Matayo 15

Indongwa isa avanyakatali

(Maliko 7:1-13)

1Sweno Avafalisayo na avigisi va indagilo vakusa kwa Yesu uluhuma ku Yelusalemu. 2“Vakumuwusa, ndawuli avanyigendo vako sivakwinatila indongwa sila sevatuleche avanyakataali vetu? Pakuva sivavikalava amawoko pevilya.” 3Ndawe Yesu avapitulige, “Nayi nyenye mbi ndawuli simwakwinatila indagilo sa Nguluvi neke mwinatilage indongwa isa avanyakatali? 4Pakuva Nguluvi alaje: ‘mogopage udado na yuyuwo’ na, ‘Yula yeamuliga udade nave uyuve uyo nachene afwisage.’ 5Ino nyenye mwakwigisa ulwa, wone umunu ave na kinu, che isaka amupele udade nave uyuve, neke sambi atigile, ‘Ikinu iki kivike kwa Nguluvi,’ apo uyo atanage ukumwogopa udade, 6pa ulu mwamwibedala ululagilo ulwa Nguluvi, sambi mufwate indongwa isa vanyakatali venyu. 7Mwivabuganisi, nambi umuvisi Yesaya avilite ulwa nyenye itigila:

8‘Avanu iva vakunzogopa kwa kulonga hela

Inumbula sawo silipataali na nene.

9Vakwifwahisa hela ukusunyalila

pakuva vakwigisa fila fye vakwivangila vavene

na indagilo sawo hela!’”

Ifinu ifya fileka umunu ave mwanangifu

(Maliko 7:14-23)

10Ndawe avakemelige avanu neke pe avalongele, “Mupulikage neke mulukagule! 11Ikinu chechakileka umunu ave mwanangifu sikila chechakwingila mumulomo, pesi kila chechakihuma mumulomo. Icho chechakileka umunu ave mwanangifu.”

12Swe avanyigendo vakusa na ukumulongela, “Ukulukagula ukutigila Avafalisayo lukavavifise pevapulike ulukani ulu?” 13Neke avapitule, “Chichekivesaga kimelo chesikivyale na dada yealikuchanya kilakulwa. 14Muvaleke iwo avalongosi avabofu. Wone umubofu amulongose umubofu muyagwe mbevali ndawe vavili vagwila mwikombo.” 15Neke Petulo amutigile, “Tulongele wunofu ikiganiso iki.” 16Ndawe avawusige, “Nayi nyenye simulalukagula? 17Simukuluwona ulwa ichakikwingila mumulomo cha kikola mwileme neke pekihuming'ase kitagwe kwihala? 18Neke isihumaga mu mulomo sasihuma munumbula ali isi sesasileka umunu ave mwanangifu. 19Pakuva munumbula gagihuma amahosa amabi, uwuwulasi, uwugoni, uwusafi, uwuhiisi, uwolelesi wa uwudesi na amaligo. 20Ali isi sesasileka umunu ave mwanangifu, neke pakulya wesimukalivi amawoko ulo hela silwilekagi umunu ave mwanangifu.”

Ulufuuwo ulwa umung'inetu

(Maliko 7:24-30)

21Neke Yesu ahege pala swe ibita ku lutanana lwa ku Tilo na ku Sidoni. 22Ndawe umung'inetu Umukananayo uluhuma mulutanana lula swe aasige we ivemba, “Ndegepele nene ve Mutwa mwana va Daudi, Umwalivangu ivawa hilo ina lisoka.” 23Neke Yesu siamupitwi kinu umung'inetu yula nda. Ndawe avanyigendo vakwe vamugongolige vitigila, “Muleke abite pakuva akutwaming'asa.” 24Neke peapitule atigile, “Nene ndimutume ku ng'olo isayasile isa ikaye ya Isilaeli swe.” 25Neke ahegelele swe ifugama itigila, “Mutwa nange nene.” 26Neke Yesu amupitule, “Silunofu ukutegula ikilyo cha avana neke utosekese imbwa.” 27Umung'inetu yula apitwe, “Ena! Mutwa na simbwa sasisava uwuwuluwulu wewilagala pasi pawulilo.” 28Ndawe Yesu amupitulige umung'inetu yula, “Ve mung'inetu, veve ulufuuwo lwako lukomi! luvesage kwa veve ndawe lwe wisaka.” Ndawe umwalive aponige ulusika lululaga.

Yesu iponia avanu wolofu

29Ndawe Yesu ahegige uluhuma pala swe ikola mumbali iya inyanza ya ku Galilaya, swe igang'amuka kukidunda, ndawe ateng'emalige kuko. 30Avamalugu swe vakusa kulumwene, vakumuletela avalema, avanya kiteve, avanyakibubwi, avabofu na vanya uwutamwa uwungi. Swe vakuvavika pamagulu ga Yesu swe akuvaponia. 31Avanu vasasave pevawene avanyakibubwi vilonga, avanya wulema viva vanofu, avanya kiteve vigenda na vabofu vilava neke pevamulumbe Nguluvi uva Isilaeli.

Yesu akuvalisa avanu mbilima sitayi

(Maliko 8:1-10)

32Ndawe Yesu avakemelige avanyigendo vakwe neke peatigile, “Nguvawonela ulusungu vamalugu, pakuva vavepamwi na nene filo fidatu, kangi vagaya kilyo nda; sinywaniti ndivilage we vina inzala pakuva vafwa musale mung'asi.” 33Neke avanyigendo vamutigile, “Tugiwona kwi imikate igikwila mbevali pabalali ipa?” 34Neke Yesu avatigile, “Mwinajo gilinga?” Swe vakumutigila, “Gimufung'ati na ifisomba fikefu.” 35Ndawe avalongelige vamalugu vateng'emale pasi. 36Swe itegula imikate igimufung'ati na ifisomba neke pamulumbe Nguluvi nu kumegula imikate na ifisomba neke avapele avanyigendo swe avanyigendo vakuvapela vamalugu. 37Neke pevalye mbevali nu kwiguta. Neke vasave ifyefisige fitangula fimufung'ati. 38Vala avalye ve vanyidama mbilima sitayi, avang'inetu na vana sivevavalile nda. 39Ndawe avilagige vamalugu, swe akwingila mukipugu neke pe abite kulutanana ulwa ku Magadani.

Currently Selected:

Matayo 15: HeNT2004

Highlight

Copy