Matayo 19

Yesu akwigisa avitegwe valalekana

(Maliko 10:1-12)

1Yesu peasinzile ukulonga isi, ahesile uluhuma ku Galilaya neke abite kulutanana ulwa ku Yudaya kumwambu ku mukoga gwa Yolodani. 2Na ililugu ilikomi limufwate, neke peavaponie avatamwa mbevali. 3Neke Avafalisayo vamusile vamugelage vitigila, “Ngali luhwanite umunyidama ukumuleka uvakwe kwa chechekivesaga kivalwa?” 4Yesu avapitwe, “Simwimbiti ukutigila ukutigila umwene yeavagafile uluhuma pamuvango umunyidama na umung'inetu. 5Neke atigile: ‘Pa ulo umunyidama amuleka udade na yuyuve neke vabaning'ane na uvakwe, na avavili iwo vava muvili gumwi?’ 6Ino vava sipevavili kangi nda, vava muvili gumwi. Apo veavabaning'ise Nguluvi umunu alavagavasa.” 7Neke vamutigile, “Pa ndawuli Musa alaje umunyidama amwandikilage ulwandiko ulwa ukulekana na uvakwe?” 8Yesu avapitwe, Pakuva mwina numbula nalamu, “Nambi Musa avapelye ululagi lwa ukulekana na avavenyu, neke uluhuma pamuvango silwe ndahihyo nda. 9Neke nene Nguvalongela: Umunu yeyeamulekaga uvakwe pesi kwa uwugoni hela na ukutegula umung'inetu yungi, uyo iva mugoni.” 10Ndawe avanyigendo vamutigilige, “Apo ulo wone lwindahihyo ku munyidama na uvakwe, ikiba pesiutegwi.” 11Neke Yesu avatigile, “Simbevali avanu vevahwanite vanukile ululongwa ulu, pesi kwa vala avapele hela. 12Pakuva pofili ifyafikwambusa avanu valemwe pa kutegula, pakuva avangi uluhuma kuwegalwe vagaya uludali lwa ingalusa, avamwi vasawule na avanu, kangi avamwi valamwe ukwikala kitategula ukwimila uwutwa wa kuchanya. Yeahwanite ukwanukila ulwigiso ulu anukilage.”

Yesu akuvafunyilila avana vadodo

(Maliko 10:13-16; Luka 18:15-17)

13Neke avanu avamwi vamuletele avana sambi avageleke amawoko mumitwe jawo na ukuvasukila. Neke avanyigendo vakwe vavakenyele avanu. 14Neke Yesu atigile, “Muvalekage avana avadodo vaase kwa nene mulavatanila. Pakuva avanu avindawe avana iva, uwutwa wa kuchanya wawo.” 15Ndawe avagelekige amawoko gakwe. Swe akwibitilaga.

Yesu akwigisa ulwa uwutalamu wa uwunono

(Maliko 10:17-31; Luka 18:18-30)

16Ndawe aasige umunu uyumwi kwa Yesu nu kumulongela, “Mwigisi, migage kinu kiki ikinofu sambi nzanukile uwumi wa mbepali?” 17Ndawe amutigilige umunu yula, “Mbi ndawuli ukumbusa nene ulwa ikinu ikinofu? Kwali yumwi swe umunofu. Neke pewisaka ukwingila muwumi wa mbepali winatilage indagilo.” 18Umunyakilambo ndawe amuwusige Yesu, “Indagilo silikwi?” Neke Yesu atigile se isi, “Ulawulaga, ulava mugoni, ulahisa, ulolelela kwa wudesi. 19Uvesage ni choga kuludado nayuyuwo, kangi umwendage umuyago ndawe lukwiyenda yuveve.” 20Umunyakilambo amutige, “Mbesili iso ndinatye, kiki kingi chekisige pakwinatila?” 21Yesu amutige, “Wone wiwenda ukuva ukwilaniche bite kaguse mbefili fye winafyo neke ukavapele avamikaa na yuveve uva wiviche uwunono kuchanya neke pe wuse uninile.” 22Umunyakilambo peapulike isi ahele wavifile, pakuva e munono hilo.

23Neke Yesu avalongele avanyigendo vakwe, “Nachene nguvalongela, salulava lutalamu hilo kulu munu umunono ukwingila ku wutwa wa kuchanya. 24Kangi nguvalongela, lupefu ingamiya ukulutila mukidwi icha ulusingi sindawe umunu umunono ukwingila ku wutwa wa Nguluvi.” 25Avanyigendo vavelige vapulike isi vasasave wuhulo vitigila, “Ino ye nani yesaapokwa?” 26Neke Yesu avalavile neke avatigile, “Ku vanu ulu siluhwaniti, neke kwa Nguluvi luhwanite.” 27Ndawe Petulo amupitulige itigila, “Wonage hwehwe tufilesile mbefili neke tukuninile sa tupelwa kiki?” 28Neke Yesu avatigile, “Nachene nguvalongela, nyenye yemuninilite nene, mung'i umu samukong'omala mufigoda pamwinga na Umwana va Umunu pesa ava akong'ome mukigoda cha indolo, samuhanga ukusihiga ing'olo isinyichumi na sivili sa Avaisilaeli. 29Na yeyeavesaga ayilesile ikaye nave avanyalukolo vakwe nave avahase nave udade nave uyuve nave vana nave migunda, ukwimila ilitawa lyangu saavanukila kanyigana na ukuhaha uwumi uwa mbepali. 30Neke awolofu avalongola savalava va mumbele na vamumbele savava valongola.

Currently Selected:

Matayo 19: HeNT2004

Highlight

Copy