Senesis 21

Hatkatien onen Ahi mai vi anatin ka Serah kur Aesak, natin Ebraham

Sen 21:1-21

1Suval koa Iahova vat kati, rokol kat Serah. 2Sakini kei meas ka mal en avong koa Ahi vat kati, kur titan. Anatin, navong Ebraham vi ulmatu tuai, Serah kur ehon tai onealu.#Hib 11:11 3Ebraham ling isen vi ‘Aesak’ koa aneite teni vi ‘viteai,’#21:3 Ebraham ling isen ‘Viteai’ veni viteai navong Ahi viteni mini (Sen 17:17-19), ka Serah mun viteai navong longe (Sen 18:12-14) ka navong kuri (Sen 21:6-7). 4ka navong avong onen rokol ouhat (8), Ebraham mumoni va en vekahoi suval koa Ahi vat kati mini.#Sen 17:12; Umen 7:8 5Ebraham, sua onen handred tai (100) navong Aesak avasi. 6Ka Serah vit, “Ahi san sien houlu minau ka sakinau naviteai. Koakeil vasi itaengoni ihiteai hetal minau. 7?Isei kilea vahitehiteni min Ebraham keke inau etin, nitounat en titiali tai? Mukos navi tovuli, ka nakur titan ulmatu onak.” 8Titiali enek moul, ka navong lokovein susu omon, tata onen mumon mari anien tai.

9En avong ten anien enek, Ismael, natin Hakar ten out Isip, mul rohtoh karen Aesak, natin Serah. 10Navong Serah lesi, viteni min Ebraham vit, “Sila lat ahin toumien enek keilu natnali luvaha. Naman kivuol navong etai, natin ahin enek nakur etai tounah keil onom koa hehi onen natkuli Aesak.”#Kal 4:29-30 11Koanik sakin Ebraham rendem houlu ven Ismael emun vi natnali keinek. 12Ka Ahi viteni min Ebraham vit, “Konandemkotei en ehon enek ka mama onen koa vi slev onom. Kumon asa koa Serah viteni minuk veni vatiamal keil koa navat kati minuk, keil ikistal ika en Aesak.#Rom 9:7; Hib 11:18 13Ka en Ismael, natin ahin toumien enek, inau numon vatiamal keil koa ikistal ika eni imai ihi mari vangi meatin tai veni kei emun vi natmali.”

14Sakini, visokon semau, Ebraham san anien ka veioai tai min Hakar ka lingi en vatisin. Evus, sila lat kei ka natnali luva. Keilu luva luka vasi out volvol ten out Bersiba. 15Navong oai vus, lokovein titan en nimal ten holeai tai. 16Kei va rani soutin neli ka rondan netan ka mul mis vit, “!Aue li, ek rovattei males natkuli vamat!”

17Rovitei tuetin, ehon emun mis ka Ahi raengoni. Ka angelo onen Ahi selus ka out nesa mai ven Hakar vit, “?Hakar, komundemko en sa? !Konametautei! Ahi raengoni titiali mis. 18Kimea, kiha veni, kitali lati. Veni inau, numon koakeil ikistal ika en vatiamal onen imai ihi mari vangi meatin tai.” 19Evus, Ahi sakin Hakar les vulvul tai koa oai mul ien. Sakini kei seh oai va en veioai onen ka san hatte tai min natnali muni.

20Evus, Ismael mai matu, ka Ahi katauni. En out volvol ten out Paran, kei mai vi meatin hau tai koa vi more meatin talauien. 21Navong mai mariso, mama onen votin atouli tai ten out Isip mai retalihe ral mini.

Currently Selected:

Senesis 21: pma

Highlight

Copy