Yohana 12

Maryamu soapi Yesu muru-mǝrǝmɓoarne

(Matiu 26:6-13; Markus 14:3-9)

1Lang Lamsan Yalimuru ueo nongŋo tongno-nong-mwashat ka, Yesu wario a Betani, muna-la mala Liazaro, ɓwa mǝnana wu, sǝ Yesu loasǝi nǝ yilǝmu ka.#12:1 Ɓalli gbal aɓa: Mat 26:6-11; Mar 14:3-9; Luk 7:37-38. 2À lam girlina mala pwarikpǝra ace pe Yesu gulo. Marta na gaki girlina ka, sǝ Liazaro na aɓalǝ aɓwana mǝnana à li girlina andǝ Yesu ka. 3Pǝlǝa Maryamu twal muna-du muru mǝ'rǝmɓoarne, mǝnana à pe nǝ nard mǝɓoarnsari, sǝ kure pa bǝti raka, soe arǝ akusǝ Yesu, sǝ hasǝkia nǝ nyang muri. Kara rǝm muru mǝɓoarne man aki ɓala kat.

4Sǝ Yahuda Iskariyoti, mwashat ata alaggana mǝnana nǝ̀ ngga mak Yesu ka, na ama,#12:4 Ɓalli gbal aɓa: Yoh 6:71; 13:26. 5“Mana tsǝa sǝ à ginǝ mak man yì muru ka a kun dinari gbǝman-tārú, sǝ boale ka à pe mia amǝtǝr ɗang?” 6Yahuda ka bangŋa anggo, pà acemǝnana kǝ ɓuàce amǝtǝr ka ɗang, nda acemǝnana yì ka, mǝn'i na ka; sǝ acemǝnana yì nda mǝbwal ndaboalo mala alaggana mala Yesu ka, pak ka kǝ iu aɓa boale ace ɓamuri.

7Sǝ Yesu na ama, “Wu nying mɓwama man zàng! Gir mǝnana pe ka nda ace gilǝki luem ace pwari tsǝkban mem. 8Wun ngga, wu nda a tarǝ wun wunǝ amǝtǝr ko aya pwari ka, sǝ mim ngga ǝn pa ata wun koya pwari ɗang.”

Kurkun amur Liazaro à nǝ̀ wali

9Amǝ Yahudi pas ongŋǝna ama Yesu warina a Betani. Pǝlǝa à waria sǝne andǝ Liazaro mǝnana Yesu loasǝi nǝ yilǝmu a ɓembe ka. 10Pǝlǝa agbani Pǝris kurkunarǝia, à nǝ̀ wal Liazaro gbal, 11acemǝnana nda ace loasǝe nǝ yilǝmu a ɓembe sǝ pas aɓalǝ amǝ Yahudi kǝ ginǝkia, sǝ à kǝ pa ɓamuria aban Yesu.

Kutio limurǝm mala Yesu aɓa Urǝshalima

(Matiu 21:1-11; Markus 11:1-11; Luka 19:28-40)

12Ban fana ka, aɓwana pas mǝnana à yiu ace Lamsan Yalimuru ka, à yì ok ama Yesu na njar aban yiu a Urǝshalima. 13Pǝlǝa à twalki ambu nkangga a buia sǝ à puro à nǝ̀ ngga kuli. À kǝ mak-gawan, à kǝ na ama,

“Wu ɓwangsǝki Ɓakuli!

Tsǝkbu mala Ɓakuli na

amur ɓwa mǝnana kǝ yiu

aɓa lullǝ Mǝtalabangŋo

Ɓakuli ka!

Tsǝkbu mala Ɓakuli na

amur Murǝm mala

amǝ Isǝrayila!”#12:13 Ɓalli gbal aɓa: Ang 118:25,26.

14Yesu kum muna mǝndambǝritso sǝ eauwe do a nzǝmi, kǝla mǝnana Malǝmce na ama,

15“Wun amǝ Siyona,

ɓangciu ɓǝ̀ kǝa

pakka wun ɗang!

Murǝm ma'wun nia

kǝ yiu anzǝm muna

mǝndambǝritso ka!”#12:15 Ɓalli gbal aɓa: Zak 9:9.

16A dǝmbe ka alaggana mala Yesu bwalta amǝnia yì agir ka ama lumsǝo mala ɓangna na ɗang. Anzǝm mǝnana Ɓakuli loasǝna Yesu nǝ yilǝmu a ɓembe, sǝ Yesu kutina aɓa ɓoarɓwa male ka, nda sǝ ɓalǝia kasǝna arǝ gir mǝnana kumban ngga, sǝ à yì sǝlǝ ama agir mǝnia kat ka, à nda kam à gilǝe amur Kǝrǝsti aɓa Malǝmce.

17Ɓwabunda mǝnana à nda ata Yesu a pwari mǝnana tunǝ Liazaro ɓǝ̀ puri ɓembe, sǝ loasǝi nǝ yilǝmu ka, à camarǝ banggia aɓwana cau mala gir mǝnana à sǝn ngga. 18Gir mǝnana tsǝa sǝ ɓwabunda puro waria kuli Yesu ka, nda acemǝnana à ongŋǝna ama pak mǝnia yì gir'lǝmndǝa ka. 19Pǝlǝa amǝ Farisi ne a rǝarǝia ama, “Wu sǝni, turo mǝɓane na sǝm pakkiyi ka. Ɓanza pwana rǝì kat umna kpate!”

Yesu nacau amur lú male

20Aɓea amǝ Gǝrik na aɓalǝ aɓwana mǝnana à waria peri a Urǝshalima a Lamsan Yalimuru ka. 21À yiu aban Filip, mǝnana yì gbal ka pur a Beseda aɓa Galili ka, sǝ à zǝmbǝa ama, “Ɓwamǝgule, sǝm nggǝ earce sǝn Yesu.” 22Pǝlǝa Filip wario kya banggi Andǝru, sǝ yia kǝm à kutio à kya banggi Yesu.

23Yesu nyesǝia wia ama:

Ado ka pwarî yina, yì mǝnana Ɓakuli nǝ̀ lǝmndǝ gulo mala Muna mala Ɓwa ka. 24Mǝ nda ban bangga wun mǝsǝcau, ɓǝ̀ mǝsǝ mǝssa kpa a nzali sǝ wu raka, nǝ̀ ueo anggo nǝmurǝì mwashat. Sǝ ɓǝ̀ wu ka, nǝ̀ pusǝ amǝsǝì pas. 25Ɓwa mǝnana kat kǝ earce yilǝmi ka, nǝ̀ ɗwanyibanì, sǝ ɓwa mǝnana ginǝki yilǝmi a man yì ɓanza ka, nǝ̀ kum yilǝmu mǝnana málá male pà kàm raka. 26Ɓwa mǝnana kat earce nǝ̀ do a ɓatam ngga, dumǝna púp nǝ̀ yiu atam, ace mǝnana ban mǝnana kat mǝ nda kam ngga, àkǝ̀ banì sǝ guro mem nǝ̀ pa. Sǝ Tárram gbal ka nǝ̀ gusǝlǝ ɓwa mǝnana kat pà ɓamuri kǝ pak turo a ɓatam ngga.

27 Ado ka ɓabumam kǝ pi, sǝ aman sǝ mǝ nǝ na? Mǝ nǝ na nǝma, “Dâ, amsǝam aɓa mǝnia yì tanni ka ɓǝ̀ kǝa sulǝ a muram ɗang” le? Awo! Mǝnia ka nda tǝr yiu mem, acemǝnana ɓǝn kutio aɓa mǝnia yì bu-pwari mala tanni ka. 28We Dâ, yinǝ gulo ace lullǝo!

Kara Ɓakuli na cau nǝ kuli ama, “Ən angŋa dǝmbǝa ǝn gusǝlǝna lullǝam, sǝ Mǝ nǝ gusǝlǝi ɗǝm.” 29Lang ɓwabunda mǝnana à cam abanì à ok man yì giu ka, cilia twali ama mgbarangce na. Aɓea ɓwana ka à bangŋa ama, “Mǝturonjar mala Ɓakuli na ne wi cau ka!”

30Pǝlǝa Yesu nea wia ama, “Man yì giu ka pà acem sǝ yiu ɗang, nda ace wun. 31Pwari mala pakkî mǝnia yì ɓanza ɓashi ka, karǝna; ado sǝ Ɓakuli ak murǝm arǝ Shetan, yì murǝm mala ɓanza man. 32Sǝ anzǝm mǝnana à loasǝnam amur nggun-gangndi ka, mǝ nǝ nun ɓwapǝndǝa kat abanam.” 33Yesu na anggo acemǝnana ɓǝ̀ lǝmndǝ ulang lú mǝnana nǝ wu ka.

34Ɓwabunda pǝlǝa ne Yesu ama, “Sǝm ok aɓa Nggurcau mala Musa ama, Kǝrǝsti ka nǝ̀ dum nǝ yilǝmu mǝnana málá male pà kàm raka.#12:34 Ɓalli gbal aɓa: Ang 110:4; Isha 9:7; Ezǝk 37:24,25; Dan 7:14. Sǝ lang sǝ a na ama, ‘Dumǝna púp, à nǝ̀ loasǝ Muna mala Ɓwa amur nggun-gangndi?’ Yana ɓwe nda man yì ‘Muna mala Ɓwa’ ka?”

35Yesu earia wia ama, “Tǎlaban ngga nda aban wun ado, sǝ banì pà nǝ̀ sau ɗang. Wu gya aɓa mǝnia yì tǎlaban ado mǝnana nda aban wun ngga, ace mǝnana ɓǝ̀ pǝndǝa ɓǝ̀ kǝa gir amur wun ɗang. Aɓwana mǝnana à kǝ gya aɓa pǝndǝa ka, à kǝ gandǝ sǝn ban mǝnana à káki kam ngga ɗang. 36Wu guli arǝ tǎlabanì ado mǝnana nda aban wun ngga, ace mǝnana ɓǝ̀ wu duk amuna mala tǎlaban.”

Anzǝm mana Yesu naná man yì cau ka, pǝlǝa upia wia, à sǝni ɗǝm ɗang. 37Kat andǝ agir-ndǝlǝki mǝnana lǝmndǝ bu Ɓakuli, mǝnana Yesu pea a ɓadǝmbǝia ka, à pà ɓamuria abani ɗang. 38Mǝnia ka, nda ace lumsǝ ɓangna mala Ishaya mǝnana bangŋa ama,

“Mǝtalabangŋo,

yana ɓwe na earnǝ cau

mǝnana sǝm bang ngga,

sǝ aban yan sǝ à

lǝmndǝ rǝcandǝa mala

Mǝtalabangŋo?”#12:38 Ɓalli gbal aɓa: Isha 53:1.

39Ace mani ka à ginǝ earnǝ Yesu, acemǝnana Ishaya angŋa dǝmbǝa bangŋǝna ama,

40Mǝtalabangŋo girkina amǝsǝia,

ɗǝm ngga girkina ɓabumia.

Girkia ace mǝnana amǝsǝia

ɓǝa kǝa sǝnban ɗang,

sǝ ɓabumia ɓǝ̀ kǝa kum

sǝlǝe ɗang,

sǝ à pà nǝ̀ nyàr abanam

ace mǝnana ɓǝn

sonzǝia ka raka.#12:40 Ɓalli gbal aɓa: Isha 6:10.

41Ishaya na man yì cau ka, acemǝnana ak dǝmbǝa sǝn gulo mala Yesu ɗiɗyal, sǝ bangcau amuri.

42Kat andǝ amani ama pas ata aɓwana-mǝgule mala amǝ Yahudi, pà ɓamuria aban Yesu ka, à bang ce aban aɓwana bwāng ɗang, acemǝnana à kǝ ɓanggi amǝ Farisi ɓǝa kǝa pǝria aɓa ndakpapi ɗang. 43Yia ka à kǝ earce ɓwangsǝban mala ɓwamǝpǝnde amur ɓwangsǝban mala Ɓakuli.

Cau mala Yesu nǝ̀ ɓashi aɓwana

44Pǝlǝa Yesu loasǝ gi kpǝm sǝ na ama:

Ɓwa mǝnana kat guli a rǝam, mǝ nda gulikiyi a rǝam nǝmurǝam ngga ɗang, ndaban guli gbal arǝ Tárram mǝnana tasǝam ngga. 45Ɓwa mǝnana kat sǝnam ngga sǝna Tárram mǝnana tasǝam ngga. 46Ən yiu kǝla tǎlaban ace pa tǎlaban aɓa pǝndǝa mala ɓanza man, ace mǝnana ɓwa mana kat pà ɓamuri abanam ngga, ɓǝ̀ kǝa ueo aɓa pǝndǝa ɗang.

47 Ɓwa mǝnana kat ok kanigir mem, sǝ kpate raka, mǝ nda mǝ nǝ ɓashi wi ka ɗang. Pa ace ɓashi sǝ ǝn yiu a ɓanza ɗang, ǝn yiu ace amsǝ ɓanza. 48Aɓwana mǝnana kat à ginǝam sǝ à ginǝ ak cau mem ngga, à ndanǝ mǝɓashi mǝnana nǝ̀ ɓashia wia ka. Acau mǝnana ǝn nea ka, à nǝ̀ mea a ɓashi a masǝlǝata apwari! 49Agir mǝnana kat ǝn nggǝ kania ka, à pà aɓa rǝcandǝa mem ɗang, Tárram mǝnana tasǝam ngga, nǝ̀ pam nzongcau arǝ mana ɓǝn na sǝ lang sǝ mǝ nǝ ne. 50Sǝ ǝn sǝlǝna ama anzongcau male ka à nǝ̀ kánǝ ɓwa aɓa yilǝmu mǝnana málá male pà kàm raka. Gir mǝnana ǝn naki ka nda gir mǝnana Tárram banggam mǝ na ka.

Currently Selected:

Yohana 12: mbu

Highlight

Copy