Yohana 14

Yesu nda njargula ká aban Ɓakuli

1 “Ɓǝ̀ ɓabum wun ɓǝ̀ kǝa kiɗiki ɗàng. Wu pà ɓamur wun aban Ɓakuli, sǝ wu pà ɓamur wun gbal abanam. 2Aɓa ɓala mala Tárram ngga aban-do na kam pas. Ɓǝ̀ pa anggo raka ɓǝn bangŋǝna wun. Mǝ ká mǝ nǝ ngga gilǝki ban-do ace wun. 3Sǝ ɓǝ̀ ǝn warina ǝn nggea gilǝkina wun ban-do ka, mǝ nǝ nyare mǝ nǝ yia kúllí wun, ace mǝnana ban mana mǝ nda kam ngga, abanì sǝ wu nǝ̀ pǎ. 4Wu surǝna rǝ njargula ká aban mǝnana mǝ nǝ ká kam ngga.”

5Toma ne wi ama, “Mǝtalabangŋo, sǝm surǝ ban mǝnana a nǝ ká kam ngga ɗang, sǝ lang sǝ sǝm nǝ̀ surǝ njar ká abanì le?”

6Yesu eari wi ama, “Mǝ nda njargula, Mǝ nda mǝsǝcau, sǝ Mǝ nda yilǝmu; kǝɓwa pà nǝ̀ ká aban Ɓakuli Tarrû ɗang she nǝ banam. 7Ɓǝ̀ wu surǝna rǝam ngga, wu surǝna rǝ Tárram. Sǝ twal ado aban ká a dǝmbǝa ka wu surǝna rǝì, sǝ wu sǝnǝ nǝi.”

8Pǝlǝa Filip ne wi ama, “Mǝtalabangŋo, lǝmndǝa sǝm yì Tarrû; mani ka karǝna sǝm.”

9Yesu ne wi ama:

Filip, ǝn sauwuna nǝ do ata wun, sǝ ba ado ka a malaká surǝam ɗang? Ɓwa mǝnana sǝnǝnam ngga sǝnǝna Tárram. Sǝ palang sǝ a kǝ na ama mǝ lǝmndǝa wun rǝì? 10A ear mbo ama mǝ nda aɓa Tárram, sǝ Tárram ngga nda a ɓalǝam? Acau mǝnana ǝn nggǝ na wun ngga à pur nǝ banam ɗang, Tárram mǝnana dukiyi a ɓalǝam ngga nǝ̀ pakkiyi turo male nǝ mim. 11Wu earnǝ mim ama mǝ nda aɓa Tárram, sǝ Tárram ngga nda a ɓalǝam. Sǝ ɓǝ̀ ana raka, wu earnǝ mim ace aturo mǝnana wu sǝnam ǝn nggǝ pea ka. 12Mǝ nda ban bangga wun mǝsǝcau, ɓwa mǝnana pà ɓamuri abanam ngga, nǝ̀ pak agir-ndali kǝla amǝnana ǝn pea ka. Yale nǝ̀ pakki agir mǝgulke mǝnana à kuti amǝnana ǝn pea ka, acemǝnana mǝ ndo mǝ nǝ o aban Tárram. 13Sǝ mǝ nǝ pak gir mǝnana kat wu zǝmbǝa aɓa lullǝam ngga, acemǝnana Muna ka ɓǝ̀ yinì Tarrí nǝ gulo.#14:13 Ɓalli gbal aɓa: Mat 7:7; Yoh 15:7,16; 16:23; Jem 1:5. 14Wu zǝm gir mǝnana kat wu earkiyi ce ka aɓa lullǝam, mǝ nǝ pe.

Yesu pa cau mala Bangŋo Mǝfele

15 Ɓǝ̀ wu kǝ earcem ngga, wu nǝ̀ kpata anzongcau mem. # 14:15 Ɓalli gbal aɓa: Yoh 15:10; 1Yoh 5:3; 2Yoh 6. 16Sǝ mǝ nǝ zǝmbǝi Tárram, sǝ nǝ̀ pa wun Mǝbwala wun nggam, mǝnana nǝ̀ yia do ata wun ba málá male ka. 17Yì nda kǝ Bangŋo mana kǝ lǝmndǝ mǝsǝcau amur Ɓakuli ka. Amǝ kpata ɓanza pa nǝ̀ gandǝ é ɗang, acemǝnana à kǝ sǝni ɗang, sǝ à surǝì ɗang. Sǝ wun ngga wu surǝì, acemǝnana ndanǝ do ata wun ado, sǝ nǝnzǝmo ka nǝ̀ ngga do a ɓabum wun.

18 Ɓǝ̀ ǝn umna ka, pà mǝ nǝ nying wun kǝla akawa ɗang, mǝ nǝ yiu aban wun. 19Banì pà nǝ̀ sau ɗang, ɓanza pà nǝ̀ sǝnam ɗǝm ɗang, sǝ wun ngga wu nǝ̀ sǝnam. Sǝ acemǝnana mǝ ndanǝ yilǝmu ka, wun gbal ka wu nǝ̀ dum nǝ yilǝmu. 20Ɓǝ̀ pwarî mǝno yina ka, wu nǝ̀ sǝlǝ ama mǝ nda aɓa Tárram, sǝ wun ngga wu nda a ɓalǝam, sǝ mǝ nda aɓalǝ wun. 21Ɓwa mǝnana kat ak anzongcau mem sǝ kǝ kpatea ka, nda ɓwa mǝnana kǝ earcem ngga. Sǝ ɓwa mǝnana kǝ earcem ngga, Tárram nǝ̀ earce ɓwe, sǝ mim gbal ka mǝ nǝ earce, mǝ nǝ lǝmndǝ ɓamuram abani.

22Pǝlǝa Yahuda (mǝnana nda Yahuda Iskariyoti raka) banggi wi ama, “Mǝtalabangŋo, mana tsǝa sǝ a nǝ lǝmndǝ ɓamuro aban sǝm, sǝ a pà nǝ lǝmndǝì ɓanza kat ɓamuro ɗang?”

23Yesu eari wi ama:

Ɓwa mǝnana kat earcem ngga, nǝ̀ kpata kanigir mem, Tárram nǝ̀ earce, sǝ mim sǝnǝ Tárram ka, sǝm nǝ̀ yiu abani sǝm nǝ̀ do ate. # 14:23 Ɓalli gbal aɓa: 1Yoh 2:24; Sǝn 21:3. 24Ɓwa mǝnana kǝ earcem raka, pà nǝ̀ kpata kanigir mem ɗang. Sǝ acau mǝnia wu kǝ oea ka, à mem na ɗang, à pur nǝ ban Tárram mǝnana tasǝam ngga.

25 Amǝnia yì acau ka, ǝn nggǝ bangga wunia acemǝnana mǝ nda aban wun ado. 26Sǝ Mǝ pa wun gbasha, yì Bangŋo Mǝfele, mǝnana Tárram nǝ̀ tasǝi aɓa lullǝam ngga, nǝ̀ yia kania wun agirbunda kat, sǝ nǝ̀ kasǝ ɓalǝ wun arǝ agir mǝnana kat, ǝn bangga wun ngga.

27 Mǝ ndya ǝn nggǝ nying wun nǝ dorǝpwala ka. Sǝ mǝnia yì dorǝpwala ǝn pākiyi ka, ɓanza pànǝi nǝ̀ pà ɗang. Ace mani ka, ɓǝ̀ ɓabum wun ɓǝ̀ kǝa kiɗiki ɗang, sǝ ɓangciu ɓǝ̀ kǝa pakka wun ɗang. # 14:27 Ɓalli gbal aɓa: Yoh 16:33; Filp 4:7; Kol 3:15; Yoh 20:19.

28 Wu ɗenyi nǝ cau mǝnana ǝn bangga wun ama, mǝ nǝ o, sǝ mǝ ngga nyar aban wun ɗǝm ngga. Ɓǝ̀ mǝsǝcau wu earǝna cem ngga, ban nǝ̀ ɓoara wun ace o mem aban Tárram, mǝnana kutiam nǝ gulo ka.

29 Ən nanà wun ce amǝnia yì agir ka ado sǝ ɓǝa yì lumsǝo, ace mǝnana ɓǝa yì lumsǝna ka, wu nǝ̀ ear ama cau mem ngga mǝsǝcau na. 30Pà mǝ nǝ samsǝ ban cau mǝnana mǝ nǝ na wun ngga ɗǝm ɗang, acemǝnana murǝm mala ɓanza man ndya kǝ yiu ka, sǝ pànǝ rǝcandǝa a muram ɗang. 31Mǝ nǝ pak gir mǝnana Tárram banggam ɓǝ̀ ǝn pak ka, ace mǝnana ko yan a ɓanza ka ɓǝ̀ sǝlǝ ama ǝn nggǝ earce Tárram.

Wu lo, ɓǝ̀ sǝm o.

Currently Selected:

Yohana 14: mbu

Highlight

Copy