Yohana 1
1
Cau duk ɓwa
1Kaniama Ɓakuli nǝ̀
pusǝ ɓanza ka,
Cau ni na kam,
sǝ mǝno yì Cau ka
à nda tàrǝia andǝ Ɓakuli;
sǝ yì, yì Cau ka Ɓakuli na.
2A tite ka à nda
andǝ Ɓakuli.
3Nǝ yi sǝ Ɓakuli pusǝ agir kat.
Kǝgir pà kàm mwashat
mana à pusǝì mǝnana
nǝ yi sǝ à pusǝì raka.
4Yì nda tǝr yilǝmu,
sǝ mǝnia yì yilǝmu
ka yiu nǝ tǎlaban
aban ɓwapǝndǝa.
5Sǝ yì tǎlaban ngga
kǝ ta aɓa pǝndǝa
sǝ pǝndǝa ka gandǝ
bwalte ɗang!#1:5 sǝ pǝndǝa ka gandǝ bwalte ɗang: Ko “sǝ pǝndǝa ka pà nǝ̀ gandǝ limngge ɗang.”
6 # 1:6 Ɓalli gbal aɓa:
Mat 3:1; Mar 1:4; Luk 3:1,2. Ɓe ɓwa yiu,
mǝnjar mǝnana
Ɓakuli turi ka,
lullǝi ama Yohana.
7Yiu yi ne ɓwapǝndǝa
cau amur mǝnia
yì tǎlaban ngga,
ace mǝnana ɓǝ̀
ɓwapǝndǝa kat ok
mǝnia yì cau ka, ɓǝ̀ é.
8Yohana nǝ ɓamuri ka
nda tǎlabanì ɗang;
yì ka, yiu ace na cau
amur tǎlabanì.
9Tǎlaban mǝ'mǝsǝcau nì,
mǝnana kǝ ta aban
ɓwapǝndǝa kat ka,
ndo kǝ yiu a ɓanza ka.
10Yì Cau ka nda a ɓanza,
sǝ kat andǝ amani ama
nǝ yi sǝ à pusǝ ɓanza ka,
ɓanza surǝì ɗang.
11Yiu aban aɓwana
mǝnana amale na ka,
sǝ amale é ɗang.
12Sǝ aɓwana mǝnana kat à é,
à pa ɓamuria abani ka,
pania wia rǝcandǝa
ɓǝa duk amuna
mala Ɓakuli.
13Ɓǝlban malea ka,
mala nkila na
andǝ nggūrǝu ɗang.
Pa aɓa kpapi
mala mɓwama andǝ
ɓwabura ɗang.
Mǝnia ka pe mala Ɓakuli na.
14Mǝnia yì Cau ka
yi duk ɓwamǝpǝnde,
sǝ yi duk zuku aɓalǝ sǝm.
Sǝm sǝna gulo male,
gulo mala kǝ̀ Muna
mwashat ɓǝrɓǝr, mana pur
nǝban Tarrí Ɓakuli ka,
lumsǝo nǝ ɓwamuru
andǝ mǝsǝcau.
15Yohana ne aɓwana cau amuri nǝ giu mǝcande ama, “Mǝnia ka nda ɓwa mǝnana ǝn na wun cau amuri nǝma nda ban yiu a nzǝmam ngga, sǝ yì ka, kutiam nǝ gulo, acemǝnana yì ka, ndakam ɗiɗyal sǝ à yì ɓǝlam.” 16Aɓa ɓwamuru andǝ mǝnbu male sǝ tsǝka sǝm bu kat, kǝ pa sǝm agir mǝɓoarne a nzǝmarǝia. 17Ɓakuli pa sǝm Nggurcau nǝ bu Musa, sǝ nǝ bu Yesu Kǝrǝsti sǝ pa sǝm ɓwamuru andǝ mǝsǝcau. 18Kǝ ɓwa sǝn ma Ɓakuli àkǝ̀ pwari ɗang, she kǝ Muni mǝnana à nda mwashat andǝ yi, sǝ nda a nkanggari ka. Yì na tsǝa sǝ sǝm surǝ Tarrí ka.
Yohana Mǝbatisǝma nda Kǝrǝsti ɗang
(Matiu 3:1-12; Markus 1:1-18; Luka 3:1-18)
19Aɓwana-mǝgule mala amǝ Yahudi mǝnana a Urǝshalima ka à túr apǝris andǝ amǝ'lawi ɓǝa kya ɗi Yohana ama, yì ka, nda yana le?
20Yohana sǝmbǝrǝia wia kǝgir ɗang, banggia wia mǝsǝcau ama, “Mǝ nda Kǝrǝsti#1:20 Kǝrǝsti (nǝ kún Gǝrik) ko Mezaya (nǝ kún Ibǝru) ka ɓālǝi nda: Ɓwa mǝnana à ɗarǝì wi muru amuri, mǝnana lǝmndǝ ama Ɓakuli tsǝngŋǝni a buno-gulo andǝ rǝcandǝa ka. ɗang.”
21À ɗi ama, “Sǝ we ka a nda yana? A nda Iliya le?”#1:21 Ɓalli gbal aɓa: Nggur 18:15; Mal 4:5. Yohana earia wia ama, “Awo, mǝ nda yì ɗang.” Sǝ à ɗi ama, “A nda mǝɓangna mala Ɓakuli mǝnana sǝm nggǝ kundǝmuri ka le?” Earia wia ama, “Awo.”
22A masǝlǝate ka à ɗi ama, “Na sǝm cau mǝnana ɓǝ̀ sǝm nyesǝi aɓwana mǝnana à tur sǝm ngga. A kǝ twali ɓamuro ama a nda yana?”
23Yohana earia wia nǝ cau mala Ishaya mǝɓangna mala Ɓakuli ama, “Mǝ nda gìu mǝnana kǝ hama a ɓabondo ka, ama, ‘Wu tsǝk njargula ɓǝ cam kporong ace Mǝtalabangŋo.’ ”#1:23 Ɓalli gbal aɓa: Isha 40:3.
24Aɓea amǝ Farisi mǝnana à turia ka, 25à ɗi Yohana ama, “Sǝ ɓǝ̀ a nda Kǝrǝsti,#1:25 Sǝn cau amur Kǝrǝsti a 1:20. ko Iliya, ko mǝno yì mǝɓangna mala Ɓakuli raka, palang sǝ a kǝ pakki aɓwana batisǝma?”
26Yohana earia wia ama, “Ən nggǝ pakki aɓwana batisǝma nǝ múr, sǝ ɓeɓwa na came aɓalǝ wun mǝnana wu surǝì raka, 27yì ka, nda ɓwa mǝnana kǝ yiu a tam tu ka, ǝn kārǝa mǝ nǝ panzǝ anggur-nkura male ɗang.”
28Mǝnia yì gir ka à pè a Betani, a nkaring Nggeasala Jodan, àkǝ̀ ban mǝnana Yohana pakkiyi batisǝma kam ngga.
Yesu nda Mǝgam mala Ɓakuli
29Ɓe ban fana ka, Yohana sǝn Yesu aban yiu nǝ bani, sǝ pǝlǝa na ama, “Wu sǝn Mǝgam mala Ɓakuli, mǝnana twalkiyi cauɓikea mala ɓanza ka! 30Mǝnia ka nda ɓwa mǝnana ǝn na ce ama, ‘Ɓe ɓwa na kǝ yiu a tam ngga. Yì ka, kutiam nǝ gulo, acemǝnana yì ka, ndakam ɗiɗyal sǝ à yì ɓǝlam.’ 31Nggearǝ mim ngga ǝn surǝì ɗiɗyal ɗang, sǝ tǝr yiu mem mǝnana ǝn nggǝ pakki aɓwana batisǝma nǝ mur ka nda ace mǝnana ɓǝa lǝmndǝì amǝ Isǝrayila rǝì ka.”
32Pǝlǝa Yohana bang gir mǝnana surǝì amuri ka ani: “Ən sǝn Bangŋo mala Ɓakuli kǝla kutu, sulǝ nǝ kuli yi do amuri. 33Ɓǝ́ pà mǝ nǝ surǝì ɗang, ɓǝ̀ Ɓakuli mǝnana tasǝam ama ɓǝn yi pakki aɓwana batisǝma nǝ múr ka na nam raka. Nam ama, ‘Ɓwa mǝnana a sǝni Bangŋo mem sulǝo yi do amuri ka, nda ɓwa mǝnana nǝ̀ pakki aɓwana batisǝma nǝ Bangŋo Mǝfele ka.’ 34Ən sǝni sǝ ǝn bangcau amuri ama, yì ka, nda Muna mala Ɓakuli.”
Alaggana mana Yesu tita tunǝia ka
35Ɓe ban fana ka, Yohana na kano ɗǝm andǝ aɓea alaggana male ɓari. 36Lang nǝ̀ sǝn Yesu aban kutio ka, na ama, “Wu sǝn Mǝgam mala Ɓakuli!”
37Lang alaggana mǝnia ɓari à ongŋǝni náná anggo ka, kara à o ata Yesu. 38Yesu nǝ̀ pǝlǝ rǝì ka, kara sǝnia aban yiu ate, sǝ ɗia ama, “Mana wu earki ce?”
À eare ama, “Rabbi a ya ban sǝ a pa?” (Rabbi ka ɓālǝi nda Malǝm.)
39Yesu earia wia ama, “Wu yiu wu yi sǝni.”
À pǝlǝa à wario à kya sǝn ban-do male. Sǝ à kya do ate ba du. Anggo ka bu-pwari ine nǝ pwarikpǝra na.
40Ɓe ɓwa mwashat ata mǝnia yì aɓwana ɓari mǝnana à ok cau mǝnana Yohana na ka nda Andǝru, mǝ'eam Shiman Bitǝrus. 41Andǝru pǝlǝa kum mǝ'eambǝi Shiman, sǝ ne wi ama, “Sǝm kumǝna Mezaya (Tǝr Mezaya nda Kǝrǝsti, Mǝ'amsǝban mǝnana Ɓakuli bangŋa ama nǝ̀ tasǝi ka.)” 42Sǝ yinǝ Shiman aban Yesu.
Yesu sǝni kyap-kyap, sǝ na ama, “A nda Shiman muna mala Yohana. À nǝ̀ tunǝo ama, Kefas.” (Tǝr Kefas nda Bitǝrus, ɓālǝi ama, Tali.)
Yesu tunǝ Filip andǝ Nataniyel
43Ɓe ban fana ka, Yesu twali a ɓabumi ama nǝ̀ o a Galili. Yi kum Filip sǝ ne wi ama, “Yiu atam.”
44Filip ka ɓwa Beseda na, la mala Andǝru andǝ Bitǝrus. 45Filip alta Nataniyel yi kumi sǝ ne wi ama, “Sǝm kumǝna ɓwa mǝnana Musa gilǝgir amuri aɓa malǝmce Nggurcau mala Musa, andǝ mǝnana à gilǝa aɓa malǝmce mala amǝ'ɓangna mala Ɓakuli ka, yì Yesu ɓwa Nazarat, muna mala Yisǝfu.”
46Nataniyel na ama, “A Nazarat! Kǝ gir mǝɓoarne nǝ̀ pur a Nazarat gbal?” Filip ne wi ama, “Yiu sǝni.”
47Lang Yesu sǝn Nataniyel aban yiu ka, na cau amuri ama, “Mǝnia ka ɓwa Isǝrayila mǝɓafoe na, mǝnana pànǝ nyir a rǝì raka.”
48Nataniyel ɗi Yesu ama, “A pak lang sǝ a surǝam?”
Yesu eari wi ama, “Mǝnana a nda a tǝta nggun vwari ka, ǝn angŋa dǝmbǝa ǝn sǝnǝ no, sǝ Filip tunǝo.”
49Pǝlǝa Nataniyel ne Yesu ama, “Rabbi, a nda Muna mala Ɓakuli! A nda Murǝm mala amǝ Isǝrayila!”
50Yesu ne Nataniyel ama, “A earnǝ mim acemǝnana ǝn banggo nǝma, ǝn sǝno a tǝta nggun vwari ka le? A nǝ sǝn agir mǝgulke mǝnana à kuti man ngga.” 51Yesu nyare nea wia ama, “Ən nggǝ na wun mǝsǝcau, wu nǝ̀ sǝn kuli nǝ mǝnna, andǝ amǝturonjar mala Ɓakuli aban eauwe andǝ sulǝo amur Muna mala Ɓwa.”#1:51 Ɓalli gbal aɓa: Tite 28:12.
Currently Selected:
Yohana 1: mbu
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2016
