Matayo 5
5
Yesu idalika kukidunda
1Neke Yesu ave akuliwona ililugu lya avanu agang'amwike kukidunda swe iteng'emala pasi. Avanyigendo vakwe nawo swe vakusa, 2ndawe avangige ukuvigisa avene itigila:
Uluhekelelo ulwa nachene
(Luka 6:20-23)
3“Vafunyilile avamikaa
munumbula,
pakuva uwutwa uwa kuchanya wawo.
4Vafunyilile avahuguvafu
pakuva valaposwa imitima jawo.
5Vafunyilile avalele,
pakuva ililila lya ing'i liva lyawo.
6Vafunyilile avanyanzala na ing'elu
ya uwugolofu,
pakuva saviguta na ukusimya ing'elu.
7Vafunyilile avanyakudegepela,
pakuva savadegepelwa.
8Vafunyilile avanyanumbula nzelu,
pakuva savamuwona Nguluvi.
9Vafunyilile avavileta uwikalakunoga
pakuva savatambulwa,
vana va Nguluvi.
10Vafunyilile avivipilwa fibi ukuvalwa uwugolofu,
pakuva Uwutwa wa kuchanya wawo!
11“Mwivafunyilile nyenye yemuligwa na avanu, muvifisiwa na ukulongwa imbi sa uwudesi vakuvavala nene. 12Muvesage na luhekelelo na ukukimilila pakuva ililila lyenyu saliva likomi kuchanya, siso se vapigilwe avavisi nyenye pesimwe mwikwali.”
Umwino na ulung'ali
(Maliko 9:50; Luka 14:34-35)
13“Nyenye mwindawe umwino mung'i! Neke umwino peguhupite kusopwa kiki sambi gunone kangi? Guva sipe mwino nda gwakutaga hela, sambi gulivatwe na avanu.”
14“Nyenye mwindawe ulumuli mung'i! Iboma inzenge pachanya pakidunda siyayifihwagi. 15Kangi avanu sivavikunga itala neke vavike mwifungu, vavivika pachanya paluwumba ying'alikage ibwalo mbeyili. 16Mulekage itala senyu sing'alikage pa vanu, sambi vafiwone ifipigo fyenyu, kangi vamulumbe udadenyu uva kuchanya.
Akwigisa Indagilo
17“Mulatigila nene ngasile mukuyasa indagilo sa Musa na sevigisige avavisi, singasili mukuyasa nda ngasile mukukangasa. 18Nachene nguvalongela mbaka kuchanya na ing'i pesafihega neke nambi lukani ludodo sisaluhega mundagilo mbaka pesikwilye mbesili. 19Ino yeyeavesaga siakwinatila ululagi nambi lumwi mwa isi indodo na ukuvigisa avangi vapigage ndahihyo, uyo ava mudodo hilo ku wutwa uwa kuchanya. Neke yula yeakwinatila indagilo na ukuvigisa avangi ukupiga iso atambulwa muvina ku wutwa uwa kuchanya. 20Nambi nene nguvalongela nditigila uwugolofu wenyu pesiwilutila uwugolofu uwa avigisi va indagilo na avafalisayo sisamwingila ku wutwa uwa kuchanya.
Ulwa Ililakali
(Luka 12:57-59)
21“Nyenye yemukapulike ulwa avanu vanyakatali vevalongele ukutigila ‘sa ulawulaga! Ye iwulaga saahigwa’ 22Ino nene nguvalongela de, ye akumuvipila umunu muyagwe saahigwa. Naye akumubedala umunu muyagwe asindikwa pawuhigilo. Na yakumutigila umuyagwe: ‘Wimupufi’ asindikwa kwitemela ilya umoto. 23Ino pewisindika inambika yako pifunyo neke wiwuke ukutigila twinalitata na umuyangu, 24Kileke bahala ikitawulwa chako bite tasi mukipulike na umuyago neke peupiluke utawule ikitawulwa chako.
25“Mwangupage mwipulike na yula yemwina litata nave we pe mulimung'asi wesimulafika kuwihigilo. Alonga akusindike kulumunyakuhiga, neke nave akusindike kulumunyigalu sambi udindilwe. 26Nachene ngukulongela, sisauhuma umo mbaka puhombite amagobole mbegali.
Ulwa Uwugoni
27“Mwapulike ukutigila lwalonzilwe: ‘Ulapiga uwugoni’ 28Ino nene nguvalongela ukuta ye ilavaga umung'inetu kono we akumudoboka uyo ava agonite nave munumbula yakwe. 29Wone iliho lyako ilyakundyo likwambuse upige inzanangifu hese neke utage kutali, ikiba pe uve wihela ikigawamuvili ikimwi mumuvili na ukuleka umuvili mbeguli gusopwe mumoto. 30Neke wone iliwoko lyako ilyakundyo likwambuse upige inzanangifu, dumule neke utage kutali. Ikiba pe uve wihela ikigawamuvili ikimwi mumuvili na ukuleka umuvili mbeguli gusopwe Mumoto.”
Yesu akwigisa avitegwe valalekana
(Matayo 19:9; Maliko 10:11-12; Luka 16:18)
31“Kangi lulonge ukutigila: ‘Umunyidama yakumuleka uvakwe apo amwandikilage ulwandiko ulwa ukulekana.’ 32Neke nene nguvalongela ye akumuleka uvakwe, pesi kwa wugoni hela, uyo akumwambusa uvakwe ave mugoni; Kangi umunu manyi amutegule umung'inetu uyu ava mugoni.”
Ulwilapo
33“Kangi mwapulike chevalongilwe avanyidaha ulwa, ‘Ulilapa, mbaka ukwisage tandi sewe umwilapye Umutwa.’ 34Neke nene nguvalongela, mulilapa nambi sukumwi; na kuve kuchanya, pakuva uko chekigoda cha Nguluvi. 35Naive mung'i, pakuva ipa peaivika amagulu gakwe; nakuve ku Yelusalemu, pakuva ye boma ingomi iya umutwa umuvina. 36Na ulilapila umutwe gwako, pakuva suhwaniti upitule nambi lufwili lumwi luve lwelu apangi lutitu. 37Peutige, ‘Ena’, apo, yivelage ‘Ena’; na peutige, ‘Nda’, apo yivelage nachene ‘Nda’ Na chekiva kilutila pa iso icho kiva kihuma kwa yula umwanangifu.”
Ulihomela umukole
(Luka 6:29-30)
38“Mwapulike ukutigila: ‘Liho kwa liho, na lino kwa lino.’ 39Neke nene nguvalongela ulihombela mukole kwa umwananzi vako. Yeakutofile ikipi kulusese ulwa kundyo mupitulile na lulusese ulwa kung'igi. 40Neke umunu yeisaka akusindike pawihigilo akutose sambi akupoke isopeka yako mulekele ategule na gumugolole, 41na umunu yakukugogelesa umuteguse ikifundo mulugendo lwa ikivalilo kimwi mutegusage fivalilo fivili. 42Mupelage ye akukusuka, kangi lemwage ukutanila kwa yeakwasimya.”
Ukuvenda avatavangu
(Luka 6:27-28, 32-36)
43“Mwapulike ukutigila: ‘Umwendage umunyawiyendi vako neke umuvipilage umutavangu vako.’ 44Neke nene nguvalongela, muvendage avatavangu venyu kangi muvasukilage avakuvatesa nyenye. 45Sambi nyenye muve mwivana va Udadenyu yealikuchanya. Pakuva umwene akuvang'alikila ilisuva avananzi na avagolofu, na ukuvaletela indonya avagolofu na avananzi. 46Pakuva pemuvendite avakuvenda nyenye muhombwa kiki? Pakuva na avanyakukong'asa imbemenenge vavipiga siso! 47Neke wone muvahungilage avanyalukolo venyu swe, muvamwipiga kiki ikilutye kuvangi? Na avanu mbevali vesivamuseli Nguluvi nawo vavipiga siso. 48Apo nyenye muvesage mwivakwilanifu, ndawe lwemukwilanifu Udadenyu uva kuchanya.”
Currently Selected:
Matayo 5: HeNT2004
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Kihehe New Testament © Bible Society of Tanzania, 2004.