Mat 18

Ɔmʋ nɩɩ ɔ gyɛ ɔkparɛ Ɩbwaarɛ kuwura‐gyii mʋ tɔ

(Maki 9:33-37; Luka 9:46-48)

1Kanɩn saŋa maŋa tɔ mʋ, abɩɩlapʋ mʋ ba ba Yesu asɛ ba taasɛ mʋ yɛ, “Anɛ tɔ mʋ, anɩmʋ ɩ gyɛ ɔkparɛ sʋsʋ kuwura‐gyii mʋ tɔ?”

2Nɩɩ Yesu tɩɩ kebii pii kʋ ba yɩlɛ bamʋ nsana‐nsana. 3Nɩɩ ɔ tɔwɛ bamʋ yɛ, “N tɔwɛ fanɛ kesintin nɩn fɛɛ, fan dan fan man kyɛɛgɛ kɛ fan waa fɛɛ nbii pii‐pii mʋ, fɛn mɛɛ yɛ fan loo sʋsʋ kuwura‐gyii mʋ tɔ kakaakʋ. 4Ɩmʋ sʋ ɔkʋmaa mʋ nɩɩ ɔ bɩya mʋ n‐yɩɩ kasɛ fɛɛ kebii pii nɩmʋ mʋ, ɩ gyɛ ɔkparɛ sʋsʋ kuwura‐gyii mʋ tɔ.

5“Nɩɩ ɔkʋmaa mʋ nɩɩ ɔ kɔɔlɛ kebii pii fɛɛ ɔnɩmʋ mɛ kɩtɩɩ tɔ mʋ, ɔ kɔɔlɛ mɛ nɩmʋ. 6Amaa ɔkʋmaa mʋ nɩɩ ɩ kan bɔla mʋ sʋ, kɛ nbii mʋ nɩɩ ba kɔɔlɛ mɛ gyii falɛ tɔ ɔkʋ waa alibi mʋ, ɩ bɔ sa mʋ fɛɛ ba taa kubuu lala ŋmina mʋ ɔbʋlɛ tɔ naa tʋʋ ɔpʋ bunkyinsa tɔ.

7“Dulinya nɩmʋ tɔ asa, bamʋ laakʋ! Lɩɩ fɛɛ atɔ mʋ nɩɩ ɩ yɛgɛ nɩɩ bɛɛ tɩyɛ bamʋ kɩkɔɔlɛ gyii tɔ mʋ, ɩ nyɛ akyɔ. Falɛ atɔ ii biti ɩ ba, amaa ɔkʋmaa mʋ nɩɩ ɩɩ bɔla mʋ sʋ ba mʋ, mʋ laakʋ. 8Nɩɩ fʋ kɩbaa abɛɛ fʋ kɩyaa ɩɩ yɛgɛ nɩɩ fɩɩ waa alibi mʋ, tɩn kɩmʋ tʋʋ. Ɩ bʋrɔn sa fʋ fɛɛ fʋ maa taa kɩbaa abɛɛ kɩyaa dɩyɛ loo nkpa kakpaa tɔ, ɩ kyɔ fʋ maa sʋ abaa anyɔ yɛ ayaa anyɔ kɛ ba taa fʋ tʋʋ fʋlɔn mʋ nɩɩ ki mee dun kakaakʋ mʋ tɔ. 9Nɩɩ fu kinsi ɩɩ yɛgɛ nɩɩ fʋ waa alibi mʋ, kyɔlɛ kɩmʋ tʋʋ. Ɩ bʋrɔn sa fʋ fɛɛ fʋ maa taa kinsi kʋlʋn loo nkpa kakpaa tɔ, ɩ kyɔ fʋ maa sʋ ansi anyɔ kɛ ba taa fʋ tʋʋ awʋrʋfɔ fʋlɔn yen‐yen tɔ.”

Kɩŋasan lɩɩ kabʋlʋpʋ fɔyɩsa

(Luka 15:3-7)

10Nɩɩ Yesu tɔwɛ bamʋ yɛ, “Fan baa fan da sʋ kɛ fan man kɩɩ apii‐pii mʋ tɔ ɔkʋ fɛɛ ɔ man gyɛ sɛhn. N tɔwɛ fanɛ fɛɛ bamʋ nbɔɔ mʋ nɩɩ ba bʋ sʋsʋ mʋ, ii wu mɛ‐Sɛ mʋ nɩɩ ɔ bʋ sʋsʋ mu ansi tɔ saŋa kʋmaa. 11Lɩɩ fɛɛ mɛ, Daadimaadi Obii‐nyɩnsa mʋ ba nɩn kɛ n ba mɔlɩgɛ asa mʋ nɩɩ ba fɔyɩ mʋ.”

12Nɩɩ Yesu tɔwɛ bamʋ yɛ, “Nɩɩ ɔnyɩn kʋ kan ɔ sʋ nbʋlʋpʋ kɩlɩfa, nɩɩ bamʋ tɔ ɔkʋlʋn fɔyɩ mʋ, mɩnɛ nɩɩ fii nyi maa biti ɔ waa? Ɔ mɛɛ yɛ ɔ yɛgɛ adɩkpanɔ yɛ akpanɔ mʋ kɩbɩɩ ɔbʋlɛ tɔ, kɛ ɔ naa biti ɔkʋlʋn mʋ nɩɩ ɔ fɔyɩ mʋ abɛɛ? 13N tɔwɛ fanɛ kesintin tɔ nɩɩ fɛɛ, nɩɩ ɔ kan wu mʋ mʋ, mu ansi ii biti i gyii mʋ sʋ, ɩ kyɔ adɩkpanɔ yɛ akpanɔ mʋ nɩɩ ba man fɔyɩ mʋ. 14Kanɩn ɔkpa maŋa sʋ nɩɩ fanɛ‐Sɛ mʋ nɩɩ ɔ bʋ sʋsʋ mʋ gbaa mee biti fɛɛ apii‐pii nɩmʋ tɔ ɔkʋlʋn maa fɔyɩ.

Nɩɩ Fʋ bɩrɩsa nɩɩ ɔ waa fʋ alibi mʋ, kʋtɔ nɩmʋ nɩɩ fʋ waa

15“Nɩɩ fu‐supu abɛɛ fʋ‐daa kan waa fʋ alibi mʋ, kpee mʋ asɛ naa lɛɛ mu alibi mʋ kaapʋ mʋ fanɛ asa nyɔ. Nɩɩ ɔ kan nu kasɛ sa fʋ mʋ, fʋ bɩla bɩya mʋ ba ɔkpa danbɩrasa mʋ sʋ nɩmʋ. 16Amaa nɩɩ ɔ man kan nu sa mʋ, biti nyɩmɩsa kʋlʋn abɛɛ asa anyɔ tii fʋ n‐yɩɩ sʋ kɛ fen kpee mʋ asɛ. Saamʋ, asɩn mʋ ɩ nyɛ yɩlɛ fɛɛ kanan mʋ nɩɩ Asɩnkyan yɩlasa mʋ ɩ tɔwɛ yɛ, ‘Ɩ dagaa asɩn kʋmaa ɩ nyɛ asa anyɔ abɛɛ asa asá be gyii ɩmʋ adansɛ.’ 17Nɩɩ ɔ man kan bɩla nu sa bamʋ mʋ, taa asɩn mʋ naa tʋʋ Krisito kʋbʋ mu ansi tɔ. Nɩɩ ɔ bɩla kina kunu sa bamʋ bɩrɛ, taa mʋ fɛɛ ɔdakpa osunpu abɛɛ apoo lenpoo ɔkɔɔlɛpʋ.

18“N tɔwɛ fanɛ kesintin fɛɛ, kʋtɔ kʋmaa mʋ nɩɩ fan ŋmina kasɛ sʋ nfɩɩ mʋ, Ɩbwaarɛ ii biti o ŋmina kɩmʋ sʋsʋ, nɩɩ kʋtɔ kʋmaa mʋ nɩɩ fan kina kasɛ sʋ nfɩɩ mʋ, Ɩbwaarɛ ii biti o kina kɩmʋ sʋsʋ.

19“N bɩla n tɔwɛ fanɛ yɛ, nɩɩ fanɛ tɔ anyɔ ba kan waa kɔnɔ kʋlʋn kʋlɛ Ɩbwaarɛ yɛ bee biti kʋtɔ kʋ mʋ, Mɛ‐Sɛ Ɩbwaarɛ mʋ nɩɩ ɔ bʋ sʋsʋ mʋ ii biti ɔ waa sa bamʋ. 20Lɩɩ fɛɛ katɩn kʋmaa mʋ nɩɩ asa anyɔ abɛɛ asa asá ba gyaŋɛ mɛ kɩtɩɩ tɔ mʋ, n bʋ bamʋ asɛ.”

Kɩŋasan lɩɩ kɩyaafɔlɛ mʋ nɩɩ o mee su kʋwɛɛ mʋ sʋ

21Nɩɩ Pita ba Yesu asɛ ba taasɛ mʋ yɛ, “Ɔnyɩrɩpɛ, ɩlɩɩ ɩfɩnɛ nɩɩ mɛ‐bɩrɩsa waa mɛ alibi nɩɩ ɩ dagaa fɛɛ n taa kɛɛ mʋ? Ilii isunɔ abɛɛ?”

22Nɩɩ Yesu lɛɛ kɔnɔ yɛ, “Ayee, man gyɛ ɩlɩɩ isunɔ, amaa adusunɔ kanɩn ɩlɩɩ isunɔ.

23“Lɩɩ fɛɛ sʋsʋ kuwura‐gyii mʋ du nɩn fɛɛ owura kʋ maa biti mʋ ayaafɔlɛ ba ba kaapʋ mʋ akɔ mʋ nɩɩ ba sʋ mʋ. 24Maa piili ɛɛ taasɛ mʋ akɔ mʋ, nɩɩ ba taa ɔnyɩn kʋ bɩya mʋ. Ɔnyɩn mʋ sʋ owura mʋ kʋkɔ afulee nderebi ngbɩn‐ngbɩn. 25Maa man taalɛ ka mʋ, nɩɩ mʋ owura mʋ yɛ, ba taa maa mʋ‐ka yɛ mu‐bii ana yɛ kʋtɔ kʋmaa mʋ nɩɩ ɔ sʋ mʋ naa fɛ kɛ ba ba ka kʋkɔ mʋ.

26“Nɩɩ kɩyaafɔlɛ mʋ kyʋn muŋa mu amulii sʋ kʋlɛ mʋ yɛ, ‘Ɔbɩlɩsa, nyɛ kenyiita sa mɛ, n biti n ka fʋ kʋkɔ maŋa kpini.’ 27Nɩɩ kɩyaafɔlɛ mʋ asɩn ɩ waa mʋ owura mʋ kʋwɛɛ, nɩɩ ɔ taa kʋkɔ mʋ kpini kɛɛ mʋ, nɩɩ ɔ yɛgɛ nɩɩ ɔ natɛ.

28“Amaa kɩyaafɔlɛ mʋ maa lɩɩ mʋ, ɔ naa wu mʋ bɩrɩsa kɩyaafɔlɛ mʋ nɩɩ mɔɔ mʋ ɔ sʋ mu afulee nderebi kɩlɩfa. Nɩɩ ɔ naa kɩtaa mʋ ɔbʋlɛ tɔ tɔwɛ mʋ yɛ, ‘Ka mɛ kʋkɔ mʋ nɩɩ fʋ sʋ mɛ.’

29“Nɩɩ mʋ bɩrɩsa kɩyaafɔlɛ mʋ muŋa mu amulii sʋ kʋlɛ mʋ yɛ, ‘Nyɛ kenyiita sa mɛ, n biti n ka kʋkɔ mʋ kpini.’

30“Amaa o kina mʋ bɩrɩsa maŋa kɩkʋlɛ mʋ, nɩɩ ɔ taa mʋ naa tii obu naa fʋʋ saŋa mʋ nɩɩ ee biti ɔ nyɛ afulee ba ka mʋ kʋkɔ mʋ. 31Mʋ bɩrɩsa ayaafɔlɛ mʋ nɩɩ ba san mʋ ba maa wu kanan mʋ nɩɩ ɔ waa mʋ bɩrɩsa mʋ, ɩ tɔɔrɔɔ bamʋ gaa nɩɩ ba naa tɔwɛ asɩn mʋ kpini sa bamʋ owura mʋ.

32“Tʋtɔ nɩɩ owura mʋ tɩɩ mʋ kɩyaafɔlɛ maŋa ba nɩɩ ɔ tɔwɛ mʋ yɛ, ‘Fʋ gyɛ kɩyaafɔlɛ kumu tɔ ɔlʋn wuya. N taa fʋ kʋkɔ kpini nɩmʋ kɛɛ fʋ, kpalɩ fɛɛ fʋ maa kʋlɛ mɛ sʋ. 33Ɩ man dagaa fʋ gbaa fʋ maa wu fʋ bɩrɩsa mʋ kʋwɛɛ fɛɛ kanan mʋ nɩɩ ngbaa mɛ n wu fʋ kʋwɛɛ mʋ?’ 34Tʋtɔ mʋ ɔnyɩrɩpɛ mʋ nyɛ agbʋ gaa, nɩɩ ɔ taa mʋ naa tii obu yɛ ba nyanla mʋ naa fʋʋ saŋa mʋ nɩɩ ee biti ɔ ka kʋkɔ mʋ kpini.”

35Nɩɩ Yesu tɔwɛ bamʋ yɛ, “Falɛ nɩɩ Mɛ‐Sɛ mʋ nɩɩ ɔ bʋ sʋsʋ mʋ ii biti ɔ waa fanɛ ɔkʋmaa nɩmʋ, amɔɔ fʋ kan taa fʋ bɩrɩsa alibi kɛɛ mʋ lɩɩ fʋ kɔkɔlɔ tɔ mʋ.”

Currently Selected:

Mat 18: naw

Highlight

Copy