3 Johan 1
1
1Kai, Khristen Kangkawng üng Mätawngky, lä kai üng bälung aevaw tätang saite yng saite äpy Kaju tea cae tärü te vi.
2Kai üng bälung aevaw saite äpy ä, nang lä Säthaw hai rawijae aesa saite ryng te phüng-a, nang üng yng saite lä cakhi te kätyng, nawsaw hawi hai hethang, nang üng hing saite angxynlyng na hawi hethang, kai la aetang pa te by vi. 3Nang lä Säthaw üng lo mitang thung-a hing jawjaw te hai nang üng yng saite cakhi te phüng, yng saite äpy na ma kai tea ly kha thui ö te vi. Tukätephüng-a kai la tengxyng y anghawtho vi dy. 4Kai üng caw nade na lä Säthaw üng lo mitang-a hing te phüng thai kha kai lä anghawtho hai te qawng-a äte kälang haetä la awng y vi.
Kaju tea bälaw saite
5Kai üng bälung aevaw saite äpy ä, nang lä mä-ai üng Khristen kangby jä-ai na tea säbawng mang te vi. Nang lä aemae vai y saite Khristen äpy na tea mäteng ma säbawng te vi. Tukätephüng-a nang lä Khrista üng cakhi saite äkähui-a lawng vi näte kai lä mäny vi. 6Yng saite khimi na ma nang üng bälung aevaw saite phüng hi-a awng saite Khristen kangkawng tea thui ö vi dy. Hini Khristen äpy na lä nang te üng hai mityng kälang mang-a ly hethang ngai te kätü-a, äni ce üng khölawng ly ö saite tea nang lä säbawng kü pa jawjaw ba ä. Nang lä mäsai y käla äni ce tea säbawng dylä Säthaw ma kawng hai vi ai. 7Äni ce lä Khrista üng mawsawng sa hethang khölawng tho ö vi dy. Säthaw bung mäny y te khimi na te üng säbawng saite dang hethang äte la mäkai ö te y. 8Tukätephüng-a mä-ai Khristen na ma honi khimi na tea lä säbawng ö hethang kae. Hokä dylä mä-ai lä lo mitang thui saite kälu-a mangtä qa ö te by vi.
Diotrephes hai Demetrius
9Kai lä nang ce märü-a awng saite Khristen kangkawng tea cae tärü vai vi dy. Tungaila Diotrephes lä kai üng thui saite lo tea tängai te y. Äni lä äma qaitä kangkawng üng mätawngky sa hethang ngai te vi. 10Tukätephüng-a kai ly te kätü-a, äni üng sa saite na lä kangkawng üng khimi na üng maw-a kai ma thui mäcai ai mang. Äni lä kai ce üng phüng na tea käsi prawng kha thui te vi. Honi qawng-a cang y, äni lä Khristen äpy na tyng te kätü-a la, lady y. Lady hethang ngai saite khimi na tea la mäkhang pa te vi. Äni ce bung la kangkawng üng mäthoja pa ö te vi.
11Kai üng bälung aevaw saite äpy ä, hawi y sa saite khimi na üng kätyng täthei-a lä aetu hang. Tungaila kähawi sa saite khimi kätyng täthei-a lä aetu ba. Kähawi sa saite lawngtä lä Säthaw üng caw nade vi. Kähawi y sa saite lawngtä lä Säthaw bung mäny te y.
12Kangkawng üng khimi qütä lä Demetrius üng phüng tea khimi kähawi näkha thui ö te vi. Äni lä lo mitang kätyng hing te phüng-a, khimi kähawi näte khimi qütä ma mäny ö vi y. Äni üng khimi hawi saite phüng tea kai ce la thui ö te by vi. Kai ce üng thui saite lä tätang khaw te nang ce lä mäny ö te vi.
Kangkhüng üng cibai sa saite älo
13Kai lä nang tea cae tärü hethang awng mang te vi. Tungaila kai lä cae kawng, caetui hai hini phüng na tea tärü hethang ngai te y. 14Qae y tea ma nang hai aeting hethang hai, lawng lawngtä mimai aekheng kha älo aepe haw ai näte kai lä aethang khai te vi.
15Säthaw ma nang tea awngneng saite py sy.
Hi-a awng saite nang üng äpy angxynlyng na ma nang tea cibai sa saite lo thui ö qi te vi.
Currently Selected:
3 Johan 1: cekNT
Highlight
Share
Copy
Want to have your highlights saved across all your devices? Sign up or sign in
© 2017, Bible Society of Myanmar and Wycliffe Bible Translators, Inc