipre angtawtha tea hini kätyng cae tärü ba.

“Hini lä käcai hai lo mitang-a awng saite Kung te üng älo na vi. Äni tea lä sanphrang Davidae üng aenae näsaite kätho saw awng vi. Honi saw hai pä-awng saite kätho tea lä, ämi ma la aekhae haw y. Aekhae saite kätho tea lä, ämi la pä-awng haw y lyng. 8Nang ce sa saite na tea kai lä mäny. Nang ce lä aethaw äje cäcaw xyng awng te kai mäny vi. Tungaila nang ce lä kai üng lo tängai kha kai tea aephae ö te y. Nang ce üng maw-a kai lä kätho pä-awng pyng te vi dy. Honi tea ämi la aekhae haw y vi. 9Tängai ö. Setan angra üng äkähui na lä Judae khimi tätang na y käla ma Judae khimi na näkha kaeling thui ö vi. Kai lä äni ce bung nang ce üng maw-a ly kha khokung-a aebo hai ö ai. Nang ce tea kai ma bälung aevaw saite lä äni ce angxynlyng na ma mäny ö ai. 10Nang ce lä änawngsa hethang kai üng särilo tea tängai ö te vi dy. Tukätephüng-a kai lä älawng qawng-a khimi qütä tea käny hethang mätang bälai tyng te kätü-a nang ce bung lä kai ma aedung hai ai. 11Kai lä qae y tea ma ly ai. Nang ce üng yng saite tea lä süng ö khi ba. Tudylä nang ce tea ävang kätyng areng lökhu kai ma py ai. Honi lökhu tea lä ämi ma laja y lyng. 12Bäja saite äni bung lä kai üng Säthaw Ingkäcai ing aeling-a lawng hai ai. Äni lä Ingkäcai ärang mang-a manila tho y lyng. Kai lä äma qawng-a Kai üng Säthaw üng ämüng hai, Kai üng Säthaw üng märü ämüng, Jerusalem kangthae, tea tärü ai. Hini Jerusalem märü kangthae lä Kai üng Säthaw Känipre te mang üng cäqa vi. Kai la äni qawng-a Kai üng ämüng kangthae tärü by ai.

13“Muilaw Käcai ma kangkawng na tea thui saite lo känawkhing awng te khimi lä thaikaw sy.

Leiodikia kangkawng tea thui saite Angthang

14“Leodikia kangkawng üng Känipre angtawtha tea hini kätyng cae tärü ba.

“Hini lä Cakhi kha mitang khü-a sasi tho saite üng älo na vi. Äni üng ämüng lä Amen näkha mäthi te vi. Äni lä Säthaw ma sa saite angxynlyng na üng langdüng vi. 15Nang ce sa saite na tea kai lä mäny. Nang ce lä kai tea bälung aevaw bärai y, kai tea la esäre y te kai lä mäny vi. Nang ce lä bälung aevaw bärai te läsy, esäre te läsy, hae haetä tea kai lä ngai te vi. 16Tungaila nang ce lä Kai tea bälung aevaw bärai y te hai esäre y te phüng-a, Kai ma nang ce bung khaisö vi ai. 17Nang ce ma, “Kai ce lä tawngnang vi. Ngai saite angxynlyng na awng vi dy. Täkang y dy lyng” näkha thui ö vi. Tungaila nang ce lä tähang si te hai bäheng hethang hawi ö te vi. Nang ce lä kangtang kanglai, ämi kangjö, hai aekhu aena nae awng ö te y vi. Tungaila honi na tea nang ce lä mäny ö te y. 18Tudylä nang ce lä Säthaw üng maw-a tawngnang hethang mai hai mäcai pyng saite sui tea kai te üng rang hethang nang ce tea kai lä thui he ngai te vi. Nang ce üng aekhu aena nae awng y saite tea saerae y hethang kai te üng kä-o kanglung käcai tea rang ö. Nang ce üng ämi nung hethang ämi aemäcai nae aesi la rang ö ba. 19Kai ma bälung aevaw saite khimi angxynlyng na tea kai lä dengpy kha pring te vi. Tudylä nang ce lä aethawsa kha ae-ui ö lawi. 20Tängai ö ba. Kai lä kätho teng-a aedaw kha täkhü te vi. Ämi la kai üng ätüng thai kha kätho pä-awng dylä, kai lä kung kha mä-ai lä mangtä bö ca ö ai. 21Kai lä bäja kha kai Pä-ai üng Areng Aety nae qawng-a äni hai mangtä aety te kätyng, bäja saite khimi tea lä Kai üng aety nae qawng-a kai hai mangtä aety hethang kai ma py ai.

22“Muilaw Käcai ma kangkawng na tea thui saite lo känawkhing awng saite khimi lä thaikaw sy” näkha näte vi.

Currently Selected:

Aetüng hai saite 3: cekNT

Highlight

Copy