Yohana 20

Lo mala Yesu a ɓembe nǝ yilǝmu

(Matiu 28:1-8; Markus 16:1-8; Luka 24:1-12)

1Anzǝm pwari Sabbat nǝ tadǝmbari ɗiɗyal, ban na mbul-mbul piu, Maryamu Mɓwama Magdala wario a ɓembe, sǝ kya sǝni ka tali mǝnana à girna kun ɓembe nǝi ka, à gǝshini. 2Pǝlǝa nyar nǝ mire aban ká aban Shiman Bitǝrus andǝ ɓe lagga, mǝnana Yesu kǝ earce kǝrkǝr ka, sǝ banggia wia ama, “À pusǝna Mǝtala sǝm Yesu a ɓembe, sǝ sǝm surǝ ban mǝnana à wari nǝi kam ngga ɗang!”

3Pǝlǝa Bitǝrus andǝ mǝno yì ɓe lagga ka, à puro à dǝshi ɓembe. 4Yia kǝm ngga à nda aban ká nǝ mire, sǝ mǝno yì ɓe lagga ka ɓangŋa aki Bitǝrus dǝmbǝa yi bik ban ɓembe. 5Pǝlǝa dili muri a kun ɓembe, sǝn anggurbyau-mur lú aɓa ɓembe sǝ kuti ɗang. 6Lang Shiman Bitǝrus yiu nǝ nzǝmo ka, kara kuti nǝ kutio aɓa ɓembe. Yì gbal ka kǝ anggurbyau-mur lú na sǝn ngga, 7sǝ nggurbyau mǝnana à marǝkina ɓamur Yesu nǝi ka, pà aban acili anggurbyau mǝnana à tsǝngŋǝna ban Yesu nǝia ka ɗang; male ka à kàrrì à nongsǝi ɗàng. 8Sǝ lagga mǝnana akdǝmbǝa ɓangŋa yiu a kun ɓembe ka, kuti gbal aɓa ɓembe; sǝn agir nì kat, sǝ ear ama mǝsǝcau na, Yesu longŋǝni ɓembe. 9Kania ama gir mǝnia ka nǝ̀ yia kumban ngga, yìa ka, à bwalta cau mala Malǝmce mala Ɓakuli mǝnana bangŋa ama, Yesu nǝ̀ loapi ɓembe nǝ yilǝmu ka ɗang. 10Pǝlǝa alaggana mǝno nyare à o a la.

11Sǝ Maryamu ka came a nza a kun ɓembe aban ɓuá. Nǝ́ ɓuá a kuni, sǝ dìlì muri nǝ sǝn ɓa ɓembe. 12Kara sǝn amǝturonjar mala Ɓakuli ɓari nǝ agir pwasǝa a rǝia, aban do, aban mana à nongsǝ lú Yesu kam ɗiɗyal ka. Mwashat ka do nǝ ban ɓamuri, sǝ ɓe mǝnia mwashat ka nda a bu ban akusǝi. 13Sǝ à ɗi Maryamu ama, “Mɓwama, mana pur a rǝo sǝ a kǝ ɓuá le?”

Pǝlǝa Maryamu earia wia ama, “Aɓwana twalǝna Mǝtalem à umna nǝi, sǝ ǝn surǝ ban mǝnana à ci kam ngga ɗàng!”

14Sǝ pǝlǝ rǝì, nǝ̀ u ka, kara sǝn Yesu aban came abani, sǝ sǝlǝ ama Yesu na ɗang. 15Pǝlǝa Yesu ɗi ama, “Mɓwama, mana pur a rǝo sǝ a kǝ ɓua? Yana ɗe a alkite?”

Maryamu kǝ sǝni kǝla yì ka, mǝtala ɓaban na, pǝlǝa ne wi ama, “Ɓwamǝgule, ɓǝ̀ a nda a twali ka, banggam ban mǝnana a ci kam ngga, ace mǝnana ɓǝn kyane ɓǝ̀ nggea twali ka.”

16Pǝlǝa Yesu tunǝi nǝ lullǝi ama, “Maryamu!”

Pǝlǝa pǝlǝ rǝì abani sǝ na ama, “Rabbonai!” (Mǝnia nǝ kun Ibǝru ka nda “Malǝm.”)

17Yesu ne wi ama, “Ce a kúr a rǝam ɗang, acemǝnana ǝn malaká nyar aban Tárram a kuli peatu ɗang. Ado ka, kyane aban amǝ'eambǝam, alaggana mem, kya banggia wia ama, Mǝ ndo mǝ nǝ nyare aban Tárram, mǝnana nda Tárria ka, aban Ɓakuli mem, mǝnana nda Ɓakuli malea ka.”

18Anggo sǝ Maryamu Mɓwama Magdala wario kya kum alaggana mala Yesu sǝ banggia wia ama, “Ən sǝnǝna Mǝtalabangŋo Yesu!” Pǝlǝa banggia wia cau mǝnana Yesu banggi wi ka.

Yesu pusǝrǝi aban alaggana male

(Matiu 28:16-20; Markus 16:14-18; Luka 24:36-49)

19Nǝ pwarikpǝra a mǝno yì pwari a nzǝm pwari Sabbat ka, alaggana mala Yesu na a tarǝia aɓa kurǝm. À girki akunkurǝm acemǝnana à kǝ ɓanggi aɓwana-mǝgule mala amǝ Yahudi. Ɓalǝia ama nǝ̀ kasǝ ka, kara à sǝn Yesu purna, camǝna aɓalǝia, sǝ nea wia ama, “Ɓǝ̀ rǝ wun pwalo.” 20Lang bangŋǝna anggo ka, pǝlǝa lǝmndǝia wia anpenye mǝnana arǝ abui andǝ nkanggari ka. Alaggane lumsǝ nǝ banɓoarnado acemǝnana à sǝnǝna Mǝtalabangŋo ka.

21Yesu banggia wia ɗǝm ama, “Ɓǝ̀ rǝ wun pwalo. Kǝla mǝnana Tárram turam ngga, anggo gbal sǝ ǝn nggǝ tur wun.” 22Pǝlǝa pyaupia wia lin'ueo amuria sǝ na ama, “Wu ak Bangŋo Mǝfele. 23Ɓǝ̀ wu twali aɓwana ban acauɓikea malea ka, à twalǝnia wia banì. Sǝ ɓǝ̀ wu twalia wia banì raka, yia ka à twalia wia banì gbal ɗàng.”

Yesu lǝmndǝ ɓamuri aban Toma

24Toma, mwashat aɓalǝ alaggana lum-nong-ɓari, mǝnana à kǝ tunǝi ama Pasa ka, pa aɓalǝia, a pwari mǝno Yesu yiu abania ka ɗang. 25Pǝlǝa aɓi alaggana banggi wi ama, “Sǝm sǝnǝna Mǝtalabangŋo!”

Sǝ Toma banggia wia ama, “Mim ngga pà mǝ nǝ earnǝ mǝno ka ɗang, she ɓǝn sǝnǝna akun anpenye mala akūsà mǝnana arǝ abui, sǝ ǝn jena kun anpenye nǝ munabuam, sǝ ǝn tsǝngŋǝna buam arǝ pengye mǝnana a nkanggari ka.”

26Anzǝm nongŋo tongno-nong-tārú ka, alaggana na ɗǝm a tarǝia a ɓala andǝ Toma, sǝ akunakurǝm ngga à girkinia kat; kara Yesu yi cam ɗǝm aɓalǝia sǝ bangŋa ama, “Ɓǝ̀ rǝ wun pwalo.” 27Pǝlǝa lǝmndǝì Toma abui sǝ ne wi ama, “Sǝn abuam; sǝ wu tsǝk munabuo kani; sarǝ buo ci a rǝ pengye mana a mǝsǝ nkanggariam ngga. Ɗeki ɓabum tuti mo, earnǝ cau!”

28Toma pǝlǝa eari Yesu ama, “Mǝtalem andǝ Ɓakuli mem!”

29Yesu pǝlǝa ne wi ama, “Nda acemǝnana a sǝnǝnam ngga, sǝ a nǝ earnǝ mim le? Aɓwana mǝnana à sǝnam raka, sǝ à ak cau mem nǝ ɓabumia kat ka, à ndanǝ tsǝkbu mala Ɓakuli!”

Gir mǝnana tsǝa sǝ à gilǝ mǝnia yì malǝmce ka

30Yesu pakki aɓea agir-ndǝlǝki pas a mǝsǝ alaggana male, mǝnana à gilǝia aɓa malǝmce mǝnia raka. 31Sǝ amǝnia à gilǝia ka, nda ace mǝnana ɓǝ̀ wu earnǝi ama Yesu nda Kǝrǝsti, Mǝ'amsǝban, Muna mala Ɓakuli; sǝ aɓa paɓamuru ma'wun abani ka, wu nǝ̀ kum yilǝmu aɓa rǝcandǝa mala lullǝi.

Currently Selected:

Yohana 20: mbu

Highlight

Copy