Luka 3

Uwudalisi wa Yohane umubatisi

(Matayo 3:1-12; Maliko 1:1-8; Yohane 1:19-28)

1Umwaka gwa ichumi na gihanu gwa uwutema wa Kaisali Tibeliyo. Pontio Pilato pee Mutema mung'i ya mu Yudaya, Helodi nave pee mutema ulubali lwa ku Galilaya, na umame Filipo imbali isa ku Ituleya na ku Tulakoniti; nayu Lusania ku Abilene, 2na Anasi na Kayafa peve vatambisi vavina; umusika ugo ulukani lwa Nguluvi lwamusye Yohane umwana va Sakaliya kubalali. 3Neke Yohane peagende mumbali mbesili isa mung'i isilimwipi na umukoga gwa Yolodani idalika, “Avanu vapele nu kubatisiwa sambi vadegepelwe inzanangifu.” 4Ndawe sandikwe mu kitabu cha Yesaya umuvisi:

“Iliswi lya umunu ye iyova mubalali

‘Muwuyapisage ing'asi iya Umutwa.

Mukonzage nu kugolola ing'asi sakwe, 5Amakombo mbegali gasilwage,

na ifidunda ni ifigang'amukila mbefili,

fiyawage fitendemale,

apabibindafu pagololwagwe,

apanyamalundo pateleswagwe.

6Na avanu mbevali savawuwona

uwupoki wa Nguluvi.’”

7Ndawe Yohane avalongelige avanu awolofu ve vamusilige sambi vabatisiwe: “Nye nye mbegalo ya inzoka! Ye nani ye avapavye sambi mukuluke ililakali lya Nguluvi ilikusa? 8Apo muvelekage amaveleko agilagila ukutigila mupitwike. Kangi muvanga ukulonga ukuta, ‘Hwehwe twivana va Abulahamu’ Nene nguvalongela Nguluvi ina ludali lwa kupitula amaganga iga gave vana va Abulahamu. 9Lino de ivega mbike pa masina ga imibiki, na umubiki gula gwesigwiveleka amaveleko amanofu gudumulwa na ukutagwa mumoto.”

10Neke ililugu ilya avanu limuwuse, “Lino tugitage ndawuli?” 11Swe akuvapitula itigila, “Yula ye ina imyenda givili, amupelage ugumwi umuyagwe ye ihela, na yula yeina ifilyo nave agitage ndahihyo.” 12Nawo avakong'asa imbemenenge, vaasile sambi vabatisiwe neke vamuwuse, “Mwigisi, hwehwe tugitage ndawuli?” 13Neke avapitule, “Mulahofya ukulutisa ifikele.” 14Avanyigalu nawo neke vamuwuse vitigila, “Nayi hwehwe nahwe tugitage ndawuli?” Neke avalongele, “Mulamupoka kwa ludali munu nambi ukumutosa ahigwe we mukumufila, kangi mutunalage na ga mahombo genyu.”

15Avanu mbevali vihuvilige na ukuvaganisa mu numbula sawo, ukutigila apamwi Yohane ava ye Kilisito. 16Neke Yohane avapitule mbevali, “Nene nguvabatisa nu lulenga, neke yakusa munyaludali ukundutila nene, kwa uyo nene sinywaniti nambi ukuhogosa inzisi sa indatu sakwe. Uyo avabatisa nyenye kwa Umuhe Umwelu na umoto. 17Uyo ye akolye uluhelo mwiwoko lyakwe, apete ingano sambi akong'ase ingano asope mukisande, umwelelo anyanye mumoto gwe sigwisimagi.”

18Neke peavapavile nu kuvadalikila avanu Ulukani Ulunofu. 19Neke Yohane amukenyele umutwa yula Helode yee mutema pakuva alamutegwe Helodiya yali mukina umame ave vakwe na uwimila mbesili imbi sealapigite. 20Kangi Helode awilye mwasiso mbesili ndawe amusopige Yohane mundinde.

Uwubatiso wa Yesu

(Matayo 3:13-17; Maliko 1:9-11)

21Avanu mbevali vavelige vibatisiwa Yesu nave swe ibatisiwa. Na peali mukwifunya kuchanya kwadindwike, 22na Umuhe Umwelu iikite kulumwene nda nziva, neke iliswi lihume kuchanya, “Veve ye veve ve mwanangu, ve mwende vangu yendinogelwa na veve.”

Ulukolo lwa Yesu

(Matayo 1:1-17)

23Yesu peivanga ifipigo fyakwe, yealafikite wita myaka machumi gadatu de, avanu vamuvaganisige ukutigila mwana va Yosefu, yeali mwana va Heli, 24Heli e va Matati, yeali umwana va Levi, umwana va Meliki, umwana va Yanayi, umwana va Yosefu, 25yeali mwana va Matatiya, umwana va Amosi, umwana va Nahumu, umwana va Hesili, mwana va Nagayi, 26yeali mwana va Maati, umwana va Matatiya, umwana va Semeni, mwana va Yoheli, umwana va Yuda, 27yeali mwana va Yohanani, umwana va Lesa, umwana va Selubabeli, umwana va Salatieli, umwana va Neli, 28umwana va Meliki, umwana va Adi, umwana va Kosamu, yeali mwana va Elimadamu, umwana va Eli, 29yeali mwana va Yosuwa, umwana va Elieseli, umwana va Yolimu, umwana va Matati, umwana va Levi, 30yeali mwana va Simioni, umwana va Yuda umwana va Yosefu, umwana va Yonamu, umwana va Eliakimu, 31yeali mwana va Maleya, umwana va Mena, umwana va Matata, umwana va Natani, umwana va Daudi, 32yeali mwana va Yese, umwana va Obedi, umwana va Boasi, umwana va Salimone, umwana va Nasoni, 33yeali mwana va Aminadabu, umwana va Adimini, umwana va Alini, umwana va Hesiloni, umwana va Felesi, umwana va Yuda, 34yeali mwana va Yakobo, umwana va Isaki, umwana va Abulahamu, va Tela, umwana va Naholi, 35yeali mwana va Selugi, umwana va Leu, umwana va Pelegi, umwana va Ebeli, umwana va Sala, 36yeali mwana va Kainani, umwana va Alufakisadi, umwana va Semu, umwana va Noha, umwana va Lameki, 37yeali mwana va Metusela, umwana va Henoki, umwana va Yaledi, umwana va Mahalaleli, umwana va Kenani, 38yeali mwana va Enosi, umwana va Seti, umwana va Adamu yeali mwana va Nguluvi.

Currently Selected:

Luka 3: HeNT2004

Highlight

Copy