Luka 9

Yesu akuvatuma avanyigendo vanyichumi na vavili

(Matayo 10:5-15; Maliko 6:7-13)

1Yesu avakemelye avanyigendo vanyichumi na vavili swe akuvapela uludali nu lulagi lwa ukudagila amasoka mbegali nu ukuponia ifitamwa. 2Neke avatume vabite ukudalika uwutwa wa Nguluvi na ukuponia avatamwa. 3Ndawe avalongelige ulwa, “Mulategula kinu mulugendo lwenyu, nambi lugoda, nambi bogolo, nambi fuka, nambi magobole nambi uyumwi va nyenye aalava na sopeka sivili. 4Na ikaye yeyemwingilaga, mwikalage mumo, mbaka ikimunyi chemwihegela mumo. 5Na apono pepavesaga sivakuvanukila nyenye pemwihega mu boma yila mukung'unage ilingundi lya inzaho senyu ulo luve lukenyelo kwa avene.” 6Swe viwuuka ukubita kidalika Ulukani Lunofu mu fijiji na ukuponia avatamwa kukwekuvesaga.

Uwuhuguvafu wa Helodi

(Matayo 14:1-12; Maliko 6:14-29)

7Neke lino Helode umutema va ku Galilaya avelige ipulika mbesili sesipigitwe na Yesu, ahuguve pakuva avanu avamwi vatige, “Yohane asilibwike uluhuma kuvafwe!” 8Avangi vatigile Eliya awonike, na avangi kangi vatigile uyo ye yumwi va avavisi va pidaha asilibwike. 9Neke Helode atigile, “Yohane ndamudumwe umutwe; mbino uyu yenani kangi yendipulika ing'ani sakwe?” Asakige ukumuwona.

Yesu akuvalisa avanu avalutye imbilima sihanu

(Matayo 14:13-21; Maliko 6:30-44; Yohane 6:1-14)

10Avigendo vavelige vipiluka uluhuma mulugendo vamulonje Yesu mbesili sevapigite. Swe akuvasindika viyena ku boma iya ku Betisaida. 11Avamalugu vavelige vakulukagula swe vakumufwata, nave avanuche akuvalongela isa uwutwa wa Nguluvi, na ukuvaponia vala vevasakige ukupona.

12Na ilisuva lyavelige livanga ukusota, vala vanyichumi na vavili vahegelye kulumwene nu kutigila, “Vatawule avanu vabite, mumigunda na mufijiji fyefilimwipi visakile ichakulya na pawuvaso pakuva ipa pebalali hela.” 13Neke avatigile, “Muvapelage nyenye ichakulya.” Swe vakumupitula, “Hwehwe twivagaya kinu chekilutye imikate igihanu na isomba sivili. Apangi tubitage yihwehwe tukavagulile hela ichakulya avanu iva mbevali!” 14(Pakuva vevipwali pala avanyidama avakwilaniche mbilima sihanu.) Neke avalongele avanyigendo vakwe, “Vavalongele avanu vateng'emale fiwungu fya avanu machumi gahanu gahanu.” 15Nawo avanyigendo vapigite ndahihyo, vakuvatigila avanu vateng'emale mbevali. 16Neke ategulage imikate igihanu ni somba isivili alavage kwilanga kuchanya, ifunyilila swe imegulasa imikate akuvapela avanyigendo vakwe vavapele avanu. 17Swe vilya vakwile mbevali na ifyefisige vakong'ise neke fimeme ifitangula finyichumi na fivili.

Petulo akumwidikila Yesu

(Matayo 16:13-19; Maliko 8:27-29)

18Ikimunyi ikimwi, Yesu peifunyige pakilega, avanyigendo vakwe vepipi nave. Neke peavawuse, “Ulwa avanu vakunigila nene ndinani?” 19Neke vamupitulage vatigilage, “Yohane umubatisi, neke avangi vakukutigila wi Eliya, kono avangi awolofu vakukutigila wimuyawo va avavisi vapidaha yasilibwike.” 20Neke avatigile, “Nyenye mukunigila nene ndinani?” Neke Petulo amutigile, “Veve ye veve Kilisito va Nguluvi.”

Yesu ilonga ulwa uluteseko na ifwa yakwe

(Matayo 16:20-28; Maliko 8:30—9:1)

21Swe akuvapavila nu kuvakanila valalongela munu ulukani ulo. 22Neke pe avalongele ukutigila, “Lumuvaje Umwana va Umunu ateseke mwa nzolofu, nu kubihilwa na avavaha, na avavina va avatambisi na avigisi va indagilo nave awulagwa na ikimunyi icha wudatu asilibuka.” 23Neke peavalongele mbevali, “Umunu yeyeavesaga isaka ukufwata nene, uyo ikanage uwunu wakwe yumwene, neke peategule umusalaba gwakwe afwate. 24Pakuva umunu yeisaka ukunania uwumi wakwe uyo awuyasa, neke wone awuyase uwumi wakwe ivalwa nene awupoka kangi. 25Pakuva lumunogela kiki umunu nave ina wunono mbewuli wa Mung'i kono we iyasa na ukwambusa uwumi wakwe? 26Pakuva yeyeambonelaga inyoni nene na ing'ani sangu, uyo navee Umwana va Umunu saamuwonela inyoni umunu uyo peakusa mundolo sakwe na sa udade na sa avanyivaha avelu. 27Neke nachene nene nguvalongela, ipa povali avangi vimite baha vesivatala ukufwa mbaka pevawuwene uwutwa wa Nguluvi.”

Yesu ipituka ulwihwano

(Matayo 17:1-8; Maliko 9:2-8)

28Fyavelige filutila filo fimunana uluhuma pa kulonga ing'ani iso swe akuvategula pamwi nave Petulo, Yohane na Yakobo, vibita ku kidunda kukwifunya. 29Na peali mukwifunya Yesu uluhwano lwakwe lwapitwike, na imyenda jakwe jave myelu gimalavadika. 30Wonage avanu vavili vawonike vilongana nave, iwo ve Musa na Eliya. 31Iwo vaasile mundolo, valongine nave ulwa ifwa yakwe ye ayikwilanikisa ku Yelusalemu. 32Ino Petulo na avayagwe yevevibatike vafuluge ni tulo vasinzilige, nambi ndahihyo valamwike, vakuyiwona indolo yakwe, na vala avanu avavili avevimite pamwi nave. 33Na avanu vala vave pevilekana nave, Petulo amulonje Yesu, “Mutwa, lwinoga ulwa tuliipa ino lekage sweno tusenge ifitinga fidatu, ikimwi cha veve na ikimwi cha Musa na ikingi cha Eliya.” Ulwene nachene sialukaguligi lwealongige.

34Na pealongige ulo, lyasile ilifufu neke livagubike, na pelyusile ilifufu ilyo, vala vanyigendo vave na muhwehwe mukomi. 35Na iliswi lyapulise uluhuma mwifufu ilyo ukutigila, “Uyu ye Mwanangu, umuhagule vangu mumupulikage yuyu!” 36Na iliswi lyavelige likatuka, Yesu awonike iva iyena. Nawo vanyigendo vakatwike sili na sivamulonji nambi munu iso sevevasiwene.

Yesu akumuponia umunyakilambo umunyalisoka

(Matayo 17:14-18; Maliko 9:4-27)

37Neke ikimunyi icha kavili, Yesu na vanyigendo vakwe peyevasulunwike uluhuma ku kidunda, ililugu ilikomi lya avanu lyatang'ine na Yesu. 38Swe umunu uyumwi, mula mwilugu neke ayovage atigilage, “Mwigisi! Ngukusuka umulave umwanangu, pakuva ye mwanangu yeiyena hela! 39Wonage, ilisoka pe likumutova aikoola kangi lyakumuletela ililibisi kono ilifulo we lihuma mumulomo. Lyakumufwahisa nu kumutesa musika silyakwangufya ukumuleka. 40Ngavasukite avanyigendo vako, valihese ilisoka, neke vakalemilwe.” 41Neke Yesu apitule atigile, “Nyela nye mbegalo ingaya ulufuuwo na inyawuyasi! Ndikala na nyenye na ukuvakangalila mbaka panili?” “Mulete umwanako ipa.” 42Na umwana peabitige kwa Yesu ilisoka lila lyamugwisise pasi na ukumuletela ililibisi. Neke Yesu alikenyele ilisoka lila, na ukumuponia umwana swe akumutawula kulu dade. 43Na mbevali vahahite pevawene uludali ulukomi lwa Nguluvi.

Yesu ipilukila kangi ukulonga ulwa ifwa yakwe

(Matayo 17:22-23; Maliko 9:30-32)

44Vala avanu vepevahaha ifipigo mbefili fyeeapigite, Yesu avalonje vanyigendo vakwe, “Mupulikise hilo nu kwinatila ing'ani isi pakuva Umwana va Umunu ibita kukutawulwa mumawoko ga avanu.” 45Neke avene sivalukagwi ululongwa ulo, lwafihitwe kuvene valalukagula, neke nawo wogopage ukumuwusa ulwa ululongwa ulo.

Yenani Umuvina yealutye?

(Matayo 18:1-5; Maliko 9:33-37)

46Swe vivanga ukwibesa yenani yeava muvina ukulutila avangi mwaavene. 47Nave Yesu peagakagwe amahosa ga inumbula sawo inwe umwana umudodo neke vimase, 48neke avalongele, “Yeyeavesaga akumwanukila umwana uyu mwitawa lyangu nene, akunzanukila nene: na kangi yeyeavesaga akunzanukila nene ava akumwanukila yula yeanumite nene. Pakuva umudodo kwa mbemuli uyo ye muvina yealutye kwa mbemuli.”

Yesiakuvabesa nyenye alilubali lwa nyenye

(Maliko 9:38-40)

49Yohane ipingilike akumutigila, “Mulugu, twamuwene umunu yeihesa amasoka mwitawa lyako, swe tukumutanila, pakuva sitwatwigendanila.” 50Neke Yesu amutigile, “Ulamukanila, pakuva yula umunu yesiakuvabesa nyenye uyo aliulubali ulwenyu.”

Avasamaliya vibihila ukumwanukila Yesu

51Ifilo fyavelige yefihegelye fya Yesu ukubita kuchanya, alamwe ukubita ku Yelusalemu. 52Atumite avanu valongole kuwutalo, nawo swe vibita mbaka kijiji icha Avasamaliya, sambi vamugelanikise apono. 53Neke avanyang'i sivamwanuchi Yesu, pakuva ealamwe ukubita ku Yelusalemu. 54Na avanyigendo vakwe Yakobo na Yohane vavelige vakuluwona ulo, swe vitigila, “Mutwa wisaka hwehwe tulagise umoto uluhuma kuchanya sambi guvanyanye tipu?” 55Neke umwene avapitukile avakenyele. 56Swe Yesu na avanyigendo vakwe vahesile, vibitaga ku kijiji ikingi.

Avahwanite ukuva vanyigendo va Yesu

(Matayo 8:19-22)

57Nawo pevabitige mung'asi, umunu uyumwi amutige Yesu, “Nene ngufwata mbekuli kukwe ubita.” 58Neke Yesu atigile, “Ing'eve sina mafinga, na ifidege fina uwusulya, neke Umwana va Umunu mugaya nambi pakulambalika umutwe gwakwe asuupe.”

59Swe akumulongela uyungi, “Ninile.” Neke amutigile, “Mutwa, ndeke tasi mbite ngamutage dada vangu.” 60Neke Yesu amutigile, “Valekage avafwe vavatage avafwe vawo, neke veve bitage ukadalike uwutwa wa Nguluvi.”

61Neke uyungi atigile, “Mutwa nene nguninila; ino ndeke tandi ngavilage avali mukaye yangu.” 62Swe Yesu akumutigila, “Umunu yeyeavanzile ukulima neke alave kumbele uyo siavaji kuwutwa wa Nguluvi.”

Currently Selected:

Luka 9: HeNT2004

Highlight

Copy