Luka 17
17
Yesu na cau amur twalban cauɓikea
(Matiu 18:6-7,21-22; Markus 9:42)
1Yesu ne alaggana male ama:
Agir mǝnana à nǝ̀ tsǝk aɓwana à nǝ̀ kpa aɓa cauɓikea ka dumǝna púp à nǝ̀ yiu. Sǝa ma caukwanban nǝ́ ɓwa mǝnana amǝnia yì agir à pur nǝ bani ka. 2Ɓǝ̀ ɓwa nǝ̀ tsǝk mwashat ata amǝnia yì amuna ɓǝ̀ pak cauɓikea ka, kǝpǝna ɓǝa ɗurri ɓwe taligo a meali sǝ ɓǝa ramte aɓa nggeamur. 3Ace mani ka wu tsǝk kir wun.
Ɓǝ̀ mǝ'eambǝo pakko cauɓikea ka, gimbi, sǝ ɓǝ̀ vwaki bui arǝ cauɓikea male pwanzali ka, twali wi banì.#17:3 Ɓalli gbal aɓa: Mat 18:15. 4Ko ɓǝ̀ pakko cauɓikea kusǝ tongno-nong-ɓari aɓa pwari mǝ'mwashati, sǝ nyar kusǝ tongno-nong-ɓari abano yi pwanmbo nzali ka, twali wi banì.
5Pǝlǝa Amǝ'mishan ne Mǝtalabangŋo ama, “Tsǝk paɓamuru ma'sǝm ɓǝ̀ gulo.”
6Mǝtalabangŋo pea wia eare ama:
Ko ɓǝ̀ guliarǝu ma'wun kyauwe kǝla mǝsǝ musta ka, wu nǝ̀ gandǝ banggi nggea nggun mǝnia ka ama, “U, kya kpa aɓa nggeamur!” Sǝ yì ka, nǝ̀ kpata cau ma'wun.
7Ɓǝà twali ama ɓeɓwa na kam aɓalǝ wun mana ndanǝ muna-ɓala mǝnana wario a rya a ɓaban ko a yal anzur ka. Ɓǝ̀ mǝnia yì muna-ɓala ka ndo kǝ nyari ɓabondo nǝ nyare ka, mǝtala-ɓala male nǝ̀ ne wi ama, “Faro, yiu do lili le?” 8Pa nǝ̀ ne wi ama, “Pakkam girlina peatu, wu yi tsǝkami a ɓadǝmbǝam, ɓǝ̀ ǝn linali sǝ ǝn nuna mur ka, sǝ a wu nǝ lili, a wu nǝ nu mur re?” 9Nǝ̀ pakki muna-ɓala man yàwá, acemǝnana kpata cau mana ne wi ɓǝ̀ pe ka le? 10Anggo gbal sǝ nǝ̀ pang nǝ wun: ɓǝ̀ wu pangŋǝna agir mǝnana kat à bangga wun ama ɓǝ̀ wu pea ka, wu nǝ̀ na ama, “Sǝm nda ka mǝturo-ɓala mǝnana sǝm pà a kun kǝgir raka. Kǝ turo ma'sǝm na sǝm pak ka.”
Yesu twali amǝ dakali lum ban kwano malea
11Yesu nǝ̀ o a Urǝshalima ka, kar nǝ nzong-nzali mala amǝ Samariya andǝ amǝ Galili. 12Nda ban kutio aɓa ɓe muna-la ka, aɓea burana lum amǝdakali na, à yì kasǝa akuni. À cam zak, 13sǝ à loasǝ gia à tunǝban ama, “Ɓwamǝgule! Yesu! Sǝn mǝsǝswatǝr ma'sǝm!”
14Yesu pǝlǝ mǝsǝì sǝnia sǝ nea wia ama, “Wu kyane, wu kya lǝmndǝ rǝ wun aban apǝris.”#17:14 Ɓalli gbal aɓa: Pǝris 14:1-32.
À nda ban o ka, kara dakali mali rǝia.
15Lang ɓwa mwashat aɓalǝia sǝni rǝì malǝna ka, kara soaɓunu nyare aban yiu, loasǝ gi, kǝ ɓwangsǝki Ɓakuli. 16Yi kpa a ɓadǝm Yesu aban pakki wi yàwá. Sǝ yì ka, ɓwa Samariya na.
17Yesu ɗiban ama, “Aɓwana lum mbo sǝ à twalia wia ban dakali? Aman tongno-nong-ine ka à nda malea aya là? 18Kǝ ɓwa pà kàm atea nǝ̀ nyare nǝ̀ ɓwangsǝ Ɓakuli ka ɗang, she kǝ ɓwa-kúnɗangna mǝnia ka?” 19Pǝlǝa ne wi ama, “Lo o, guliarǝu mo amsǝno.”
Yiu mala Domurǝm mala Ɓakuli
(Matiu 24:23-28,37-41)
20Amǝ Farisi ɗi Yesu ama, “A ya pwari sǝ Domurǝm mala Ɓakuli nǝ̀ yiu le?” Yesu earia wia ama, “Yiu mala Domurǝm mala Ɓakuli ka gir na mǝnana à nǝ̀ sǝni nǝ mǝsǝu ka ɗang. 21Kǝɓwa pà nǝ̀ na ama, ‘Ndya ka, wu sǝni’ Ko ana raka, ‘Ndako ka’ ɗang. Acemǝnana Domurǝm mala Ɓakuli ka nda àkǝ̀ ɓalǝ wun.”
22Pǝlǝa ne alaggana male ama:
Pwari na kǝ yiu ka yi mǝnana rǝ wun nǝ̀ ɓǝla arǝ sǝn pwari mwashat aɓalǝ apwari mala Muna Mala Ɓwa ka, sǝ pà wu nǝ̀ sǝni ɗang. 23Ɓwapǝndǝa nǝ̀ na wun ama, “Ndako ka!” Ko ana raka, “Ndya ka!” Wu kǝa ɓangŋa atea ɗang. 24Kǝla mǝnana ɓǝ̀ mbulo linzama pǝlilip ka, nǝ̀ tá amur ɓanza a bui man nǝ̀ ngga bwal ɓe bui ka, anggo sǝ Muna Mala Ɓwa nǝ̀ pa a pwari nyare male. 25Sǝa ma peatu ka, Muna mala Ɓwa nǝ̀ nu tanni kǝrkǝr arǝ agir pas, sǝ aɓwana mǝnana a nza man ngga à nǝ̀ ɓinǝ mǝsǝì.
26Kǝla mǝnana kumban a nza mala Nuhu ka, anggo sǝ nǝ̀ pa aɓalǝ anonggeo mǝnana Muna Mala Ɓwa nǝ̀ nyare nǝ̀ yiu nǝi ka.#17:26 Ɓalli gbal aɓa: Tite 6:5-8. 27Ɓwapǝndǝa kǝ lili, kǝ nu, à kǝ al rǝarǝia, à kǝ isǝ amunia ba pwari mǝnana Nuhu kuti nǝi a nggea-waru ka. Pǝlǝa mùrgula yiu yi twal tea kat.#17:27 Ɓalli gbal aɓa: Tite 7:5-24.
28 # 17:28 Ɓalli gbal aɓa:
Tite 18:20–19:25
. Kǝ nda anggo a nza mala Lotu. Ɓwapǝndǝa kǝ li, à kǝ nu, à kǝ kurkuro, à kǝ makkiagir, à kǝ rikrya, à kǝ ɓakki aɓah. 29A pwari mǝnana Lotu purî ɓa Sodom ngga, bǝsa andǝ amǝsǝtali bǝsa nya nǝ kuli amur amǝ Sodom twaltea kat.
30Anggo sǝ nǝ̀ kumban a pwari mǝnana Muna Mala Ɓwa nǝ̀ yia pusǝna rǝì nǝi ka. 31A mǝno yì pwari ka, ɓwa mǝnana nda amur kurǝm male sǝ agirkuma male ka à nda aɓa kurǝm ngga, ɓǝ̀ kǝa na ama nǝ̀ sulǝ púp nǝ̀ ngga pwania ɗang. Anggo sǝ ɓwa mǝnana nda a ɓabondo ka, ɓǝ̀ kǝa nyare a ɓala ace twal kǝgir ɗang.#17:31 Ɓalli gbal aɓa: Mat 24:17-18; Mar 13:15,16. 32Wu ɗenyi nǝ málá Lotu!#17:32 Ɓalli gbal aɓa: Tite 19:26.
33Ɓwa mǝnana kǝ earce nǝ̀ amsǝ yilǝmi ka nǝ̀ turte. Sǝ ɓwa mǝnana kǝ turta yilǝmi ka nǝ̀ amsǝi.#17:33 Ɓalli gbal aɓa: Mat 10:39; 16:25; Mar 8:35; Yoh 12:25. 34Ən nggǝ na wun, a mǝno yì du ka, aɓwana ɓari nǝ̀ pa aban nongŋo a kala mǝ'mwashati, à nǝ̀ twal man mwashat ka, à nǝ̀ nying ɓe. 35À nǝ̀ kum amamǝna ɓari aban go aban mǝ'mwashati, à nǝ̀ twal mwashat à nǝ̀ nying man mwashat ka. 36[À nǝ̀ kum aburana ɓari a ɓaban, à nǝ̀ twal man mwashat ka, à nǝ̀ nying ɓe.]
37Pǝlǝa alaggana male ɗi ama, “Aya ban le, Mǝtalabangŋo?”
Yesu earia wia ama, “Ban mǝnana lugir pak kam ngga, abanì sǝ adǝkǝlaki nǝ̀ rambǝa.”
Currently Selected:
Luka 17: mbu
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2016
