Matiu 11

Ɗiban mala Yohana Mǝbatisǝma aban Yesu

(Luka 7:18-35)

1A nzǝm mana Yesu yi malǝna ne alaggana male lum-nong-ɓari amǝnia yì akwarkiru ka, pǝlǝa nying ban mǝno kutio o nǝ̀ ngga kanigir andǝ hamnǝ cau arǝ ala mala amǝ Galili.

2Yohana Mǝbatisǝma ka nda a ndàkurban sǝ ok ce agir mana Kǝrǝsti kǝ pea ka, pǝlǝa tur alaggana male 3ɓǝa kya ɗi ama, “A nda Mǝ'amsǝban mǝnana sǝm kundǝkiyi muri ka le, ko ɓǝ̀ sǝm tsǝk mǝsǝ sǝm arǝ ɓeɓwa ɗang?”

4Yesu nyesǝia wia ama, “Wu nyare wu kya ban Yohana wu kya banggi wi cau mala agir mana wu kǝ sǝnia sǝ wu kǝ oea ka. 5Ante kǝ sǝnban, agbakǝre kǝ gya, à kǝ twali amǝdakali ban akwano bǝsa malea, amǝkir'ara kǝ okban, à kǝ loasǝ alú, sǝ à kǝ hamnǝ Cau Amsǝban aban amǝtǝr.#11:5 Ɓalli gbal aɓa: Isha 35:5,6; 61:1. 6Tsǝkbu mala Ɓakuli na amur aɓwana mana à kum ɓe kǝgir annda a rǝam raka.#11:6 à kum ɓe kǝgir annda a rǝam raka: Ko “à kum ɓe kǝgir a rǝam mǝnana nǝ̀ cia à nǝ̀ bwaki buia arǝ earnǝ mim ka raka.””

7Lang alaggana mala Yohana purna à nǝ̀ nggǝ o ka, Yesu tita ne aɓwana cau amur Yohana ama:

Mǝnana wu puro wu wario a ɓabondo aban Yohana ka, mana ɗe wu wari a sǝne? Wu wari a sǝn ndǝrdangŋa mǝnana gung kǝ dǝurǝki ka le? 8Ɓǝ̀ pa ana raka, mana wu puro wu wari a sǝne? Wu wari a sǝn ɓwa mana oasǝ agir-nggurǝu mǝɓoarne a rǝì ka le? Awo, aɓwana mǝnana à oasǝkiyi agir-nggurǝu mǝɓoarne a rǝia ka à nda aɓalǝ apalta mala amurǝma. 9Sǝ mana ɗe wu wari a sǝne? Mǝɓangna na le? E, ǝn nggǝ bangga wun yì ka, kuti mǝɓangna. 10Yì nda ɓwa mǝnana à gilǝ mǝnia yì cau amuri ka ama:

“Mǝ nǝ tur mǝturonjar

mem a ɓadǝmbǝo,

mǝnana nǝ̀ yia gilǝkio njar

ace yiu mo ka.” # 11:10 Ɓalli gbal aɓa: Mal 3:1 .

11 Ən nggǝ na wun mǝsǝcau: Ata ɓwapǝndǝa kat ka à malaká ɓǝl kǝɓwa a ɓanza man mǝnana kum gulo kuti mala Yohana Mǝbatisǝma ka ɗang; sǝa ma ɓwa mǝkyauwe kat a Domurǝm mala kuli ka, kuti Yohana nǝ gulo. 12Lo a nza mala Yohana Mǝbatisǝma yi bwal a dyan ngga, Domurǝm mala Kuli ka kǝ nu tanni kǝrkǝr a bu aɓwana, sǝ amǝ bumpina ka à kǝ̀ é nǝ rǝcandǝa. 13Amǝ'ɓangna mala Ɓakuli kat andǝ malǝmce Nggurcau mala Musa ka à hamna nǝ cau amur Domurǝm mala Ɓakuli yi pur a pwari mala Yohana.#11:13 Ɓalli gbal aɓa: Luk 16:16. 14Sǝ ɓǝ̀ wu nǝ̀ eare wu nǝ̀ ak cau mǝnia ka, Yohana ka nda Iliya mǝnana à bangŋa ama nǝ̀ yiu ka.#11:14 Ɓalli gbal aɓa: Mal 4:5-6; Mat 17:10-13; Mar 9:11-13. 15Ɓwa mana kat ndanǝ akiru okban ngga ɓǝ̀ ok cau.

16 Arǝ mana sǝ mǝ nǝ kani amǝ'nza man? À nda kǝla amuna mana à do aɓa limo sǝ à kǝ akia rǝia tunǝkiban nǝ cau ama:

17 “Sǝm twangga wun ntetu,

sǝ wu tanggwam ɗang;

sǝm tuka wun nggyal ɓua lú,

sǝ wu ɓua ɗang.”

18 Yohana yiu, liki kǝgir ɗang, sǝ nuki kǝgir gbal ɗang. À yì bangŋa ama, “Ndanǝ kukwar a rǝì.” 19Muna mala Ɓwa yiu kǝ li sǝ kǝ nu, à yì bangŋa ama, “Mǝligula na sǝ mǝ'ɓiki nu mur anap na, gyajam mala amǝ'aki aboalo-cemi andǝ acilia amǝ'cauɓikea ka.” Sǝ sǝlǝe mala Ɓakuli ka à kǝ surǝì arǝ turo male.

Yesu ɓǝsǝki amǝɓinǝ pwanzali

(Luka 10:13-15)

20Yesu kutia naki acau nǝ bumkiɗikea amur ala mana kya pakki agir-ndali kam kuti acili aban kat ka, acemǝnana à ɓinǝ pwanzali ɓǝa nying acauɓikea malea ka. Na ama:

21 Wun amǝ Korazin, ban nǝ ɓikea wun! Wun amǝ Beseda, ban nǝ ɓikea wun! Ɓǝ̀ ama agir-ndali mǝnana ǝn pea aɓalǝ ala ma'wun ngga à nda ǝn pea arǝ ala mala amǝ Taya andǝ amǝ Sidon ngga, ɓǝa oasǝkina asangginagir a rǝia sǝ à songŋǝna tú amuria ɗiɗyal mana nǝ̀ lǝmndǝ ama à nyingŋǝna acauɓikea malea ka. # 11:21 Ɓalli gbal aɓa: Isha 23:1-18; Ezǝk 26:1–28:26; Jol 3:4-8; Amo 1:9,10; Zak 9:2-4. 22Sǝ mim ngga ǝn nggǝ na wun ama gir mǝnana nǝ̀ kum wun a pwari ɓashi ka, nǝ̀ ɓike nǝ̀ kuti gir mana nǝ̀ kum amǝ Taya andǝ amǝ Sidon ngga.

23 Sǝ we Kapanahum ngga, ama à nǝ̀ loasǝo a kuli le? Awo, a nggearǝ nzali a tuli-lú sǝ à nǝ̀ yinǝ we. Ɓǝ̀ ama agir-ndali mana ǝn pakkia a ɓalǝo ka ǝn pangŋǝnia a Sodom ngga ɓǝ yalung ngga ndakam piu. # 11:23 Ɓalli gbal aɓa: Isha 14:13-15; Tite 19:24-28. 24Sǝ ǝn nggǝ no ama, gir mǝnana nǝ̀ kumo a pwari ɓashi ka nǝ̀ ɓike nǝ̀ kuti gir mǝnana nǝ̀ kum nzali Sodom ngga.#11:24 Ɓalli gbal aɓa: Isha 14:13-15; Tite 19:24-28.

Yesu kǝ pe aɓwana male usǝlǝo

(Luka 10:21-22)

25A pwari mǝno ka Yesu na ama:

Ən nggǝ ɓwangsǝo, we Dâ, mǝtala kuli andǝ nzali, ace mǝnana a sǝmbǝrǝ agir mǝnia ka arǝ amǝ'sǝlǝgir andǝ amǝ sǝlǝcau, sǝ a lǝmndǝia a banfana aban amǝ'ɗwanyi-sǝle. 26E, Dâ, anggo sǝ ɓoarô ama ɓǝ̀ pa.

27 Tárram Ɓakuli panam agir kat aɓa buam. Kǝ ɓwa surǝam yì Muni ɗang, she kǝ yì Ɓakuli Tárram; sǝ kǝɓwa surǝ Ɓakuli yì Tárram ɗang, she kǝ mim Muni andǝ aɓwana mana ǝn tarkia mǝ nǝ lǝmndǝ Ɓakuli Tárram abania ka. # 11:27 Ɓalli gbal aɓa: Yoh 1:18; 3:35; 10:15.

28 Wu yiu abanam, wun kat mǝnana wu kǝ tanni sǝ twalo dǝmbǝrya wun ngga, mǝ nǝ pà wun usǝlǝo. 29Wu pa ɓamur rǝ wun aɓata nzongcau mem, kǝla mana nda-rya kǝ pa ɓamuri aɓata nggun-rya ka. Acemǝnana mǝ nda ɓukɓuk, nǝ nwangsǝmuru a ɓabum ngga, wu kànì a rǝam, sǝ yilǝmi wun nǝ̀ kum usǝlǝo.#11:29 Ɓalli gbal aɓa: Ir 6:16. 30Nggun-rya mem ngga nda halku, sǝ twalo mem ngga nda hapǝlam.

Currently Selected:

Matiu 11: mbu

Highlight

Copy