Mak 2

Yisa nba din te ki gbanankpeenn daanɔ paak biaŋinba

(Matiu 9.1-8; Luk 5.17-26)

1Ki li din tan teen daa ŋannlelee, ki Yisa bia ŋmat Kapenaum; ki bi mɔɔnt nan u ŋmat ŋaak powa. 2Ki niib bonchiann din tikir hali nan yiar bonmintik nnawa tan kaa ŋaak maŋ ni ki sɔɔ sa fit baar tammɔb boor ni; ki u mɔɔntir Yennu maan ki teemm. 3Ki niib banna din tan jii baatsɔɔ ki u gbanant kpo; ki bi teenɔ liaŋ paak a bin baar nanɔ Yisa boor. 4Ba din ki fit baar u boor kimaan niib nba din yabit na paak, ki bi chɔɔ loot mɔpinn yur paak, ki sikin baatɔɔ na nan liaŋ na ki tan birɔ Yisa tɔɔnn ni. 5Yisa nba din la ba teenɔ yada biaŋinba na, ki u yet baatɔɔ na a “N bik, n nyik chab a biita.”

6Li yoo na ki Yennu sennu wanntesiab din kar leŋ maŋ ki boi bi para ni, 7“Bee teen ki jɔɔ na piak nna? U jikit Yennu yikoo u yur paake. Ŋmee daa sa fit nyik chab nirɔ biiti, ki li ki tee Yennu kuukɔɔ kaa?”

8Dudukit na nba din be bi para ni yoonba na, ki Yisa bann ki boib a “Bee ki i boi i para ni linba be na paaki? 9Ma yet baatɔɔ na a ‘N nyik chab a biit’ amii ma yaa n yetɔ a ‘Fiit ki jii a liaŋ kii somm na,’ maan munnlee na sinsuuk ni lannpoe paarii? 10ŋaan n sa wanni nan min nisaarik Bik mɔk yikoo tingbouŋ nna ni, ki sa fit nyik chab nirɔ biit;” ŋanne ki u jiant bet wunba ki u gbanant kpo na a 11“N beerae, fiit, ki jii a liaŋ kii kun a ŋaak ni.”

12Li taakpaak ni ki u fiir ki jii u liaŋ ki nyii bi kura ninbina ni; ki li bakitib bonchiann; ki bi piak dont Yennu sann ki yeen a “Ti daa ki mi la bakitnauŋ toona na booru.”

Biaŋinba ki Yisa din yiin sɔɔ ki u sann din tee Liifai

(Matiu 9.9-13; Luk 5.27-32)

13Li poorpoe ki Yisa bia din ŋmat mɔkgbeŋŋir na kpiŋ, ki niib bonchiauŋ tikir u boor ni ki lintɔwa, ki u din wantib Yennu labaar. 14Ŋanne ki u din gar tɔɔnn po ki saa la jasɔɔ nna ki u sann din tee Liifai, wunba din tee Alfeus bik, ki u kar u toonn paak lampogaar diiuk ni; ki Yisa betɔ a “Fiit kii waan.” Ki u fiir ki waau.

15Ki Liifai maŋ teen jaamm u ŋaak ni ki tur Yisa; ki lampogaarteeb bonchiann nan biitdamm bonchiann lakin kar nan Yisa nan u poorpoweiteeb ki di jeet, kimaan bi yab bonchiann ki waau. 16Ki sennu wannteeb, binba din tee Farisiinba na, la ki Yisa di jeet nan biitdamm nan lampogaarteeb na; ki bi boi u poorpoweiteeb na a “Bee ki u lakin di nan lampogaarteeb nan biitdammi?”

17Yisa nba gbat nna ki u betib a “Binba mɔk laafia ki loon tebtɔɔ; ŋaan binba yiar, ŋamme loon tebtɔɔ. Li ki tee niŋamm paak kaa te ki n baari, biitdamm paake ki n baar.”

Mɔloru labaar

(Matiu 9.14-17; Luk 5.33-39)

18Ŋanne ki Jɔɔnn wunba din wuur niib Yennu nyunwuru na poorpoweiteeb nan Farisiinba din lorin mɔi; ki nisiab din baar ki boi Yisa a “Jɔɔnn poorpoweiteeb nan Farisiinba poorpoweiteeb lorin mɔi; bee teen ki a poorpoweiteeb ki lorimi?”

19Ki Yisa boib a “Poochianu-i be, saamm sa lor mɔi yoo nba ki pooyookir sɔrɔ daa be bi boor ni nawa-aa? Aaii. Pooyookir sɔrɔ nba daa be bi boor ni na, bi kan lor mɔi. 20Ŋaan sianyoo baat na ki bi tan sa nyinn pooyookir sɔrɔ na bi boor; li yoo maŋe ki bi sa lor mɔi.

21“Ŋaan sɔɔ kan sak jii chabpaann ki lik takperi; li-i tee ki u teen nnaie, chabpaann na sa pat takper nae, ki li patimin na sa ŋamm pukin. 22Nnee mun ki sɔɔ kan jii dapaanin ki liak dalenkper ni; li-i tee ki u teen nnaie, ki dapaanin na tan mɔ yoonba li sa yeer dalenkper nae, ki daan maŋ-n mɔɔn yann, ki linlenn na-n mun yeer. Li paak, bi tuu jikit dapaanin ki liakit linlenpaann nie.”

Juu teeb foon daar labaar

(Matiu 12.1-8; Luk 6.1-5)

23Tɔn, Juu teeb foon dasiar, ki Yisa nan u poorpoweiteeb din gaar dii kpaab ni. Ba din saa maŋ ki u poorpoweiteeb na toktir dikara ki pinii ki ŋman ŋaan saa. 24Ŋanne ki Farisiinba na boiɔ a “Gotir, bee ki bi tuun linba ki ti sennu ki chab a bii tuun foon daari?”

25Ki u yetib a “I ki mi karin Yennu gbouŋ ni David nba din tun biaŋinba-aa? Ki yoo nba ki kon din gbat ŋɔɔ nan u jɔɔmu, ki bi din ki mɔk jeet na, 26ki u din kɔɔ Yennu ŋaak ni, ki saa jii Yennu boroboro ki ŋman yoo nba ki Abiata din tee manteeb yudaanɔ na. Ki sennu na din ki chab nan sɔɔ-n di boroboro maŋ see Yennu manteeb kuukɔɔe; ŋaan David maŋ din ŋmame, ki bia tur u jɔɔmu na gbaa ki bi mun ŋman.”

27Ŋaan ki Yisa ŋamm ki yetib a “Nisaarik sommir paake ki Yennu senn foon daar; li ki tee foon daar paak kaa ki u din nan niibi. 28Li paak, min nisaarik Bike tee foon daar Yomdaanɔ biak.”

Currently Selected:

Mak 2: BIM

Highlight

Copy