Maliko 11

Yesu akwingila mu Yelusalemu kwa luheyo

(Matayo 21:1-11; Luka 19:28-40; Yohane 12:12-19)

1Pevahegelye ku Yelusalemu vafikite na muboma isa Betifage na Betaniya, mwivambala lya ikidunda icha imiseituni. Kula Yesu avatumite avavili va avanyigendo vakwe, 2avatigee, “Mubitage mbaka kukijiji chemulaving'ine. Na pemukwingila mukijiji, muyifika idogovi minge yesiyeyilahowa na munu. Mwawulage mulete, 3neke wone umunu avawuse ukutigila, ‘Nyela mbi ndawuli mwigita de?’ Mumutigilage, ‘Umutwa ina kipigo nayo na neke kangi ayipilula baha.’”

4Vahele mung'asi swe vakuyiwona idogovi minge pivala pa mulyango gwa ikaye. Swe vakwawula. 5Avanu avamwi avevimile uko swe vakuvatigila, “Mbi ndawuli mukwawula idogovi iyo?” 6Swe vakuvapitula ndawe Yesu lwe alavalonje nawo swe vakuvatawula. 7Nawo vayisindike idogovi kwa Yesu, vitandika imyenda jawo pachanya pa idogovi swe Yesu ihova. 8Avanu wolofu vatandike imyenda jawo mung'asi, na avamwi vadumwe amatagala ga imibiki ukuhuma mumigunda na ukutandika mung'asi. 9Na vala ave valongwe na ava mumbele, vavanzile ukuyova vitigila, “Hosana! Mufunyilile yula ye akusa mwitawa lya Nguluvi! 10Wufunyilile Uwutwa we wukusa wa Udadetu Daudi Hosana kuchanya hilo!”

11Yesu avelige ifika mu Yelusalemu, inje mu Tembeli, ndawe alavige imbali mbesili. Na pekive kinyamihye, awukite swe ibita ku Betaniya na avanyigendo vanyichumi na vavili.

Yesu akugufingulisa Umusombe

(Matayo 21:18-19)

12Na ikimunyi icha kavili lwevahumige ku Betaniya inzala yavafile. 13Neke aguwone kwa kutaali umusombe ugunya mahamba. Ahele sambi angule amaveleko mumusombe, na avelige ihegelela sakiweni kinu pe si gamahamba hela kangi silwe lusika lwa amaveleko. 14Swe Yesu akugutigila, “Uluhuma lino kwa veve mbaka mbepali pagaya munu yesa alya amaveleko uluhuma kwa veve.” Avanyigendo vakwe vapulike ulo.

Yesu ibita ku Tembeli

(Matayo 21:12-17; Luka 19:45-48; Yohane 2:13-22)

15Vavelige vifike ku Yelusalemu, Yesu inje mu Tembeli, swe ivanga ukuvahaka mbevali vevagusige na ukugula mula mu tembeli. Swe idulika inyaaga sawo avakowoka amagobole na ifigoda fya avasulusi va ingunda. 16Samulekiti munu asave nambi ikinu uluhuma pala pa tembeli. 17Neke avange ukuvigisa avanu ukutigila, “Mbi silwandike mu Waandike Uwelu ulwa, ‘Itembeli yangu yiva kaye ya kwifunyo lwa avanu mbevali va ing'i mbesili!’ Neke lino nyenye mudulike yive lifinga lya vahiisi!”

18Avatambisi avavina na avigisi va indagilo, pevapulike iso neke vavange ukusaka ifigaho sambi vamuwulage neke ulwene wogopige pakuva mbevali vasasavalige seigisige. 19Na lyavelige lisota ilisuva Yesu na vanyigendo vakwe vahegite pala pa boma.

Lwegwave Umusombe gula

(Matayo 21:20-22)

20Pamilawu pevalutilige, vaguwene umusombe gula gukasile na sindela. 21Petulo agwiwike umusombe gula, neke amutigile Yesu, “Mwigisi, lavage! Umusombe gula gwe ukagufingulise yegukasile!”

22Neke Yesu avatigile, “Mumufuuwage Nguluvi. 23Nachene, nguvalongela, umunu yeyeavesaga na ulufuuwo ahwanite ukutigila ikidunda iki, ‘Kimuke ipo bite ukitoose kunyanza!’ Wone alonge wesiisina munumbula yakwe, we ifuuwa ukuta lweilonga, lugendela mumo, nachene lupigika ndahihyo. 24Ino nene nguvalongela nyenye, chechemusukaga mukwifunya mufuuwagwe ukuta yemwanuche icho, nacho kiva chenyu. 25Na pepemuvelaga mwimile mukwifunya, mudegepelage, wone mwina lukani na munu yungi; sambi udadenyu nave yealikuchanya ahwane ukuvadegepela nyenye inzanangifu senyu. [ 26Neke wone nyenye muve simwidegepela avangi inzanangifu sawo, nayu dadenyu yeali kuchanya savadegepela nyenye inzanangifu senyu.”]

Ulwa uludali lwa Yesu

(Matayo 21:23-27; Luka 20:1-8)

27Neke pevafikite ku Yelusalemu, na Yesu peagendige mu Tembeli avatambisi avavina na avigisi va indagilo na avavina va avanu neke vamubitile Yesu, 28swe vakumutigila, “Mbi kwa lulagi luki wipiga isi? Nave ye nani yeakupelye ululagi upige isi?”

29Neke Yesu avatigile, “Nayi nene ndivawusa lukani, wone mumitule nayinene ndivalongela kwa lulagi na ludali lwa nani ndipiga isi mbesili. 30Mundongele, uwubatiso wa Yohane wahumite kwa Nguluvi apangi kwa avanu? Mumitule.”

31Swe vivanga ukwilonganza vavene, “Vitigila, ‘Wone tutigile wahumite kwa Nguluvi’, atutigila, ‘Lino mbi ndawuli simwamufuuvitwi?’ 32Na kangi wone tutigile, ‘Wahumite ku vanu’” (Wogwipe avanu pakuva mbevali valukagulige ukuta Yohane ali muvisi nachene.) 33Swe vakumupitula Yesu, vakumutigila, “Situluseli.” Neke Yesu avatigile, “Nayi nene sindivalongela nyenye kwa lulagi na ludali lwa nani nene ndipiga isi mbesili.”

Currently Selected:

Maliko 11: HeNT2004

Highlight

Copy