Asu 6
6
Anyɩn Akyɛtɔpʋ Asunɔ mʋ Kɩlɛɛ
1Saŋa mʋ nɩɩ Yesu abuupu mʋ ba nyɛ akyɔ mʋ, kamɔɔrɛ‐gyii kɩ ba Gyiwu ndɛ‐bii mʋ nɩɩ bɛɛ tɔwɛ Giriki mʋ yɛ Gyiwu ndɛ‐bii mʋ nsana. Ba fabɩlɛ yɛ Gyiwu ndɛ‐bii mʋ ba mɛɛ sa bamʋ akulapu‐kyɩɩ atɔ barɩgɛsa kanan mʋ nɩɩ ɩ dagaa. 2Ɩmʋ sʋ mʋ, asunpu kudu‐anyɔ mʋ ba sarɛ Yesu abuupu mʋ kpini. Nɩɩ ba tɔwɛ bamʋ yɛ, “Ɩ man dagaa fɛɛ a yɛgɛ abwaarɛsɩn kɩtɔwɛ yɩla kɛ a ba kɩɩ atɔ kɩbarɩgɛ sʋ. 3Kanɩn sʋ anɛ‐daa ana yɛ anɛ‐supu ana, fan lɛɛ fanɛ tɔ anyɩn asunɔ mʋ nɩɩ bɛ sʋ bɛɛrɛɛ yɛ kanyaasɩn nɩɩ Kayaayu Kyɩrɛkyɩrɛ kɩ bɔla bamʋ tɔ mʋ, kɛ a taa kusun nɩmʋ waa bamʋ abaa tɔ, 4kɛ a nyɛ saŋa sa kabwaarɛ‐kʋlɛ yɛ abwaarɛsɩn kɩtɔwɛ mʋ.”
5Kanɩn nfɛɛrɛ mʋ ɩ pɩrɛ bamʋ kpini. Nɩɩ Yesu abuupu mʋ ba lɛɛ Sitefen mʋ nɩɩ mʋ kɩkɔɔlɛ‐gyii yɛ Kayaayu Kyɩrɛkyɩrɛ kɩ kyɔ mʋ tɔ mʋ, nɩɩ ba lɛɛ Filipi yɛ Pokoro yɛ Nikano yɛ Timon yɛ Pamena maa Nikolasi mʋ nɩɩ ɔ lɩɩ Antiyoki, nɩɩ ɔ taa mʋ n‐yɩɩ biliŋi Gyiwu abi, nɩɩ ɔ ba kɔɔlɛ Yesu gyii mʋ. 6Nɩɩ ba lɛɛ bamʋ kaapʋ asunpu mʋ, nɩɩ asunpu mʋ ba taa bamʋ abaa gyaga bamʋ sʋ nɩɩ ba kʋlɛ kabwaarɛ‐kʋlɛ sa bamʋ.
7Ɩmʋ sʋ abwaarɛsɩn mʋ ɩ yɛlɩgɛ. Yesu abuupu mʋ ba nyɛ akyɔ tii sʋ Gyerusalem ɔsʋwʋlɛ sʋ. Nɩɩ Ɩbwaarɛ aseepu mʋ gaalaagaa gbaa ba kɔɔlɛ Yesu gyii.
Gyiwu abɩlɩsa ba kɩtaa Sitefen
8Sitefen mʋ nɩɩ ɔ sʋ ɔlʋn nɩɩ Ɩbwaarɛ bwaala mʋ mʋ, waa asɩn kyinkyinsa yɛ asɩnkaala asa mʋ tɔ. 9Amaa Gyiwu abi mʋ nɩɩ ba lɩɩ Kirini yɛ Alekisanda kabwaarɛ kʋlɛkpa mʋ nɩɩ bɛ tɩɩ yɛ ba kɔɔlɛ bamʋ n‐yɩɩ, yɛ bamʋ nɩɩ ba lɩɩ Silisiya, Asiya ɩsʋwʋlɛ sʋ mʋ kpini ba gyii Sitefen ɩmɔɔrɛ. 10Lɩɩ mʋ kanyaasɩn yɛ Kayaayu Kyɩrɛkyɩrɛ ɔkpa katɔwɛ tɔ sʋ mʋ, ba man taalɛ yɩlɛ mu ansi tɔ.
11Ba lɩɩ asiiri tɔ naa wu asa akʋ yɛ ba ba tɩn atɩntɩnsa gyaga Sitefen sʋ, kɛ ba ba tɔwɛ yɛ, “An nu Sitefen maa tɔwɛ nbusaa asɩn ɛɛ gyaga Mosesi maa Ɩbwaarɛ sʋ.” 12Nɩɩ amɔɔrɛ‐gyipu ba tɔwɛ fun waa abɩlɩsa mʋ yɛ Mosesi nbara akaapʋpʋ yɛ asa mʋ kpini nkɔlɔ nɩɩ ba kɩtaa Sitefen ba Ɩsɩrayɩ kʋbʋ‐kʋbʋ abɩlɩsa mu ansi tɔ. 13Ba bɩya antɩŋɛsa wuya ana nɩɩ ba tɔwɛ yɛ, “Saŋa kʋmaa ɔnyɩn nɩmʋ ɩ tɔwɛ nbusaa asɩn ee yii kabwaarɛ‐sunkpa ayɛ kyɩrɛkyɩrɛ mʋ yɛ Mosesi nbara mʋ nɩɩ ɔ sa anɛ mʋ. 14Nɩɩ an bɩla nu maa tɔwɛ yɛ Yesu Kanasareti‐nyɩn mʋ biti o boyi Kabwaarɛ‐sunkpa ayɛ mʋ, kɛ ɔ kyɛɛgɛ anɛ anaana atɔ mʋ nɩɩ anɛ naana Mosesi taa sa anɛ mʋ.”
15Ɩsɩrayɩ kʋbʋ‐kʋbʋ abɩlɩsa mʋ kpini mʋ nɩɩ ba tɛ asɩn mʋ tɔ mʋ, ba kɩɩ Sitefen kyimm, nɩɩ ba wu mu ansi tɔ ɩ maa du fɛɛ Ɩbwaarɛ kabɔɔ ansi tɔ mʋ.
Currently Selected:
Asu 6: naw
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
