Апостолдордыҥ керектери 14

Павел ле Варнава Иконияда

1Иконияда андый ок болды. Олор иудейлердиҥ синагогазына кирип, сӧс айдарда, ума јок кӧп иудейлер де, еллиндер де Кудайга бӱттилер. 2Багынбаган иудейлер дезе кара јаҥдуларды тӱймедип, карындаштарга удурлаштырып ийдилер. 3Андый да болзо, апостолдор анда тапту узак јӱрӱп, Кайракан керегинде јалтанбай айдып турдылар. Кайракан дезе, Бойыныҥ јакшылыкту сӧзиниҥ чынын керелеп, олордыҥ колыла билдилер ле кайкалдар јайаар болды. 4Калада јаткандар эки јара бӧлинди: кезиги иудейлердиҥ, ӧскӧлӧри дезе апостолдордыҥ јанында болгондор. 5Кара јаҥдулар ла иудейлер бойыныҥ бийлериле кожо Павел ле Варнаваны уйатка тӱжӱрип, ташла шыбалаарга јӱткӱп турарда, 6олор мыны билип, Ликаонияныҥ Листра ла Дервия калаларына ла олорды эбире јерлерге ырбап, 7анда Сӱӱнчилӱ Јар јарлап јӱрдилер.

Павел ле Варнава Листрада ла Дервияда

8Листрада базып болбос бир эр кижи отурган. Энедеҥ кенек чыккан бойы, ол качан да баспаган. 9Ол Павелдиҥ айтканын угуп отурган. Павел ого чике кӧрӱп, ол бӱдӱп турганын, аргадалар аргалу болгонын билеле, 10тыҥ ӱнденип, айтты:

– Иисус Христос Кайраканныҥ адынаҥ сеге айдадым, будыҥа тӱс тур!

Онызы тура јӱгӱрип, база берди.

11Павелдиҥ эткенин кӧрӧлӧ, улус ликаон тилле кыйгырыжып чыкты:

– Кижи бӱдӱмин алынган кудайлар биске тӱшти!

12Олор Варнаваны Зевс деп, Павелди дезе, сӧс айдып турган учун, Гермес деп ададылар.

13Каланыҥ ары јанында Зевстиҥ байзыҥы турган. Оныҥ абызы каалганыҥ јанына букалар ла чечектеҥ ӧргӧн ӧрӱмелдер экелип, улусла кожо тайылга эдерге турган. 14Је Варнава ла Павел апостолдор мыны угала, кийимдерин јырта тартып, улустыҥ ортозына кийдире јӱгӱреле, 15тыҥ ӱнденип айттылар:

– Эрлер, слер нени эдип тураар? Бис слердий ле улус эдибис. Слерди бу тӧгӱн кудайлардаҥ теҥери ле јерди, талайды ла олордо бары-јогын јайаган тирӱ Кудайга баштанзын деп, слерге Сӱӱнчилӱ Јар јарлап јадыбыс. 16Ӧткӧн ӱйелерде Ол ончо калыктарга бойыныҥ јолыла јӱрер јӧп берген. 17Је Ол Бойы керегинде керелеп, быйан эдип, теҥеридеҥ биске јаҥмыр јаадырып, тӱжӱм, аш-курсак берип, јӱректеристи сӱӱнчиле толтырган.

18Мынайда айдып, олорго тайылга этпезин, кажызы ла јанзын деп, улусты јӱк арайдаҥ бӱдӱндирип салдылар. Бойлоры калада артып, улус ӱретти. 19Антиохия ла Икониядаҥ бир кезик иудейлер келеле, апостолдор тидим јарлыктап турарда, «Олор бир де чынды айтпай, ончозы тӧгӱндеп јадылар» – деп, улусты тӱймедип ийдилер. Павелди ташла шыбалап, ӧлӱп калган болор деп, каланыҥ ары јанына чыгарала, анда артырып койдылар. 20Ӱренчиктер оны эбире јуулыжып келерде, ол туруп, кала јаар барды. Эртезинде дезе Варнавала кожо Дервия јаар јӱре берди.

Антиохияга бурылганы

21Олор бу калага Сӱӱнчилӱ Јар јарлап, тапту кӧп улусты ӱренчиктер эттилер. Кайра јанарда, Листрага, Иконияга ла Антиохияга кирип, 22ӱренчиктердиҥ тынын тыҥыттылар. Кудайга јаантайын чындык болзын деп јакып, «Бис Кудайдыҥ Каандыгына кӧп шыра ӧдӱп кирер учурлу» – деп, ӱредип турдылар. 23Кажы ла серкпеде јаандарды кол салып кӧстӧйлӧ, Павел ле Варнава орозолоп, мӱргийле, олорды бойлоры бӱткен Кайраканга берип койдылар. 24Оноҥ Писидияныҥ ичиле ӧдӱп, Памфилияга келдилер. 25Пергияда Кайраканныҥ сӧзин јарлыктайла, Атталияга тӱштилер. 26Оноҥ чыгала, Антиохия јаар јӱстилер. Кудайдыҥ јакшылыгына бойлорын беринип, эдетен ижин бӱдӱрип салдылар.

27Једип келеле, серкпениҥ улузын јууп, Кудай олорло нени эткенин ончозын, канайып Ол ӧскӧ калыктарга бӱдериниҥ эжигин ачканын айттылар. 28Анда ӱренчиктерле кожо узак јӱрдилер.

Currently Selected:

Апостолдордыҥ керектери 14: AltNTBC

Highlight

Copy