Luka 19

Yesu na Sakayo

1Nave Yesu inje mu Yeliko, na pealutilige, 2umo e mwali umunu, ilitawa lyakwe Sakayo. Yee yumwi va avavina va avakong'asa imbemenenge nave e munono. 3Uyu asakige ukumuwona Yesu ulwa munu va kinyandawuli, neke alemwage pakuva avanu ve wolofu nave e mufupi. 4Swe akwangufya ilongola asakwilila mu musombe sambi amuwone, pakuva alukagulige ulwa agendela ing'asi yiyila. 5Nave Yesu ave ifika apono pala, alafile kuchanya nu kumulongela, “Sakayo wangufye wike, pakuva namunyi de lumbaje ukuhwa mukaye yako.” 6Swe akwangufya akwika, akumwanukila mu luhekelelo. 7Na avanu vavelige vakuluwona ulo, vahung'wine mbevali vitigila, “Inje na ukwikala kulu munu umunya nzanangifu.” 8Sakayo ndawe imige na ukumulongela Umutwa! “Ve Mutwa, Lavage! Ndigavasa uwunono wendinawo pagati nagati na ukuvapela Avamikaa na wone ndamupokite munu kinu ngumupilulila katayi.” 9Yesu amulongelage, “Neng'ino uwupoki wufikite mukaye iyi, pakuva uyu nave va mumbegalo ya Abulahamu. 10Pakuva Umwana va Umunu aasile kukusaka nu kuvapoka avanu avayasile.”

Ikiganiso icha amagobole

(Matayo 25:14-30)

11Ulusika lwe avanu pevapulikisa ing'ani isi, Yesu awilye ukulonga ikiganiso. (Pakuva yee pipi ukufika ku Yelusalemu, na avene vatigilige wanda uwutwa wa Nguluvi wuwoneka yilino.) 12Swe itigila, “Umunu uyumwi yee mutambule awukite lugendo lwa kutaali sambi akakwave uwutwa nu kupiluka. 13Sweno, wesialawuka, avakemelye avakami vakwe vanyichumi, avapelye amagobole dinali kwa yeyeavesaga nu kuvatigila, ‘Mupigilage amagobole iga uwusulusi mbaka pe mbamilwike.’ 14Neke avanyang'i vayagwe vevamuvipye; nambi vatumite avanu vabite vakatigile, ‘Sitwiwenda uyu atuteme.’

15“Umunu uyo umutambule apilwike kukaye peyeakwavite uwutwa. Baho peatumite vakemelwe avakami vase vala vealavapelye amagoboledinali, vamulongele chevakambwe mu wusulusi yumwi yumwi. 16Umukami uva kutala aasile, itigila, ‘Mulugu, ngakwavite amagobole dinali nyichumi isingi ukulutila sila sewapelye.’ 17Nave amutige: ‘Lunofu, veve mukami ve munofu pakuva ukave muhuvilwa mufinu ifidodo, lino usagila muboma sinyichumi!’ 18Umukami uva kavili aasile, itigila, ‘Mulugu, ngakwavite amagobole dinali sihanu isingi ukulutila sila sewapelye.’ 19Nave amutige, ‘Lino usagila muboma sihanu.’

20“Umukami uyungi aasile itigila, ‘Tegule iligobole dinali yako, ndafihite mulipembo, 21pakuva ndakogwipe, veve wi munu mukali. Veve wi munu yewawitegula ifinu fyesifyako, nu kubeta chesiwavyaliti.’ 22Nave amutige, ‘Ngukuhiga uwimila imilongele jako, veve ve mukami yesiwimuhuvilwa! Valukagwe ulwa nene ndi munu mukali, yendanditegula fyesifyangu nu kubeta chesindavyaliti. 23Mbi ndawuli sukavikiti amagobole dinali sangu ku vasulusi sambi penzusile negulise na agongeleche?’ 24Neke pavalongele avebaho, ‘Mumupoke iligobole dinali iyo mukamupele yula umunya magobole dinali sinyichumi.’ 25Ndawe vamulongelige: ‘Mulugu, ina magobole dinali nyichumi!’ 26Nguvalongela: ‘Yeyevesaga ina kinu saapelwa. Neke yula yeihela kinu apokwa na kila che inacho. 27Kangi vala, avatavangu vangu vesiviwenda nene ndivateme muvalete ipa muvadumule wendilava.’”

Yesu akwingila ku Yelusalemu kwa luheyo

(Matayo 21:1-11; Maliko 11:1-11; Yohane 12:12-19)

28Na Yesu pealonzile iso, avalongolye ukubita ku Yelusalemu. 29Nape yeahegelye pipi na ku Betifage na ku Betaniya, mukidunda chekitambulwa Miseituni, ndawe atumige avavili va avanyigendo vakwe 30itigila, “Mubite mbaka kukijiji che mwilaving'ana na pemufikite muyiwona idogovi indodo minge yesiyilahowa na munu yeyeavesaga, mwawule muyilete ipa. 31Na wone munu avawuse mbi ndawuli mukuyawulila, mumutigilage de Umutwa ayigulwime.”

32Na vala avevatumitwe vahele neke vasiwone ndahihila ndawe lwe vevalongele. 33Na pevayawulilige idogovi indodo, avenayo vavatige, “Mbi ndawuli mukuyawulila idogovi indodo?” 34Swe vitigila, “Umutwa ayigulwime” 35Swe vakuyisindika kwa Yesu. kono we vatandike imyenda jawo muchanya mudogovi swe vakumuhofya Yesu. 36Na pevabitige vatandalike imyenda jawo mung'asi.

37Ave peahegelye mukisulunukila cha ikidunda cha Imiseituni, ililugu mbelili lya avanyigendo vakwe, vavanzile ukuhekelela na ukumulumba Nguluvi vayofile, uwimila ifipigo mbefili ifya uludali fye vafiwene; 38vitigila, “Ye mufunyilile Umutema yeakusila mwitawa lya Umutwa. Uwikalakunoga kuchanya na indolo kuko kuchanya!”

39Avamwi va Avafalisayo veve mu mukong'ano vamulonje, “Mwigisi vakenyele avanyigendo vako!” 40Neke avapitule atigilage, “Nguvalongela nyenye, pevakatwike iva amaganga gayoya.”

Yesu Akuyivembela i Yelusalemu

41Yesu aveihegelela na ukuyiwona i muboma, ayivembye 42weitigila, “Kiba neng'ino uke uselage ing'ani isa uwikalakunoga! Neke lino sifihitwe pamiho gako. 43Pakuva ifilo fikusila pe avatavangu vako savakupilima na ukukusigamila imbali mbesili. 44Savakusindila ng'ani veve, pamwinga na avanako avali mumo. Nawo sisavakusigasisa nambi liganga limwi muchanya mwiganga liyagwe, pakuva siwalukagwi ulusika lwe Nguluvi asye ukukupoka.”

Yesu akuvahaka avasulusi mu tembeli

(Matayo 21:12-17; Maliko 11:15-19; Yohane 2:13-22)

45Ndawe Yesu ingilige mu tembeli, nu kuvahaka avasulusi 46we akuvalongela, “Pakuva nzandike, ‘Ikaye yangu sayiva kaye ya nzifunyo.’ Lino nyenye muyipitwe yive lifinga lya avahiisi.”

47Nave igisige mbepali mu tembeli. Neke avavina va avatambisi, na avigisi va indagilo, na avavina va vanu vasakige ing'asi yu kumuwulaga, 48Neke sivibeti nambi lukani ulwe vevahwana vapige, pakuva avanu mbevali vevamumemeleche vakumupulikisa.

Currently Selected:

Luka 19: HeNT2004

Highlight

Copy